საქართველოს პრეზიდენტმა, სალომე ზურაბიშვილმა განცხადება გაავრცელა და საქართველოს პარტნიორ სახელმწიფოებს მმართველ პარტიაზე ზეწოლის მოხდენისკენ მოუწოდა, თუმცა არ აღუნიშნავს, კონკრეტულად რა ნაბიჯებს ელოდება ის დასავლეთისგან. ექსპერტთა ნაწილი არ გამორიცხავს „ქართული ოცნების“ ლიდერებზე სანქციების დაწესებას, ყველაზე ცუდ შემთხვევაში კი, საქართველოსთვის უვიზო მიმოსვლის შეჩერებას, რამაც შესაძლოა ქვეყანაში ისედაც დაძაბული მდგომარეობა, მეტად გააუარესოს.

„რეპრესიები საქართველოში - სასწრაფოდ მოვუწოდებ ჩვენს პარტნიორებს და მათ, ვისაც სურთ აღკვეთონ კრიზისის გაღრმავება და არასტაბილურობა, დროა ძლიერი ზეწოლა მოახდინოთ მმართველ პარტიაზე, რომელიც ქვეყანას კლდიდან აგდებს! ნუ დააგვიანებთ.

რეპრესიული ძალების მიერ ნათრევი პოლიტიკური ლიდერები, პარტიის შტაბი ეწინააღმდეგება ჩხრეკისა და ამოღების ოპერაციებს, ახალგაზრდა მომიტინგეების ოფისებს ჩხრეკენ, პრემიერი ამას „პრევენციას“ უწოდებს“, - დაწერა პრეზიდენტმა სოციალურ პლატფორმა X-ზე.

ანალიტიკოსი ედიშერ გვენეტაძე For.ge-სთან საუბარში ამბობს, რომ სალომე ზურაბიშვილს ბოლო მცდელობა დარჩა ქვეყანაში არეულობის მოსაწყობად, რადგან ის სულ მალე საქართველოს პრეზიდენტი აღარ იქნება. გვენეტაძე მიიჩნევს, რომ დასავლეთი არ წავა ისეთ ნაბიჯზე, როგორიც არის საქართველოსთვის უვიზო მიმოსვლის შეჩერება, რადგან მისი შეფასებით, „ეს იქნება საქართველოს დასჯა“.

„ამ ქალბატონმა კიდევ ერთხელ დაამტკიცა, რომ ის არის უცხო სახელმწიფოთა აგენტი. მისი განცხადებები და მოწოდებები მახსენებს თბილისიდან 1921 წელს გაგზავნილ მოხსენებებს მოსკოვში იმის შესახებ, რომ დროა, დაგვეხმაროთ და მოგვცეთ უფლება ავიღოთ ქალაქიო - იქიდან მოდიოდა დასტური, „აიღეთ ქალაქი“, - ზუსტად ანალოგიური სიტუაციაა. როდესაც ზურაბიშვილი ევროკავშირს მიმართავს, ეს არის მისი ბოლო მცდელობა - მას დარჩა ზუსტად 10 დღე და ამის შემდეგ ის პრეზიდენტი აღარ იქნება. მისი პატრონებიც ამის შესახებ ძალიან ნერვიულობენ, რადგან მათ აქ დიდი ფული აქვთ ჩადებული და ეს ყველაფერი წყალში ეყრებათ.

არ გამოვრიცხავ, რომ დასავლეთის მხრიდან იყოს გაუაზრებელი ქმედებები, რაც იქნება მყვირალა, მაგრამ დიდი მოლოდინი არ მაქვს იმის, რომ საქართველოს შეუწყდება ვიზალიბერალიზაცია - ეს იქნება საქართველოს დასჯა იმისათვის, რომ საქართველო არ ჩაება ომში, ქართველმა ხალხმა არ აირჩია ოპოზიცია, რომელიც განადგურებით ემუქრება ქართულ სახელმწიფოს და ვიზალიბერალიზაციის შეწყვეტა იქნება კიდევ ერთი უსუსურობის გამოვლენა, რომელსაც დღევანდელი დასავლურური რეჟიმი მიმართავს საქართველოს წინააღმდეგ“, - განგვიცხადა ედიშერ გვენეტაძემ.

ანალიტიკოსი ვახტანგ ძაბირაძე თვლის, რომ ზურაბიშვილის მოწოდება სწორი და დროულია. მისი განცხადებით, დასავლეთი საბოლოოდ, ალბათ, მივა ვიზალიბერალიზაციის შეჩერების საკითხამდე.

„სანქციებზე ძალიან რეალურია საუბარი. მესმის ზურაბიშვილის მოწოდების, რადგან ხელისუფლება მუდმივად ატრიალებს ერთსა და იგივეს - ცრუ იმედებს აჩენს და ცდილობს, რომ ამით პროტესტის ტალღა გადააგოროს. ამიტომ, თუ სანქციების დაწესებას და რეალური ნაბიჯების გადადგმას აპირებენ, რაზეც საუბარია, ჯობია ეს დროულად გადაიდგას, რომ ხელისუფლებას სალაპარაკოდ წაერთვას ეს თემა და პროპაგანდა ვერ შეძლოს - ჩვენი გულუბრყვილო საზოგადოების ნაწილის დარწმუნებას, რომ ჩვენ დავალაგებთ, წავალთ ევროპაში და ა.შ.

ქვეყანაში ძალიან მძიმე ვითარება გვაქვს, ურთულესი მდგომარეობაა - კაცმა არ იცის რა ჯობია - ჯობს ახლავე, ზეწოლის შედეგად ხელისუფლებამ დაიხიოს უკან თუ ხელისუფლებამ შეძლოს და ეს პროტესტი რაღაცნაირად მიანელოს. პროტესტი ქუჩაში შეიძლება მიანელო, მაგრამ ადამიანებში იქნება. თუ პროტესტი ქუჩიდან გადაინაცვლებს სამზარეულოებში, ეს სულაც არ ნიშნავს იმას, რომ პროტესტი გაქრა. ამ სამზარეულოებმა ერთ დღეს შესაძლოა ისე იფეთქოს, რომ ყველა და ყველაფერი წალეკოს.

ვფიქრობ, რომ ზურაბიშვილის მოწოდება დროულია და მანაც ბევრი რამ უნდა გააკეთოს, რომ დასავლეთი მკაფიოდ ჩამოყალიბდეს სანქციების მიმართულებით. ცუდია საუბარია ვიზალიბერალიზაციის ამბებზე, მაგრამ ალბათ, მივალთ აქამდეც“, - განაცხადა ვახტანგ ძაბირაძემ For.ge-სთან საუბარში.

აქვე შეგახსენებთ, რომ 4 დეკემბერს აქტივისტების ბინებსა და პოლიტიკური პარტიების ოფისებში პოლიციამ ჩხრეკა ჩაატარა. უფრო კონკრეტულად, საგამოძიებო მოქმედებები ჩატარდა „ერთიანობა - ნაციონალური მოძრაობის“, „კოალიცია ცვლილებისთვის“ და „დროას“ ოფისებში. ასევე გაჩხრიკეს „დაიტოვეს“ ერთ-ერთი დამფუძნებლის ილია ღლონტის ბინა.

გარდა ამისა, „დროას“ ოფისთან, ჩხრეკის პარალელურად, დააკავეს „კოალიცია ცვლილებისთვის“ ლიდერი ნიკა გვარამია და კოალიციის წევრი გელა ხასაია. დაკავებულია მოძრაობა „დაფიონის“ წევრი, ზვიად ცეცხლაძეც. ასევე, სამართალდამცავებმა „ძლიერი საქართველოს“ ორი წევრი დააკავეს. დაკავებულია „ერთიანობა - ნაციონალური მოძრაობის“ ახალგაზრდული ორგანიზაციის რამდენიმე წევრი.