აქციის მონაწილეებმა თავდაცვის მიზნით შექმნეს ე.წ. არაფორმალური ჯგუფი, რომლის მიზანი, მათივე თქმით, არის მომიტინგეების დაცვა ე.წ. „ტიტუშკებისგან“. სოციალურ ქსელში გავრცელდა მათი ვიდეოც, სადაც ისინი აქციის მონაწილეებს დაცვას ჰპირდებიან. ნიღბიანები ამტკიცებენ, რომ არც ერთ პარტიას არ წარმოადგენენ, ივლიან ქუჩა-ქუჩა, დადგებიან რუსთაველზე და დაიცავენ აქციის მონაწილეების უსაფრთხოებაას. „იცოდეთ, რომ თქვენ ხართ დაცულები და ვერანაირი ტიტუშკა ვერაფერს დაგიშავებთ“, - განაცხადა ერთ-ერთმა ნიღბიანმა ახალგაზრდამ.

ვინ დგას ე.წ. არაფორმალური დაჯგუფების უკან და ვინ არიან ის ნიღბიანი ბიჭები, რომლებიც „მშვიდობიანი აქციის“ მონაწილეებს უსაფრთხოებას პირდება? For.ge-ს ინფორმაციით ესენი არიან უკრაინაში მებრძოლი ქართველები, რომელთა არსენალში შედის შეიარაღებაც. ამ ჯგუფში შედიან „კანვასის“ და „ჯიუტის“ წევრები. რადიკალური ოპოზიციის წევრები მათი ხელმძღვანელობით შექმნილ არაფორმალურ შეიარაღებულ დაჯგუფებაზე კომენტარს არ აკეთებენ, მაგრამ განმარტავენ, რომ აქციის მონაწილეების უსაფრთხოებაზე იზრუნებენ.

საპარლამენტო უმრავლესობის წევრის, გიორგი კახიანის განცხადებით, კანონმდებლობის მიხედვით ასეთი დაჯგუფებების შექმნა საკმაოდ მძიმე სისხლის სამართლებრივ სასჯელს ითვალისწინებს და არავის ურჩევს, რომ ასეთი დაჯგუფებების შექმნაზე სერიოზულად იფიქროს, ან რაიმე კანონსაწინააღმდეგო ქმედებები განხორციელდეს მათი მხრიდან.

„შესაბამისი სამართალდამცავი ორგანოები, ბუნებრივია, ამაზე რეაგირებას მოახდენენ. კანონმდებლობის მიხედვით ასეთი დაჯგუფებების შექმნა საკმაოდ მძიმე სისხლის სამართლებრივ სასჯელს ითვალისწინებს“, - აღნიშნა გიორგი კახიანმა.

ხელისუფლება ამბობს, რომ იმოქმედებს კანონის შესაბამისად და არ დაუშვებს ქვეყანაში ნიღბიანი შეიარაღებული ადამიანების თარეშს. ექსპერტი უსაფრთხოების საკითხებში დავით კუხალაშვილი აცხადებს, რომ ნებისმიერი ორგანიზაციის ჩამოყალიბებას უნდა ჰქონდეს ლეგიტიმური საფუძველი და ის აუცილებლად უნდა იყოს სახელწიფოს მიერ აღიარებული. წინააღმდეგ შემთხვევაში, ნებისმიერი გაერთიანება არის უკანონო და ასეთი უკანონო გაერთიანების საქმიანობა უნდა იქნეს აღიარებული იდენტიფიცირებულ საფრთხედ, რომ შესაძლებელია, აღნიშნული ჯგუფები გამოყენებულ იქნას სხვადასხვა დესტრუქციული, მათ შორის კრიმინალური ქმედებისთვის.

„ასეთი ტიპის განცხადებების გაკეთება, შესაბამისი მისალმებები, რომელიც ვრცელდება მასმედიით, ვფიქრობ, რომ სახელმწიფომ უნდა ჩათვალოს იდენტიფიცირებულ საფრთხედ. თუ იმას გავითვალისწინებთ, რომ არსებობს სპეციალური ჯგუფები, რომელიც მომზადებული იქნა როგორც საქართველოში, ისე ქვეყნის გარეთ და რომლებმაც, პრაქტიკულად, განახორციელეს ძალიან აქტიური მონაწილეობა ძალადობრივი ქმედებების ინსპირირებაში რუსთაველის გამზირზე, ვფიქრობ, რომ ამ კუთხით საქართველოს სპეცსამსახურებს და პოლიციურ უწყებებს მართებთ განსაკუთრებული აქტივობები და სასურველია, რომ თუკი უკვე სისხლის სამართლის დანაშაულის ნიშნები გვაქვს სახეზე, მოხდეს დაუყონებლივი რეაგირება“, - აცხადებს for.ge-სთან საუბრისას დავით კუხალაშვილი.

ანალიტიკოსი ედიშერ გვენეტაძე აცხადებს, რომ მიზანმიმართულად დაგეგმილია სცენარი იმ ადამიანების მიერ, რომელთაც ჰქვიათ კოლექტიური დასავლეთის ლიბერასტულ-ფაშისტური ძალები. ანალიტიკოსი იხსენებს, რომ ანალოგიური სიტუაცია იყო 90-იანი წლების დასაწყისში, როდესაც შექმნეს ისეთი ორგანიზაცია, რომელსაც ერქვა „მხედრიონი“.

„გულქართველი ბიჭები იყვნენ გაერთიანებული, თავიდანვე მართლაც სამშობლოს დაცვისაკენ იყვნენ მიმართული, მაგრამ შემდეგ გადააქციეს იმ ორგანიზაციად, რომელმაც ქართველობაში გამოიწვია უამრავი სისხლი. ამის შემდეგ იყო ის, რაც მოხდა ზვიად გამსახურდიას ხელისუფლების დამხობის შემდეგ. მაშინ შეიქმნა ე.წ. კულინარიელები, „ვერის საძმო“ და ვისი საძმო არ იყო მაშინ. რისთვის იყო ეს? - იმისთვის, რომ საქართველოში შექმნილიყო მართვადი ქაოსი. ამ ადამიანებს დაავიწყდათ ერთი რამ - დღეს, საქართველო სახელმწიფოა და ამ ე.წ. საძმოებისთვის, რომელსაც აკოწიწებენ, არსებობს შესაბამისი სასჯელი 6-და 12 წლამდე. ამიტომ, სახელმწიფო აუცილებლად იმოქმედებს“, - აცხადებს for.ge-სთან საუბრისას ედიშერ გვენეტაძე.