4 დეკემბერს 22:00 საათზე, „საზოგადოებრივი მაუწყებლის“ ეთერში დაგეგმილი იყო დებატები, რომელშიც ირაკლი კობახიძესთან და შალვა პაპუაშვილთან ერთად მონაწილეობა უნდა მიეღოთ „ქართული ოცნების“ ყოფილ მინისტრებს, თინა ხიდაშელს და მიხეილ ჯანელიძეს. თუმცა ეს დებატები  ჯანელიძის უარის შემდეგ ჩავარდა. ჯანელიძემ პოზიცია 4 დეკემბერს საღამოს შეიცვალა და ეს საზოგადოების მხრიდან უარყოფითი რეაქციით ახსნა, ამის შემდეგ დებატებზე უარი ხიდაშელმაც განაცხადა.

არადა, დებატების ეს ფორმა ხიდაშელმა მოითხოვა, რასაც წინ უძღოდა ირაკლი კობახიძის განცხადება, რომელმაც ოპონენტებს ღია ეთერში დისკუსია თავად შესთავაზა.

ჯანელიძე სოციალურ ქსელში წერს, რომ ამის მიზეზი დებატებთან დაკავშირებით საზოგადოების ნეგატიური რეაქციაა. მისივე განმარტებით, არ სურს, მისმა ქმედებამ რაიმე სახის ლეგიტიმაციის შესახებ ეჭვი გააჩინოს.

„1. მე არავის სახელით არ ვსაუბრობ. არ წარმოვადგენ რომელიმე პოლიტიკურ პარტიას ან ჯგუფს. არ ვაწარმოებ არანაირ მოლაპარაკებებს.

2. საზოგადოებრივ მაუწყებელზე ჩემი მისვლის ერთადერთი მიზანი არის, რომ ადამიანებს, რომლებიც რუსული პროპაგანდის გავლენის ქვეშ არიან, მათთან მივიტანო პროტესტი. ყველას გვყავს ასეთი ადამიანები ჩვენს გარშემო.

3. ირაკლი კობახიძის სტუდიაში ყოფნა ასეთი აუდიტორიის მეტ ყურადღებას გამოიწვევს. ის ჩემთვის დიდი ხანია არაფერს წარმოადგენს.

4. ძალა ერთობაშია!

„პირველი არხი“ - ჯერ არავინ დამკავშირებია თქვენგან“, - წერს ჯანელიძე Facebook-ზე.

„პაპუნას გზავნილის შემდეგ დებატები არ იქნება. იმის მიუხედავად, რა და როგორ მიმაჩნია სწორედ, ამას აღარ აქვს მნიშვნელობა“, - დაწერა ხიდაშელმა სოციალურ ქსელში.

ირაკლი კობახიძემ სპეციალურ ბრიფინგზე გაუქმებულ დისკუსიაზე ისაუბრა. მისი თქმით, პაპუნა ჯანელიძე და თინა ხიდაშელი მხოლოდ იმიტომ დათანხმდნენ ამ ფორმატს, რომ წინასწარ იცოდნენ, ის არ შედგებოდა.

„როგორც ცნობილი გახდა, როგორც პაპუნა ჯანელიძემ, ისე თინა ხიდაშელმა უარი თქვეს საჯარო დისკუსიაში მონაწილეობაზე. ეს ორი ადამიანი გახლავთ ორი საშუალო არითმეტიკული ნაციონალი, შესაბამისად, მათთან ჩვენი დისკუსია საზოგადოებას მისცემდა განზოგადების საშუალებას და სიმართლის დადგენის შესაძლებლობას.

მათი უარი საჯარო დისკუსიაზე ნიშნავს ერთადერთ რამეს - სიმართლე არის ჩვენს მხარეს და მათ ეშინიათ ნებისმიერი საჯარო დისკუსიის, სწორედ ამის გამო. რადიკალურმა ოპოზიციამ ზუსტად იცის, რომ არაფერი აქვს სათქმელი არაფერთან დაკავშირებით, მათ შორის, არც ჩვენს გადაწყვეტილებასთან დაკავშირებით.

თქვენ ხედავდით, რომ ამ ორ ადამიანზე იყო ლიბერალურ-ფაშისტური ბულინგი, თუმცა მგონია, რომ ეს ბულინგიც იყო აშკარად დალაგებული, ისინიც აშკარად თავს იკავებდნენ საჯარო დისკუსიისგან. მათ, რეალურად, ამ დისკუსიაზე თანხმობა განაცხადეს იმ გათვლით, რომ საბოლოო ჯამში, ეს ფორმატი არ შედგებოდა“, - განაცხადა ირაკლი კობახიძემ.

ანალიტიკოსი გია აბაშიძე for.ge-სთან ამბობს, რომ აშკარაა რადიკალური ოპოზიცია დაბნეულია და ეს არა მხოლოდ ამ ჩაშლილ დებატებში გამოჩნდა, არამედ სხვადასხვა აქტივობებიდანაც ნათლად იკვეთება. აბაშიძე ამბობს, რომ ამას პოლიტიკური აქტივიზმი აღარ ჰქვია, ეს არის ექსტრემიზმი.

„სამწუხაროდ, ოპოზიცია ცდილობს ჩვენი ახალგაზრდების გამოყენებას და ამას ყველაზე საშინელი ხერხებით აკეთებს. ერთი მხრივ, დიდი ხნის წიან დატრეინინგებულ ჩვენს ახალგაზრდებს იყენებენ და მეორე მხრივ, მეორე ნაწილის შეცდომაში შეყვანით მათი ემოციებით რადიკალიზმის გაღვივება უნდათ. დასავლელი ინსტრუქტორებით ცდილობენ უკვე 7 დღეა ქვეყანაში რევოლუციას, თანაც ისე, რომ თავად სასტუმროებში არიან დამალულები. რაც შეეხება ამ დებატებს, აქ არის ორი ვერსია. ერთი, რომ თინა ხიდაშელი და პაპუნა ჯანელიძე, რომლებიც პოლიტიკურ სივრცეში არაფერს წარმოადგენენ, არ შეათანხმებდნენ რადიკალურ ოპოზიციასთან. მეორე ვერსიაა, რომელიც უფრო დამაჯერებელია - შეთანხმებულები იყვნენ, მაგრამ როცა მიხვდნენ და, ალბათ, ურჩიეს კიდეც, რომ ირაკლი კობახიძესთან და შალვა პაპუაშვილთან ათასით ნულს წააგებდნენ, სჯობდა ამ დებატებზე საერთოდ უარი ეთქვათ. ეს უარი კი ძალიან უსუსური არგუმენტებით ახსნეს. თითქოს ხალხი მათ ამუნათებდა და ეს საზოგადოებაში დისონანს შეიტანდა.

მე მახსენდება რამდენიმე წლის წინ, როცა პარლამენტის თავმდჯომარე ირაკლი კობახიძეს და ყოფილ თავმჯდომარეს, დავით უსუფაშვილს კონსტიტუციაზე ტელედებატები ჰქონდათ. მაშინაც უსუფაშვილი კობახიძესთან ძალიან მშრალად დამარცხდა. ვერანაირი არგუმენტები ვერ მოიტანა კონსტიტუციურ ცვლილებებზე, რომელსაც მაშინდელი „ქართული ოცნება“ აპირებდა. ახლა სად პაპუნა ჯანელიძის და სად დავით უსუფაშვილის ინტელექტი, მით უმეტეს ხიადშელის და მისი მეუღლის ინტელექტი ერთნაირი არ არის“, - ამბობს აბაშიძე.

მისივე თქმით, ფაქტია, რომ რადიკალურმა ოპოზიციამ ამ ტელედებატებში სხვა ფიგურების წარმოდგენა ვერ შეძლო. აბაშიძე ასევე პრეზიდენტ სალომე ზურაბიშვილის იმპიჩმენტის განხილვას იხსენებს და ამბობს, რომ იქაც, ზურაბიშვილის წარმომადგენლებს, მათ შორის თამარ ჩუგოშვილს, კობახიძემ აჯობა. მათ პრემიერთან იურდიულ დებატებში პირწმინდად წააგეს.

„როცა სიმართლე რევანშისტების მხარეს არ არის, იქ მანიპულაციებით ვერაფერი ვერ გამოუვათ, ვერც ირაკლი კობახიძესთან, ვერც მმართველი გუნდის სხვა წევრებთან. ფაქტია, რომ ტელედებატების კარი ღიაა, უკან პრემიერს არ დაუხევია და ელოდება ოპოზიცია ამ ტელედებატებისთვის ვინმეს თუ წარმოადგენს. ყველა ფორმატში პრემიერ-მინისტრი და პარალმენტის თავმჯდომარე მზად არის. ყველაფერში ჩამორჩენილი და ჩაკარგული რადიკალები ამ ნაბიჯს ვერაფრით გადადგამენ“, - ამბობს აბაშიძე.