დღეს, პრემიერ-მინისტრი ოფიციალური ვიზიტით აზერბაიჯანის რესპუბლიკას ეწვევა. ირაკლი კობახიძის განცხადებით, მეზობელ ქვეყნებთან ურთიერთობების გაღრმავება არის ერთ-ერთი უმთავრესი პრიორიტეტი, აქედან გამომდინარე, შემთხვევითი არ არის ბრიუსელში ვიზიტის შემდეგ ვიზიტები შედგება მეზობელ ქვეყნებში. აზერბაიჯანში ვიზიტის შემდეგ, ერთ კვირაში ვიზიტი შედგება სომხეთში.

„საუბარი გვექნება ყველა საკითხზე, რომელიც უკავშირდება ორმხრივ თანამშრომლობას. მნიშვნელოვანია რეგიონში მშვიდობის უზრუნველყოფა და აქ, ჩვენი ქვეყანა ყოველთვის ასრულებდა დადებით როლს, შესაბამისად ყველაფერი გაკეთდება იმისთვის, რომ ორმხრივი ურთიერთობები გაღრმავდეს და ხელი შევუწყოთ მშვიდობასა და სტაბილურობას“, - აღნიშნა ირაკლი კობახიძემ.

ირკლი კობახიძის აზერბაიჯანში ვიზიტს წინ უსწრებდა ერთი მნიშვნელოვანი დეტალი. საქართველოს ყოფილი საგარეო საქმეთა მინისტრი და ზურაბ ადეიშვილის ყოფილი მოადგილე, ეკა ტყეშელაშვილი, რომელიც უკრაინაში ევროკავშირის ანტიკორუფციული ინიციატივის ხელმძღვანელია, 13 მარტს აზერბაიჯანის რესპუბლიკის პრეზიდენტთან, ილჰამ ალიევთან შეხვედრაზე იმყოფებოდა. კერძოდ, აზერბაიჯანის პრეზიდენტმა მიიღო ნიზამი განჯავის საერთაშორისო ცენტრის თანათავმჯდომარეები, სახელმწიფო და მთავრობის ყოფილი მეთაურები, ასევე ცენტრის გამგეობის წევრები.

მაშ ასე, აზერბაიჯანი პრეზიდენტი ილჰამ ალიევი სააკაშვილის მთავრობის ყოფილ მაღალჩინოსანს ეკა ტყეშელაშვილს შეხვდა. როგორც ჩანს, ეს ჟესტი საქართველოს ხელისუფლების დასანახად არის, რადგან ადრეც შეხვედრია ალიევი ქართული ოპოზიციის წარმოამდგენლებს და მათ შორის სააკაშვილიც კი ყავდა მიწვეული უკრაინიდან. როგორც ჩანს, ალიევი მისტირის ძველ ხელისუფლებას, რომელიც ყველაფერს აძლევდა და ამის ნათელი მაგალითია დავით გარეჯის საქმე.

როგორც ჩანს, აზერბაიჯანსა და საქართველოს შორის პრობლემები დაგროვდა და ამის ერთ-ერთი მაგალითია ჩაკეტილი საზღვარი, რომელიც აზერბაიჯანმა ჯერ კოვიდის გავრცელების მოტივით დაკეტა და დღემდე ამ მხრივ ვითარება არ შეცვლილა. უკვე მეორე წელია საზღვარი დაკეტილია და რამდენიმე დღის წინ გააგრძელეს სახმელეთო საზღვრის ჩაკეტვა 1 ივლისამდე. ცხადია, რომ საზღვარს კეტავენ მტერთან და არა სტრატეგიულ პარტნიორებთან. ოფიციალურად კი საქართველო და აზერბაიჯანი სტრატეგიული პარტნიორები არიან.

აზერბაიჯანული მედია ავრცელებს ინფორმაციას, რომ აზერბაიჯანის წინააღმდეგ აგენტურა თბილისში თავისუფლად მოქმედებს. გამოცემა „caliber.az“ აქვეყნებს სტატიას - „ქართული ფაქტორი და დასავლური ქსელი აზერბაიჯანში“, სადაც საუბარია იმაზე, რომ აზერბაიჯანის სახელმწიფო დამოუკიდებლობის მოპოვებისთანავე გახდა როგორც დასავლეთის ქვეყნების, ისე სპეცსამსახურების საფარქვეშ მოქმედი ყველა სახის ორგანიზაციისა და ფონდის ინტერესის ობიექტი, რომლებმაც მოულოდნელად დაიწყეს როგორც ოპოზიციის, ისე მრავალი არასამთავრობო ორგანიზაციის გულუხვი დაფინანსება. „დემოკრატიული განვითარების ხელშეწყობის“ ნიღბით. ყველა ფულადი ტრანში უცხოეთიდან, რომელიც გამოყოფილია საგრანტო ხელშეკრულებებით, ახლა ექვემდებარება მკაცრ ანგარიშგებას.

„ბაქოს პოლიტიკა ამ მიმართულებით მარტივად აიხსნება იმ მომენტებით, როდესაც ადგილობრივი არასამთავრობო ორგანიზაციების უცხოელმა დონორებმა და ზოგიერთმა მედიამ გადალახეს დასაშვები ზღვარი და დაიწყეს ჩარევა ჩვენი სახელმწიფოს საშინაო საქმეებში. ან თუნდაც აქ დავგეგმოთ სოციალური აჯანყებები და თუნდაც „ფერადი რევოლუციები“.

სამწუხაროდ, პრაქტიკა აჩვენებს, რომ მეზობელი და მით უმეტეს მეგობარი სახელმწიფოებიც არიან ჩართულნი ანტიაზერბაიჯანულ ქმედებებში. ეს ყველაზე მკაფიოდ გამოიკვეთა საინფორმაციო პორტალ Abzas Media-სა და Toplum TV-ის მენეჯერებისა და თანამშრომლების შემთხვევაში. ამრიგად, როგორც Caliber.Az-მა ინფორმირებული წყაროებიდან შეიტყო, როგორც Abzas Media-სთან, ასევე Toplum TV-სთან დაკავშირებით ჩატარებულმა გამოძიებამ დაადგინა, რომ აზერბაიჯანის დასავლური ქსელი საქართველოს მეშვეობით უკანონოდ ფინანსდებოდა. როგორც ჩანს, დასავლური ინსტიტუტები, რომლებმაც ფეხი გაიმყარეს საქართველოში, იყენებენ ქვეყანას პლაცდარმად მეზობელ ქვეყნებში სიტუაციის დესტაბილიზაციისთვის.

სხვადასხვა დასავლური ფონდები და ინსტიტუტები, სოროსის აგენტები, თავისუფლად მოქმედებენ საქართველოში და სარგებლობენ ამ ქვეყნის ფინანსური ინსტიტუტების, მაგალითად, ბანკების შესაძლებლობებით. ეს ყველაფერი საქართველოს დაზვერვისა და ფინანსური მონიტორინგის ორგანოების წინაშე ხდება. მას შემდეგ, რაც საქართველო გახდა ევროკავშირის წევრობის კანდიდატი, ეს საქმიანობა კიდევ უფრო გაფართოვდა და გახდა აგრესიული.

რაც შეეხება ფულადი გზავნილების მექანიზმს, თანხები ირიცხება ქართულ ბანკებში, იქ ხდება განაღდება და აზერბაიჯანში გადადის. სინამდვილეში, ეს არის სცენარი, რომელიც ოდესღაც ჟურნალისტ აფგან მუხთარლის მეშვეობით განხორციელდა. ამასთან, ფართოდ გამოიყენება ანონიმური საბანკო ბარათები და ეს უკვე იძლევა იმის საფუძველს, რომ დაგეგმილი ღონისძიებები, ფაქტობრივად, უკანონოა“, - ნათქვამია სტატიაში.

როგორც გამოცემა წერს, ზემოაღნიშნულის გათვალისწინებით, საქართველოს ხელისუფლებამ და ამ ქვეყნის სპეცსამსახურებმა თავიდან უნდა აიცილონ დასავლური პროვოკაცია აზერბაიჯანის წინააღმდეგ და არ გახდნენ ამ ბინძური თამაშის მონაწილეები.

ექსპერტი უსაფრთხოების საკითხებში დავით კუხალაშვილი აცხადებს, რომ, პირველ რიგში, უნდა გავითავისოთ ის, რომ დიპლომატიური ღიმილის საფარქვეშ აქტიურად მიმდინარეობს სადაზვერვო საქმიანობა. მისი თქმით, სტრატეგიული პარტნიორობის პირობებშიც კი სადაზვევრო საქმიანობა ძალიან მნიშვნელოვანია და სტრატეგიული პარტნიორებიც კი ერთმანეთის საწინააღმდეგოდ ახორციელებენ ასეთი ტიპის საქმიანობას.

„ასეთი მაგალითები ჩვენ გვაქვს. უბრალოდ, ეს სახელმწიფო ჯერ ამ მიმართულებით არ გვიხსენებია და სამწუხაროდ, ღია წყაროებში არსებული ინფორმაციების ანალოგებით, ჩვენ უკვე შეგვიძლია ამ მიმართულებითაც ვისაუბროთ. ის, რომ საქართველოში აზერბაიჯანის საწინააღმდეგოდ ჯაშუშები მოღვაწეობენ, ეს არის უფრო პოლიტიკური განცხადება, რომელიც შესაძლებელია ემსახურებოდეს პოლიტიკური დაზვერვის ინტერესებს გამავრცელებელი სახელმწიფოს მხრიდან. რეალური მტკიცებულების გარეშე, გვაქვს იმის უფლება, რომ ასე შევაფასოთ ეს გარემოება.

რაც შეეხება იმას, რომ ალიევი ხვდება „ნაციონალური მოძრაობის“ ხელისუფლების ყოფილ მაღალჩინოსანს, ამაზე აუცილებელია, რომ გარკვეული აქტიური ღონისძიებები განახორციელოს საქართველოს სადაზვერვო და კონტრსადაზვევრო უწყებამ, რომ ასეთი კონტაქტები არ იყოს აზერებაიჯანის და მისი სტრატეგიული პარტნიორების მიერ გამოყენებული კონსტიტუციური წყობილების წინააღმდეგ. ჩვენ არ უნდა დაგვავიწყდეს ის გარემოება, რომ კავკასიელები ვართ და კავკასიაში პირადი ურთიერთობები განსაკუთრებულად მნიშვნელოვანია.

ამიტომ, დიპლომატიურ ურთიერთოებთან ერთად, ეს გასათვალისწინებელია და უნდა გავითვალისწინოთ ასევე ის გარემოებაც, რომ სააკაშვილისა და ალიევს შორის იყო საკმაოდ ახლო ურთიერთობები. ეს კი იმას ნიშნავს, რომ შესაძლებელია, გარკვეული ხაზიც კი არსებობს იმისათვის, რომ საქართველოს წინააღმდეგ გარკვეული დესტრუქცია განხორციელდეს. არც ის არ უნდა დაგვავიწყდეს, რომ ჩვენმა ყოფილმა ხელისუფლებამ დავით გარეჯი გადასცა აზერბაიჯანს, ეს შემთხვევითი ფაქტი არ არის და ამიტომ, ვფიქრობ, რომ ესეც შეიძლება მიზეზობრივ კავშირში იყო იმ ურთიერთობებთან, რომელზედაც ჩვენ ვსაუბრობთ“, - აცხადებს კუხალაშვილი.

გარდა იმისა, რომ ეს არის საკმაოდ ცუდი ფაქტი, ექსპერტი უსაფრთხოების საკითხებში ამბობს, რომ ამ შემთხვევაში, საქართველომ უნდა გაითვალისწინოს ის ფაქტი, რომ აზერბაიჯანს ჰყავს ეთნიკურად და რელიგიურად მონათესავე ჯგუფები საქართველოში. შესაბამისად, ამ შემთხვევაში განსაკუთრებული ყურადღება მართებს პოლიციურ და კონტრსადაზვერვო უწყებებს, რომ გარკვეული სახის დესტრუქციები არ დაიწყოს ამ ჯგუფების მხრიდან.

„შესაძლებელია, რომ აზერბაიჯანი ამ ქმედებებით, გარკვეულწილად, კიდევ რაღაცისთვის ვაჭრობდეს საქართველოს ხელისუფლებასთან სათანადო ზეგავლენის მოხდენის კუთხით. ამიტომ, არჩევნები გვაქვს მოახლოებული, ჩვენ ვიცით, რომ ეს ეთნიკური ჯგუფი გარკვეულ როლს თამაშობს არჩევნებში და ამ შემთხვევაში, საკამოდ საფრთხილო ვითარება გვაქვს. ყველა ეს მოქმედება ერთიანობაში და კომპლექსურად უნდა იყოს აღქმული საფრთხეებად. აუცილებელია კოორდინირებული ქმედებები გააჩნდეს სპეცსამსახურებს, პოლიციურ უწყებებს და საზოგადოებას.

წინააღმდეგ შემთხვევაში, არაფრის გამორიცხვა არ შეიძლება. ჩვენ ვთქვით, რომ არჩევნების შემდეგ, ალბათობის მაღალი ხარისხით, მოსალოდნელია გარკვეული დესტრუქციული ქმედებების აგორება განახორციელონ დესტრუქციულმა პოლიტიკურმა პარტიებმა, მათ შორის ისეთმა პარტიებმა, რომლებიც იმართებიან უცხო სახელწმიფოების მხრიდან და როგორც ფინანასურად, ასევე პოლიტიკურად არიან მხარდაჭერილი. ამიტომ, ვფიქრობ, რომ ეს შეიძლება გარკვეული ჯაჭვის ნაწილი იყოს“, - აღნიშნა for.ge-სთან საუბრისას დავით კუხალაშვილმა.

პოლიტოლოგი რამაზ საყვარელიძე აცხადებს, რომ აზერბაიჯანის შიში არ არის გაუგებარი, რადან ადრეც იყო ასეთი ფრაგმენტი, რაზედაც ალიევს საკმაოდ მკვახე პასუხის გაცემა მოუწია, როცა დასავლეთის წრეებმა გამოთქვეს კრიტიკული შენიშვნების იმაზე, როგორი მმართველობაა აზერბაიჯანში - დიქტატურაა, თუ დემოკრატია.

„პრინციპში, ეს ეჭვი, რომ შეიძლება დასავლეთმა ასეთი კრიტიკული დამოკიდებულების კვალობაზე გააგრძელოს თავისი პოლიტიკური თამაშები და სირთულეები შეუქმნას აზერბაიჯანს, საფუძველს მოკლებული არ არის. ვიცით, რომ დასავლეთს აქვს ხოლმე ასეთი აკვიტება, რომ მთავარია შეცვალოს ხელისუფლება და ცხოვრების წესი კონკრეტულ ქვეყანაში და ის იყოს ისეთი, როგორიც ევროპისთვის არის ტიპური, ანუ, რასაც დემოკრატია ჰქვია. ანალოგიური პრინციპით მოხდა ხავერდოვანი რევოლუციები სხვადასხვა ქვეყნებში და ძნელი სათქმელია ამ რევოლუციების პოლიტიკური მიზანი რა იყო. შედეგი ცხადია - კიდევ უფრო რთული გახდა არაბულ ქვეყნებში პოლიტიკური სიტუაცია და კიდევ უფრო ავტორიტარური გახდა ეს ქვეყნები. ძალიან ხშირად დასავლეთს არ აქვს ხოლმე გათვლილი ის, მისი ჩარევის შედეგად რა მოხდება“, - ამბობს საყვარელიძე.

რაც შეეხება ორ ქვეყანას შორის ურთიერთობას, პოლიტოლოგის განცხადებით, საქართველოს მიმართ დამოკიდებულებაში აზერბაიჯანი კრიტიკული არ არის და არ ამბობს, რომ საქართველო შეიძლება აღმოჩნდეს დასავლეთის ინტერესების გამტარებელი.

„პირიქით, დასავლურ აგენტურაზეა ეჭვი. მით უმეტეს, იმის შემდეგ, რაც დასავლეთის ასეთი არასწორი პოლიტიკური გათვლების წინააღმდეგ საქართველომაც გაილაშქრა. არასწორი გათვლები ჰქონდა ევროპას მაშინ, როცა მეორე ფრონტის გახსნას მიანიშნებდა ქართულ მხარეს. საქართველო კი მტკიცედ აღუდგა წინ დასავლეთის მორიგ შეცდომას. დასავლეთი კარგი რამეა, მაგრამ შეცდომებს უშვებს და დასავლეთის მხრიდან ასეთი შეცდომა რომ არ დაიშვას, ამიტომ შიშობს აზერბაიჯანი.

ამ შიშის ფონზე არის „ნაციონალური მოძრაობის“ ფიგურები წამოწეული თუ არა, არ ვიცი, მეეჭვება. იმიტომ, რომ საქართველოში თუ ვინმეს აქვს ბრმა პროდასავლურობის იარლიყი, არის „ნაციონალური მოძრაობა“. ნაციონალების მხრიდან არც ის იქნება გასაკვირი, რომ აზერბაიჯანთან საქართველოს პარტნიორობა მათთვის მიუღებელი იყოს და გავისხენოთ მთელი რიგი რეპლიკები ამ პარტნიორობის თაობაზე.

არც ის მგონია, რომ აზერბაიჯანის პოლიტიკური კლიმატი იყოს შეცვლილი, დარღვეული იმისთვის, რომ დასავლეთის ინტერესებს უფრო მოერგონ. ასე რომ, მაგ ვერსიაში ნაციონალებთან და ტყეშელაშვილთან შესაძლო ალიანსის ვარიანტი საეჭვო მეჩვენება, თორემ დასავლეთის მიმართ აზერბაიჯანის ფრთხილი დამოკიდებულება სრულიად გასაგებია“, - განაცხადა for.ge-სთან საუბრისას რამაზ საყვარელიძემ.