„ქართული ოცნება“ მომავალ კვირას წარადგენს კანონპროექტს ლგბტ პროპაგანდის აკრძალვის შესახებ. ცნობილია, რომ კანონპროექტის განხილვა ხმაურის ფონზე წარიმართება. ოპოზიცია და ა-ო ამტკიცებენ, რომ ქვეყანა ლგბტ პროპაგანდის გავრცელების რისკის წინაშე არ დგას და შესაბამისად, მიაჩნიათ, რომ ხელისუფლება სექსუალური უმცირესობების თემით იწყებს საარჩევნო კამპანიას. მმართველ გუნდში კი აცხადებენ, რომ ლგბტ პროპაგანდა არის დამაზიანებელი ნებისმიერი საზოგადოებისთვის და განსაკუთრებით საქართველოსთვის, რომელიც კულტურულ მემკვიდრეობაზე დგას.

აქ საინტერესო დეტალია ისიც, რომ ოპოზიცია, რომელიც ამტკიცებს, რომ კანონპროექტის განხილვაში მიიღებს მონაწილეობას, მაგრამ კენჭისყრაში არა, არ პასუხობს მარტივ კითხვას - ლგბტ პროპაგანდა არის თუ არა ცუდი? უმრავლესობის ლიდერის მამუკა მდინარაძის შეფასებით, კითხვაზე პასუხი არ აქვთ, რადგან მათ ქართველი ხალხის და თავისი პატრონების ეშინიათ.

„ჩვენ ხომ არ ვლაპარაკობთ იმაზე, რომ ისინი რაიმე ნორმას რაიმე სახით მხარს დაუჭერენ თუ არა, ცუდი რომ არის ამაზე პასუხს ვერ სცემენ. იცით რატომ? - იმიტომ, რომ აქ ქართველი ხალხის ეშინიათ და იქ თავისი პატრონების. ეს არის რეალობა. ეშინიათ პატრონების, რომლებსაც ვერ უბედავენ იმის კითხვასაც კი: „მოდი, ვიტყვით, რომ ცუდია ლგბტ პროპაგანდა“. ასევე, ქართველი ხალხის რისხვის ეშინიათ.

ეს არის ძალიან მარტივი ფორმულა, დღემდე რომ გაურბიან და მიკიბ-მოკიბვით საუბრობენ ამ თემაზე, თითქოს დღეს აქტუალური არ არის. ჩვენ ეს თემა წამოვჭერით და ვთქვით, რომ ეს არის თანამედროვე სამყაროს უმწვავესი პრობლემა და ამაზე პასუხი იქიდან არ არის. მათ ამის საპასუხოდ წამოჭრეს თემა, რომ ფასების ზრდა არის ცუდი.

შარშან ვამბობდი, რომ არ იყო მართლა ის ეტაპი, რომ ამგვარი სიმძაფრით იყო ეს პროპაგანდა და ამ პროპაგანდას უნდა დავუპირისპირდეთ ჯანსაღი პროპაგანდით-თქო, მაგრამ იმდენად გამძაფრდა ეს ყველაფერი, რომ წელს ვამბობთ, დიახ, ამას კანონმდებლობა სჭირდება, ამას უკვე რეგულაცია სჭირდება. ვერ წარმოვიდგენდით, ალბათ, რომ ოფიციალურ სტრუქტურებში თუ შეაღწევდა პროპაგანდა იმგვარად, რომ იტყოდნენ „დედას“ და „მამას“, „დედა“ და „მამა“ არ დავუძახოთ“, - აღნიშნა მამუკა მდინარაძემ.

ანალიტიკოსი „ხალხის ძალის“ წევრი დავით ქართველიშვილი გამოდის ინიციატივით, რომ ძალიან მარტივი კითხვები უნდა დავუსვა ლგბტ პროპაგანდის ლატენტურ მიმდევრებს, ხოლო ყველაზე ორიგინალური პასუხები ბანერებზე უნდა დაიტანო, პარალელურად, მმართველი გუნდი შემეცნებით და საარჩევნო კლიპებს გამოუშვებდა და, შესაბამისად, დიდი ძალისხმევის გარეშე, „ქართული ოცნება“ საკონსტიტუციო უმრავლესობას მოიპოვებდა შემოდგომაზე. ქართველიშვილის თქმით, ოპოზიცია დუმს, რადგან შეკითხვები გააზრებული აქვთ, ხოლო მათი პასუხები კოშმარული სიზმრების კატეგორიისაა.

„ძალიან მარტივი კითხვები უნდა დავუსვა ამ პროპაგანდის ლატენტურ მიმდევრებს. მაგალითად, თქვენს ოჯახში მშობელთა ნუმერაციის მიხედვით თქვენ რომელ ადგილზე ხართ? ქალ-ვაჟი მყავსო ერთხელ გითქვამთ და თქვენი გენდერულად ნეიტრალური შვილების მაგივრად ამას თამამად რატომ აცხადებთ - არ გეშინიათ? სქესის შეცვლის ნებართვას ხომ მისცემთ თქვენს შვილებს, რამე რომ იყოს? ამის აუცილებლობის დარწმუნებაში ხომ დაეხმარებით?

ნიდერლანდებისა და შვეიცარიის მსგავსად, ინცესტის გარკვეული სახეობების ლეგალიზაციაზე რა აზრის ბრძანდებით? ზოგიერთ დასავლურ ქვეყანაში შემუშავებული საკანონმდებლო ინიციატივების ფარგლებში, ეთანხმებით თუ არა, პედოფილიის ისეთი შემთხვევების დეკრიმინალიზაციას, სადაც ინტიმური კავშირი დგება ურთიერთშეთანხმების საფუძველზე და ურთიერთპრეტენზიების გარეშე? რას ფიქრობთ ქართულ სპორტში ტრანსგენდერების კვოტირებაზე? და სხვა უამრავი სხვა - საინტერესო და თანამედროვე შეკითხვები.

მერე ყველაზე ორიგინალურ პასუხებს ბანერებზე დავიტანდი, შემეცნებით და საარჩევნო კლიპებს გამოვუშვებდი და საკონსტიტუციო უმრავლესობას დიდი ძალისხმევის გარეშე მოვიპოვებდი შემოდგომაზე. ამიტომაც გვაქვს „კრავთა დუმილი“ და შიში, რამეთუ ჩვენი შეკითხვები გააზრებული აქვთ, ხოლო საკუთარი პასუხები კოშმარული სიზმრების კატეგორიისა“, - ამბობს დავით ქართველიშვილი.

კანონის მიღების აუცილებლობაზე საუბრობს პოლიტოლოგი რამაზ საყვარელიძე, რომელიც განცხადებით, ქვეყანა ამ მიმართულებით დაზღვეული არ არის. მისი თქმით, დღეს, ამ საკითხზე როგორც პრობლემაზე საუბრობს ერთი თაობის ხალხი, მაგრამ გავა დრო და მოვა სრულიად განსხვავებული თაობა, რომელიც სრულიად განსხვავებული სულისკვეთებით იქნება განმსჭვალული და არ არის გამორიცხული, რომ მან სხვანაირი ღირებულებები წამოწიოს წინა პლანზე.

„ჩვენ, არა თუ ერთმანეთთან, არამედ მომავალ თაობასთანაც ვართ პასუხისმგებლები. რა გითხრათ? ლაპარაკი არ არის სექსუალური უმცირესობების შევიწროებაზე, მაგრამ, თუკი ლგბტ თემამ შეასრულა დამცველის ფუნქცია და თუკი კანონში შევიდა, რომ სექსუალური ორიენტაციის თვალსაზრისით არ შეიძლება დისკრიმინაცია, თუ არადა სამსახურში უნდა აღადგინო, როგორც ეს ამერიკაშია, მერე მომრავლდებიან. ანუ ხელსაყრელი გახდება ლგბტ თემში ჩართვა და, რა თქმა უნდა, ბევრი ასეთი გაჩნდება. რამდენადაც ვიცი, ჯერჯერობით ასე არ დგას საკითხი და არც აპირებენ, რომ დადგეს და სწორედ ამიტომ ხდება ამ კანონის მიღება. კანონით უნდა დარეგულირდეს ისე, რომ ლგბტ თემის დაცვა არ გადავიდეს საზღვრებს გარეთ.

არის კი ეს საარჩევნო პროპაგანდის ნაწილი, როგორც ამას ოპოზიცია აცხადებს? - ქვეყანაში არ არის, მაგრამ ქვეყნის გარეთ არის და როგორც ცხადი ხდება, სწორედ ქვეყნის გარედან არის ზეწოლა. ამიტომ, კანონი საჭიროა იმისთვის, რომ ეს ზეწოლა გაჩერდეს. პრეზიდენტმა გვითხრა, რომ ზეწოლა ხდება სააკაშვილის გამოშვებაზეო. პრაქტიკულად, ყველა საკითხზე ახდენენ ზეწოლას და ერთნაირსქესიანთა ქორწინებაზე არ იქნება ზეწოლა? - რა თქმა უნდა, იქნება“, - აცხადებს საყვარელიძე.

პოლიტოლოგის განცხადებით, კოვიდ19 პანდემიის დროს საქართველომ ჩაკეტა საზღვრები იმ მოტივით, რომ ავადმყოფობა არ გავრცელებულიყო. იმ შემთხვევაში, თუ არ გინდა პოლიტიკური და სოციალური ავადმყოფობები შემოვიდეს, უნდა ჩაკეტო საზღვრები, რომ არ გავრცელდეს შენთვის არასასურველი სოციალური ტენდენციები.

„აი, ასეთი საზღვრების ჩაკეტვას ემხრობა, ამ შემთხვევაში, მოსახლეობის დიდი ნაწილი. რა თქმა უნდა, ოპოზიციის სახით ამ ჯგუფს ეყოლება მხარდამჭერები, რადგან მათ ნებისნიერი მიზეზი უნდათ, რომ ევროპელებს ანახონ - აი, ხელისუფლება არაა ევროპული, რუსულია. დიდი შანსია, რომ პროცესები ერთნაირი სცენარით გაგრძელდეს და ვგულისხმობ 7-8 მარტის მოვლენებს. ოღონდ აქ არის მოსალოდნელი ერთი რამ, თუკი საპატრიარქო იტყვის, რომ ქრისტიანობას გვიბღალავენ ისინი ვინც მხარს უჭერენ ერთნაირსქესიანთა ქორწინებას, ასეთ შემთხვევაში მოხდება ის, რაც პირველ 17 მაისს მოხდა.

ხალხი გამოვიდა ქუჩა და სწორედ იმის მერე ლგბტ ტიპები აქტიური არ არიან. მიხვდნენ, რომ სახიფათოა. შეიძლება იგივე განმეორდეს - ხალხმა აიღოს საკუთარ თავზე პასუხისმგებლობა და დაანახოს ვიღაცებს, რომ ცეცხლს ეთამაშება ის, ვინც ცდილობს თავი მოაწონს ევროპას ამ ხალხის თავმოყვარეობის და ღირებულებების წაბილწვის ხარჯზე“, - აღნიშნა for.ge-სთან საუბრისას რამაზ საყვარელიძემ.