პრეზიდენტის რწმუნებული კახეთის რეგიონში, ზურაბ ჭიაბერაშვილი, თანამდებობიდან განთავისუფლების მოთხოვნით პრეზიდენტს მომავალ კვირას მიმართავს განცხადებით. ის ერთადერთია პრეზიდენტის რწმუნებულებიდან, რომელსაც აღკვეთი ღონისძიების სახით გირაო აქვს შეფარდებული. როგორც თავად ამბობს, ის უდანაშაულოა და როგორც for.ge-სთან საუბრისას აცხადებს, მას სთხოვდნენ ვანო მერაბიშვილის წინააღმდეგ ჩვენების მიცემას, გამოქვეყნდება მისი ჩვენებები და საზოგადოება ნახავს, თუ რა კითხვებს უსვამდნენ მას.

რეგიონების გუბერნატორებმა დაწერეს განცხადება თანამდებობიდან განთავისუფლების შესახებ. როდის აპირებთ გადადგომას?

ზურაბ ჭიაბერაშვილი: პრეზიდენტ სააკაშვილის სახელზე ჩემს განცხადებას მომავალ კვირას გამოვაგზავნი თბილისში, რომელიც ინაუგურაციამდე დაკმაყოფილდება.

თქვენ არ გსურთ ახალ ხელისუფლებასთან თანამშრომლობა, თუ არც მათ მოუნდებოდათ თქვენთან თანამშრომლობა?

- ნებისმიერ დემოკრატიულ ქვეყანაში ნორმაა და ასე მოხდა საქართველოშიც. შარშან საპარლამენტო არჩევნების შემდეგ, როდესაც „ქართულმა ოცნებამ“ გაიმარჯვა, ბუნებრივია, ჩვენ, მინისტრთა კაბინეტის წევრებმა დავწერეთ განცხადება და გზა დავუთმეთ იმ პოლიტიკურ ძალას, რომელმაც გაიმარჯვა არჩევნებში. იცით, რომ ინაგურაციის დღეს ძალაში შედის ახალი კონსტიტუცია და გუბერნატორებს უკვე ნიშნავს ახალი მთავრობა.

თქვენმა საპრეზიდენტო კანდიდატი,  „ნაციონალური მოძრაობა“ და პირადად თქვენც ამბობთ, რომ პარტიის რეიტინგი არის მზარდი, მაშინ, როცა ოქტომბრის საპარლამენტო არჩევნებში ამომრჩევლის 46 პროცენტმა დაგიჭირათ მხარი, საპრეზიდენტო არჩევნებში კი ხმების 20 პროცენტი მიიღეთ, ანუ 26 პროცენტით იკლო თქვენმა რეიტინგმა. რაში გამოიხატება თქვენი მზარდი რეტიგინგი?..

- საქართველოში ტრადიციულად ასე ხდება, როდესაც არჩევნებში მარცხდებოდა პოლიტიკური ძალა, ქრებოდა პოლიტიკური სცენიდან. ქართული საზოგადოების გარკვეულ ნაწილს და განსაკუთრებით კოალიცია „ქართული ოცნების“ ლიდერებს ასე ეგონათ, რომ „ნაციონალური მოძრაობა“ გაქრებოდა პოლიტიკური სცენიდან. უფრო სწორედ, ისინი აცხადებდნენ და ყველაფერი გააკეთეს იმისათვის, რომ ეს ასე მომხდარიყო. განვლილი ერთი წლის პოლიტიკური დევნა და რეპრესიები ამის ნათელი მაგალითია. სწორედ არჩევნების შემდეგ, როცა ტარდებოდა კვლევები, ის ადასუტურებდა, რომ „ნაციონალურ მოძრაობას“ ჰქონდა 10 პროცენტიანი რეიტინგი. მხოლოდ იმიტომ, რომ იყო „ნაციონალური მოძრაობის“ წევრი ადამიანებს იბარებდნენ პროკურატურაში. მარტვილში არის ადამიანი გვარად თოფურია, რომელიც 32-ჯერ იყო დაბარებული დაკითხვაზე. წინაასარჩევნოდ პრემიერი ივანიშვილი აცხადებდა, რომ „ნაციონალური მოძრაობა“ არ აიღებდა 10 პროცენტზე მეტს, მაშინ, როდესაც დავით ბაქრაძემ აიღო 21 პროცენტი. ეს იმაზე მეტყველებს, რომ გაზაფხულთან შედარებით, „ნაციონალურმა მოძრაობამ“ და მისმა კანდიდატმა შეძლეს გაეზარდათ რეტინგი, რაც მიუთითებს იმაზე, რომ „ნაციონალურ მოძარაობას“ აქვს მზარდი რეიტინგი.

არ ფიქრობთ, რომ ის, რის გამოც „ნაციონალურმა მოძრაობამ“ წააგო არჩევნები, ამის მიზეზი იყო ის, რაც ხდებობა 9 წლის განმავლობაში. შსს-ს სპეცრაზმელი საუბრობს იმ სასტიკეზე, რომელიც განახორციელა მის მიმართ ბაჩო ახალაიამ. პოლკოვნიკი თეთრაძის მეუღლე, უშუალოდ ბაჩო ახალაიას და მეგის ქარდავას ადანაშაულებს მის მკვლელობაში. ამ ადამიანების სახელი და გვარი უკავშირდება საკმაოდ მძიმე დანაშაულს. მზად არის „ნაციონალური მოძრაობა“ იმისათვის, რომ აიღოს ამ დანაშაულებზე პასუხისმგებლობა?

- 1 ოქტომბერს ჩვენ დაგვაბრალეს 10 თვის ბავშვის მკვლელობა, ამიტომ, ჩვენ თუ ვიმსჯელებთ სკანდალური განცხადებებით, ასე შორს ვერ წავალთ. ასევე მახსოვს „ასავალ-დასავალი“ ბეჭდავდა, რომ „ნაციონალური მოძრაობა“ დადიოდა ციხეებში და საკუთარი ხელით არჩევდა გარდაცვლილი პატიმრების ორგანოებს გადასანერგად. თუ მედიცინაში ვინმე ოდნავ მაინც ერკვევა, იმას არ სჭირდება ახსნა, ეს რამდენად აბსურდულია. რაც შეეხება იმ სააქმეებს, რაც აღძრულია და იგივე სპეცრაზმელის ჩვენებას, ეს ჩვენება არ მინახავს. მე ერთი რამ ვიცი, რომ კონკრეტულმა მოსამართლემ მიიღო გადაწყვეტილება, რომელიც ეხებოდა სპეცრაზმელების ვითომდა წამებას და უდანაშულოდ სცნო მაშინდელი შს მინისტრი.

რაც შეეხება კადრებს, რომელიც გავრცელდა ეს იყო უმძიმესი დანაშუალი, ასევე ივნისშიც გავრცელდა კადრები უმძიმესი დანაშაულის შესახებ. აქიდან გამომდინარე, ჩემი აზრია, რომ აბსოლუტურად მიუკერძოებლად, ყოველგვარი პოლიტიუკური სპეკულაციის გარეშე, უნდა გამოიძიონ ეს საქმე. ჩვენც არაერთხელ განვაცხადეთ და ახლაც ვამბობთ, რომ ყველაფერი უნდა გავაკეთოთ იმისათვის, რომ კონკრეტული პირები, რომლებმაც ჩაიდინეს დანაშაული, დაისაჯონ.

პრეზიდენტმა სააკაშვილმა თავის ბოლო განცხადებაში აღნიშნა, რომ ძალიან წუხს იმის გამო, რომ ზედმეტად ენდობოდა შსს-ს და პროკურატურის თანამდებობის პირებს, თუმცა კონკრეტული პირები არ დაასახელა. როგორ ფიქრობ ვის გულისმობდა სააკაშვილი, ძმებ ახალაიებს და ზურაბ ადეიშვილს?

- არ ვიცი ვისზე იყო საუბარი. მე შემიძლია გითხრათ ერთი რამ, ჩვენ ურთულეს პირობებში მოგვიწია ხელისუფლებაში ყოფნა. ჩვენ ჩავიბარეთ ჩავარდნილი სახელმწიფო, არაფუნქციონირებადი სახელმწიფი ინსტიტუტი და იმავდროულად, ქვეყანა, რომელსაც მართავდნენ ერთი მხრივ სახელმწიფო სტრუქტურებში მოკალათებული კორუმპირებული ჩინოვნიკები და მეორე მხრივ ქურდული სამყარო. როდესაც ასეთ მონსტრს უპირისპირდები, არ გამოვრიცხავ, რომ იყო გადაცდომები, ან შეიძლება იყო ჩადენილი დანაშაული, მაგრამ ეს უნდა გაირჩეს ყოველგვარი პოლიტიზირების გარეშე. მხოლოდ იმის გამო, რომ პოლიტიკური ოპონენტი წაშალო პოლიტიკური სცენიდან, არ შეიძლება ამ საკითხების პოლიტიზირება.

სააკაშვილმა ბოდიში მოუხადა ადამაინებს, რომლებიც მისი მმართველობის პერიოდში წამების მსხვერპლნი გახდნენ, მაგრამ მეორე დღეს მან შეიწყალა ადამიანები, რომლებიც უმძიმეს დანაშაულში არიან ბრალდებული და მათ შორის აღმოჩნდა ბუტა რობაქიძის მკვლელობის საქმის ერთ-ერთი ბრალდებული მაიზერ ლიპარტელიანი...

- მაიზერ ლიპარტელიანი ბრალდებული იყო ცრუ ჩვენების მიცემისთვის. მას აიძულეს, რომ მიეცა ერთი ჩვენება, მაგრამ სასამართლოზე გამოვიდა და მისცა ის ჩვენება, რასაც ის თვლიდა, რომ იყო სიმართლე. ამის გამო ის გახდა პოლიტიკური დევნის მსხვერპლი. მე ვთვლი, რომ ეს იყო მიზანმიმართულად გაკეთებული.

პოლიტიკური ინტერესი ჰქონდათ ლიპარტელიანის მიმართ?

- პოლიტიკური ინტერესი არ იყო მაიზერ ლიპარტელიანის მიმართ, ინტერესი იყო ის, რომ მაიზერ ლიპარტელიანით გასულიყვნენ ვინმე სხვაზე. ის გამოყენებული იყო როგორც შუალედური რგოლი. მინდა გითხრათ, რომ იგივე ხდება ჩემ შემთხევაშიც. ჩემ შემთხვევაში შეიძლება პოლიტიკური ინტერესი არ არსებობდეს, მაგრამ ინტერესი არის, რომ მერაბიშვილის წინააღმდეგ მივცე ჩვენება. გამოქვეყნდება ჩემი ჩვენებები და თქვენ ნახავთ იქ რა კითხვას მისვამდნენ. ამაში არაფერი დასამალი არაა. რა თქმა უნდა, ინტერესი იყო ვანო მერაბიშვილი და სწორედ ამ ნიშნით არის ეს საქმე პოლიტიკური.

შეწყალების საკითხს რომ დავუბრუნდეთ. რითი ხსნით იმას, რომ პრეზიდენტმა შეიწყალა ნარკორეალიზატორები, ანუ შეიწყალა იმ კატეგორიის დანაშულში ბარლდებულები, რომლებსაც ფართო ამნისტია არ შეეხოთ...

- არასამთავრობო ორგანიზაციებიდან გაკეთდა განმარტებები, რომ ამ შეწყალებით პრეზიდენტს კანონი არ დაურღვევია და ის მოქმედებდა სამართლებლივ ჩარჩოში. რაც შეეხება მიზანშეწონილობას, რატომ გადადგა პრეზიდენტმა ეს ნაბიჯები, ამაზე ისეთ პოლიტიკურად დაძაბულ და პოლარიზებულ საზოგადოებაში, როგორიც არის ქართული საზოგადოება, ბუნებრივია, იქნება განსხვავებული მოსაზრება. „ქართული ოცნება“ ეცდება წარმოაჩინოს, რომ დიდი უბედურება მოხდა. პირდაპირ გეტყვით, არაფერი იმაზე დიდი უბედურება არ მოხდარა საქართველოში, ვიდრე ეს იყო ამნისტიით რუსეთის აგენტის გამოშვება. ამიტომ, თუ ჩვენ პოლიტკურ სივრცეში გადავიტანთ ამ საკითხს, მაშინ ვერ ავიცილებთ ურთიერთბრალდებას, მაგრამ რაც შეეხება საკითხის სამართლებლივ მხარეს, პრეზიდენტი მოქმედებდა სამართლებლივ ჩარჩოში, ხოლო რაც შეეხება პარლამენტის ამნისტიას, ის იყო სამართლებლივი ჩარჩოს გარეთ.

სამართლებლივ ჩარჩოში ჯდება ნარკორეალიზატორების და არაერთი მკვლელობისთვის გასამართლებულების ამნისტირება?

- როგორ ფიქრობთ, ის ადამიანები, რომლებიც პარლამენტის ამნისტიით გამოვიდნენ, იქ არ იყო მსგავსი კატეგორიის ხალხი? საკითხი დგას ძალიან მარტივად, არ შეიძლება პარლამენტმა კანონი მიიღოს კონკრეტული პირებისთვის. ძალიან ბევრი იყო ისეთი, რომელიც იყო პოლიტიკური დევნის მსხვერპლი და ბუნებრივია, პრეზიდენტმა ისინი შეიწყალა.

თქვენ ამბობთ, რომ გაიძულებდნენ ჩვენების მიცემას და აპირებთ გამოაქვეყნოთ თქვენი ჩვენება. ბატონო ზურაბ, ვინ გაიძულებდათ ჩვენების მიცემას?

- მინდა გითხრათ, რომ პროკურატურა ხმარობდა ასეთ ფრაზას ე.წ. ფიქტიური დასაქმების საქმე, რაზედაც მოსამართლემაც მისცა გაფრთხილება და შენიშვნა. ეს არის სამუშაოს მაძიებელთა აღრიცხვის პროგრამასთან დაკავშირებული საქმე. მეორე, რაც უნდა ვთქვათ, არის თვითონ საქმის არსი, ანუ დასაქმების პროგრამა თავდაპირველად დაიწყო თბილისსა და საქართველოს 25 დიდი ქალაქში. ჩვენ შევედით დაახლოებით 600 ათას ოჯახში და სამუშაოს მაძიებლად აღერიცხა, დაახლოებით, 700 ათასზე მეტი ადამიანი. „ნაციონალური მოძრაობა“ რომ დარჩენილიყო ხელისუფლებაში, როგორც 25 ქალაქში წარმატებით განვახორციელეთ, ასევე წარმატებით განვახორციელებდით ამ პროექტს მთელი ქვეყნის მასშტაბით. ანუ არანაირი წინაპირობა იმისა, რომ ეს არ განხორციელდებოდა, არ არსებობდა. შესაბამისად, გამოძიება გვედავება იმას, რომ მეორე ეტაპი გაჩერდა.

საზოგადოებაში უნდათ შექმნან ისეთი განწყობა, რომ თითქოს, ეს ხალხი, ვინც მაშინ დაკოტრაქტდა მაინცდამაინც მხოლოდ პარტიული ნიშნით შეირჩა. დაახლოებით, 20-მდე ადამიანია დაკითხული და თვალნათლივ ჩანს, რომ არანაირი პოლიტიკური ნიშნით ეს ხალხი შერჩეული არ ყოფილა. ეს ადამიანები, ძირითადად, შეარჩიეს ადგილობრივი თვითმართველობის ორგანოებმა. ეს აბსოლუტურად კანონის ფარგლებში ხდებოდა იქიდან გამომდინარე, რომ მთავრობის დადგენილებაში პირდაპირ წერია, რომ თვითმარველობის ორგანოებს უნდა შეერჩია ეს ხალხი.

მაგალითად, სასამართლოზე იმერეთის წარმომადგენელმა თქვა, რომ მე მუდმივად მაკითხვდა ხალხი სამუშაოს მოთხოვნით და რეალურად ვიცოდი ვის უნდოდა მუშაობის დაწყებაო. ამიტომ, როცა მოვიდა მთავრობის ბრძანება, ბუნებრივად დავუკავშირდი იმ ხალხს, ვინც რეგულარულად გამგეობაში გვაკითხავდა სამუშაოს მოთხოვნითო. მეორე ადამიანმა თქვა, რომ ხალხი შეარჩია სოციალურად დაუცველი ოჯახებიდან. ამიტომ, ზოგადად რაში გამოიხატება ბრალდება, ეს არ ჩანს.

რომც წარმოვიდგინოთ, რომ პროგრამა შეფერხდა და არ განხორციელდა, აქ რაში იკვეთება ვანო მერაბიშვილის ან ჩემი დანაშაული, ეს არ ჩანს. ბრალდება არის აბსურდი. მე არ გავუსწრებ მოვლენებს, მორჩილად დავდივარ ქუთაისში სასამართლოზე და მზად ვარ, რომ ყველა კითხვას გაეცეს პასუხი. როცა ჩვენ ვამბობთ, ეს არის პოლიტიკური დევნა, არასოდეს არ გვითქვამს, რომ გამოძიება არ ჩატარდეს, ან სასამართლო არ გაიმართოს. ჩვენ ყოველთვის კითხვის ნიშნის ქვეშ ვსვამდით ერთ საკითხს - რამდენად მართებულია, რომ წინასწარ პატიმრობაში იყოს პოლიტიკური ფიგურები.

როგორ ფიქრობთ პოლიტკურად მოტივირებულია ახალაიების, ქარდავას და სხვა ბრალდებულების მიმართ აღძრული სისხლის სამართლის საქმეები?

- მე კონკრეტულ საქმეებს კარგად არ ვიცნობ და შესაბამისად გამიჭირდება ამის კომენტირება. მაგრამ ზოგადი პოლიტიკური შეფასება არის ასეთი - რაც შეეხება ადამიანებს, რომლებიც ბრალდებულები არიან ციხის სკანდალთან დაკავშირებით და წამებაში არიან ეჭვმიტანილები, მეც, როგორც ნებისმიერი მოქალაქე, ვითხოვ ამის გამოძიებას. მაგრამ გამოძიებამ არ უნდა დაუშვას შერჩევითი სამართალი. ერთი მხრივ, ადამიანი, რომელიც ამის სათავეში იდგა, ანუ ბედუკაძე არ უნდა იყოს განრიდებული საქმიდან ისე, რომ საერთოდ არ აგოს პასუხი და მეორე მხრივ, საქმე მიმდინარეობდეს სხვა ადამიანის მიმართ. კი ბატონო, მიმდინარეობდეს იმათ მიმართაც, მაგრამ შერჩევით სამართალს ნუ ექნება ადგილი და ბედუკაძე ნუ იქნება შერაცხული სრულიად უდანაშაულოდ.

რაც შეეხება კონკრეტულად ახალაიას, ვიმსჯელოთ იმ საქმეების მიხედვით, რაც მის მიმართ იყო წარდგენილი. ორ საქმეში სადაც მას ბრალად ედებოდა წამება და არადამიანური მოპყრობა, ის სასამართლომ გაამართლა. ის ბრალდებული იყო ციხის ბუნტთან დაკავშირებით, ქვეყანაში, სადაც „კანონიერი ქურდები“ მართავდნენ ქვეყანას. მაგრამ გაასამართლო ადამიანი ციხის ბუნტისთვის, რომელიც კარგად იყო მაშინ დასაბუთებული, რომ იმართებოდა „კანონიერი ქურდების“ მიერ, ეს ნიშნავს შექმნა ქვეყანაში განწყობა, რომ „კანონიერ ქურდებს“ შეუძლიათ გაასამართლონ ადამიანი მათ წინააღმდეგ ბრძოლისათვის. მეოთხე საქმე ეს არის გირგვლიანის საქმე.

გაკეთდა უკვე განცხადებები, რომ ახალაიას წინააღმდეგ მიმდინარეობს სხვა საქმეების გამოძიება და არაა გამორიცხული, რომ მას კიდევ წაუყენონ ბრალდება...

- საზოგადოებაში არსებობს აგრესია ახალაიას მიმართ და ერთი შეხედვით, ძნელია ილაპარაკო სამართლებრივ მხარეზე, მაგრამ შევხედოთ სამართლებლივ მხარეს. არჩევნების წინა დღეს სასამართლო იღებს გადაწყვეტილებას ამ ადამიანის შესახებ და ამბობს, რომ მას უნდა მიესაჯოს წინასწარი პატიმრობა. თან გაითვალისწინეთ, რომ გირგვლიანის საქმეზე ვანო მერაბიშვილს აღკვეთი ღონისძიება საერთოდ არ აქვს შეფარდებული, ხოლო იმავე საქმეზე ახალაიას უფარდებენ აღკვეთ ღონისძიებას პატიმრობას.

ახლაიას ბრალი იმ ნაწილში წაუყენეს, სადაც დასტურდება, რომ ამ მკვლელობაში ბრალდებულებს (რომლებიც მისი ძმის მეგობრები იყვნენ), საპატიმრო დაწესებულებაში შეუქმნა კომფორტული პირობები. ეს ადამიანები თავისუფლად გადაადგილდებოდნენ, ტოვებდნენ საპატიმროს, მიდოდნენ ძველ სამსახურში. მეტიც, აგვისტოს ომის დროს ისინი გამოიყვანეს საკნიდან და იმ ე.წ. სასულიერო პირის, ციხის ყოფილი დირექტორის, ტაბაღუას სახლს აფარებდნენ თავს. ეს არაა დანაშუალი?

- ჩვენ უნდა გავარჩიოთ ერთმანეთისგან საქმის არსებითი მხარე და წინასწარი პატიმრობის შეფარდება. მე არ ვამბობ, რომ ახალაიას მიმართ გამოძიება არ იყოს და ის ადამიანები გამოდიოდნენ თუ არა სასჯელაღსრულების დაწესებულებიდან. გამოძიება გაგრძელდეს, სასამართლო ჩატარდეს. ლაპარაკი მაქვს წინასწარ პატიმრობაზე. წინასწარი პატიმრობა რითი დაასაბუთა პროკურატურამ და რა გაიზიარა მოსამართლემ? - მოსამართლემ თქვა მოსალოდნელია, რომ იმ საქმეებზე, რაზედაც ახალაია იყო ბრალდებული, გამართლდეს და გარეთ გამოვიდესო. გარეთ გამოსვლა არ გვაწყობს და ახლა შევუფარდოთ წინასწარი პატიმრობაო. ვიდრე სასამართლო განაჩენი არ იქნება, მე არ ვამტკიცებ არც ჩემი, არც მერაბიშვილის და არც ახალაიას უდანაშაულობას.

როდესაც გამოდის იგივე თეთრაძის მეუღლე და ამბობს, რომ ახალაიამ და ქარდავამ მისი მეუღლე წამებით მოკლეს, იმის გამო, რომ ერთი მინისტრი იყო,ხოლო მეორე სამხედრო პოლიციის უფროსი, ამ ადამიანებმა არ უნდა აგონ პასუხი და ამ დანაშაულში ბრალდებულები დაუსჯელები უნდა დარჩნენ?

- მე თვითნ ვამბობ, რომ იქ, სადაც წამების ბრალდება არის, ჩატარდეს სრულფასოვანი გამოძიება, მაგრამ როდესაც ვლაპარაკობ შერჩევით სამართალზე, მე გისვამთ კითხვას, ბედუკაძე, არა თუ ეჭვი არსებობს, რომ წამებაში მონაწილეობდა, არამედ კადრებში გვყავს ნანახი როგორ აწამებდა ადამიანს, ის გარეთაა და მასზე არ მიმდინარეობს გამოძიება. ამაზე ვლაპარაკობ, რომ შერჩევითი სამართალია, თორემ მე არც ჭაკუას, არც ქარდავას და არც ახალაიას ხელს არ ვაფარებ.

პირიქით, თუ დასტურდება, რომ ისინი წამებაში მონაწილეობდნენ, უმკაცრესად უნდა დაისაჯონ იმისათვის, რომ მათ მიერ ჩადენილი დანაშაულისთვის, თუ ეს დადასტურდება, პოლიტიკური ჩირქი ჩვენ „ნაციონალურ მოძრაობას“ გვეცხება. მე ვზიანდები და მე მეცხება ჩირქი. ჩატარდეს სრულფასოვანი გამოძიება. როდესაც საქმე ეხება უმაღლესი თანამდებობის პირებს, რაც არ უნდა საზოგადოებრივი აგრესია არსებობდეს, არ შეიძლება მათი წინასწარ პატიმრობაში ყოფნა. თუ სასამართლო დაადასტურებს მათ ბრალეულობას, კი ბატონო, შეაბრუნონ საპატიმროში. იგივე მეც მეხება.