დღეს, პოლონეთის ქალაქ ვარშავაში, საგანგებო ნომრის ასოციაციის (EENA) ყოველწლიური კონფერენცია ოფიციალურად გაიხსნა, რომელსაც შინაგან საქმეთა სამინისტროს „112“-ის დეპარტამენტის წარმომადგენლები ესწრებიან. ყოველწლიური კონფერენცია ევროპის საგანგებო ნომრის ასოციაციის (EENA) მრჩეველთა საბჭოს თავმჯდომარემ, დემეტრიოს პიროსმა, გახსნა.

„მნიშვნელოვანია, საქართველოს „112“-ის მონაწილეობა საგანგებო ნომრის ასოციაციის (EENA) ყოველწლიურ კონფერენციაში. წელს საქართველოს დელეგაციას წილად ხვდა უპირატესობა, წარდგეს კონფერენციის მონაწილე 44 ქვეყნის წინაშე, როგორც ერთ-ერთი სპიკერი ქვეყანა. ასევე, აღსანიშნავია, რომ სხვადასხვა ქვეყნის სტენდის გვერდით განთავსებულია საქართველოს „112“-ის წარმომადგენლობითი სტენდი. სტენდი საშუალებას აძლევს კონფერენციაზე დამსწრე საზოგადოებას, გაეცნოს ქართული მხარის მიერ წარმოდგენილ პრომო მასალასა და სამუშაო პროგრამას (ERC), რომელშიც მუშაობენ „112“-ის ოპერატორები.“ - განაცხადა გახსნითი სიტყვით გამოსვლისას დემეტრიოს პიროსმა.

ევროპის საგანგებო ნომრის ასოციაცია (EENA) საერთაშორისო არასამთავრობო ორგანიზაციაა, რომელიც 1999 წელს შეიქმნა ბრიუსელში. ასოციაციის მიზანია, ევროპის მასშტაბით გადაუდებელი დახმარების  ერთიანი  ნომრის - 112-ის დანერგვა და საგანგებო სიტუაციების მართვის სამსახურების ეფექტური მუშაობისთვის ხელის შეწყობა. 2013 წლის 3 სექტემბრიდან საქართველოს „112“ ამ ორგანიზაციის წევრია.