გაბრაზდით! აჯანყდით! გამოდით! - ამ მოწოდებით 28 ნოემბრიდან რუსთაველის გამზირზე მიმდინარეობს საპროტესტო აქცია, რაც მანიფესტაციის და გამოხატვის კანონით დადგენილ ნორმებს გასცდა და ძალადობრივი ხასიათი მიიღო. ძალადობის ფაქტები იმდენად მასშტაბური გახდა, რომ ადამიანებმა მიიღეს სხვადასხვა სიმძიმის დაზიანებები. მძიმედ არის დაზიანებული პოლიციის 150-ზე მეტი თანამშრომელი, მათ შორის მედიის წარმომადგენელი და აქციის მონაწილეები.

მიმდინარე გამოძიების ფარგლებში, მოსამართლის განჩინების საფუძველზე, სამართალდამცავებმა გუშინ დილიდან დაიწყეს საგამოძიებო მოქმედებების ჩატარება თბილისსა და საქართველოს სხვადასხვა რეგიონებში. პოლიციამ ბევრ ლოკაციაზე ამოიღო სხვადასხვა ფეთქებადი და საბრძოლო მასალები, რომლებიც გადაჰქონდათ მოპედებით და „გლოვოს“ ჩანთებში იყო ჩალაგებული.

საერთო ჯამში, პოლიციამ ოპერატიული ღონისძიებებისა და საგამოძიებო მოქმედებების შედეგად ჯგუფური ძალადობის ორგანიზების და ხელმძღვანელობის, ჯგუფურ ძალადობაში მონაწილეობის ფაქტებზე 7 პირი დააკავა. ადმინისტრაციული წესით დააკავა „კოალიცია ცვლილებისთვის“ ერთ-ერთი ლიდერი ნიკა გვარამია, რომელიც მოგვიანებით გაათავისუფლეს; „ნაციონალური მოძრაობის“ ახალგაზრდული ორგანიზაციის ხუთი წევრი; მოძრაობა „დაფიონის“ წევრი, ზვიად ცეცხლაძე; დაკავებულია „ლელოს“ წევრები: ვეფხია კასრაძე და ვასო კაძელაშვილი.

აღსანიშნავია, რომ პარლამენტთან მიმდინარე საპროტესტო აქციის დროს დაკავებულებს - დავით ლომიძესა და თემურ ზასოხაშვილს, რომელთაც განსაკუთრებულ დავალებათა დეპარტამენტის თანამშრომლებზე თავდასხმასა და ე.წ. „მოლოტოვის კოქტეილების“ სროლას ედავებიან, აღკვეთის ღონისძიების სახით პატიმრობა შეეფარდათ.

არსებული ინფორმაციით, მოსამართლის განაჩენის საფუძველზე მიმდინარე გამოძიების ფარგლებში იგეგმება რადიკალური ოპოზიციის ლიდერების დაკავება, რომლებიც გარდა იმისა, რომ ღიად მოუწოდებდნენ ადამიანებს აჯანყებისკენ, აფინანსებენ იმ ძალადობას, რომელიც დღეს თბილისში და საქართველოს სხვადასხვა ქალაქებში მიმდინარეობს.

For.ge-ს ინფორმაციით იგეგმება მამუკა ხაზარაძის, გიორგი ვაშაძის, ნიკა მელიას, ლევან ხაბეიშვილის და პეტრე ცისკარიშვილის დაკავება. ეს არის მოკლე ჩამონათვალი იმ ადამიანებისა, რომელიც სახელმწიფო გადატრიალების ბრალდებით იქნებიან დაკავებული.

მოსამართლის განჩინების საფუძველზე მიმდინარე საგამოძიებო მოქმედებები ჩატარდა მოძრაობა „ჯიუტების“, პარტია „დროასა“ და პარტია „გირჩის“ ოფისებში, ასევე, პარტია „ნაციონალური მოძრაობის“ ახალგაზრდულ ოფისში. სამართალდამცველებმა ოფისებიდან და დაკავებული პირების პირადი ჩხრეკის შედეგად ნივთმტკიცებად ამოიღეს: ჩაფხუტები, აირწინაღები, დიდი რაოდენობით პიროტექნიკა, ელექტროგადამცემი მოწყობილობები, კომპიუტერული ტექნიკა, ე.წ. მოლოტოვის კოქტეილები, საღებავები, სხვადასხვა სახის ხსნარები, რომლებზეც დანიშნულია შესაბამისი ექსპერტიზები.

როგორც ჩანს, დეპუტატები ემზადებოდნენ ამ პროცესებისთვის და სწორედ ამიტომ, დეპუტატის იმუნიტეტის შეჩერებაზე ცესკოს განცხადებით მიზანმიმართულად მიმართეს კანონის დარღევით. ცესკოს ყოფილი თავმჯდომარე გიორგი ზესაშვილი აცხადებს, რომ დღეს პარლამენტში არის 150 დეპუტატი და სანამ არ მოუხსნიან მანდატს, მანამდენ მათ იცავს დეპუტატის იმუნიტეტი.

„თუმცა, თუ დეპუტატი დაარღვევს კანონს, ასეთ შემთხვევაში გენერალური პროკურატურა უნდა შევიდეს მოთხოვნით პარლამენტში, რომ მოუხსნან უფლებამოსილება. ისევ პარლამენტმა უნდა მოუხსნას მანდატი, წინააღმდეგ შემთხვევაში, დეპუტატის დაკავება არის შეუძლებელი. გამონაკლისი არის ერთი შემთხვევა, როდესაც დანაშულის ადგილზე ხდება დაკავება და მაშინვე უნდა მიმართოს პარლამენტს უფლებამოსილების შეჩერებაზე“, - აღნიშნა for.ge-სთან საუბრისას გიორგი ზესაშვილმა.

პრემიერ-მინისტრის განცხადებით, მიუხედავად იმისა, რომ რადიკალური ოპოზიციის, ასევე მდიდარი ენჯეოების ლიდერები, იმალებიან ოფისებში, ისინი ვერ გაექცევიან პასუხისმგებლობას მძიმე, უხეში ძალადობის გამო, რომელსაც მიმდინარეობს რუსთაველის გამზირზე.

„ვრცელდებოდა კონკრეტული ვიდეოკადრები, რომელიც ასახავდა უხეშ ძალადობას პოლიციელებზე. ადამიანები, რომლებიც მანამდე მეორე მხარეს დაფიქსირებულ ინციდენტებზე მძიმე რეაქციას გამოხატავდნენ, ამ შემთხვევაში, იწონებდნენ და ხშირად აჟიტირებული კომენტარებით გამოხატავდნენ საკუთარ დამოკიდებულებას ამ უმძიმესი აგრესიის მიმართ. ეს ყველაფერი აჩვენებს იმას, რომ სინამდვილეში, ძალადობის მიუღებლობა მათთვის არის მხოლოდ ფარისევლობა და და ეს არის ჩვეულებრივი ორმაგი სტანდარტი“, - განაცხადა ირაკლი კობახიძემ.

For.ge-სთან საუბრისას პარლამენტის ვიცე-სპიკერი გია ვოლსკი აცხადებს, რომ რადიკალური ოპოზიციის ლიდერების ქმედებას აქვს როგორც მორალური, ასევე სამართლებრივი მხარე. მისი თქმით, სამართლებრივად ამ ყველაფერს გამოძიება სჭირდება.

„მაგრამ უკვე რაც იკვეთება და რეალობაა ის, რომ ნამდვილად ეს არის სახელმწიფო გადატრიალების მცდელობა და ამას არ ჰქვია აქცია. ამას არათუ პრემიერ-მინისტრი, გუნდის რომელიმე წევრი ამბობს, ან თუნდაც ჩვენთან დაპირიპირებული, ან ნეიტრალური ადამიანი, ეს არის ის, რასაც თვითონვე ამბობენ და ღიად იძლევიან კომენტარებს, რომ ეს ხელისუფლება უნდა დაინგრეს და უნდა მოვიდეს ხელისუფლება, რომელსაც უხელმძღვანელებს, სიტყვაზე, ალეკო ელისაშვილი, გვარამია, ნაცვლიშვილი, ხაზარაძე, აი, ეს ხალხი.

მაგრამ აქ ჩნდება მეორე მხარე - მორალური პასუხისმგებლობა. საზოგადოების, ხალხის წინაშე, რაც არანაკლებ მძიმეა და მნიშვნელოვანია, ვიდრე სამართლებრივი პასუხისმგებლობა. აი, ამ მორალურ ნაწილში „ქართული ოცნება“ მართალია თავის მოქალაქეების და ახალგაზრდების წინაშე. მათ შორის იმ ახალგაზრების წინაშე, რომლებიც სხვადასხვა გარემოების გამო ჩართული არიან ამ აქციებში“, - აცხადებს გია ვოლსკი.

პოლიტოლოგი თამარ კიკნაძე ერთ-ერთია, რომელიც ამტკიცებს, რომ ნებისმიერი არეულობა საქართველოსთვის დამთავრდება ძალიან ცუდად, რადგან ეს შეიძლება იყოს ინტერვენციის საფუძველი.

„ეს ახალგაზრდები ამ ყველაფერზე პასუხისმგებლობას ვერ გრძნობენ, იმიტომ რომ არ იციან რა შედეგი შეიძლება მოჰყვეს ამ ყველაფერს. მაგრამ ის პოლიტიკური ძალები მშვენივრად ფლობენ სიტუაციას და მშვენივრად იციან, რითი შეიძლება ეს ყველაფერი დამთავრდეს. როგორც პრემიერ-მინისტრმა აღნიშნა, მათი პასუხისმგებლობის საკითხი უნდა დადგეს.

არაერთხელ მითქვმას და არა მხოლოდ ახლანდელ მოქმედებებზე, რაც დღეს ხდება, არამედ იმ ქმედებებზე უნდა აგონ პასუხი, რასაც ისინი ჩადიან ამდენი ხნის განმავლობაში საქართველოს წინააღმდეგ. კობახიძემ თქვა ასეთი რამ - ჩვენ გვინდოდა ეს საკითხი პარლამენტში განგვეხილაო და ამიტომ გვჭირდებოდა კონსტიტუციური უმრავლესობაო, მაგრამ ისე იქცევიან, რომ სხვა საფუძველიც არსებობს ამისთვისო.

ძალიან მოხარული ვიქნები, რომ დასრულდეს ეს იძულებითი კოაბიტაცია და ცხოვრების სხვა ჩარჩოებს უნდა დავუბრუნდეთ, სადაც პოზიციაც და ოპოზიციაც ორიენტირებული იქნება ქვეყნის კეთილდღეობაზე და პირად ინტერესებზე. ამიტომ მივესალმები ასეთ ნაბიჯებს. ქართველი ხალხი 12 წელია ითმენს ამ ყველაფერს და ბევრი ძალიან იმედგაცრუებულია, რომ ამდენი წელია უყურებენ ამ კოაბიტაციას და თუ ამას დაასრულებენ, დაიმსახურებენ ქართველი ხალხის დადებით განწყობას“, - აცხადებს for.ge-სთან საუბრისას თამარ კიკნაძე.