მას შემდეგ, რაც მმართველმა გუნდმა ოპოზიციის ოფისებში ჩხრეკა ჩაატარა და რადიკალური ჯგუფების ხელმძღვანელები დააკავა, სიტუაცია ქვეყანაში მეტ-ნაკლებად ჩაცხრა. 4 დეკემბერს სასტუმრო „მარიოტში“ შეკრებილმა დაბნეულმა ოპოზიციამ ვერაფერი რომ ვეღარ მოიფიქრა, სამოქმედო გეგმად დაუმორჩილებლობა გამოაცხადა.
„ქართულ ოცნებაში“ კი ამბობენ, რომ ოპოზიციას არც გეგმა აქვს და არც სამოქმედო ტაქტიკა გააჩნია. მათი მიზანი რაც იყო, ხელისუფლებამ უკვე გამოააშკარავა და რესურსიც გახარჯულია. ოპოზიციის მიზანი იყო, რომ ქვეყანაში დესტაბილიზაცია და დაპირისპირება გამოეწვია, რათა ამის ხარჯზე ხელისუფლებაში მოსულიყო, თუმცა გეგმა ჩაუვარდათ და ნაცმაიდანი არ შედგა.
4 და 5 დეკემბერს კი პროტესტის ღამე ყველაზე მშვიდი აღმოჩნდა - აქციამ, პირველად ამ პერიოდის განმავლობაში, სპეციალური საპოლიციო ღონისძიებების გარეშე ჩაიარა.
სხვა ღამეებისგან განსხვავებით, დემონსტრანტებმა რამდენიმე ერთეული პიროტექნიკა გამოიყენეს, პირველად არ ყოფილა ფიზიკური დაპირისპირება საპოლიციო ძალებსა და აქციის მონაწილეებს შორის. იყო მხოლოდ სიტყვიერი შელაპარაკების რამდენიმე ეპიზოდი.
ამ ფაქტს „ქართული ოცნება“ უკავშირებს ოპოზიციის ოფისებში ჩატარებულ ჩხრეკას. სახელისუფლებო პარტიისთვის ელენე ხოშტარიას გაკეთებული განცხადება არის ამის დასტური - ოპოზიციონერმა პოლიტიკოსმა საკუთარ ოფისში მიმდინარე საპოლიციო ღონისძიებების პარალელურად თქვა, რომ არის ადგილზე აქციისთვის საჭირო აღჭურვილობა, რომელსაც მომავალშიც შეიძენენ და ამაზე პასუხისმგებლობას, როგორც ერთ-ერთი ორგანიზატორი, თავადაც იღებს.
მმართველი გუნდის განცხადებით, ელენე ხოშტარიას ეს განცხადება აღიარებაა.
ოპოზიციაში კი ამბობენ, რომ ახალი გეგმა და მოქმედებაა საჭირო იმისთვის, რომ დაწყებული დაკავებების ფონზე, საპროტესტო მუხტი არ შეწყდეს. ამიტომ ოპოზიცია გაერთიანებული საინფორმაციო ცენტრის ამოქმედებას აანონსებს - როგორც პარტიების წარმომადგენლებმა თქვეს, აქ საზოგადოებას სისტემატიურად მიაწვდიან ინფორმაციას ქვეყანაში განვითარებული პროცესების შესახებ.
ერთობლივ ბრიფინგზე ითქვა, რომ გააგრძელებენ დასავლელ პარტნიორებთან სანქციების მიმართულებით მუშაობას.
„არის სრული ერთობა იმისთვის, რომ ივანიშვილს ქვეყანა რუსეთში არ გავატანოთ“, - ამბობს კოალიცია „ძლიერი საქართველოს“ ლიდერი მამუკა ხაზარაძე.
პარტია „გახარია საქართველოსთვის“ წევრის, თეონა აქუბარდიას განცხადებით, ოპოზიციური პარტიები საჯარო მოხელეების დაცვაზე იზრუნებენ და ამასთან, ევროპელ პარტნიორებთან ერთად, სანქციების საკითხებზე იმუშავებენ.
„ნაცმაიდანი“ უკვე ჩავარდნილია“, - ამბობს საქართველოს პრემიერ-მინისტრი ირაკლი კობახიძე.
მთავრობის მეთაურის თქმით, ოპოზიციის მოწოდებები საყოველთაო გაფიცვის შესახებ, სასოწარკვეთილი გზავნილებია.
„მათ აქვთ გარკვეული რესურსი, ეს არის ლიბერალურ-ფაშისტური რესურსი, რომელიც იქმნებოდა უცხოური დაფინანსებით და პრაქტიკულად, ეს რესურსი უკვე მაქსიმალურად გამოფინეს გარეთ. ამის იქით მათ დიდი რესურსი რეალურად აღარ აქვთ, შესაბამისად, „ნაცმაიდნის“ ჩავარდნილი მცდელობის ხელახლა გაღვიძება ისეთივე წარუმატებლობისთვის არის განწირული, როგორც იყო წინა ოთხი „ნაცმაიდნის“ მცდელობა. აქედან გამომდინარე, მათ ამის არავითარი რესურსი არ აქვთ“, - აღნიშნა ირაკლი კობახიძემ.
ანალიტიკოსი ედიშერ გვენეტაძე for.ge-სთან ამბობს, რომ ოპოზიცია, მას შემდეგ, რაც სახელმწიფო გადატრიალება ჩაუვარდათ, წყალწაღებულები ხავს ეკიდება. დაბორიალობენ უგზო-უკვლოდ და აღარ იციან რა გააკეთონ. ანალიტიკოსის თქმით, მათ რომ რეალურად შეძლებოდათ ქვეყანაში საყოველთაო დაუმორჩილებლობა, აქამდე იზამდნენ, მაგრამ ამის რესურსი სად აქვთ.
„რა საყოველთაო დაუმორჩლებლობა და რა გაფიცვა, ამათ სიტყვაზე ხალხი აივანზე არ გამოვა. რომელ გაფიცვასა და დაუმორჩილებლობაზეა საუბარი? მთელ იმედებს რუსთაველზე მორბენალ ბავშვებზე ამყარებდნენ და ფულის სანაცვლოდ პოლიციას აცემინებდნენ. ახლა, დავინახეთ, ეს რესურსიც ხელიდან გამოეცალათ. მათი მთელი შესაძლებლობა იყო ის, რომ უცოხეთიდან შემოსული დიდი თანხების სანაცვლოდ, აქ რევოლუცია მოეწყოთ. უბრალოდ, აი, ამათ პატრონების თავში ჩამახედა, ჭიჭე ვაშაძეს, ხაბეიშვილს, ხაზარაძეს, ხოშტარიას, ჯაფარიძეს და დანარჩენ მათგანს ფულს რევოლუციის მოწყობაში რომ მისცემენ. ამათ რევოლუციის მოწყობა კი არა, აქციაზე კარავში შესვლა არ უნდათ. რომელი რევოლუციის მომწყობები ესენი არიან, რუსთაველზე სპეცრაზმს საჩხუბრად ბავშვები მიუსიეს, თვითონ კიდევ სასტუმროებში იმალებოდნენ. კაციშვილი არ ჰყავთ ლიდერი, რომელიც პროცესებს გონივრულად მაინც დაგეგმავს. უცხოელი ინსტრუქტორები ჰყავდათ ჩამოყვანილი, რომ გადატრიალება მოეხდინათ, მაგრამ ეს 7 დღე ისე ტატქიკურად და გონივრულად იმოქმედა ხელისუფლებამ, რომ ვერაფერიც ვერ შეძლეს. ამიტომ, ახლა, სადღაც შეშინებულები რომ იკრიბებიან და კიდევ ატყუებენ ხალხს დაუმორჩილებლობა გამოაცხდეთო, უკვე მეცოდებიან“, - ამბობს გვენეტაძე.
მისივე თქმით, სჯობია ხაზარაძე რომ საკუთარი პარლამენტი შექმნას აპირებს, იქ წაიყვანოს სალომე ზურაბიშვილი და დაისვან. ანალიტიკოსის აზრით, ოპოზიციის საშველი არაფერია, რადგან ნოემბრის მოვლენების შემდეგ საკუთარ თავს ისეთი განაჩენი გამოუტანეს, რომ საბოლოოდ ჩაირეცხენ. თუმცა პასუხი მათაც უნდა აგონ და იმედია ხელისუფლება მათ სამართლებრივ პასუხისმგებლობის საკითხსაც დააყენებს.
„საგარეო საქმეთა მინისტრი ეუთოს მინისტერიალზე იმყოფება და ის ოფიციალურ შეხვედრებს მართავს. ასევე ეუთო /ოდირმა გასაგებად აუხსნა ოპოზიციასაც და დასავლეთსაც, რომ არჩევნები არ გაყალბებულა და მას შედეგზე არ მოუხდენია ისეთი გავლენა, რომ მისი შედეგი კითხვის ნიშნის ქვეშ დადგეს. ამიტომ ოპოზიცია ახლა ისეა გაკოტრებული პოლიტიკურად, რომ აღარც ქვეყნის შიგნით და აღარც ქვეყნის გარეთ კაცი არ ეყოლებათ მომკითხავი“, - ამბობს გვენეტაძე.
მედია პოლიტიკის ექსპერტი გიორგი ახვლედიანი კი ამბობს, რომ, როცა ხალხში პროტესტია, პარლამენტთან ოპოზიცია მას თავად მიჰყავს. ახვლედიანი for.ge-სთან ამბობს, რომ ის, რაც რუსთაველის გამზირზე ამ დღეებში ხდებოდა, ეს პროტესტი არ ყოფილა, ეს იყო საბოტაჟი და ომი ქართველ ხალხთან. ხალხმა კი ამ ომის განხორციელებაში მხარი არ აუბა მათ. ამიტომ მათი მხრიდან გაფიცვაზე და საყოველთაო დაუმორჩილებლობაზე საუბარი აბსურდია.
„წარმოიდგინეთ, ამ ყველაფერს პატარა ბავშვების ხელით აკეთებენ. ოღონდ ამას ვერ დავარქმევთ მცირეწლოვანთა პროტესტს, ამას ჰქვია ბოდიში და „მალალეტკების ბეზპრიძელი“. ამათ ჰგონიათ, რომ აი, ხელისუფლება ქუჩაში გდია და ამ „მალალეტკების“ ხელით შეძლებენ მის აღებას. უკრაინაში იანუკოვიჩის ხელისუფლება იყო კორუფციაში ჩამხრჩვალი. ახლა ასეა? ხელისუფლება სისტემურად ძლიერია, თუ არ ჩავთვლით თითო-ოროლა კაცს, რომლებმაც რაღაცა დაწერეს და ვითომ პეტიციები გამოაქვეყნეს. ეგეც ხელოვნურად წინასწარ იყო დაგეგმილი. ჩვენს ქვეყანაში კი არსებობს ხელისუფლება, რომელიც აგერ, უკვე, მეოთხედ, საზოგადოების მხრიდან მხარდაჭერილია. ასეთი რამ საქართველოში ჯერ არ მომხდარა. იშვიათად ხდება, რომ ამდენჯერ ლეგიტიმაცია ხელისუფლებამ მიიღოს.
ასე რომ, „ოცნების“ ხელისუფლება ძალიან მყარად დგას. ვნახეთ, ძალოვანი სტრუქტურები ამხელა წნეხს როგორ უძლებდნენ. 3-მილიონიან ქვეყანაში, მილიონ ორასი ათასი ადამიანი მხარს „ოცნებას“ უჭერს. ოპოზიციას რვაასი ათასი ხმით მოუგო. ეს იმას ნიშნავს, რომ საზოგადოებას უნდა ის, ვინც აირჩია და არავითარი რევოლუცია ხალხს არ სურს. ისევ ეს პროექტი უნდა ამუშავდეს. რაღაცა პოლიტიკურ უმრავლესობას დასავლეთიდან ამ ლიბერალების მხრიდან კარტბლანში აქვს მიცემული, რათა ხელისუფლება ამ მაიდანის პროექტით გადაატრიალონ. ეს ადამიანები ხელს აწერენ იმაზე, რომ პატარა ბავშვები მოკვდნენ“, - ამბობს ახვლედიანი.
მისივე თქმით, მასობრივი დაუმორჩილებოლბაა, როცა მთელი საწარმო, ბიზნესი, დაწესებულებები, საზოგადოებრივი ტრანსპორტი, საჯარო სამსახურები გაფიცვაზე მიდის. ანალიტიკოსის თქმით, იმიტომ უნდა გაიფიცონ, რომ ჭიჭე ვაშაძეს ხელისუფლებაში მოსვლა უნდა?!
„არჩევნებზე საზოგადოებას ვერ არწმუნებენ, რომ ხმა მისცენ და ახლა ამავე საზოგადოებას დაარმწუნებენ იმაში, რომ მათი სკამების გულისთვის გაიფიცონ, არ იმუშაონ, ქვეყანაში არეულობა დაიწყონ და სახელმწიფო გადატრილება მოაწყონ? თვითონაც კარგად იციან, რომ მსგავსი რამ გამორიცხულია და უკვე პარანოიაში არიან. ხვდებიან, რომ პასუხისგება მოუწევთ და აღარ იციან რა ილაპარაკონ“, - ამბობს ახვლედიანი.
