რუსეთის ცენტრალური საარჩევნო კომისიის ინფორმაციით, ვლადიმერ პუტინი რუსეთის პრეზიდენტად მოსახლეობის 87,28%-მა აირჩია და ის პრეზიდენტი უკვე მეხუთე ვადით გახდა. რუსეთის ცესკოს ცნობით, პუტინს მხარი 75 მილიონზე მეტმა ამომრჩეველმა დაუჭირა. რაც შეეხება სხვა კანდიდატებს, ნიკოლაი ხარიტონოვმა ხმების 4,31% მიიღო, ვლადისლავ დავანკოვმა - ხმების 3.85% და ლეონიდ სლუცკიმ - 3.20%. მსოფლიო ლიდერები მასშტაბურ გაყალბებასა და ზეწოლაზე საუბრობენ და აღნიშნავენ, რომ ვლადიმერ პუტინის რეჟიმის ფონზე სხვა შედეგი არც იყო მოსალოდნელი.

ამასთან, რუსეთმა ოკუპირებული აფხაზეთისა და „სამხრეთ ოსეთის“ რეგიონებში საარჩევნო უბნები მოაწყო, რაც საფრანგეთმა თავის მხრივ დაგმო. როგორც საფრანგეთის ევროპისა და საგარეო საქმეთა სამინისტროს განცხადებაშია ნათქვამი, რუსეთში საარჩევნო პროცესი სამოქალაქო საზოგადოების გაძლიერებული ზეწოლის და რეჟიმის საწინააღმდეგო ფორმების შეზღუდვის, გამოხატვის თავისუფლების შეზღუდვისა და დამოუკიდებელი მედიის საქმიანობის აკრძალვის ფონზე მიმდინარეობდა.

„საფრანგეთი გმობს იმ ფაქტს, რომ რუსეთმა საარჩევნო უბნები აფხაზეთისა და სამხრეთ ოსეთის სეპარატისტულ რეგიონებში, ასევე, მოლდოვის რესპუბლიკის დნესტრისპირეთის რეგიონში, საქართველოსა და მოლდოვის ხელისუფლების თანხმობის გარეშე მოაწყო“, - ნათქვამია განცხადებაში.

როგორც ცნობილია, 17 მარტს რუსეთში, მოსკოვის დროით 12:00 საათიდან, საპროტესტო აქცია „შუადღე პუტინის წინააღმდეგ“ მიმდინარეობდა. აქცია 12:00 საათზე, საარჩევნო უბნებზე მისვლას და პრეზიდენტის წინააღმდეგ ხმის მიცემის ან ბიულეტენის დაზიანებას ითვალისწინებდა. საბოლოოდ, რუსეთში, საპრეზიდენტო არჩევნების მესამე დღეს სამართალდამცავებმა 50-ზე მეტი ადამიანი დააკავეს.

საქართველოს ყოფილი მინისტრი შერიგებისა და სამოქალაქო თანასწორობის საკითხებში პაატა ზაქარეიშვილი არ ელოდება, რომ რუსეთში ქვეყნის მასშტაბით, მასობრივი გამოსვლები დაიწყება, რადგან როგორც მან For.ge-სთან საუბარში თქვა: „არა თუ პუტინი ქმნის რუსეთს, არამედ რუსეთი ქმნის პუტინს“.

„პუტინი სრულებით მართავს სიტუაციას. მან 85%-ზე მეტი აიღო არჩევნებში და ეს ადამიანები არიან მტრები, როგორც საქართველოსი, ისე სამყაროსი. პუტინი არ ქმნის რუსეთს, არამედ რუსეთი ქმნის პუტინს. სწორედ ეს არის რუსეთი. ქუჩაში გამოვლენ ერთეული ადამიანები, მაქსიმუმ 10 ათასი კაცი. იქნება ხალხი, მაგრამ ძალიან ცოტა და ისინი არ შექმნიან ამინდს რუსეთში“, - განაცხადა პაატა ზაქარეიშვილმა.

აფხაზეთის მთავრობის უშიშროების ყოფილი მინისტრი ლევან კიკნაძე ჩვენთან საუბარში აღნიშნავს, რომ რუსეთის რეჟიმი იმ მოქალაქეებს დაიჭერს, ვინც პუტინის ხელისუფლებას წინააღმდეგ გაუწევს.

„ბევრს არ უნდა პუტინი, მაგრამ იმდენ პროცენტს დაწერენ, რამდენიც უნდა. ცალკეულ ადგილებში შეიძლება გამოსვლები დაიწყოს, თუმცა ყველაფერს ჩაახშობენ. პუტინი თავად ეწევა სამამულო ომს და ძალიან რთულია ვინმე წავიდეს მის წინააღმდეგ, რადგან რეჟიმი აუცილებლად დაიჭერს. ნაკლებად მგონია, რომ იქ რაიმე სერიოზული გართულებები შეუქმნან პუტინის რეჟიმს“, - განაცხადა ლევან კიკნაძემ.

ვლადიმერ პუტინმა რამდენჯერმე ახსენა უკრაინასთან შესაძლო მოლაპარაკებების გამართვა, თუმცა ამ დრომდე რაიმე, კონკრეტული შედეგი არ დამდგარა. ისმის კითხვა: რამდენად არსებობს მზაობა, მხარეები მოლაპარაკების მაგიდას მიუსხდნენ და უკრაინა-რუსეთის ომის დასრულდეს?!

პაატა ზაქარეიშვილი აღნიშნავს, რომ ეს მოლაპარაკებები ვერ შედგება, რადგან რუსეთი უკრაინას კონკრეტულ პირობებს უყენებს, რაც უკრაინისთვის მიუღებელია.

„პუტინი არაერთხელ ავლენს, რომ მზად არის მოლაპარაკებებისთვის, მაგრამ იქვე დასძენს მოლაპარაკებებს რუსეთის პირობებზე. წესით, მოლაპარაკებები არ უნდა იყოს წინასწარ პირობებით დათქმული. ასეთი პირობებით უკრაინა, რა თქმა უნდა, უარს ამბობს მოლაპარაკებებზე. როგორც კი ზელენსკი დათანხმდება მოლაპარაკებებს, პუტინი უცებ წამოაყენებს ისეთ პირობებს, რომ შეუძლებელი იქნება ასეთი მოლაპარაკების დაწყება“, - განაცხადა პაატა ზაქარეიშვილი.

ლევან კიკნაძის შეფასებით, უკრაინა-რუსეთის ომი საბოლოოდ მხარეთა შორის მოლაპარაკებით დასრულდება:

„ეს ომი მაინც დასრულდება მოლაპარაკებით. ყველას გვინდა, რომ რუსეთი დამარცხდეს, მაგრამ არსებობს ამის შესაძლებლობა?! - არავინ იცის, რა და როგორ იქნება, რამდენად ერთიანი იქნება ევროპა და ამერიკა. ეს ჩვენ ვართ მიჩვეული გაჭირვებას, თორემ იქ როგორც კი ოდნავ გაუჭირდა ხალხს, გამოსვლები დაიწყო. დღეს სხვა დროა, არავის უნდა ომი, გაჭირვება, მსხვერპლი და ლტოლვილი“, - დასძინა ლევან კიკნაძემ.