თბილ ოფისებში მოკალათებული ოპოზიციის ლიდერები ამოფარებიან კომპიუტერული ბრძოლებით გატაცებულ ახალგაზრდებს და ინტერნეტში ნანახი აგრესიის რუსთაველზე გადატანისკენ უბიძგებენ. 

ექიმმა-ფსიქიატრებმა უკვე დასვეს დიაგნოზი, თუ რა სჭირთ ამ ახალგაზრდებს, რომლებმაც რემბოდ წარმოიდგინეს თავი და დაუნდობლად ანადგურებენ ყველაფერს, რაც რუსთაველზე შეხვდებათ.

„ორი ღამეა, ვაკვირდები ამ ადამიანებს, ვუსმენ მათ და დასკვნამ თავადაც გამაოცა! უმეტეს ნაწილს აქვს განცდა, რომ თამაშობს კომპიუტერულ თამაშს „ქაუნთერ სტრაიკს“, -აცხადებს ვახტანგ ბოჭორიშვილის კლინიკის გენერალური დირექტორი, ექიმი-ფსიქიატრი დავით გადელია.

მისივე შეფასებით, ახალგაზრდების ეს ჯგუფი თავს წარმოიდგენს ამ თამაშში, რეალობა კი დამატებით დრაივს და ადრენალინს აძლევს მათ და, ალბათ, ერთი სული აქვთ, როდის დაღამდება-ადრენალინის ხარჯვა მნიშვნელოვანი მოთხოვნილებაა ორგანიზმისთვის. ის, რომ ამით წესრიგს არღვევენ და შეიძლება დაიჭირონ, კიდევ უფრო აძლიერებს მუღამს.

ექიმი-ფსიქიატრი ამბობს, რომ მიტინგზე არიან გულწრფელი პროტესტანტებიც, მაგრამ აგრესიული ახალგაზრდები ყოველ ღამე, 12 საათისთვის გამოდიან, იკავებენ მშვიდობიანი პროტესტანტების ადგილს და იწყება ძალიან ცუდი ამბები. საკმაოდ ახლოსაა მათთან კამერები და ისმის ამ ახალგაზრდების ლაპარაკი, უმეტეს ნაწილს აქვს განცდა, რომ თამაშობს კომპიუტერულ თამაშს. „იმ თამაშში რომ არის, სწორედ ისე უჭირავს მიტინგზე მოსულ ბიჭს ქვემოდან პეტარდების ყუთი და აფრქვევს ცეცხლს, თავს წარმოიდგენენ იმ თამაშში. კომპიუტერული თამაშების რეალური სუბლიმაცია სულაც არაა უხიფათო. ყველა კამერა აჩვენებს, როგორ ჩაამტვრიეს პარლამენტის ფანჯრის მინები და შეუშვეს ანთებული პიროტექნიკა, ფაქტობრივად, გააჩაღეს ხანძარი, პოლიციელების სახეებისკენაც ისვრიან ამ ყველაფერს“.

დავით გადელიას აზრით, მთელი უბედურება ისაა, რომ ამ ახალგაზრდებს ვიღაცები უქებენ საქციელს, ზოგიერთი პარტია, ალბათ, აფინანსებს და ახალისებს კიდეც. ბევრს ეტყობა ამ მიმართულებით გაწვრთვნაც. ეს ბიჭები ძალიან დიდ შარში არიან და ვიღაცები მათ იყენებენ.

„ჰიტლერი, ლენინი და სააკაშვილი-მეტი გახსენდებათ სადმე ბავშვების პოლიტიკაში გამოყენება?!“ - აცხადებს უმრავლესობის ლიდერი მამუკა მდინარაძე, რომლის თქმითაც, ორჯერ მეტი, ანუ ორი მილიონის მსხვილკალიბრიანი პიროტექნიკაა გაყიდული და ეს „ქაუნთერი“ სულაც არ არის, ეს არის „ლუზერი“ აგენტების მიერ წაქეზებული პროცესი.

პარალელურად, ამ ბავშვების მშობლები ჩივიან, რომ მათ ჰგონიათ შვილები სკოლაში დადიან და ამ დროს ბავშვებს ფეისბუქით ნახულობენ ბანერით ხელში. მათ რომ რამე დაემართოს, ვინაა პასუხისმგებელი, უნებართვოდ რომ გაიყვანეს სკოლის ტერიტორიიდან და მოზარდებით მანიპულირებენ?!

ვრცელდება ინფორმაცია, რომ განსაკუთრებული აგრესიით გამორჩევიან ის ახალგაზრდები, რომელთაც მიტინგზე გასვლამდე კლუბურ ნარკოტიკებს ურიგებენ.

ანალიტიკოსი რამაზ საყვარელიძე for.ge-სთან საუბრისას აცხადებს, რომ კომპიუტერული და, ზოგადად, ეკრანული თამაშები გავლენას ახდენს ახალგაზრდებზე. მთელ მსოფლიოშია ეს პრობლემა, რადგან ძალზე აგრესიული თამაშები აისახება ბავშვებზე. იაპონელებიც ხედავენ ამ პრობლემას და ეს საკითხი შესწავლის საგანი არაერთხელ გამხდარა. კლასიკური შრომებიცაა ამის შესახებ, რომ მიბაძვა ადამიანის თვისებაა და ადამიანი იმეორებს იმ ქცევას, რასაც უყურებს.

„არ იქნება კომპიუტერული თამაშები, იქნება უამრავი საბრძოლო ფილმი და მოზარდიც, სურვილის შემთხვევაში, აკრეფს ამ აგრესიას. მეეჭვება, რაიმის აკრძალვამ შედეგი გამოიღოს. აღზრდის სფეროსთვის სამაგალითოა ის მეთოდი, რაც მოიძებნა თამბაქოს მწეველებთან მიმართებით. საუბარია იმაზე, რომ სკოლებში გავრცელებული იყო თამბაქო და სწორედ სკოლებიდან დაიწყო მისი ჩანაცვლების პროცესი, როდესაც ახალგაზრდებს გაუხსნეს სპორტული დარბაზები, უზარმაზარი რაოდენობის მაყურებელი განალაგეს ახალგაზრდული სპორტის გარშემო, სპორტი გახდა მოვლენა ახალგაზრდებში. საერთოდ, სპორტი ახალგაზრდულია და შედეგიც მიიღეს - თუ სპორტს მიჰყვები, თამბაქოს ვეღარ მოსწევ. სპორტის გარდა, ახალგაზრდობა შეიძლება ჩართონ ხელოვნების დარგებში და მაშინ ახალგაზრდობას აღარ გაუწევს გული ასეთი მარტივი აგრესიული ფორმებისკენ. მთავრობამ რაც შეიძლება მეტი ახალგაზრდა უნდა ჩართოს სპორტსა და ხელოვნებაში, რათა ახალგაზრდობა გადმოერთოს სერიოზულ და პროდუქტიულ საქმიანობაზე და არა ნგრევაზე“, - აღნიშნა რამაზ საყვარელიძემ.

„მართვის სტრატეგიული ინსტიტუტის“ ხელმძღვანელი პეტრე მამრაძე სრულიად იზიარებს აზრს, რომ ბავშვის ფსიქიკაზე აისახება ის, რასაც კომპიუტერულ თამაშებში ხედავენ. ამ თამაშებსა და კლიპებში ჩანს ათასნაირი აგრესია, სადაც პანტა-პუნტით ხოცავენ ადამიანებს, ისე ჭრიან მათ, თითქოს კომბოსტო ყოფილიყოს.

ანალიტიკოსი გერმანიაში მომხდარ ფაქტებს იხსენებს, როდესაც ბავშვები კლასში ჩუმად აირჩევდნენ ერთ-ერთ თანაკლასელს მსხვერპლად, იმიტომ კი არა, რომ სძულდათ იგი, არამედ კამათელს გააგორებდნენ და მონეტას ააგდებდნენ, შემდეგ უკვე ამ მსხვერპლს შესვენებაზე ან სადმე რომ მოიხელთებდნენ, ყველა ერთად ეცემოდა და სრულიად მოულოდნელად იწყებდნენ მის ცემას. პარალელურად, ზოგიერთი ახალგაზრდა ამ ყველაფერს იღებდა ტელეფონით, რათა განეთავსებინა ინტერნეტში. იყო ლეტალური შემთხვევებიც, როცა კვდებოდნენ ბავშვები თანაკლასელების ხელით. ამის შემდეგ ხელისუფლებამ სასწრაფო ზომები მიიღო - კანონმდებლობა დაიხვეწა, საგანმანათლებლო დაწესებულებაში მობილურების შეტანა აიკრძალა, დაიწყო მკაცრი კონტროლი, მაგრამ ეს საზარელი ფაქტი ფაქტადვე დარჩა. ამის შესახებ დაიწერა კიდეც, რომ როდესაც მცირეწლოვანი და არასრულწლოვანი ბავშვი დღეში რამდენიმე საათის განმავლობაში უყურებს, თუ როგორ შეუბრალებლად ხოცავენ ადამიანებს კომპიუტერში, მოზარდიც ფიქრობს, რომ ეს ასე უნდა იყოს. ამდენად, თუკი ვირტუალურ სინამდვილეში შეიძლება ასეთი სისასტიკეების ჩადენა, რეალურად რატომ არ შეიძლება ასევე მოიქცეს?!

„მადლობა ღმერთს, ეს არის მხოლოდ ნაწილი ბავშვებისა. ლექციიიდან რომ ვბრუნდები საღამოს, სავსეა ტრანსპორტი დაღლილი ბავშვებით და მოზარდებით, ეს ახალგაზრდები მთელი დღე სწავლობენ, მუშაობენ, კიდევ კარგი, ეს ჯანსაღი ბირთვი არსებობს და ამიტომაცაა, რომ „ოცნებამ“ მიიღო ამდენი ხმა. თუმცა იმის მოწმენიც ვართ, რომ, როგორც ნებისმიერ დასავლურ ქვეყანაში, შეიძლება 15 მოზარდი შეიყაროს ერთ-ერთი ოჯახში, ან სადმე დაბადების დღეზე, თავყრილობაზე და 15-ივეს ცხვირი ჰქონდეს ჩაყოფილი ტელეფონში, ერთმანეთთან ზეპირი კომუნიკაცია საერთოდ არ აქვთ, მესიჯობენ სრულ სიჩუმეში, რატომღაც ეს არის ახალგაზრდების რამდენიმესაათიანი „შეხვედრა“, რაც წარმოუდგენელი იყო ჩემი ახალგაზრდობის დროს, ასევე, წარმოუდგენელი იყო თუნდაც 10 წლის წინ“, - აცხადებს პეტრე მამრაძე ჩვენთან საუბრისას.

მისივე განმარტებით, დამტკიცებულია, რომ ზეპირ ურთიერთობას ვერაფერი შეცვლის, როცა თვალებში უყურებენ ახალგაზრდები, ერთმანეთის მიმიკას ხედავენ და ინტონაციას ისმენენ. ზუსტად ამის შესახებ იწერება პუბლიკაციები, გაუძლებს კი დემოკრატია ციფრულ ეპოქას?! სოციალურ ქსელში (ფეისბუქი იქნება ეს, ტვიტერი, ტიკ-ტოკი, თუ სხვა პლატფორმა) განთავსებულმა ინფორმაციამ, რომელსაც თან სდევს ვიზუალი, ფოტოსურათები, გამოდევნა რეალური ინფორმაცია და ცოდნა. რამდენიც არ უნდა ავუხსნათ ამ ახალგაზრდებს ტელევიზიის ეკრანიდან, რომ საქართველოს ხელისუფლება არანაირად არ ხერგავს გზას მოლაპარაკებისკენ, არ წყვეტს ურთიერთობას ევროკავშირთან, ის ახალგაზრდა, ცხვირი რომ ჩარგული აქვს ტელეფონში, თავის ჯგუფში, ხედავს სრულიად სხვა ინფორმაციას და ის არის მისთვის რეალობა. ასეთი ახალგაზრდა გეუბნება, მე წავიკითხე, მე ჩემი თვალით ვნახე. ზოგიერთი ასეთი ბავშვი ფიქრობს, აი, თურმე ნამდვილი ბრძოლა როგორია, პიროტექნიკის სროლით ერთი-ორი პოლიციელი ხომ დაიწვება, ეს არაფერია.

„ბრიტანეთში, როდესაც კოვიდის ეპიდემია პიკს აღწევდა, ეთნიკური ბრიტანელების ჯგუფები თავს ესხმოდნენ თანამედროვე ქსელური ტელეფონების, აიფონების-G5-ის სადგურებს და ანტენებს, რადგან ინტერნეტ ქსელის მეშვეობით წაიკითხეს, რომ თურმე კოვიდს ეს ტელეფონები ავრცელებდა. რა დონის სიბნელეა. ეს იგივეა, დაიჯერო, რომ ტელეფონით თუ დაგელაპარაკა კოვიდით დაავადებული ადამიანი, მისი კოვიდი საუბრისას გადაგედება. ამ ახალგაზრდების ნაწილი ნორმალურ ოჯახში იზრდება, მაგრამ მოწყვეტილნი არიან უფროს თაობას, დედებს, მამებს, მათი დარწმუნება იოლია, მათ დააჯერეს, რომ ეს არის რუსული, კრემლის მიერ გამოგზავნილი მარიონეტული მთავრობა, ხოლო სააკაშვილი არის მოდერნიზატორი და პროდასავლური პოლიტიკოსი, რომელსაც თურმე პირდაპირ ნატოსა და ევროკავშირში მიჰყავდა საქართველო. ასეთ ახალგაზრდას რომ უთხრა, შენ იცი, სააკაშვილის რეჟიმის დროს რამდენი ბოროტება ხდებოდა? გიპასუხებს, არ ვიცი, მე იმ დროს დაბადებული არ ვიყავი. ასეთი „ფუნდამენტი“ აქვთ ამ ახალგაზრდებს. ბევრმა ეს ისწავლა უნივერსიტეტებში. არის ასეთი უნივერსიტეტებიც თბილისში, სადაც ახალგაზრდებს ტვინში უტენიან, თითქოს საქართველოს მთავრობამ ამ შემზარავი რუსული კანონების მიღებით ჩახერგა გზა ევროპისკენ, ახლა ვიზალიბერალიზაციას დახურავენ, მერე ერაზმუსის სისტემით რომ დადიოდნენ ევროპაში სასწავლებლად, ამასაც დახურავენ და დარჩებიან კრემლის ამარა. თვითონვე მომისმენია ასეთი რამ მათი ლექტორებისაგან და გამკვირვებია, როგორ შეიძლება, სააკაშვილზე თქვა, რომ პროდასავლური იყო, როცა უფრო ანტიდასავლური და პრორუსული, ვიდრე სააკაშვილი და ბიძამისია, არ არსებობს. სააკაშვილი კგბ-ს ეფრეიტორია, ბიძამისი-კგბ-ს გენერალი, როგორც წერს რუსული პრესა. ამ ადამიანებმა ყველაფერი ღირებული გადასცეს რუსეთს“, - მიიჩნევს პეტრე მამრაძე.

მანვე პარალელი გაავლო ნაცების დროს ჩატარებულ მიტინგებთან და აღნიშნა, რომ 7 ნოემბერს გაოგნებული დასავლური პრესა წერდა, რომ ასი ათასი, თუ 150 ათასი ადამიანი გამოვიდა ქუჩაში და ერთი ფანჯარა ან ხის ტოტი არ ჩამტვრეულა ხალხის მიერ. ეს იყო პროტესტი. ამ დროს 7 ნოემბერს როგორ მოიქცა პოლიცია? როგორ დასდევდნენ ხალხს და „იმედი“ როგორ დახურეს? გავიხსენოთ მიშა სააკაშვილის საჯარო განცხადება - „ან ჩვენ, ან „იმედი“, მერაბიშვილმა კი თქვა ლატინინასთან, „იმედი“ რომ არ დაგვეხურა, ძალაუფლებას ვკარგავდითო. ახლა სამი ნაცისტური ტელევიზია დღედაღამ გამოდის, კიდევ არ ჰყოფნით ტელევიზიები და საზოგადოებრივ მაუწყებელში იჭრებიან.