მმართველი გუნდი ელოდება ოპონენტების პოზიციას, გაერთიანდებიან თუ არა მიდგომაში, რომ ადამიანის უფლებების დაცვასთან ერთად, უნდა ებრძოლონ თუ არა ფესევდოლიბერალურ ლგბტ პროპაგანდას. „ქართულმა ოცნებამ“ მიიღო გადაწყვეტილება, მოამზადოს საკანონმდებლო ინიციატივა, რომელიც საზოგადოებას „ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს“. გადაწყვეტილება მმართველმა ძალამ მას შემდეგ მიიღო, რაც მსოფლიოში აქტუალური თემა გახდა ლგბტ პროპაგანდა.

ხელისუფლების პოლიტიკური ოპონენტები აცხადებენ, რომ კანონპროეტის ინიციერის საჭიროება არ არსებობს, რადგან საქართველოს შემთხვევაში ლგბტ თემის პროპაგანდა არ ხდება და ხელისუფლებას წინასაარჩევნო მანიპულაციაში სდებენ ბრალს. როგორც ოპოზიციაში აცხადებენ, ეს არის გამოგონილი პრობლემების შექმნა, რომელშიც დემოკრატიით დაინტერესებული პოლიტიკური ჯგუფი მონაწილეობას არ მიიღებს.

„გირჩის“ ლიდერი იაგო ხვიჩია თვლის, რომ ფსევდოლიბერალურ პროპაგანდასთან დაკავშირებული ინიციატივით, სავარაუდოდ, გამოხატვის თავისუფლების შეზღუდვას აპირებენ.

„ზოგადად, ვერასდროს წარმომედგინა, თუ მთავრობის საქმე ადამიანების უკანალის დაცვა იქნებოდა. მგონი, ჩვენი მთავრობა ერთადერთია სამყაროში, რომელმაც ჩათვალა, რომ მისი მთავარი კომპეტენციაა, რაღაცნაირად გაუფრთხილდეს ამ ღირებულებას და სიკეთეს. მინდა, წარმატება ვუსურვო ამ ყველაფერში. ვიცი, რომ ამ მიზნით - ადამიანების უკანალები დაიცვან, საბოლოო ჯამში, გამოხატვის თავისუფლების შეზღუდვას მოიფიქრებენ. მათ განცხადებაში ასე იგრძნობოდა.

მოგეხსენებათ, პოსტსაბჭოთა ქვეყანა ვართ და ყველაფერში ვითხოვთ მთავრობის დახმარებას, მაგრამ ეს ერთადერთი საკითხია, როცა ქართველ ხალხს მთავრობისთვის არ გვითხოვია დახმარება, არ გვითხოვია, დაგვეხმარეთ ჩვენი სხეულის ნაწილების დაცვაშიო. ასეთი არც თხოვნა და არც საარჩევნო დაპირება ყოფილა. ნაცვლად იმისა, რომ მთავრობა მართლა ზრუნავდეს ევროინტეგრაციის პროცესში არსებულ პრობლემებზე, მოიგონეს არარსებული საჭიროების თემა - ქართველი ხალხის უკანალების დაცვა და შეუდგნენ ამ ფუნქციის განხორციელებას“, - განაცხადა იაგო ხვიჩიამ.

საპარლამენტო უმრავლესობის ლიდერის მამუკა მდინარაძის განცხადებით, თუ პედოფილიის საკითხი დგას პრობლემად, მისი გადაწყვეტის უმკაცრესი ნორმები არსებობს, ლგბტ პროპაგანდის შემხვევაში უბრალო ადმინისტრაციული ხარისხის ამკრძალავი ნორმაც არ არის.

„როდესაც პედოფილიაზე ვლაპარაკობთ, ეს არის ძალიან სერიოზული პრობლემა, რომლისთვისაც არსებობს ნორმა, უმკაცრესი სასჯელი და როგორც კი მსგავსი ფაქტი გამოვლინდება, უმკაცრესად უდგებიან სამართალდამცველები და შესაბამისი სასჯელი არის უმკაცრესი. გაუპატიურებაზე, პედოფილიაზე არის უმკაცრესი სასჯელები. აღსრულებაშიც უმკაცრესად ისჯებიან. ერთზეც და მეორეზეც უმკაცრესი სასჯელებია, მაგრამ ლგბტ პროპაგანდაზე, განსხვავებით ამისა, არათუ უმკაცრესი სასჯელები, არამედ უბრალო ადმინისტრაციული ხარისხის აკრძალვაც კი არ არის“, - განაცხადა მამუკა მდინარაძემ.

„ქართული ოცნების“ თავმჯდომარის ირაკლი ღარიბაშვილის განცხადებით, მთელ მსოფლიოში მიმდინარეობს აღვირახსნილი კამპანია, აღვირახსნილი პროპაგანდა - ამერიკაში, ევროპაში ბაღებში, სკოლებში მიჰყავთ ტრანსგენდერები და ეუბნებიან, რომ თუ არ მოგწონთ თქვენი სქესი, შეგიძლიათ შეიცვალოთ. მისი თქმით, ეს პროპაგანდა მოედო მთელ მსოფლიოს.

„რაც შეეხება დაანონსებულ კანონპროექტს, ეს არის ძალიან მნიშვნელოვანი საკითხი. მესმის, რომ ერთის მხრივ, ეს არის მგრძნობიარე საკითხი მთელი საზოგადოებისთვის, ჩვენი ხალხის 90%-ზე მეტი ასე არის განწყობილი, რომ აუცილებელია ჩვენი შვილების, შვილიშვილების ახალგაზრდა თაობის დაცვა, აი, ამ მავნებელი, პირდაპირ უნდა ითქვას, ანტიეროვნული, ანტიადამიანური პროპაგანდისგან. გადახედეთ მთელ მსოფლიოში რა ხდება, როგორი ტენდენცია მიმდინარეობს.

ეს პროპაგანდა მოედო მთელ მსოფლიოს. დღეს არის საგანგაშო ვითარება. ამიტომ, აუცილებელია და ჩვენ გვქონდა ამის თაობაზე გუნდში მსჯელობა, საპარლამენტო უმრავლესობა გამოვიდა ამ ინიციატივით, ჩვენი გუნდის სახელით გააჟღერა ეს ინიციატივა. ვფიქრობ, რომ საზოგადოება ამას სწორად გაიგებს. ჩვენ ვართ კონსერვატიული საზოგადოება მრავალსაუკუნოვანი კულტურით, ღირებულებებით, ამიტომ, ამას სჭირდება სწორი გააზრება და სწორი დაცვა. სწორი დაცვა სჭირდება ჩვენ საზოგადოებას ბავშვებს და ზოგადად, ჩვენს ღირებულებებს“, - აღნიშნა ირაკლი ღარიბაშვილმა.

ანალიტიკოს ზაალ ანჯაფარიძის განცხადებით, ორგანიზაცია ამ პროცესის, რომ მოხდეს ამ ღირებულებების შემოტანა და დამკვიდრება, ეს ყველაფერი უკვე აწყობილი და კარგად გამართული მექანიზმია. მისი თქმით, მიუხედავად წინააღმდეგობისა, ევროპაში, პრაქტიკულად, ფეხი მოიკიდა და შესაბამისად, მიდის ნელ-ნელა განვრცობა სხვა ქვეყნებში.

„საქართველო, რომელიც არის ევროკავშირის კანდიდატი ქვეყანა, რომელსაც განაცხადი აქვს გაკეთებული იმაზე, რომ უნდა გახსნას მოლაპარაკება წევრობაზე, ადრე თუ გვიან, გვეტყვიან იმას, რაც ადრე გვითხრა კუბილიუსმა - „თუ გინდათ ჩვენთან ყოფნა, უნდა ითამაშოთ და იცხოვროთ ჩვენი წესებით, მიიღოთ ისინი“. ის, რის წინააღმდეგაც ეს კანონი მზადდება, როგორც ჩანს, არის იმ ცხოვრების წესი, რომელიც ნელ-ნელა ყალიბდება ევროპაში და აშშ-ში, საიდანაც მოდის და მერე ვრცელდება სხვადასხვა ქვეყნებში. ასეთი მოცემულება გვაქვს, „ქართული ოცნება“ თავისი პოლიტიკური მოცემულობისა და მისი ამომრჩევლის ინტერესებიდან გამომომდინარე დგამს ამ ნაბიჯს, რომ აჩვენოს მის ელექტორატს, რომ ის დგას ტრადიციული ღირებულებების სადარაჯოზე“, - აცხადებს ზაალ ანჯაფარიძე.

კითხვაზე, გახდება თუ არა კანონი ლგბტ თემის პროპაგანდის აკრძალვა ისეთივე დაპირისპირების და ქუჩის პროცესების მიზეზი, როგორც ეს იყო ფარას კანონი, ანალიტიკოსი თვლის, რომ აუცილებელია საზოგადოებასთან მეტი კომუნიკაცია.

„თქვენი გამოცემის მეშვეობით, პირდაპირ მინდა ვურჩიო ხელისუფლებას იმ გამოცდილების გათვალისწინებით, რაც იყო „უცხოური აგენტების გავლენებთან“ დაკავშირებით, თუნდაც ფორმალურად მაინც, მოაწყონ საზოგადოებრივი განხილვები, მოიწვიონ ალტერნატიული პოზიციების მქონე ადამიანები, გაიარონ ამ კანონის პუნქტები, რომ შემდეგ არ იყოს შეხსენებები და დამუნათებები, რომ საზოგადოების ჩართულობის გარეშე გაიტანეს.

დარწმუნებული ვარ, რომ მომხადარიყო „უცხოური აგენტების გავლენის“ კანონპროექტის განხილვა, შეიძლებოდა რაღაცების ისე შეცვლა, რომ კანონის არსი არ დარღვეულიყო. აქაც აჩვენონ საზოგადოებას, რომ ჩვენ არ ვართ ის პარტია, რომელიც ისე მოქმედებს, როგორც „ნაციონალური მოძრაობა“ - რაც მინდა იმას ვაკეთებენ. მოუსმინონ ალტერნატიულ აზრს, თუ ვერ მივლენ კონსენსუსამდე მერე გაიტანონ და თქვან, რომ ვერ შედგა კონსენსუსი, მაგრამ როგორც ხალხის მიერ არჩეულ პარტიას, რომელსაც გვაქვს მანდატი, მიგვაჩნია, რომ ეს კანონი უნდა მივიღოთ და - მიიღონ“, - აღნიშნა for.ge-სთან საუბრისას ზაალ ანჯაფარიძემ.

ფსიქოლოგი, პოლიტოლოგი რამაზ საყვარელიძე არ ფიქრობს, რომ უმრავლესობის მიერ დაანონსებული კანონი სოციალური პროტესტის საფრთხე გახდება. მისი თქმით, თუ მაინც ჩათვლიან საჭიროდ, რომ უნდა გააპროტესტონ, გამოვიდნენ ქუჩაში და დაანახონ ხალხს რას უჭერენ მხარს. ფსიქოლოგი ფიქრობს, რომ საფრთხეების თვალსაზრისით, ეს კანონი საქართველოსთვის დიდი საფრთხის შემცველი არ არის, მაგრამ ევროპისთვის არის.

„გულუბრყვილობა ყველა ქართველის და მათ შორის ჩემი ნაკლიც არის. არ მეგონა, რომ დასავალეთი ასეთ უხეშ სისულელეს გააკეთებდა. არ მეგონა გააკეთებდნენ იმას, რასაც 70 წელიწადი კომუნისტები აკეთებდნენ, როცა თვლიდნენ, რომ ნაციები უნდა მოისპოს და ზოგადო სოციალისტური, თუ კომუნისტური ადამიანი უნდა შეიქმნას. ამათი მისწრაფებაც ეგ არის, რომ ნაციებს თავიანთი ღირებულებები მოუსპონ და შექმნან ისეთი ადამიანი, როგორიც თვითონ მიაჩნიათ საჭირო.

იმეორებენ კომუნისტების ნაბიჯებს და ეს არის გულდასაწყვეტი. რაც შეეხება სიფრთხილეს, შეიძლება არც არის საჭირო. მაგალითად, იმის ჩვენება, რომ ნუ იმეორებთ კომუნისტურ ნაბიჯებს და ნუ გვერჩით ისევე, როგორც გვერჩოდნენ კომუნისტები, ამაზე პედალირება ზოგიერთებისთვის შეიძლება საკმარისი აღმოჩნდეს.

მე მგონია, რომ პრობლემა ამ შემთხვევაში მათთვის უფრო არის, ვიდრე ჩვენთვის. იმიტომ, რომ ახლა როგორც თქვენ დასვით კითხვა - აბა რა ვქნათ? ეს გულისხმობს, რომ ჩვენ ვართ ცუდ დღეში, მაგრამ მეორე მხრივ, იქნებ, დასავლეთია ცუდ დღეში, როცა ასეთ სისულელეზე მიდის? თუკი ცუდ დღეშია, მაშინ მთავარია გადაატარო, არ დათანხმდე და მორჩა. არ მოგვცემენ ევროკავშირის წევრობას? - ნუ მოგვცემენ, არც ეგ არის პრობლემა. აი, ამ პირობებში, როცა ლაპარაკია, რომ დედის რძის მაგივრად „მშობელი ნომერ პირველის“ რძე გქონდესო, რა შეგონების საჭიროება არსებობს, რომ გასაგები იყოს - მათ ჭკუაზე სიარულს ჯობია მკაფიოდ ითქვას - არა“, - განაცხადა for.ge-სთან საუბრისას რამაზ საყვარელიძემ.