ქართველი ბიზნესმენები და განსაკუთრებით სამშენებლო სექტორის წარმომადგენლები ამჯერად ფსონს კანდიდატის სტატუსზე დებენ. მათი ღრმად სწამთ, რომ ევროპული პერსპექტივის გაღრმავება დადებით ეფექტს მოიტანს. დეველოპერებისთვის ეს უძრავი ქონების გაძვირებაში გამოიხატება. მანამდე კი ამ მიმართულებით გარკვეული კლებაა.

უძრავი ქონების ბაზარზე 2023 წელს სტაბილურობა ჯერჯერობით შენარჩუნდა. როგორც „არსის“ გენერალური დირექტორი ბესო ორთოიძე განმარტავს, ბაზარმა გამოწვევებს გაუძლო, თუმცა არის რამდენიმე საკითხი, რაც პრობლემად რჩება. ეს არის მოთხოვნა-მიწოდების შესაძლო დისბალანსი და კადრებთან დაკავშირებული პრობლემა.

„მთელი წლის განმავლობაში შენარჩუნებული იყო სტაბილურობა და ეს ტრენდი გაგრძელდა. პანდემიური პერიოდის გამოწვევებისგან პრაქტიკულად არაფერი დარჩენილა, ბაზარი გაიზარდა. გასულ წელს სარეკორდო ზრდა გვქონდა როგორც სარეალიზაციო ფასის, ასევე თვითღირებულების ნაწილში. წელს ეს მდგომარეობა დასტაბილურდა“, - აღნიშნა ორთოიძემ და ხაზი გაუსვა, რომ დღედღეობით უძრავი ქონების ბაზარზე ორი გამოწვევაა: „გაზრდილია სამშენებლო ნებართვების რაოდენობა. მომავალ წელს ეს შეიძლება რისკის მატარებელი იყოს იმ თვალსაზრისით, რომ მოთხოვნამ მიწოდებას გადააჭარბოს. ევროკავშირის კანდიდატის სტატუსის პერსპექტივა მოთხოვნის სტიმულირებას მოახდენს. მეორე გამოწვევაა კადრები, რაც იყო და რჩება პრობლემად. აქაც ის ფაქტორი, რომ ნებართვები გაზრდილია და მოთხოვნა იმატებს, კადრების საკითხი უფრო პრობლემური ხდება და შეიძლება გაღრმავდეს კიდეც“, - აღნიშნა ორთოიძემ.

„არსის“ აღმასრულებელი დირექტორი იმედოვნებს, რომ მზარდი დინამიკა 2024 წელსაც შენარჩუნდება და ბაზარს ამ მხრივ საფრთხე არ ემუქრება.

„მნიშვნელოვანია სტაბილურობის შენარჩუნება, 2023 წელს ბაზარმა ამ კუთხით დადებითი დინამიკა აჩვენა და ეს უნდა შენარჩუნდეს. საფასო რყევები ბაზრისთვის სასურველი არ არის, როცა თვითღირებულების ასეთი მკვეთრი ზრდა ფიქსირდება“, - დასძინა „ბიზნეს ინსაიდერთან“ საუბრისას ბესო ორთოიძემ.

ევროკავშირის კანდიდატის სტატუსთან დაკავშირებით დადებითი მოლოდინი აქვს საქართველოს უძრავი ქონების ეროვნული ასოციაციის ხელმძღვანელს ვაჟა მებაღიშვილსაც, რომლის შეფასებითაც, თუ ქვეყანაში ეკონომიკური სტაბილურობა შენარჩუნდა, უძრავი ქონების ბაზარზეც ვითარება არ შეიცვლება.

„რეგიონში მიმდინარე პროცესების ფონზე საქართველო სტაბილურობას მაინც ინარჩუნებს და საინვესტიციოდ მიმზიდველი ქვეყანაა. შესაბამისად, ქვეყნის მიმართ არის გარკვეული ინტერესი და ვითარდება ინფრასტრუქტურა. ეკონომიკური მდგომარეობა მეტ-ნაკლებად სტაბილურია და ეფექტებიც შესაბამისად დადებითია. კანდიდატის სტატუსი ამ მიმართულებით დამატებითი როლს ითამაშებს“, - განაცხადა მებაღიშვილმა.

ბიზნესისთვის დადებით შედეგს ელის საქართველოს მცირე და საშუალო ბიზნესასოციაციის ხელმძღვანელი მიხეილ ჭელიძეც. მისი აზრით, კანდიდადის სტატუსის მონიჭების შემდეგ ევროპული ბიზნესი უფრო მეტად მიენდობა ქართულ ბიზნესს, რაც გარიგებების ოდენობას გაზრდის.

„ევროკავშირის სტატუსის მონიჭების შემდეგ, ერთიორად გაიზრდება ის შესაძლებლობები, რაც დღეს გვაქვს. ევროკავშირთან ყოველწლიურად ბრუნვა 2-3%-ით იზრდება. კანდიდადის სტატუსის მონიჭება ნიშნავს იმასაც, რომ ევროპული ბიზნესი უფრო მეტად მიენდობა ქართულ ბიზნესს, რაც გულიხსმობს იმას, რომ გარიგებების ოდენობა უფრო გაიზრდება. ზუსტად რა მოხდება ვერავინ იტყვის, მაგრამ, ყოველ შემთხვევაში, იმის თქმა შეიძლება, რომ მინიმუმ 50%-იანი წისვლა იქნება. ეს კარგი ამბავი ეკონომიკურ შესაძლებლობებს მინიმუმ გააორმაგებს“, - განაცხადა მიხეილ ჭელიძემ.

დღევანდელი გადასახედიდან ცოტა რთული წარმოსადგენია, კანდიდატის სტატუსმა როგორ უნდა გაააქტიუროს ბიზნესი და მათ შორის, უძრავი ქონების ბაზარი. ჯერჯერობით ამ სექტორში გარკვეული უკუსვლა ფიქსირდება. მიმდინარე წლის ნოემბერში უძრავი ქონების ბაზარზე დიდი ვარდნა დაფიქსირდა. 2023 წლის ნოემბერში თბილისში საცხოვრებელი ბინების ტრანზაქციების რაოდენობამ 3390 ერთეული შეადგინა და წინა წლის ნოემბერთან შედარებით 16%-ით შემცირდა. „ქოლიერს ჯორჯიას“ ინფორმაციით, ბაზრის ზომა 7%-ით - 215 მილიონ აშშ დოლარამდეა შემცირებული.

2023 წლის ნოემბერში თბილისში ახალ პროექტებში ტრანზაქციების 10%-იანი კლებაა, ძველ პროექტებში კი, მაჩვენებელი 27%-ით შემცირდა.

2023 წლის ნოემბერში ბათუმში საცხოვრებელი ბინების ტრანზაქციების რაოდენობამ 993 ერთეული შეადგინა და წინა წლის ნოემბერთან შედარებით 41%-ით იკლო. ბაზრის ზომა 43%-ით - 43 მილიონ აშშ დოლარამდეა შემცირებული.

2023 წლის ნოემბერში ბათუმში ახალ პროექტებში ტრანზაქციების 44%-იანი კლება იყო, ძველ პროექტებში კი - 24%-იანი.