პრეზიდენტისთვის აქტუალური აღარც 26 ოქტომბრის არჩევნებია და აღარც - ეუთო/ოდირი, რომელსაც საბოლოო ანგარიში ჯერ არ გამოუქვეყნებია. სალომე ზურაბიშვილი მხოლოდ ახალი არჩევნების დანიშვნას და ირაკლი კობახიძის გადაგომას ითხოვს, რის შემდეგაც, 2 კვირაში, ხელახალი არჩევნები უნდა დაინიშნოს.

„პრემიერი, რომელმაც ვერ გადაწყვიტა კრიზისი და მხოლოდ იცის ხალხის მიმართ მუქარა და რაღაცები და არანაირად პოლიტიკური კომპრომისის ძებნა, უნდა იყოს შეცვლილი და როგორც კი გადადგება ეს პრემიერი, 2 კვირაში მე უნდა დავნიშნო არჩევნები. უნდა იყოს ერთად მოლაპარაკებული, როგორ უნდა ჩატარდეს შემდეგი არჩევნები.

ეს არის კომპრომისი, ეს არის დეპოლარიზაცია, ეს არის ქვეყნისთვის გამოსავალი, ეს არის სტაბილურობა, ეს არის მშვიდობა, ეს არის ქვეყნის მომავალი, რომელიც იქნება ურყევი, თავისუფალი და დემოკრატიული“, - თქვა მან საზოგადოებრივ მაუწყებელთან ინტერვიუში.

ჟურნალისტის კითხვაზე, - ეუთო/ოდირის საბოლოო ანგარიშს არ უნდა დაველოდოთ? სალომე ზურაბიშვილმა აღნიშნა:

„კრიზისი არ ელოდება არაფერს, კრიზისი არის ჩვენს ქუჩებში. არჩევნები მორჩა, არჩევნების გაყალბება უკვე დადასტურდა ქვეყანაში, ეს არის პრობლემა. ვინ უნდა დაელოდოს? ხალხი გამოსულია ქუჩაში, მე კი არ ვარ. არ არის აღიარებული ეს არჩევნები ხალხის მიერ, პოლიტიკური ოპოზიცია არ შედის პარლამენტში, კრიზისია. გვინდა, არ გვინდა, კრიზისია. ეუთო/ოდირი დამთავრებულია, უკვე არის კრიზისი, არავინ აღარ ელოდება“, - ამბობს ზურაბიშვილი.

პრემიერ-მინისტრი ამბობს, რომ პრეზიდენტი საკუთარ გადაწყვეტილებებში დამოუკიდებელი არ არის და იდენტურ საკითხზე მისი რადიკალურად შეცვლილი პოზიციაც ადასტურებს. მისი თქმით, თუკი ზურაბიშვილი 2020 წელს საპარლამენტო მანდატებზე ოპოზიციის უარს დემოკრატიის წინააღმდეგ გადადგმულ ნაბიჯად აფასებდა, ახლა ის ანალოგიური ქმედებისკენ პარტიებს თავად მოუწოდებს.

„დემოკრატიისა და არჩევნების არსის სრული უარყოფაა, როცა გამარჯვების ვერმიღწევის გამო და გაყალბების რეალური მტკიცებულებების გარეშე ითხოვ ახალ არჩევნებს და უარს ამბობ, ამომრჩევლის ნდობით მოპოვებულ მანდატზე და მრავალპარტიულ პარლამენტზე“, - ეს განცხადება სალომე ზურაბიშვილმა 2020 წელს, მეათე მოწვევის პარლამენტის პირველ სხდომაზე გააკეთა. მაშინ პრეზიდენტმა საპარლამენტო სესია გახსნა. ოპოზიციას მისი დღევანდელი პოზიცია მოსწონს და 4 წლის წინანდელი განცხადების გამართლებასაც ცდილობს, თუმცა ზოგიერთისთვის გაუგებარია, 26 ოქტომბრის არჩევნებისგან განსხვავებით, რატომ არ უჭერდა სალომე ზურაბიშვილი ოპოზიციას მხარს 2020 წლის პოსტსაარჩევნო პერიოდში?

მმართველ გუნდში ამბობენ, რომ პრეზიდენტის დღევანდელ განცხადებას სანდოობა ვერ ექნება, რადგან სალომე ზურაბიშვილი არჩევნებში დამარცხებას ვერ ეგუება. „ქართულ ოცნებაში“ აცხადებენ, რომ პროცესები 2020 წლის ანალოგიურად ვითარდება - ერთი განსხვავებით: ოპოზიციასთან ერთად, წელს არჩევნების გაყალბების დეზინფორმაციულ კამპანიაში სალომე ზურაბიშვილიც ჩაერთო.

სალომე ზურაბიშვილის უფლებამოსილების ვადა ეწურება. უკვე დანიშნულ საპრეზიდენტო არჩევნებს ის არალეგიტიმურ უწოდებს და ამბობს, რომ საქართველოს პრეზიდენტად რჩება. ამიტომ არსებობს მოლოდინი, რომ 14 დეკემბერს, როცა პრეზიდენტის არჩევნებია დაგეგმილი, რადიაკლურმა ჯგუფებმა ზურაბიშვილთან ერთად, ახალი საპროტესტო ტალღა ააგორონ.

ანალიტიკოსი გია აბაშიძე for.ge-სთან ამბობს, რომ სალომე ზურაბიშვილი ადეკვატურობის ყველა ზღვარს გასცდა, შესაბამისად, უკვე ისეთ იდეებს იგონებს, რომელიც სასაცილოც აღარ არის. აბაშიძე მიიჩევს, რომ ზურაბიშვილი როლში ისეა შესული, რომ ყოვლისშემძლე პრეზიდენტი ჰგონია თავი. მათ შორის ვადის გასვლის შემდეგ ჰგონია, რომ თანამდებობაზე დარჩება.

„არ ვიცი ამ ქალბატონის ბოლოდროინდელი ქცევები, განცხადებები, უკვე რაციონალურ განხილვას აღარ ექვემდებარება. ამასთან ერთად, აშკარად ჩანს, რომ სალომე ზურაბიშვილის პოლიტიკური წონა, რადიკალურ ოპოზიციაში საერთოდ არაფერს წარმოადგენს. ის მხოლოდ სჭირდებათ იმის გამო, რომ როგორც პრეზენტის სტატუსის მატარებელი ადამიანი გამოიყენონ. ფიქრობენ, რომ ამით ქვეყანაში პროტესტის მუხტს ააგორებენ და დასავლეთის ყურადღებას მიიქცევენ. მას აქვს შესაძლებლობა დასავლელ ლიდერებთან კომუნიკაცია ჰქონდეს, ამიტომაც მისი გამოყენება უნდათ.

ისინი თავის მხრივ ოპოზიციას და ამ ექსტრემისტულ ძალებს აგულიანებენ, რომ ქვეყანაში სიტუაცია დესტაბილიზაციისკენ წაიყვანონ. აქ უკვე დგება საკითხი - რას იზამს მომავალში და როგორი იქნება მისი შემდეგი ქმედებები. ვერაფერს ვერ იზამს ზურაბიშვილი. იგივე სიტუაცია იქნება, როგორც ე.წ. „ქართული ქარტიის“ გარშემო მოხდა. მან ასევე ვერ შექმნა ტრაგიკომიკური საარჩევნო შტაბი 26 ოქტომბერს და ა.შ. ეს იმ ჟანრიდან არის, როცა თაღლითი მამუკა ხაზარაძე ამბობდა, რომ ალტერნატიული მთავრობა უნდა შეიქმნას. ტექნიკური პარლამენტის ჩამოყალიბება უნდა მოხდეს და ა.შ. ეს არის ამ პოლიტიკანების სილაში თამაში და ა.შ. რაღაცა პოლიტიკურ პასკებს აცხობენ, რომელიც იშლება. ამიტომ ძალიან დიდი სირცხვილია საქართველოს პრეზიდენტის ინსტიტუტისთვის რომ ასეთი სამარცხვინო ქალბატონი 5 წელი პრეზიდენტი იყო. ბოლო 2 წელიწადში ამან ეს ინსტიტუტი აბსოლუტურდ დააზიანა“, - ამბობს აბაშიძე.

მისივე თქმით, ამიტომ მომავალ პრეზიდენტს ბატონ მიხეილ ყაველაშვილს მოუწევს ამ ინსტიტუტისთვის ავტორიტეტის და რეპუტაციის დაბრუნებისთვის შრომა.

„14 დეკემბერს ზურაბიშვილი შესაძლოა პარლამენტთან გამოვიდეს, ინაუგურაციის დღეს მიტინგზე სასტვენით ხელში ან პიროტექნიკით მივიდეს, გასაკვირი ნამდვილად არაფერი აღარ იქნება. სალომე ზურაბიშვილი არაადეკვატურია. ძალიან კარგი გააკეთა, საზ.მაუწყებლის ჟურნალისტმა, როდესაც ზურაბიშვილს წაუკითხა მისი ციტატა, რომელიც ვერც გაიხსენა. მას არც კი ახსოვდა პარლამენტის ტრიბუნიდან მაშინდელ პრეზიდენტზე გიორგი მარგველაშვილზე რა თქვა.

შეიძლება გავიდეს ერთი თვე და შესაძლოა, აღარც ახსოვდეს რას ამბობდა ე.წ. საარჩევნო შტაბზე 26 ოქტომბერს. კვლავ გავიმეორებ, თქვენს გამოცემასთანაც და ნებისმიერ საჯარო სივრცეში, რომ ამ ქალბატონის ქცევების და განცხადებების ახსნა, რაციონალური კუთხით შეუძლებელია. ეს უკვე პიროვნულ პრობლემას უკავშირდება. არ შეიძლება მარტო ის დავარქვათ, რომ აგენტოკრატიის წარმომადგენელია და სხვა ქვეყნის ინტერესებს ატარებს. ის დახვეწილი აგენტიც არ არის და შენიღბვას ოსტატურადაც ვერ ახერხებს. ის არის არაადეკვატური და ძალიან დასანანია, რომ ჩვენი ქვეყნის პრეზიდენტი ისტორიაში ასეთი სამარცხვინო და ბრიყვული განცახდებებით ჩაიწერება. ისიც არ დაგვავიწყდეს, რომ თუ ადრე სერგო ორჯონიკიძე და ფილიპე მახარაძე გვყავდა მოღალატეები, ამ საუკუნეში გვყავს კოლექტიური ნაცების და წარმავალი პრეზიდენტის ზურაბიშვილის სახით“, - ამბობს აბაშიძე.

რაც შეეხება კითხვას აქვს თუ არა ოპოზიციას კიდევ იმის რესურსი, რომ 14 დეკემბერს რუსთაველის გამზირზე პროცესები დაძაბოს, აბაშიძე ამბობს, რომ სალომე ზურაბიშვილის რენომე და ავტორიტეტი ნულოვანია. მას აქვს ილუზიები, ისე როგორც ვაშაძეს, ხაზარაძეს, მელიას თუ გიორგი გახარიას, რომ რაღაცას წარმოადგენენ. თუმცა ისინი ქუჩაში იმ შვიდასიათასი ხმის ერთ პორცენტსაც ვერ გამოიყვანენ. ოპოზიციურად განწყობილმა ამომრჩეველმა რაციონალური აზროვნება დაიწყო და ექსტრემისტულ ქმდებებს არ ეთანხმება. შესაბამისად, ოპოზიციამ სახე და საკუთარი რადიკალები თავადვე გამოიყვანეს სააშკარაოზე. 14 დეკემბერს კი რას შეძლებენ, გამოჩნდება.