პარლამენტი გამოდის ინიციატივით, რომ დაინერგოს გამჭვირვალობის სტანდარტები ევროპარლამენტშიც, რათა ქართულმა საზოგადოებამ ნახოს ლობისტები, რომლებიც კონკრეტული სტატიების უკან დგანან. გარდა ამისა, კვლავ პრობლემას წარმოადგენს უცხო ქვეყნების ფული ქართულ პოლიტიკაში. პარლამენტის თავმჯდომარის განცხადებით, ლობისტები არათუ სტატიებში აკეთებენ ჩანაწერებს, მათ დაწერეს რეზოლუცია, შეატანინეს ევროპარლამენტარებს პარლამენტში და მიაღებინეს, რაც ტიპური მაგალითია, როგორ მოქმედებს კორუფცია პოლიტიკაში ლობისტების მეშვეობით.

პაპუაშვილის თქმით, კარგია, რომ აშშ-ში მოქმედებს „რუსული კანონი“. ცოტა ხანში გამოქვეყნდება შემდეგი ანგარიში „ნაციონალური მოძრაობის“ ლობისტების შესახებ, სადაც პაპუაშვილის განცხადებით, კიდევ ერთხელ ამოვიკითხავთ ამ მედიასაშუალებებს, ავტორებს და ვნახავთ, რამდენია გადახდილი ასეთ სტატიებში.

„უცხოურ დაფინანსებას და უცხო ქვეყნების ფულს ქართულ პოლიტიკაში არაფერი ესაქმება - მივმართავ ყველა პარტიას, ეს არის არამხოლოდ კანონის დარღვევა, რადგან აკრძალულია უცხოური შემოწირულებების მიღება, ეს არის სუვერენიტეტის მიმართ უდიერი მოპყრობა. უცხოური დონორების მხრიდანაც ეს არის საქართველოს სუვერენიტეტის შელახვა, როცა უცხო ფულით აფინანსებენ ქართულ პარტიებს.

რაქვიაშვილის მხრიდან აღიარებაც კი მოვისმინეთ, რომ დიახ, პარტიებს აქვთ შექმნილი სქემა ყალბი ე.წ. ენჯეოების მეშვეობით იმისთვის, რომ მოიზიდონ უცხოური დაფინანსება. ეს გარკვეული სიამაყითაც თქვა, რომ, თითქოს, კანონმდებლობაში მოძებნეს რაღაც ხვრელი იმისთვის, რომ მიიღონ დაფინანსება. ვერც კი ხვდება ოპოზიცია, მათ შორის სანდრო რაქვიაშვილი, რას ამბობს ამით. ამით ამბობს, რომ ქართული პარტიები თურმე ფინანსდებიან უცხოეთიდან და როგორც წარმოუდგენიათ მათ ქართული საქმის კეთება, როდესაც ისინი სხედან უცხოური ორგანიზაციების ხელფასზე?!“ - აცხადებს შალვა პაპუაშვილი.

როცა პოლიტიკური პარტია ზის უცხო ორგანიზაციის ხელფასზე, შესაბამისად, ის ატარებს სხვა ორგანიზაციის თუ ქვეყნის ინტერესებს. პარლამენტის თავმჯდომარის განცხადებით, როგორც ჩანს, ეს არის პრობლემა, რატომაც ჩუმდებიან ოპოზიციური პარტიები, როცა საუბარია სანქციებზე და რაც ეწინააღმდეგება საქართველოს ინტერესებს.

პრემიერ-მინისტრ ირაკლი კობახიძის განცხადებით, უცხოელი აგენტების შესახებ კანონის დაინიცირების შემდეგ პოლიტიკური სუბიექტების ირიბად დაფინანსება შემცირებულია, თუმცა თვლის, რომ თითოეულ ასეთ პრეცედენტს ქვეყანა ბოლომდე უნდა გაყვეს.

„პარტიების თუ, ზოგადად, პოლიტიკური სუბიექტების ირიბი დაფინანსება ეწინააღმდეგება როგორც ჩვენს კანონმდებლობას, ისე სახელმწიფო სუვერენიტეტის პრინციპს. დემოკრატიულ ქვეყნებში დამკვიდრებული საყოველთაო მიდგომაა, რომ პარტიები, პოლიტიკური სუბიექტები შეიძლება ფინანსდებოდნენ შიდა სახელმწიფოებრივი წყაროებიდან და არა - საზღვარგარეთული წყაროებიდან. ამასთან დაკავშირებით იყო სერიოზული გადახვევები, როდესაც არცთუ ირიბად ხდებოდა კონკრეტული პოლიტიკური სუბიექტების დაფინანსება.

ტენდენცია არის დადებითი. ეს დადებითი ტენდენცია დაიწყო მას შემდეგ, რაც დაინიცირდა პარლამენტში უცხოელი აგენტების შესახებ კანონი. მას შემდეგ აღარ ხდება ირიბი წესით პოლიტიკური სუბიექტების დაფინანსება, ყოველ შემთხვევაში, ასეთი დაფინანსების მოცულობა შემცირებულია. ეს ძალიან კარგია, თუმცა ბოლომდე უნდა გავყვეთ თითოეულ ასეთ პრეცედენტს. პრინციპულად მნიშვნელოვანია, არც პირდაპირი და არც ირიბი ფორმით არ მოხდეს საქართველოში უცხოური წყაროებიდან პოლიტიკური სუბიექტების დაფინანსება, რათა დაცული იყოს სახელმწიფო სუვერენიტეტის პრინციპი“, - განაცხადა ირაკლი კობახიძემ.

ამასთან, როგორც კობახიძემ აღნიშნა, პარტიების დაფინანსებასთან დაკავშირებით რაიმე საკანონმდებლო ცვლილებები არ იგეგმება. პარტიების ირიბი დაფინანსების საკითხი მოწესრიგებულია მოქალაქეთა გაერთიანების შესახებ ორგანული კანონით და ამ კანონის ფარგლებში თუ რაიმე ზომები იქნება მიღებული, კობახიძის განცხადებით, ეს არის ანტიკორუფციული სამსახურის საქმე.

საქართველოს ხელისუფლება ამ ეტაპზე ე.წ. FARA-ს კანონის მიღებას არ ჩქარობს, თუმცა გამორიცხული არ არის, რომ საპარლამენტო არჩევნების შემდეგ საკითხი აქტუალური გახდეს საქართველოს პარლამენტში. უცხოეთიდან შემოსული თანხები რომ ქვეყნის ინტერესებს არ ემსახურება, ამაზე გასულ კვირას ისაუბრა შალვა პაპუაშვილმა, რომლის ინფორმაციით, ყოფილი თავდაცვის მინისტრი თინა ხიდაშელი, რომელიც ამჟამად არასამთავრობო ორგანიზაცია „სამოქალაქო იდეას“ ხელმძღვანელობს, ტაივანიდან ფინანსდება, რათა საქართველოში ანტიჩინური განწყობები გააღვივოს.

ანალიტიკოსი ვახტანგ ძაბირაძე აცხადებს, რომ ფულადი ნაკადების მართვა აუცილებელია და სახელმწიფომ უნდა იცოდეს, სად მიდის ის ფული, რაც შემოდის ნებისმიერი გზით. მისი თქმით, პოლიტიკაში ფულის რეგულირებაზეა ლაპარაკი, მაგრამ აქ მნიშვნელოვანი არის მეორე თემა - გასაგებია, რომ უცხოეთიდან ფულის შემოსვლა უნდა გაკონტროლდეს, მაგრამ ასევე უნდა გაკონტროლდეს ის ფული, რომელიც ადგილზე იხარჯება და ეს არის შავი ფული, რომელიც გაცილებით მეტია, ვიდრე უცხოეთიდან შემოსული თანხა.

„გასაგებია, რომ ამის რეგლამენტირება უნდა გაკეთდეს, მაგრამ ამას სჭირდება ნდობა. საზოგადოება უნდა ენდობოდეს ხელისუფლებას და როცა ჩნდება უნდობლობა, როდესაც მოწესრიგებული არ გაქვს სასამართლო, საარჩევნო კანონი, როდესაც არის ეჭვი, რომ ქვეყანაში არის ელიტური კორუფცია და საკმაოდ დიდი მასშტაბით და ა.შ. კი ბატონი, შეგიძლია გააკონტროლო უცხოეთიდან შემოსული თანხა, მაგრამ ეს საზოგადოებაში დიდ პროტესტს მაინც არ გამოიწვევს, იმიტომ, რომ მთავარი ფული აქ არის საქართველოში.

ჩემი შეფასებით, უცხოეთიდან შემოსული თანხა იმდენად მცირეა, რომ ხელისუფლების განცხადებით ოფისების გასახსნელადაც კი არ ეყოფათ. ამიტომ, მე არ მგონია, რომ უცხოური ფული დიდ ზეგავლენას ახდენდეს არჩევნებზე და პოლიტიკურ პროცესზე. უფრო დიდ ზეგავლენას ახდენს ადგილობრივი ფული, რომელიც არსად არ ჩანს და ეს არის შავი ფული, რომელიც იხარჯება უამრავი რაოდენობით. თუმცა, თუ გულწრფელი ვიქნები, ვიტყვი, რომ ეს თანხები უნდა კონტროლდებოდეს“, - აცხადებს for.ge-სთან საუბრისას ვახტანგ ძაბირაძე.

პოლიტოლოგ რამაზ საყვარელიძეს ეჭვი ეპარება, რომ ჩვენმა აქტიურმა „მეგობრებმა“ სახელმწიფოს მისცენ უფლება საქართველოს პარლამენტმა კენჭი უყაროს FARA-ს კანონს. მისი თქმით, თუკი დასავლეთის თანხებზეა ლაპარაკი, დასავლეთს არ უნდა მოუნდეს საკუთარი თავის გამჟღავნება, მაგრამ თუკი რუსეთის ფინანსებაზეა ლაპარაკი, ასეთ შემთხვევაში დასავლეთს შეუძლია თქვას, რომ დაგეხმარება.

„წმინდა პოლიტიკური თვალსაზრისით რომ აიღოთ, არც ისე მარტივი საკითხია. ვის აწყობს? მე მგონია, რომ გამჭვირვალეობის შესახებ კანონი ისევ ისე არ აწყობს დასავლეთს, როგორც მაშინ. გვახსოვს, სწორედ დასავლეთის მხრიდან წამოვიდა შეტევა, რომ ეს არის „რუსული კანონი“ და არა ამერიკული. თეთრი სახლიდან გვითხრეს, რომ „რუსული კანონი“ არის.

ყველაზე კარგად იციან რა არის ამერიკული კანონი და რა რუსული. ეს ნიშნავს მხოლოდ იმას, რომ რაც თავისთვის ემეტებათ, შენთვის არ უნდათ, რაც არ არის გასაკვირი. რახან გაუვიდათ და შემოგვიტიეს, სანამდე გაუვათ ისევ შემოგვიტევენ, მით უმეტეს, რომ ნახეს ქუჩაში გამოვიდა ხალხი. ამიტომ, მეჩვენება, რომ ეს გზა არ იქნება პროდუქტიული, ისევე როგორც მაშინ“, - ამბობს საყვარელიძე.

როგორც პოლიტოლოგი აცხადებს, კანონში არსებობს იმის რესურსი, რომ ყველა ორგანიზაციის შემოსავლები დაფიქსირდეს და უკვე ამავე კანონით შეიძლება შემოვლითი ვარიანტის გაკეთება.

„დასავლეთიდან შემოსული თანხები ჩვენი მხირდან არის უკონტროლო. საქართველო ძალიან ნოყიერი ადგილია ნებისმიერი სპეცსამსახურისთვის. რამდენიც არ უნდა ვიძახოთ, რომ ჩვენ არავის არ ვმტრობთ, ფაქტია, რომ სპეცსამსახურების დიდი რაოდენობა და ახლა უკვე ჩინეთიც დაემატება თავისი ინტერესებით, იტრიალებს საქართველოში. ისედაც ბლომად ტრიალებდნენ.

გზაჯვარედინზე ვართ და დიდია შანსი, რომ სპეცსამსახურები დაინტერესდნენ ამ გზაჯვარედინით. სიმართლე გითხრათ, არ მესმის რა საჭიროა ნერვების დაგლეჯვა იმაზე, როცა შეიძლება რაღაცა სხვა გზებით სიტუაციის მორბილება. ხანდახან რჩება შთაბეჭდილება, რომ ვიღაცებს ჩათქმული აქვთ, რომ იქ ვერ შეძლეს, მაგრამ აქ მაინც გააკეთებენ. ეს შეჯიბრი არ მეჩვენება სპორტის ისეთ სახეობად, რომელშიდაც ღირდეს ახლა ძალების მოსინჯვა. საკმაოდ სუსტი ქვეყანა ვართ და მოდით, ვიმოქმედოთ ჩვენი შესაძლებლობის მიხედვით“, - განაცხადა for.ge-სთან საუბრისას რამაზ საყვარელიძემ.