მიუხედავად არსებული მძიმე ვითარებისა, მთავრობის ხელმძღვანელი აცხადებს, რომ ყველაფერი არის კონტროლის ქვეშ, „ნაცმაიდანი“ ჩავარდა და ქვეყნის ინტერესები იქნება თავიდან ბოლომდე დაცული. ჩავარდნილი „ნაცმაიდნის“ შემდეგ გარკვეული ძალები, ძალადობრივი დაჯგუფებები გადასული არიან იმაზე, რომ მცირედით, მაგრამ მაინც დააზიანონ ქვეყნის ინტერესები. პროცესები რომ მართულია, ამას ადასტურებს ბაიდენის ადმინისტრაციის განცხადებები, მათ შორის ევროპარლამენტარების მძიმე განცხადებები, რომლითაც ისინი აქეზებენ რადიკალებს.
ამერიკელი პროფესორის ჯეფრი საქსის განცხადებით, ის, რაც ხდება რუსეთის საზღვრებთან, საქართველოში, რუმინეთსა და მოლდოვაში აშშ-ის მოქმედი პრეზიდენტის ჯო ბაიდენის, მისი მრჩევლის ეროვნული უსაფრთხოების საკითხებში ჯეიკ სალივანის და სახელმწიფო მდივნის ენტონი ბლინკენის ბოლო გასროლაა.
„დამთხვევა არაა, რომ ამჟამად რუსეთის გარშემო ბევრი არეულობაა, მათი დიდი ნაწილი შეერთებული შტატების მიერ არის გამოწვეული. ეს ბაიდენის ადმინისტრაციის ერთგვარი ბოლო გასროლაა. არის არეულობა საქართველოში, არის არეულობა რუმინეთში, მოლდოვაშიც ახალი არეულობის გაღვივების თაობაზე საუბრობენ. ეს რეგიონები რუსეთის საზღვრებთან მდებარეობს, სადაც აშშ-ს აქვს აქტიური ფარული ოპერაციები ისეთი ორგანიზაციების ჩართულობით, როგორიცაა დემოკრატიის ეროვნული ფონდი, რომლებიც მიზნად ისახავენ პრობლემების შექმნას რუსეთისთვის. ასე რომ, რაც ხდება, ეს არის ბაიდენის, სალივანის, ბლინკენისა და „დიფ სთეითის“ ერთგვარი ბოლო გასროლა“, - განაცხადა ჯეფრი საქსმა.
მიუხედავად იმისა, რომ ამერიკის მოქმედი ადმინისტრაცია საქართველოში ლობირებს სახელმწიფო გადატრიალებას, საქართველოს მთავრობის მეთაურის განცხადებით, ბევრი გამოწვევა იყო აშშ-საქართველოს ურთიერთობებში ბოლო ოთხი წლის განმავლობაში, მაგრამ დიდი იმედი აქვს, დონალდ ტრამპის პრეზიდენტობის პირობებში ყველა ეს გაუგებრობა წარსულს ჩაბარდება.
„დიდი მოლოდინით ველით შეერთებული შტატების ახალი პრეზიდენტის ინაუგურაციას. საქართველოს ხელისუფლება დაინტერესებულია შეერთებულ შტატებთან ურთიერთობების გადატვირთვით. დიახ, აშშ-ის ამჟამინდელი, ანუ მიმავალი ადმინისტრაციის ზოგიერთი წარმომადგენელი ცდილობს, რთული მემკვიდრეობა დაუტოვოს ახალ ადმინისტრაციას საქართველოსთან და, ზოგადად, რეგიონთან მიმართებით.
იგივე სცადეს უკრაინასთან მიმართებით და საქართველოსთანაც იგივე მცდელობაა. ბევრი გამოწვევა იყო აშშ-საქართველოს ურთიერთობებში ბოლო ოთხი წლის განმავლობაში და დიდი იმედი გვაქვს, რომ დონალდ ტრამპის პრეზიდენტობის პირობებში ყველა ეს გაუგებრობა წარსულს ჩაბარდება. ამდენად, დიდად ვართ დაინტერესებულნი შეერთებულ შტატებთან ურთიერთობების გადატვირთვით. დარწმუნებული ვარ, რომ ეს პრეზიდენტ ტრამპის ადმინისტრაციის პირობებში მოხდება“, - განაცხადა ირაკლი კობახიძემ.
საქართველოში არსებული პოლიტიკური ვითარების შესახებ საუბრობს ხორვატი საგარეო პოლიტიკის ექსპერტი ბოჟო კოვაჩევიჩი და პარალელებს ავლებს უკრაინის სცენართან. კოვაჩევიჩი აღნიშნავს, რომ ევროკავშირმა საქართველოსთან მოლაპარაკებები ორი კანონის მიღების შემდეგ შეაჩერა, რადგან დასავლეთს ისინი არ მოეწონა. ასევე, ევროკავშირი და აშშ უკმაყოფილო დარჩნენ არჩევნების შედეგებით.
„ეუთოს დასკვნაში არ არის ნათქვამი, რომ არჩევნები დარღვევით ჩატარდა და საქმე იმაშია, რომ კოლექტიური დასავლეთი არ არის კმაყოფილი შედეგებით, რადგან ელოდებოდა, რომ გაიმარჯვებდა ძალა, რომელიც მხარს უჭერს უკრაინის პრეზიდენტს ვოლოდიმირ ზელენსკის. საქართველოს პრეზიდენტი სალომე ზურაბიშვილი კოლექტიური დასავლეთის ხელში ინსტრუმენტი გახდა იმისთვის, რომ ჩამოაგდოს არჩეული მთავრობა. ყველაფერი, რასაც ვუყურებთ, არის იგივე, რაც ვნახეთ 2013-2014წწ. კიევში.
ვხედავთ, რომ დასავლეთი უარყოფითად აფასებს ხელისუფლების მხრიდან ძალის გამოყენებას, მაგრამ არაფერი აქვს წინააღმდეგი დემონსტრანტების მხრიდან ძალადობაზე. ეს იგივეა, რაც უკრაინაში ხდებოდა. დასავლეთი საქართველოსგან რუსეთის წინააღმდეგ სანქციებს ითხოვს და სწორედ ამიტომ უნდა მისდამი ლოიალური ოპოზიციის მოყვანა ხელისუფლებაში, ანუ დასავლეთი ულტიმატუმს უყენებს ხელისუფლებას და ეუბნება: ან სანქციები და ხარ ინსტრუმენტი რუსეთის წინააღმდეგ ან შეგცვლი.
მაშინ, როცა თვითონ ევროკავშირი ვერ ბედავს პირდაპირ დაუპირისპირდეს რუსეთს, უნდა რომ 3.5 მილიონიანი ერი დაუპირისპირდეს მას. საქართველოს ყოფილი პრეზიდენტის მიხეილ სააკაშვილის გათავისუფლებას იმიტომ ითხოვენ, რომ ის მათი ფიგურაა. დასავლეთმა საქართველოს მთავრობა დილემის წინაშე დააყენა: ან სანქციების დაწესება ან დამხობის წინაშე აღმოჩნდება. ეს არის მესიჯი, რომელსაც დასავლეთი უგზავნის საქართველოს“, - აცხადებს ბოჟო კოვაჩევიჩი.
ასეთია კოლექტიური დასავლეთი, რომელიც ეუთო-ოდირის დასკვნის მიუხედავად, არ აღიარებს საპარლამენტო არჩევნებს. ამ ვითარებაში, როდესაც აშშ არის მხარე, რომელიც ხელისუფლების ძალადობრივ დამხობას ლობირებს, რამდენად შეძლებს საქართველო გადატვირთვის პოლიტიკას, ამ ეტაპზე რთული სათქმელია.
ვიცე-სპიკერი გია ვოლსკი განმარტავს, რომ რეალურად, ჩვენ ხშირად თავს ვარიდებთ ამ საკითხებზე სიღრმისეულ ანალიზსს და პირდაპირ აღვწერთ ვითარებას. მისი თქმით, აუცილებელია, საზოგადოებას გავაგებინოთ, რომ დღეს მსოფლიო არის პრაგმატული, ხელმძღვანელობს ცივსისხლიანი პოლიტიკით და არ აქვს ადგილი რაიმე მორალურ ღირებულებებს, ვინაიდან, მისი თქმით, მესამე მსოფლიო ომის პირას ვდგავართ.
„ყველა მხარე ცდილობს თავისი ინტერესი გაატაროს. აქ არა მარტო აშშ-ის ინტერესებზეა საუბარი, რომ გავლენა შეინარჩუნოს გარკვეულ რეგიონებში, არამედ იმაზეა საუბარი, რომ რუსეთი წარმოადგენს საფრთხეს და მათ შორის მესამე მსოფლიო ომის დაწყების წინაპირობა იქმნება, მათ შორის ბირთვული შეიარაღების გამოყენების.
ჩვენ როდესაც ვამბობთ, რომ აშშ-თან ურთიერთობის გადატვირთვა გვინდა, ეს იმას ნიშნავს, რომ ველოდებით ისეთ ადმინისტრაციას, რომელიც მნიშვნელოვნად მოიცავს დღევანდელი სახელწმიფო მმართველობის პოზიციას. აქედან გამომდინარე, ვილაპარაკოთ იმაზე, საითკენ მივდივართ და შევაფასოთ ის, რა მდგომარეობაშიც დღეს ვართ. მოკლედ რომ ვთქვათ, დღეს მსოფლიო არის სერიოზული საფრთხის წინაშე. მესამე მსოფლიო ომის საფრთხე არის რეალობა“, - აცხადებს ვოლსკი.
მისი თქმით, არის განვითარების მეორე პერსპექტივა, როდესაც მსოფლიო დაჯდება მოლაპარაკების მაგიდასთან. სანამ ეს მოხდება, ყველა მხარე, არსებული ხელისუფლებებით, ეცდებიან თავისი ინტერესი გაატარონ და თავისი ინტერესების გამტარებელი ხელისუფლებები ჰყავდეთ ქვეყნებში.
„ეს არ არის ერთდღიანი პოლიტიკა, ეს გრძელვადიანი პოლიტიკაა. რასაკვირველია, ჩასაფრებული რუსეთიც არის საფრთხის შემცველი. როდესაც ჩვენ ველაპარაკებით ჩვენს უცხოელ პარტნიორებს, გვინდა ამ მდგომარეობიდან საქართველო გადავარჩინოთ. ამ დიდ, უშველებელ ჯახში პატარა ქვეყანა შუაში აღმოჩნდა და გვინდა, რომ გავიყვანოთ სამშვიდობოს. სამშვიდობოზე გაყვანა ნიშნავს, რომ არ დაუპირისპირდე რუსეთს ეკონომიკურად და მით უმეტეს სამხედრო თვალსაზრისით, მაგრამ ეს პოლიტიკა ვიღაცისთვის არ არის მისაღები. აქედან გამომდინარე, გვაბრალებს რუსეთის მხარდაჭერას და მეორე ადვილად აჯერებს თავისი პროპაგანდით იმ ახალგაზრდებს, რომლებიც დღეს ქუჩაში არიან გამოსული“, - აცხადებს for.ge-სთან საუბრისას გია ვოლსკი.
ვიცე-სპიკერის პოზიციას იზიარებს პოლიტოლოგი თამარ კიკნაძე, რომლის განცხადებით, საქართველოში მიმდინარე პროცესები დაგეგმილი და განხორციელებულია აშშ-ის მიერ, რომელსაც სხვა მონაწილეებიც ჰყავს.
„დააკვირდით როგორ არიან მომზადებული აქციის მონაწილეები: შეიარაღებული არიან პიროტექნიკით, მოლოტოვის კოქტეილებით, ყველას აქვს ზურგჩანთები და შესაბამისად, არიან აღჭურვილნი, რაც მეტყველებს იმაზე, რომ ჩადებულია ფინანსები და კარგად არიან დატრენინგულები ეს ახალგაზრდები. 20 იანვრამდე აშშ-ის ისევ ძველი ადმინისტრაცია არის და ჩემი აზრით, ცდილობენ, რომ რაც შეიძლება მეტი გლობალური პრობლემა შეუქმნან ტრამპს.
მას გაცხადებული აქვს, რომ კონცეტრირება ძირითადად აშშ-ზე მოხდება და ესენი ისეთ დღის წესრიგს და მოქმედებებს სთავაზობენ მსოფლიოს, რომ ტრამპი იძულებული გახადონ, რეაგირება მოახდინოს ამ ყველაფერზე. ტრამპის ადმინისტრაციის მომავალმა წარმომადგენელმა თქვა, რომ სხვა დღის წესრიგი იქნება ჩვენთან მიმართებაში, უფრო კონსტრუქციული და გათვალისწინებული იქნება საქართველოს ინტერესები, რაც ძალიან მნიშვნელოვანი განცხადებაა“, - აღნიშნა for.ge-სთან საუბრისას თამარ კიკნაძემ.
