„არეულობა და დესტაბილიზაცია ამ ქვეყანაში, პირველ რიგში, „ნაციონალურ მოძრაობას“ აწყობს“, - აცხადებს ვიცე-სპიკერი მანანა კობახიძე, რომლის განცხადებით, შესაბამისმა ორგანოებმა უნდა გამოიკვლიონ ვის რა ამოძრავებს და ვინ მოქმედებს ქვეყნის ინტერესების საწინააღმდეგოდ.

ვინ არის პრორუსული აქციის ორგანიზატორი და რატომ უფრთხის ყოფილი მმართველი ძალა, ზურაბ ჟვანიას საქმის გამოძიებას? ამ საკითხებზე for.ge. მანანა კობახიძეს ესაუბრა.

ბოლო დღეებში თბილისში „ევრაზიული კავშირის“ მიერ ორგანიზებული აქციები გაიმართა, რომელსაც დაპირისპირება მოჰყვა. თქვენი ოპონენტები თვლიან, რომ ამ აქციის გამართვით ხელისუფლება ცდილობს გაიგოს მოსახლეობის დამოკიდებულება „ევრაზიული კავშირის“ მიმართ. რა კავშირი აქვს ამ აქციებთან ხელისფლებას?

მანანა კობახიძე: როგორ შეიძლება ჩვენ ვუწყობდეთ ხელს პრორუსული ღონისძიების ორგანიზებას. არეულობა და დესტაბილიზაცია ამ ქვეყანაში, პირველ რიგში, „ნაციონალურ მოძრაობას“ აწყობს - იქნებ, „ნაციონალური მოძრაობაა“ დაინტერესებული, რომ ასეთი ჯგუფები გააქტიუროს, რაღაცა დესტრუქციის ფონი შექმნან...

ფიქრობთ, რომ „ნაციონალური მოძრაობა“ არის ამ აქციების ორგანიზატორი?

- არ ვიცი, ამას გამოკვლევა სჭირდება. შესაბამისმა ორგანოებმა უნდა გამოიკვლიონ ვის რა ამოძრავებს, ვინ მოქმედებს ქვეყნის ინტერესების საწინააღმდეგოდ. ჩვენ სტაბილურობა და წესრიგი გვინდა. ძალიან მნიშვნელოვანი ამოცანის წინაშე ვდგავართ, რასაც ევროპაში ინტეგრაცია ჰქვია. თუ ვინმეს ეს არ აწყობს, ცხადია, კანონის წინაშე პასუხი ყველამ უნდა აგოს, ვინც კანონის ზღვარს გადავა.

ძალიან საინტერესოა საერთოდ რა ამოძრავებს ამ ხალხს, რა ინტერესები აქვთ. ვიღაცას შეიძლება არ აწყობს ქვეყნის საგარეო კურსი, არ მოსწონს ქვეყნის ევროპაში ინტეგრაციის რეალური პრესპექტივა და თავისი განსხვავებული ხედვები აქვს. გამოხატვის თავისუფლება უნდა იყოს დაცული და ეს სახელმწიფომ უნდა უზრუნველყოს. მაგრამ, მეორე მხრივ კანონი უნდა დაიცვას იმ ადამიანებმა, ვისაც განსხვავებული ხედვა აქვთ.

რაც შეეხება ყოფილ პრეზიდენტს, მიუხედავად იმისა, რომ დისტანციურ დაკითხვაზეც უარს ამბობს, სააკაშვილს პროკურატურამ ერთკვირიანი ვადა მაინც მისცა. რა გზა რჩება პროკურატურას იმისათვის, რომ ყოფილი პრეზიდენტისგან ჩვენება მიიღოს?

- არსებობს სისხლის სამართლის საპროცესო კოდექსი, სადაც ცალსახად არის გაწერილი, რა ზომას უნდა მიმართოს პროკურატურამ, თუკი მოწმე თავს არიდებს საგამოძიებო უწყებაში გამოცხადებას. სააკაშვილი არანაირად არ დგას კანონზე მაღლა. ის არის ყოფილი პრეზიდენტი, მაგრამ ჩვეულებრივი მოქალაქეა. არაერთი შემთხვევა არსებობს, როდესაც მოქმედი პრეზიდენტი დაუკითხავთ მოწმის სახით. ეს როგორც აშშ-ში, ისე ევროკავშირის ქვეყნებში არანაირად არ უკვირთ. მითუმეტეს, თუ საუბარია ადამიანზე, რომელიც დღეს არანაირი იმუნიტეტით არ სარგებლობს და არის ჩვეულებრივი მოქალაქე.

სააკაშვილი ვალდებულია კანონს დაემორჩილოს და მისცეს ჩვენება. თუ ამას არ გააკეთებს, ცხადია პროკურატურამ კანონის შესაბამისად უნდა იმოქმედოს. „ნაციონალური მოძრაობა“ აცხადებს, რომ ეს არის პოლიტიკური დევნა და რა თქმა უნდა, ეს ასე არაა. სააკაშვილისგან კონკრეტულ სისხლის სამართლის საქმეებზე სურთ ჩვენების მიღება. თუ საქართველოში ჩამოსვლის ეშინია, შეთავაზებულია „სკაიპით“ დაკითხვა. მაგრამ სათანადო პასუხისმგებლობა არ ყოფნის, რომ პასუხი გასცეს იმ კითხვებს, რომელიც მის მიმართ არსებობს.

skype-თი დაკითხვა შესთვაზეს მხოლოდ გირგვლიანის საქმეზე, კუდ-ის მაღალჩინოსნების შეწყალების კანონიერებასთან დაკავშირებით. საააკშვილი ამბობს, რომ ადამიანები, რომლებმაც გირგვლიანი მოკლეს ,მხეცები არიანო, თუმცა სწორედ ეს მხეცები შეიწყალა. ამ შეწყალებას კი საქმის პოლიტიზირებით ხსნის...

- საკუთარ თავთან მოდის წინააღმდეგობაში. ჯერ აღიარა, რომ გირგვლიანის საქმე წინა ხელისუფლების შეცდომაა. თან აღნიშნა, რომ ვინც ის მოკლა, მხეცები არიანო და იქვე გაჩერდა. ალბათ, ჟურნალისტს უნდა ეკითხა, თუ ასე იყო, მაშინ რატომ შეიწყალეთო. ის, რომ საქმე პოლიტიზირებული იყო და ამიტომ შეიწყალა, ეს არაა ლოგიკა. დღეს ძალიან ბევრს საუბრობენ, რომ პრეზიდენტს უფლება აქვს პირი შეიწყალოსო, დიახ, ასეა და ეს მისი უფლებაა, მაგრამ პრეზიდენტს არ აქვს უფლება, ბოროტად გამოიყენოს ეს უფლება. ნებისმიერ შეწყალებას საფუძველი უნდა ჰქოდეს. საინტერესოა, რითი იხელმძღვანელა მან, როცა ამბობს, რომ ისინი მკვლელები არიან და წელიწადნახევრის შემდეგ ეს მკვლელები შეიწყალა.

ძალიან საინტერესოა, რატომ გაურბის ამ კითხვებზე პასუხს? „ნაციონალები“ ამბობენ ყველა საქმეზე ერთად რატომ დაიბარეთო, მაგრამ ცალ-ცალკე რომ დაებარებინათ, დარწმუნებული ვარ ამაზეც იყვირებნდენ. როცა უნდა დაებარებინათ და რომელ საქმეზე, ნებისმიერ შემთხვევაში, „ნაციონალური მოძრაოაბა“ იყვირებდა, რომ ეს არის პოლიტიკური დევნა.

მეგის ქარდავას, კოხტა კოდუას და მწამებლებს რომ იბარებენ, ამაზეც პოლიტიკურ დევნაზეა საუბარი. მათი ლექსიკონი გახდა სიტყვა „პოლიტიკური დევნა“. ეს შიდა მოხმარებისთვის არაა, უფრო გარე მოხმარებისთვის არის გათვლილი, რათა დასავლეთს შეუქმნან წარმოდგენა, რომ აქ ვიღაცას დევნიან. მე დარწმუნებული ვარ, რომ ძალიან კარგად შეისწავლეს დასავლეთში მათი ეს ტაქტიკა.

პროკურატურა ამბობს, რომ დაკითხულია მოწმეები, მიმდინარეობს ექსპერტიზა, ამოღებულია ნივთმტკიცებაც. როდესაც მოწმე უარს ამბობს ჩვენებაზე, ამ შემთხვევაში როგორ უნდა ამტკიცოს პროკურატურამ, რომ სააკაშვილი არის ამ საქმეებში დამნაშავე?

- საუბარია მხოლოდ მოწმის სახით დაკითხვაზე. პროკურატურას არ უთქვამს, რომ ისინი აპირებენ ბრალი წაუყენონ სააკაშვილს და ვერც იტყოდა. ჯერ ადამიანს უნდა ჰკითხო რა ინფორმაცია აქვს ამა თუ იმ დანაშაულზე. ამის მერე თუ გექნება მტკიცებულებათა ერთობლიობა და ბრალის წაყენების საფუძველი, ეს უკვე სხვა საკითხია.

მე არანაირად არ გავუსწრებ მოვლენებს და არ ვიტყვი, რა უნდა გააკეთოს პროკურატურამ, ეს მათი გასაკეთებელია. სწორედ ეს უნდათ, გამოვიდეთ და ვიყვიროთ, რომ დაიჭირეთ სააკაშვილი, მაგრამ ამას არ ვიტყვით, ეს არაა ჩვენი სათქმელი. პროკურატურამ უნდა გადაწყვიტოს, თუ სააკაშვილის ქმედებაში არის დანაშაულის ნიშნები და საფუძველი, რომ ბრალი წაუყენონ, ეს მათი გადასაწყვეტია.

ის გამოანათქვამები, როგორც იქცევა ახლა სააკაშვილი, პირველ რიგში არ შეეფერება იმ რანგის ადამაინს, რომელიც იყო ქვეყნის პრეზიდენტი. ეს მას ამდაბლებს და მის უპასუხისმგებლობაზე მეტყველებს. არ შეიძლება ასე იქცეოდეს ადამაინი, რომელიც იყო ქვეყნის პრეზიდენტი. სამწუხაროა, რომ ასეთი პრეზიდენტი ჰყავდა ქვეყანას. მას არ ყოფნის პასუხისმგებლობა, რომ ითანამშრომლოს გამოძიებასთან.

არ მინდა დაკითხვა, ეს გავს იმას, რომ არ მინდა ბაღში წასვლა. რას ჰქვია არ მინდა დაკითხვა?! როცა გამოძიებას აქვს კითხვები, ის ვალდებულია მივიდეს და გასცეს პასუხი. რითი არის იმ ადამიანებზე უკეთესი, თუნდაც მის თანაგუნდელებსა და თანამებრძოლებზე, რომლებიც მიდიან და ჩვენებას აძლევენ პროკურატურას?! დაღელაშვილზე უკეთესი რითი არის სააკაშვილი? მივიდა და მისცა ჩვენება გამოძიებას. უნდა შეეგუოს, რომ მობრძანდეს და პასუხი გასცეს პროკურატურის კითხვებს.

თქვენ ამბობთ, რომ პროკურაურას ვერ უკარნახებთ როგორ უნდა იმოქმედოს, მაგრამ პრემიერის განცხადებაზე, რომ მინდა დავამშვიდო შეშინებული პრეზიდენტი და ვუთხრა, რომ მოუწევს კითხვებზე პასუხის გაცემა, ამას მოჰყვა უმცირესობის პასუხი, რომ ღარიბაშვილი პროკურორის ენით ესაუბრება საზოგადოებას. რამდენად სწორად მიგაჩნიათ, როდესაც პრემიერი პროკურორის სათქმელს ახმოვანებს?

- ირაკლი ღარიბაშვილი აღმასრულებელი ხელისუფლების მეთაურია. პროკურატურა შედის აღმასრულებელი ხელისუფლების დაქვემდებარებაში იუსტიციის სამინისტროს სახით. დღეს ისევ და ისევ, იმ ცვლილებებით, რომელიც სააკაშვილის დროს შევიდა კონსტიტუციაში, პროკურატურა სწორედ მთავრობის და პრემიერის დაქვემდებარებაშია, როგორც აღმასრულებელი სტრუქტურის ერთ-ერთი ნაწილი. აქედან გამომდინარე ღარიბაშვილი პროკურორის რანგში კი არ გვევლინება, არამედ გვევლინება როგორც მთავრობის მეთაური, რომელიც ხელმძღვანლობს აღმასრულებელ ხელისუფლებას. როგორც პრემიერს, მას უფლება აქვთ, გამოხატოს თავისი დამოკიდებულება. არანაირად კანონს არ არღვევს.

არა მარტო ყოფილი ხელისუფლება, არამედ ამ კითხვას სვამენ უფლებადამცველები. რატომ იწყებს პროკურატურა საქმეებზე რეაგირებას მხოლოდ მას შემდეგ, რაც ინტერნეტით გავრცელდება კონკრეტული საქმე. ასე იყო მუხროვის საქმის შემთხვევაში, ეს საქმე მანამდეც ჰქონდა პროკურატურას, მაგრამ გამოძიება მხოლოდ ინტერნეტით გავრცელებული კადების შემდეგ დაიწყო. ასევე მოხდა ჟვანიას შემთხვევაშიც. არ გიჩნდებათ კითხვა, რა უშლიდა ხელს გამოძიებას, რომ მანამდე დაეკითხა დაცვის წევრები, სანამ ეს კადრები გამოქვეყნდებოდა?

- ერთია რა აიტვირთა ინტერნეტში და რა გზით... ამაზე ცალკე მიდის გამოძიება და ამას იძიებს შსს. რაც შეეხება საქმის გამოძიებას, მე ზუსტად ვიცი, რომ ჟვანიას საქმეზე ინტენსიურად მომდინარეობს გამოძიება, ამას ადასტურებს გოგლა ჟვანიაც. ეს საქმე თაროზე იყო შემოდებული. იქ როდის რა მოხდა, ეს მე არ ვიცი. ვისი დაკითხვა როდის ჩათვალა პროკურატურამ, ეს მისი გადსაწყვეტია. საქმის მასალები არ მინახია. რაც შეეხება მუხროვანის საქმეს, პროკურატურაში ძალიან ბევრი საჩივარია, საქმეების გადამუშავება მიდიოდა.

გამოძიება რა სტადიაში იყო, ეს მე არ შეიძლება ვიცოდე, მაგრამ რაღაცა კადრების გავრცელების შემდეგ გამოძიების ინტენსიურობა იზრდება, ესეც ლოგიკურია. საზოგადოების ინტერესი კიდევ უფრო ღრმავდება, როდესაც ასეთი სახის ინფორმაცია ვრცელდება საჯარო სივრცეში.

9 წელი თაროზე იყო შემოდებული ჟვანიას საქმე, ყველაფერი თავიდან არის გამოსაძიებელი და რა გასაკვირია თუკი ამას ერთი, ან ორი წელი სჭირდება. ამაში არაფერი გასაკვირი არაა.

„ნაციონალური მოძრაობა“ ძალიან მტკვინეულად აღიქვამს ზურაბ ჟვანიას საქმის ძიებას, რომელიც დასასრულისკენ მიდის...

- ღირსების საკითხია ამ საქმის გამოძიება. გაურკვეველ ვითარებაში გარდაცვლილი იპოვეს ქვეყნის მეორე პირი. ამას დაარქვეს გაზით გაგუდვა, თაროზე შემოდეს საქმე და უამრავი კითხვის ნიშნები დატოვეს. მთელი ეს რეაქციები, რაც მოჰყვა ამ საქმის გამოძიებას, მეტყველებს იმაზე, რომ მათ არ უნდათ ამ საქმის ხსენება, მათ ძალიან აშინებთ საქმის გამოძიება. ისტერიკა ემართებათ, ყვირიან, ამ საქმის პოლიტიზებას ახდენენ და მაშინვე იწყებენ საუბარს, რომ თქვენ გინდათ ჩვენი დევნაო. მათი ამ აჟიოტაჟით მთელი საზოგადოება კიდევ ერთხელ დაარწმუნეს იმაში, რომ მაშინდელ ხელისუფლებას ამ ძალიან მძიმე ფაქტთან რაღაც შემხებლობა უნდა ჰქონოდა. საუბარია არა უბედურ შემთხვევაზე, არამედ მკვლელობაზე. მათივე რეაქციები კიდევ უფრო ამძაფრებს ამ ეჭვებს.

ისინი ამბობენ, რომ პროკურატურას ისევ კრიმინალი ფარცხალაძე მართავს. თქვენი ინფორმაცით, პროკურატურას ისევ ფარცხალაძე აკონტროლებს?

- იცით, დაზეპირებული ფრაზები აქვთ, აიკვიატეს ეს ფარცხალაძე და ამ დროს ძალიან უსუსრია მათი არგუმენტი. დახვეული აქვთ ეს ერთი მესიჯი „ფარცხალაძე კრიმინალი“, რაც სასაცილოა. სამართლებრივად მას არანაირი პრობლემა არ ჰქონდა და შეეძლო მუშაობა, მაგრამ ის, რომ წინა ხელისუფლებისგან განსხვავებით სრულიად განსხვავებული მიდგომა გვაქვს, ეს ფაქტია და ეს მისი გადადგომით დასტურდება. პროკურატურას ჰყავს ახალი ხელმძღვანელი და სწორედ ის ხელმძღვანელობს ამ უწყებას. რა შუაშია აქ ფარცხალაძე?!

რაც შეეხება გენერალ გოგი თათუხაშვილის შვილის საქმეს. ის იყო ახალაიას საქმის მოწმე. გამოძიებით ირკვევა, რომ მან ლევან ქარდავას და დავით ახალაიას წინააღმდეგ მისცა ჩვენება. მისივე თხოვნით მას დაცვა დაუნიშნა პროკურატურამ,თუმცა შემდეგ მოუხსნა. ოჯახი ამტკიცებს, რომ თვითმკვლეობამდე ის გაუჩინარებული იყო. ფაქტია, რომ შალვა თათუხაშვილს აქვს ძალადობის უმძიმესი კვალი. თუ დაინტერესდება უმრავლესობა რა მოხდა თათუხაშვილის შემთხვევაში?

- ნებისმიერი ძალადობის კვალი უნდა იყოს გამოძიებული. ექსპერტიზა თუ ადასტურებს, რომ ამ ადამიანს ჰქონდა ძალადობის კვალი და რა შეიძლება იყოს მიზეზი, ამ ყველაფერს გამოძიება სჭირდება. თუ დგინდება, რომ ეს ძალადობის კვალი არის სიცოცხლის დროინდელი და არის ამის შესახებ ეჭვები, უნდა ჩატარდეს გამოძიება და გაირკვეს რა მოხდა.

საერთოდ, როდესაც საქმეზე მნიშვნელოვანი მოწმე იღუპება, თუნდაც თავს იკლავს, ან რაღაცა ვითარებაში გარდაიცვლება, ეს საქმისთვის არ არის კარგი. როცა მოწმე მნიშვნელოვანია, ასეთი მოწმე, პირიქით, პროკურატურას უნდა სჭირდებოდეს და მისი დაცვა პროკურატურის ინტერესებშია. ძალადობის და წამების გამართლება არ არსებობს ამ ქვეყანაში, ეს დაუშვებელია. ამისთვის ვიბრძოდით ჩვენ, რომ წამება და არადამიანური მოპყრობა არ ყოფილიყო.

პოლიტპატიმრებმა უნდობლობა გამოუცხადეს იუსტიციის მინისტრს. სამართლიანობის აღდგენის მოთხოვნით მათ დაიწყეს აქციები. რას უპასუხებთ ამ ადამიანებს, რომლებიც საკუთარი უფლების აღდგენას ითხოვენ?

- სამართლიანობის დამკვიდრება ჩვენი მთავარი ამოცანაა. საქმეები, რომელიც თაროზე იყო ჩამოდებული და არ იხილებოდა, დაწყებულია გამოძიება. ათი ათასზე მეტი საჩივარია შესული. არ ვიცი თეა წულუკიანთან რა პრეტენზია აქვთ. პროკურატურას აქვს ვალდებულება, რომ რეაგირება მოახდინოს საჩივრებზე, თუნდაც იმ კანონის ფარგლებში, რაც დღეს არსებობს. სამწუხაროდ, სამართლიანობა არასოდეს არ ყოფილა ამ ქვეყანაში და ამიტომ აღდგენაზე კი არა, დამკვიდრებაზე უნდა იყოს საუბარი. იმაზე, რომ კანონი იქნეს დაცული. 200-მდე პოლიტპატიმარი გარეთ რომ გამოვუშვით, ამნისტიით ადამიანების სიცოცხლე რომ ვიხსენით, ეს სამართლიანობის აღდგენა არაა?!