ხელისუფლება მიიჩნევს, რომ საქართველოში სახელმწიფო გადატრიალება ჩავარდა. მას შემდეგ, რაც პიროტექნიკის მარაგები ამოიღეს, აქციამ შედარებით მშვიდობიანი ფორმა მიიღო, მაგრამ ძალადობრივი ჯგუფები ფსიქოლოგიურ ზეწოლას ახდენდნენ პოლიციელებზე, აქვეყნებდნენ მათ პირად მონაცემებს; ძალადობდნენ ადამიანებზე, რომლებიც მათ მხარს არ უჭერენ. წუხელ კი რუსთაველის გამზირზე ვითარება ისევ დაიძაბა და მომიტინგეთა დასაშლელად, სპეცრაზმს სპეციალური საშუალებების გამოყენება დასჭირდა. პარალელურად კი, ჯგუფური ძალადობისა და ძალადობის ორგანიზებით დაწყებული გამოძიების ფარგლებში მიმდინარეობს საგამოძიებო მოქმედებები.

მოსამართლის განჩინების საფუძველზე დაწყებული სპეციალური საპოლიციო ღონისძიებების ფარგლებში ბოლო ორი დღის განმავლობაში განხორციელდა ჩხრეკა, როგორც კონკრეტული პარტიების ოფისებში, ასევე, საქმესთან შემხებლობაში მყოფი პირების საცხოვრებელ სახლებში. მათ შორის მოსამართლის განჩინების საფუძველზე საგამოძიებო მოქმედებები ჩატარდა ძებნილ დავით კეზერაშვილისა და მისი ცოლის ძმის, დიმიტრი ჩიქოვანის საცხოვრებელ ბინაში.

სამართალდამცველებმა ოფისებისა და საცხოვრებელი სახლების ჩხრეკის შედეგად ნივთმტკიცებად ამოიღეს: ცეცხლსასროლი იარაღები, დიდი ოდენობით თანხა, მეხსიერების ბარათები, კომპიუტერული ტექნიკა, ასევე, ჩაფხუტები, აირწინაღები, დიდი რაოდენობით პიროტექნიკა, ელექტროგადამცემი მოწყობილობები, ე. წ. მოლოტოვის კოქტეილები, საღებავები, სხვადასხვა სახის ხსნარები, რომლებზეც დანიშნულია შესაბამისი ექსპერტიზები.

შს სამინისტრომ მაღალი საზოგადოებრივი ინტერესიდან გამომდინარე, გაავრცელა ინფორმაცია კეზერაშვილის ოჯახის წევრის მფლობელობაში არსებული, ამაღლების ქუჩა N12-ში მდებარე საცხოვრებელი სახლის ჩხრეკის თაობაზე, სადაც ბოლო დროს ცხოვრობდა ჩიქოვანი. ჩხრეკისას სამართალდამცველებმა საცხოვრებელ ბინაში მოწყობილი სპეციალური სამალავიდან ამოიღეს, როგორც რეგისტრირებული, ასევე, რამდენიმე ათეული არარეგისტრირებული ცეცხლსასროლი იარაღი, მაყუჩები, საბრძოლო ვაზნები, კომპიუტერული ტექნიკა და მეხსიერების ბარათი.

დავით კეზერაშვილი განმარტავს, რომ მისი სახლის ჩხრეკისას ამოღებული იარაღის ნაწილი მას ეკუთვნის და მასთან არანაირი შეხება არასოდეს ჰქონია დიმიტრი ჩიქოვანს. როგორც კეზერაშვილი წერს, ამ იარაღის არსებობის შესახებ წლებია სრული ინფორმაცია ჰქონდა, როგორც შსს-ს და სასამართლოს, რომელიც სხვა ქონებასთან ერთად არაერთხელ დაყადაღდა.

„ყველაფერი, რაც არ არის გაფორმებული, არის ამ ე.წ. უწყების მიერ ჩადებული. ჩემი და ჩემი ოჯახის წევრების პოლიტიკური ნიშნით დევნა 12 წელზე მეტია გრძელდება, თუმცა ეს არაფერია იმასთან შედარებით, რასაც გომელაურის კრიმინალური დაჯგუფება უკეთებს საქართველოს თავისუფლების მოყვარულ ხალხს თბილისისა და სხვა ქალაქების ქუჩებში. საქართველოში დაშინებას და დევნას შედეგი არც აქამდე გამოუღია და არც მომავალში გამოიღებს“, - წერს დავით კეზერაშვილი.

კეზერაშვილის საცხოვრებელ სახლში საგამოძიებო მოქმედებებს წინ უსწრებდა სტრასბურგის სასამართლოს გადაწყვეტილება, რომელმაც თქვა, რომ საქართველოს უზენაესი სასამართლოს გადაწყვეტილება უსამართლო არ ყოფილა. სტრასბურგის სასამართლომ დაადასტურა, რომ დავით კეზერაშვილმა თავდაცვის მინისტრობის დროს გაფლანგა ჯარისთვის განკუთვნილი სახელმწიფო ბიუჯეტი და მის მიმართ პოლიტიკურ დევნას ადგილი არ ჰქონია.

რაც შეეხება დიმიტრი ჩიქოვანს, ამბობს, რომ სახლში პირდაპირი მნიშვნელობით შევარდა ივანიშვილის „ომონი“ და ეს არის პოლიტიკური დევნის კლასიკური ქრონიკა, რომელიც მხოლოდ რეჟიმის ჩამოქცევასთან ერთად დასრულდება.

„ჩემ საცხოვრებელ სახლში, პირდაპირი მნიშვნელობით, შევარდა ივანიშვილის „ომონი“, რომელიც ეძებს იმას, რაც, უბრალოდ, არ არსებობს! მე, საქართველოს ასობით ათას მოქალაქესთან ერთად ვაგრძელებ ბრძოლას, ბრძოლას თავისუფლებისთვის, ჩვენი ქვეყნის ევროპული მომავლისთვის, სადაც ადამიანებს არ დევნიან მათი პოლიტიკური კუთვნილების, შეხედულებებისა და ნათესაური კავშირების გამო. მე ვარ დიმიტრი ჩიქოვანი, მამა, შვილი, ამ ქვეყნის ამაყი მოქალაქე და არასდროს დავუშვებ იმას, რომ საქართველო რუსეთის ნაწილი გახდეს!“, - წერს დიმიტრი ჩიქოვანი.

გამოძიების მასალებით დასტურდება, რომ დავით კეზერაშვილი არის ერთ-ერთი დამფინანსებელი საქართველოში სახელმწიფო გადატრიალების. რაც შეეხება საგამოძიებო მოქმედებებს, ექსპერტი უსაფრთხოების საკითხებში დავით კუხალაშვილი აცხადებს, რომ ყველაფერი კეთდება საქართველოს კანონმდებლობის შესაბამისად, მაგრამ ფიქრობს, რომ საქართველოს დაზვერვის სამსახური უფრო აქტიურ ფაზაზე უნდა გადავიდეს.

„არსებობს ასეთი მიღებული პრაქტიკა, რომ სახელმწიფოები, რომლებიც დამნაშავეს აძლევენ თავშესაფარს, უნდა განხორციელდეს სპეცოპერაცია, ანუ უნდა მოხდეს კეზერაშვილის მოპარვა და გადაეცეს საქართველოს სასამართლოს. ეს იქნება უფრო იდეალური ვარიანტი და ანალოგიური მოქმედება უნდა განხორციელდეს ყველა იმ პირზე, რომლებიც სხვადასხვა სახელმწიფოებში არიან თავშეფარებული, როგორც სისხლის სამართლის დამნაშვეები“, - აცხადებს for.ge-სთან საუბრისას დავით კუხალაშვილი.

ანალიტიკოს ედიშერ გვენეტაძის განცხადებით, გადამტრიალებელთა ხელშემწყობთა ლოგიკით, ბანდიტის, ყაჩაღის, ბიზნესის რეკეტიორს, საქართველოს ჯარის მძარცველს, რომელსაც სასამართლომ გმირი მეომრებისადმი წართმეული 15 მილიონი დაუმტკიცა, რაც სტრასბურგმა დაადასტურა, - ჩაუდეს.

„ისმის კითხვა - რად უნდოდა ამდენი იარაღი კეზერაშვილს და მის ამფსონებს?! ბუნებრივია, ეს ჭირდებოდათ და სჭირდებათ იმ პროცესებისთვის, რომლის დროსაც გადაწვეს და ააოხრეს თბილისი. სრული პასუხისმგებლობით ვაცხადებ, კეზერაშვილი და მისი თანამოაზრეები, თანადამფინანსებლები იმათ გვერდით იმკვიდრებენ საკუთარ სახელს, რომლებმაც ააოხრეს დედაქალაქი, მაგალითად - ჯიბღუ ჰხაკანის, თემურ ლენგის, ჯალალედინის, აღა-მაჰმად-ხანის და ბევრი სხვა იმ ამაოხრებლებს შორის, რომლებმაც „ღირსეულად“ შეძლეს ჩვენი დედაქალაქის აოხრება.

კითხვას ვსვამ, საიდან ჰქონდათ ამდენი პიროტექნიკა, მოლოტოვის კოქტეილები და ამდენი სხვადასხვა სახის ბასრი საგნები იმ პიროვნებებს, რომლებიც აგრესიას იჩენდნენ სამართალდამცავების მიმართ? ნაცმოძრაობის ოფისებიდან, რომლის ერთ-ერთი ლიდერი კეზერაშვილის ცოლის ძმა, დიმიტრი ჩიქოვანია, ამოიღეს უამრავი რაოდენობით პიროტექნიკა. მეორე - კეზერაშვილის მიერ ქართული ჯარის გაძარცვა დაადასტურა სტრასბურგის სასამრთლომ.

ამიტომ, კანონიერად მიმაჩნია ის, რაც ხდება კეზერაშვილის გარშემო, ვინაიდან თბილისის 21-ე საუკუნის ჯიბღუ ხაკანები და აღა-მაჰმად-ხანი, ანუ დამფინანსებლები აუცილებლად უნდა გამოვლინდნენ და წარსდგნენ ქართული სამსჯავროს წინაშე, რათა მომავალში ეს არავინ არ გაიმეოროს. კეზერაშვილი არის ამ ყველაფრის ერთ-ერთი დამფინანსებელი.

ასევე, ძალიან დიდი ეჭვია, რომ ამ პროცესებს აფინანსებს ხაზარაძე, ჯაფარიძე, ოქრიაშვილი და ნაყოფია. ესენი არიან ნაცმოძრაობის ბანკირები. ამავე დროს, არ გამოვრიცხავ, რომ მათი დამფინანსებელი იყვნენ ლომჯარია-გიგაურის მრავალმილიონიანი ბიუჯეეტის მქონე არასამთავროები და, რა თქმა უნდა, უცხოეთიდან შემოსულია დიდი თანხები“, - აღნიშნა for.ge-სთან საუბრისას ედიშერ გვენეტაძემ.