საქართველოში საპროტესტო აქციები, რაც პრემიერ-მინისტრ ირაკლი კობახიძის განცხადების შემდეგ დაიწყო, თითქოს მინავლდა, ხალხის რაოდენობამ იკლო და საპროტესტო მუხტმა დაიკლო - ასე აფასებენ 5 დეკემბერს, რუსთაველის გამზირზე გამართული აქციას, სადაც აქციის მონაწილეთა რაოდენობა შედარებით ნაკლები იყო. მმართველი პოლიტიკური გუნდის წარმომადგენლების შეფასებით, ბოლო ერთი კვირის განმავლობაში, პირველად გაიმართა აქცია მომიტინგეთა მხრიდან ძალადობისა და ექსტრემისტული დაჯგუფებების მიერ მოწყობილი პროვოკაციების გარეშე.

თბილისის მერმა, კახა კალაძემ სოციალურ ქსელ „ფეისბუქში“ გაკეთებულ ვიდეომიმართვაში განაცხადა, რომ მართალია, ძალადობრივი აქციების დროს პოლიტიკოსები ღიად არ ჩანდნენ, თუმცა ამ ყველაფრის უკან სწორედ კონკრეტული პოლიტიკური პარტიები და ორგანიზაციები დგანან.

„გუშინდელმა დღემ კარგად დაანახა საზოგადოებას ის, რაზეც ღიად ვსაუბრობთ ამ დღეების განმავლობაში, რა პროცესები მიდის ქვეყანაში, რა ძალასთან გვაქვს საქმე, რა რეალური მიზნები ამოძრავებს რადიკალურ ოპოზიციას.

დავიწყოთ საპროტესტო მიტინგის წუხანდელი ღამის შეფასებით, რომელიც ბოლო ერთი კვირის განმავლობაში პირველად გაიმართა მომიტინგეთა მხრიდან ძალადობისა და ექსტრემისტული დაჯგუფებების მიერ მოწყობილი პროვოკაციების გარეშე და ისმის კითხვა - რატომ? გუშინ განხორციელდა საგამოძიებო მოქმედებები კონკრეტულ ორგანიზაციებსა და პოლიტიკურ პარტიებში, სადაც ამოღებული იქნა უამრავი „მოლოტოვის კოქტეილი“, პიროტექნიკა და სხვა ნივთები, რასაც ძალადობრივი აქციის მონაწილეები იყენებდნენ. ყველამ დაინახა, რომ ამ ძალადობრივი დაჯგუფებების უკან იდგნენ კონკრეტული პოლიტიკური პარტიები. პოლიტიკოსები ასე ღიად არ ჩანდნენ. ხალხს ატყუებდნენ, ჩვენ არაფერ შუაში არ ვართ, ეს არის ბავშვების აქციაო. ვინ არის ბავშვი? გვარამია, მელია, ჯაფარიძე, ხოშტარია თუ სხვა რადიკალები? ასევე, კონკრეტული არასამთავრობო და ახალგაზრდული ორგანიზაციები პირდაპირ ჩართულები იყვნენ ამ ძალადობრივი ქმედებების დაორგანიზებასა და ხელშეწყობაში“, - განაცხადა თბილისის მერმა.

ანალიტიკოსი რამაზ საყვარელიძე For.ge-სთან საუბარში ამბობს, რომ ამ ეტაპზე პროტესტი მშვიდობიან რეჟიმში მიმდინარეობს, რამაც შესაძლოა ისეთივე მხარდაჭერა ვერ მოიპოვოს, როგორც ეს წინა დღეებში იყო.

„თუკი ხელისუფლების დღევანდელ რიტორიკას დავუგდებთ ყურს, ყველა ერთ მომენტს აქცევს ყურადღებას - რადგან „საბრძოლო იარაღები“ ჩამოერთვათ აქციის მონაწილეებს, გაჩერდა პროცესი. აგრესიულები აღარ არიან, ქვასაც კი აღარ ისვრიან, შესაბამისად, არც პოლიცია დასდევთ - ამ აგრესიული მოქმედებების წყარო ოპოზიცია იყოო - ამბობენ. თითქოსდა შემტევები იყვნენ და აღარ არიან - შიგნიდან შეიცვალა განწყობილება და შიგნიდან ჩაქრა აგრესიული იმპულსი.

ამასთან, მოვისმინეთ უამრავი შეფასება, თუნდაც ევროპარლამენტარების თუ სხვათა მხრიდან, რომ ზედმეტი ძალა იყო გამოყენებული სახელმწიფოს მხრიდან და არ იყო ლაპარაკი მეორე მხარის საქციელზე. თუ გაგრძელდა ასეთი კრიტიკული შეფასებები, ამან შეიძლება ახალი სუნქთვა შთაბეროს ამ პროტესტს. თუმცა, მშვიდმა პროტესტმა შეიძლება ისეთი მხარდაჭერა ვერ მოიპოვოს, როგორიც ადრე, შესაბამისად, ხალხის რაოდენობაც შემცირდეს“, - განაცხადა რამაზ საყვარელიძემ.

კახა კალაძის თქმითვე, ბოლო დღეებში განვითარებული ქმედებები იყო იმ სცენარის ნაწილი, რასაც გარე ძალების მიერ დატრენინგებული ორგანიზატორები გეგმავდნენ გადატრიალების მოსაწყობად.

„გუშინდელი ამბების შედეგად, საზოგადოებამ ვერ ნახა დაშავებული მომიტინგეები და პოლიციელები, რაც კიდევ ერთხელ მოწმობს იმას, რომ ყველა ქმედება იყო იმ სცენარის ნაწილი, რასაც გარე ძალების მიერ დატრენინგებული ორგანიზატორები გეგმავდნენ და ახორციელებდნენ. მიზანი, ცხადია, გახლდათ სახელმწიფო გადატრიალება.

როდესაც ექსტრემისტული დაჯგუფებები აქციებზე იწყებდნენ ქვების, „მოლოტოვის კოქტეილების“, პიროტექნიკის სროლას პოლიციელების მისამართით, სამართალდამცავები მიმართავდნენ კანონით დადგენილ წესს არეულობის აღსაკვეთად.

აღარაფერს ვამბობ რადიკალების მართულ მედიაზე, რომლებიც კადრში აჩვენებდნენ სულ სხვა სურათს და საუბრობდნენ საპირისპიროზე. არასრულწლოვანები ისროდნენ ასაფეთქებელ საშუალებებს, აყენებდნენ სიტყვიერ და ფიზიკურ შეურაცხყოფას სამართალდამცველებს და ამ დროს მაყურებელს უმტკიცებდნენ, რომ არაფერი ხდებოდა“, - აღნიშნა კალაძემ.

„ქართული ოცნების“ აღმასრულებელმა მდივანმა, მამუკა მდინარაძემ განაცხადა, რომ როგორც კი ფიზიკური ძალადობის წყარო გამოაცალა სახელმწიფომ რადიკალურ ოპოზიციას, ისინი მორალურ და ფსიქოლოგიურ ძალადობაზე გადავიდნენ, რადგანაც სულით და ხორცით მოძალადეები არიან, იმიტომ რომ ჯაშუშის ხასიათი სხვა რამეს არ ითვალისწინებს.

„არც ამას ვლაპარაკობ შემთხვევით, ათეულობით რუსი ინსტრუქტორი შემთხვევით არ აღმოჩენილა, ყველა ოპოზიციონერი იყოო, იქ არ დამიწყოთ ახლა ამის მტკიცება. სად რა არის აღრეული და რომელი ინსტრუქტორი საიდან, რა მიზნით, არის ჩამოსული, თვითონ ვერ არკვევენ და ჩვენც გვიჭირს გარკვევა, მაგრამ საბოლოოდ მაინც ვერკვევით ამაშიც. შესაბამისად ამისა, ისინი იმართებიან პარტიული ოფისებიდან და შემდეგ იყოლიებენ. რა თქმა უნდა, ვიღაცა შეიძლება იყოს გულწრფელიც იქ და არის ასეთი შემთხვევებიც, მაგრამ ის გულწრფელი ადამიანები მეტწილად დგანან მშვიდობიანად და გუშინ, ამ მშვიდობიან აქციაზე, რომ გითხრათ, არ განძრეულა იქ არავინ და ერთი ქვა არ უსვრიათ, მთლად ეგრეც არ იყო, მაგრამ სადამდეც მოთმენა შეიძლება, იქ პოლიცია არ ინძრევა, ითმენენ, ვაჟკაცურად, თავისი მუნდირის და ღირსების შესაბამისად. მაგრამ როგორც კი გაუსაძლისია და პასუხის გარეშე შეუძლებელია მოგერიება, აქ გადადიან მოქმედებაზე და ამის გამო, ზოგიერთი ფაშისტი ტელევიზიის ჟურნალისტი დარბის, სახლებში ადგება მათ მშობლებს. წარმოიდგინეთ, რა ბულინგს ბედავენ, იქ მსახიობების, იქ სპეცრაზმელების. როგორც კი ფიზიკური ძალადობის წყარო გამოვაცალეთ, მორალურ და ფსიქოლოგიურ ძალადობაზე გადავიდნენ. სულით და ხორცით მოძალადეები არიან, იმიტომ რომ ჯაშუშის ხასიათი სხვა რამეს არ ითვალისწინებს. „ნაცის“ გენეტიკა ეს არის. აგენტობაზე ხელს რომ აწერ და ვიღაცის აგენტი რომ ხდები, მერე ყველაფერს კადრულობ“, - განაცხადა მამუკა მდინარაძემ.