რადიკალების ახალი სტრატეგია - გასაჯაროვდა სპეცრაზმელთა სიები და ოჯახის წევრებს სახლში მიუვარდნენ ბრალდებით, რომ მათი შვილები არიან რუსული ომონის წევრები. კერძოდ, „მთავარმა არხმა“ გამოაქვეყნა იმ სპეცრაზმელების სია, რომლებიც, მათი ინფორმაციით, აქციის მონაწილეთა დარბევასა და დაკავებებში მონაწილეობენ. მათივე ცნობით, აღნიშნული სია შინაგან საქმეთა სამინისტროდან ფარულად მიაწოდეს. ის, რასაც აღნიშნული ტელეკომპანია აკეთებს, არის სისხლის სამართლის დანაშაული.

რადიკალური ოპოზიციის დაქვემდებარებში მყოფი ჟურნალისტები სახლში მიუვარდნენ ერთ-ერთი სპეცრაზმელის პენსიონერ მშობლებს, რის შედეგად ხანდაზმულმა მამაკაცმა გონება დაკარგა.

„ისე სწრაფად შემოვარდა ეს ქალი, მორბოდა ჩემკენ. მე ვუთხარი, გამარკვიე რაშია საქმე. მან მითხრა, რომ შენი შვილი დაფიქსირებული არის დარბევაშიო. ჩემი შვილი წუხელ მოვიდა სახლში, გორში საზღვარზე იდგა 10 დღე, არ გასულა აქციაზე. გონება დავკარგე, გავითიშე კაცი, ყველანაირად ძალა დავკარგე. სასწრაფო მოვიდა და ძლივს მომისწრო“, - იხსენებს სპეცრაზმელის მამა.

სპეცრაზმელის დედა, „ქრონიკასთან“ იხსენებს, როგორ მივარდა მასთან ოპოზიციური არხის ჟურნალისტი და აღნიშნავს, რომ ჟურნალისტმა მას სიტყვიერი შეურაცხყოფა მიაყენა.

„შემოვარდნენ, მეგონა ჩემი შვილი იყო მკვდარი. შეურაცხყოფა მომაყენა, მეუბნებოდა, სხვის შვილს რომ სცემს შენი შვილი, ახლა რას იტყვიო. ჩემი მეუღლე ცუდად გახდა, დაეცა და პირთან მიუტანა მიკროფონი და კიდევ ეკითხებოდა რაღაცებს. რომ მომივარდა სახლში, ხომ უნდა გაეკითხა, ვინ ცხოვრობდა... ავადმყოფი ცოლ-ქმარი ვართ...“, - განაცხადა სპეცრაზმელის დედამ.

„ქართული ოცნების“ ერთ-ერთი ლიდერი მამუკა მდინარაძე აცხადებს, რომ ეს არის აგონიის შედეგად მიღებული გადაწყვეტილება, აედევნონ პოლიციელებს. თუმცა, მისივე თქმით, ბულინგის არავის ეშინია.

„ეს არის აგონიის შედეგად მიღებული გადაწყვეტილება, რომ აედევნონ პოლიციელებს, აედევნონ ადამიანებს, ბულინგი განახორციელონ ადამიანების მიმართ, ვინც მათ არ მოსწონთ და ვინც მათ გეგმებს არ შეესატყვისება. 30 და 35 წელს ვინც არის გადაშორებული, 10-იდან 9, შეიძლება, 2008 წლის ომის ვეტერანი იყოს. რას ავრცელებთ, ხომ არ გააფრინეთ? გუშინ მედია იყო ირაკლი კობახიძესთან? ესაა ჟურნალისტიკა? ცოტა დაფიქრდნენ, რას აკეთებენ, ხომ არ გაგიჟდნენ მართლა, რა სპეცრაზმელების ვინაობას ავრცელებს? ვინ არის, ვინ შლის, ვინ არ შლის, ვინ ამეტებს უფლებამოსილებას?

დავუშვათ, გვქონდა ასეთი ერთი, ორი ფაქტი. ჩვენ თავად დავგმეთ და არ მოგვეწონა. მაგრამ 1000-დან 999 რომ ზედმიწევნით კეთილსინდისიერად იქცევა, რას აქვეყნებ? ვის უქვეყნებ? რა პირად მონაცემებს... სულ გაგიჟდნენ? თან თავის თავსაც რისკის ქვეშ აყენებენ, იმდენად აგონიაში არიან. ამას სამართლებრივი შეფასება სჭირდება, აქ შესაფასებელია, ხომ არ არის სისხლის სამართლის წესით გათვალისწინებული დანაშაულის ნიშნები? ადევნება... მათი ბულინგის არავის ეშინია!“, - განაცხადა მამუკა მდინარაძემ.

„ყველა პოლიციელი, რომლის სახელი და გვარი ოპოზიციამ გაასაჯაროვა, შექებას იმსახურებს“, - აცხადებს „ხალხის ძალის“ წევრი გურამ მაჭარაშვილი, რომლის განცხადებით, ისინი თავისი ჯანმრთელობის და ოჯახის ბულინგის ფასად, საქართველოს სუვერენიტეტს და მშვიდობას იცავენ.

„ყველა პოლიციელი, რომლის სახელი და გვარი ოპოზიციამ გაასაჯაროვა, შექებას იმსახურებს. კარგია, რომ საზოგადოება იმ პოლიციელებს გაიცნობს, ვინც თავისი ჯანმრთელობის და ოჯახის ბულინგის ფასად, საქართველოს სუვერენიტეტს და მშვიდობას იცავს“, - აცხადებს გურამ მაჭარაშვილი.

ანალიტიკოსის, „ხალხის ძალის“ წევრის, დავით ქართველიშვილის შეფასებით, საქართველოში დემონსტრაციების დაშლაში მონაწილე პოლიციელთა სახელების გამჟღავნებას არეგულირებს „პერსონალურ მონაცემთა დაცვის შესახებ“ საქართველოს კანონი. ეს კანონი მიზნად ისახავს პერსონალური მონაცემების დამუშავებისას ადამიანის ძირითადი უფლებებისა და თავისუფლებების, მათ შორის პირადი ცხოვრების ხელშეუხებლობის დაცვის უზრუნველყოფას.

„კანონის მე-3 მუხლის „ა“ პუნქტის მიხედვით, პერსონალური მონაცემი არის ნებისმიერი ინფორმაცია, რომელიც იდენტიფიცირებულ ან იდენტიფიცირებად ფიზიკურ პირს უკავშირდება. ამგვარად, პოლიციელთა სახელები პერსონალურ მონაცემებად ითვლება, რადგან მათი იდენტიფიცირება შესაძლებელია.

პერსონალური მონაცემების დამუშავება, მათ შორის გამჟღავნება, დასაშვებია მხოლოდ კანონით განსაზღვრული საფუძვლების არსებობის შემთხვევაში, როგორიცაა მონაცემთა სუბიექტის თანხმობა ან სხვა სამართლებრივი საფუძველი. ამ მოთხოვნების დარღვევა იწვევს სამართლებრივ პასუხისმგებლობას. გარდა ამისა, საქართველოს სისხლის სამართლის კოდექსის 157-ე მუხლი განსაზღვრავს პასუხისმგებლობას პირადი ან ოჯახური საიდუმლოების უკანონოდ მოპოვებისა და გავრცელებისთვის, რაც შესაძლოა, გამოყენებულ იქნას პოლიციელთა პერსონალური მონაცემების უკანონო გამჟღავნების შემთხვევებში.

ამრიგად, საქართველოში პოლიციელთა სახელების, როგორც პერსონალური მონაცემების, გამჟღავნება დასაშვებია მხოლოდ შესაბამისი სამართლებრივი საფუძვლების არსებობის შემთხვევაში. ამ მოთხოვნების დარღვევა იწვევს სამართლებრივ პასუხისმგებლობას, მათ შორის ადმინისტრაციულ ან სისხლის სამართლებრივ პასუხისმგებლობას, კონკრეტული შემთხვევის გარემოებების გათვალისწინებით“, - წერს დავით ქართველიშვილი.

ექსპერტი უსაფრთხოების საკითხებში დავით კუხალაშვილი თვლის, რომ პოლიციელებზე მასიური ძალადობა, დამცირება-შეუარაცხყოფის მაღალი მასშტაბები უზრუნველყოფილია უცხო ქვეყნების სადაზვერვო სამსახურებისათვის ხელსაყრეყრელი პროპაგანდით, რომელიც ხორციელდება დესტრუქციული პარტიების, მათ კონტროლს დაქვემდებარებული მასმედიის საშუალებებით, ანტისახელმწიფოებრივი იდეოლოგიის მქადაგებელი ლექტორებითა და მასწავლებლებით, კრიმინალური ჯგუფებით. კუხალაშვილი თვლის, რომ ვითარება მყარ და სისტემურ ოპერატიულ კონტროლს უნდა დაექვემდებაროს. უმნიშვნელოვანესია პრევენციული ღონისძიებები.

„ეს არის პროცესი, რომელსაც შეიძლება მოჰყვეს ანგარისწორება სპეცსამსახურების და შსს-ს დანაყოფებზე და მათი ოჯახის წევრების წინააღმდეგ. ეს განეკუთვნება სრულიად საიდუმლო ინფორმაციებს და მათ შესახებ ინფორმაციები ღია წყაროებში არ უნდა ვრცელდებოდეს. აქედან გამომდინარე, არსებობს ორი ვარიანტი და მე ერთ ვარიანტზე გავამახვილებდი ყურადღებას.

სუს-დან ინფორმაცია თუ ახალი თანამშრომლებიდან არის გამოსული, ამ შემთხვევაში, შეიძლება ვისაუბროთ, რომ რეალურად, საიდუმლო ინფორმაციის გაჟონვა მოხდა სისტემიდან. მაგრამ, თუ ესენი არიან 2012 წლამდე თანამშრომლები, ამ შემთხვევაში, ყოფილი ხელისუფლების წევრებს გატანილი აქვთ მნიშვნელოვანი ბაზები, რომლითაც საფრთხის ქვეშ დგება ეროვნული უსაფრთხოება.

როდესაც ვსაუბრობთ საიდუმლო ინფორმაციის გავრცელებაზე, ეს არის სისხლის სამართლის დანაშაული და ვფიქრობ, რომ აუცილებელად უნდა დაიწყოს სისხლის სამართლებრივი დევნა და უნდა გაირკვეს, ვინ მონაწილეობდა ამ პროცესებში. ჟუნრალისტს რომ არ აქვს ელემენტარული ეთიკა, ჯურნალისტი რომ არასახელმწიფოებრივად აზროვნებს, ესეც არის იმის დადასტურება, რაც მოხდა.

ჟურნალისტმა უნდა იცოდეს, რა არის საიდუმლო ინფორმაცია და რა არა. მათ უნდა ჰყავდეთ იურისტები, რომლებიც აუცილებლად უნდა აკეთებდნენ სათანადო ინფორმაციას რამდენად მიზანშეწონილია ამ ინფორმაციის გამოქვეყნება და ხომ არ ირღვევა კანონმდებლობა. მე ვფიქრობ, რომ ამ შემთხვევაში, სისხლის სამართლის დანაშაულის ნიშნები არსებობს“, - აცხადებს for.ge-სთან საუბრისას დავით კუხალაშვილი.

პოლიტოლოგ რამაზ საყვარელიძის განცხადებით, ბულინგის დროს წარმოუდგენელია ვისაუბროთ ეთიკურობაზე. მისი თქმით, ეს არის ბულინგი, მაგრამ ამ შემთხვევაში დიდი მასშტაბის ბულინგს ვაკვირდებით.

„საბოლოო ჯამში, შეიძლება ეს განვიხილოთ როგორც შურისძიების ფორმა. ეს მართლა იმით ხომ არაა განპირობებული, რომ ერთმა პოლიციელმა ვიღაცა გალახა?! ნებისმიერ შემთხვევაში, როცა გამოიწვევ პოლიციელს, რომ ის ჩაერთოს პროცესში, ცხადია, ის ნაზად და ფაქიზად ვერ ჩაერთვება და როგორც წესი, ფიზიკურად მტკივნეულია პოლიციელის ჩართვა ასეთ პროცესში. თუმცა, რეალურად, პოლიცია ჩაერთო თუ არა, და მერე რა მოხდა, ეს ხომ არ აინტერესებთ ამათ?! რეალურად, აქ უფრო დიდი მასშტაბია აღებული - ფოირვერკებით პროვოცირება, რომ პოლიცია ჩაერთოს და მერე, უკვე, ბულინგი ჩაერთოს როგორც შიგნით, ისე საერთაშორისო დონეზე და გაკეთდეს უცხოელების შეფასება, რომ ხელისუფლების მიერ ძალის გადამეტებას არ ჰქონდეს ადგილი. მაგრამ მეორე მხრიდან, იყო თუ არა ძალა, ამაზე გაჩუმებული არიან. დიდი სცენარია“, - აღნიშნა for.ge-სთან საუბრისას რამაზ საყვარელიძემ.