აფხაზეთში, ოკუპირებული ოჩამჩირის რაიონში რუსეთის სამხედრო-საზღვაო ძალების მუდმივი ბაზა გაიხსნება. ოკუპირებული აფხაზეთის ე.წ. პრეზიდენტმა ასლან ბჟანიამ უკვე გააფორმა ხელშეკრულება რუსეთის თავდაცვის სამინისტროსთან. ამასთან, ასლან ბჟანია ყურადღებას ამახვილებს თბილისთან ურთიერთობაზე და ამბობს, რომ თანამშრომლობა მხოლოდ ენერგეტიკის სფეროში არსებობს.

„საქართველოს დღევანდელი ხელმძღვანელობა, ვგულისხმობ პრემიერ-მინისტრს და მის გუნდს, და არა საქართველოს პრეზიდენტს, პრაგმატული ხალხია და ამ თვალსაზრისით, ასე ვთქვათ, ასეთი დიდი პრობლემები არ ყოფილა. მაგრამ, ხანდახან ხდება, რომ არა იმდენად ქართული, რამდენადაც ამერიკული სადაზვერვო თვითმფრინავები არღვევენ საჰაერო სივრცეს, ჩვენ ამ საკითხს ვაფიქსირებთ, მაგრამ ცხადია, რომ ეს დაზვერვა ხორციელდება შეერთებული შტატების შეიარაღებული ძალების და გარკვეულწილად, საქართველოს ინტერესებიდან გამომდინარე“, - განაცხადა ასლან ბჟანიამ.

ბჯანიას პროვოკაციულ განცხადებას შეფასება მოჰყვა თბილისში. ვიცე-სპიკერ გია ვოლსკის განცხადებით, არანაირი შეთანხმება რუსეთსა და აფხაზეთს შორის არ არსებობს, ეს არის გარკვეული ფორმალობა, ხანდახან საშუალებას მისცემენ ხოლმე ბჟანიას, რომ დაელაპარაკოს ვინმეს მაღალ დონეზე, მათ შორის პრეზიდენტს.

„რუსეთის ინტერესია, ძალები მოიკრიბოს, რათა კავკასიის რეგიონი არ დათმოს, რაც სააკაშვილმა ჩააბარა 20 პროცენტის ოდენობით - დათმობას არ დაუშვებს, ჩვენ ვალდებულები ვართ ჩვენი პატარა ქვეყანა გავიყვანოთ სამშვიდობოზე. რუსეთი აგრესორი და საოკუპაციო ძალაა, მსოფლიო დაპირისპირების ერთ-ერთი მხარეა, აქედან გამომდინარე, იმსჯელეთ და შეაფასეთ, ვინ დაგვაწია თავზე ეს უბედურება. ჩვენ საფრთხის შემცველ სიტუაციაში, მათ შორის, რუსეთიდან მომავალი საფრთხის წინ მყოფნი, ვალდებულები ვართ ჩვენი პატარა ქვეყანა გავიყვანოთ სამშვიდობოზე“, - განაცხადა გია ვოლსკიმ.

ანალიტიკოსების შეფასებით, ოჩამჩირეში მუდმივი სამხედრო-საზღვაო ბაზა დიდ რისკებს შეუქმნის როგორც ანაკლიის პროექტს, ასევე ქვეყნის უსაფრთხოებას და შესაბამისად, ხელისუფლების მხრიდან აუცილებელია მკაცრი შეფასებები, პარტნიორი ქვეყნები საქმის კურსში ჩაყენება, რათა მათი მხრიდან ამ პროექტთან დაკავშირებით ზეწოლა განხორციელდეს.

რაც შეეხება შეთანხმებას, საუბარია, ოჩამჩირეში მდებარე წყალქვეშა ნავების ყოფილ სამხედრო ბაზაზე, რომელიც საბჭოთა კავშირის პერიოდიდან არსებობდა. ორი წლის წინ, რუსეთმა ამ ბაზის გაწმენდითი და სარეაბილიტაციო სამუშაოები ჩაატარა, რაც ადასტურებდა ამ ბაზასთან დაკავშირებით რუსეთის გეგმებებს. როგორც ჩანს, მიღებულია გადაწყვეტილება, რომ ძველი ბაზის ადგილზე მუდმივი სამხედრო ბაზა გაკეთდეს, რაც ექსპერტის უსაფრთხოების საკითხებში ვახტანგ მაისაიას განცხადებით, დიდი საფრთხის შემცველია საქართველოსთვის და არსებობს საფრთხე იმისა, რომ რუსეთი ამ ბაზას თავისი იმპერიული მიზნების განხორციელებისთვის გამოიყენებს, როგორც უკრაინის ომში, ასევე რეგიონში.

„ეს არის ანექსიის პირდაპირი დაწყება. სამხედრო-საზღვაო ძალების მუდმივი ბაზის გახსნა ისე, რომ საქმის კურსში არ არის თბილისი, ეს უკვე არის ანექსია. გასაგებია, რუსები აფართოებენ პლაცდარმს და, როგორც ჩანს, ისინი აპირებენ საზღვაო აკვატორიაში საქართველოს სხვა ტერიტორიებსაც დაეპატრონონ, რაც არაა გამორიცხული. ეს მართლა საშიშია საქართველოს ეროვნული უსაფრთხოებისთვის.

რუსეთს ეს სჭირდება იმისთვის, რომ მოახდინონ კომპენსაცია ყირიმში არსებული სიტუაციების. ანექსირებული ყირიმის ინფრასტრუქტურა შავ ზღვაში იბომბება. უკრაინელები უკვე შტაბებსაც უბომბავენ რუსებს. ამიტომ, რუსეთი ცდილობს უფრო შორ მანძილზე მოახერხოს თავისი კომუნიკაციების გადატანა და შესაბამისად, როგორც ჩანს, უმიზნებენ საქართველოსაც. ეს გადაწყვეტილება საქართველოსთვისაც არის ერთგვარი გაფრთხილება“, - აცხადებს for.ge-სთან საურისას ვახტანგ მაისაია.

პოლოტოლოგი, მკვლევარი საერთაშორისო ურთიერთობების საკითხებში თამარ კიკნაძე აცხადებს, რომ რუსეთის ბაზები განლაგებულია თბილისიდან 30 კილომეტრში. მისი თქმით, ძირითადად, სამხრეთ ოსეთის და აფხაზეთის ოკუპირება მოხდა იმიტომ, რომ იქ რუსები თავისი სამხედრო ძალებით გამაგრებულიყვნენ.

„რაც შეეხება რუსეთის ბაზების განლაგებას, კავკასია აღიქმება რუსეთის გავლენის სფეროდ. გარდა ამისა ამ მსოფლიო გადანაწილების პროცესში რუსეთი აფიქსირებს თავის პოზიციას. არსებობს ობიექტური რეალობა და ოპოზიციის მოქმედებიდან გამომდინარე, ჩანს, რომ მათ საქართველოს ბედ-იღბალი საერთოდ არ აინტერესებთ. მათი ერთადერთი ინტერესია, იყვნენ იარაღი რუსეთის წინააღმდეგ ბრძოლაში, მაგრამ ობიექტური რეალობა არის აბსოლუტურად განსხვავებული.

ჩვენ უნდა ვიმოქმედოთ ჩვენი ეროვნული ინტერესებიდან გამომდინარე. ახლა დადგა ის დრო, როდესაც ჩვენ შეგვიძლია ვილაპარაკოთ ჩვენს ტერიტორიულ მთლიანობაზე. არ უნდა ავყვეთ პროვიკაციებს, ვიმოქმედოთ ჩვენი ეროვნული ინტერსებიდან გამომდინარე. დღეს, აფხაზებთან და ოსებთან ლაპარაკის კარგი შესაძლებლობა არის“, - აღნიშნა for.ge-სთან საუბრისას თამარ კიკნაძემ.

პოლიტოლოგ რამაზ საყვარელიძის განცხადებით, რუსეთის ეს გადაწყვეტილება ადასტურებს, რომ ბრალდება ხელისუფლების პრორუსულობაზე არის პროპაგანდის ნაწილი. რუსეთთან კეთილგანწყობილი და ურთიერთობის აღდგენის რიტორიკა არის ტყული, რადგან, მისი თქმით, რუსეთს არაფერში არ სჭირდება საქართველოსთან ურთიერთობის აღდგენა.

„რუსეთი არაა ის ქვეყანა, რომელიც კარგი ადამიანობისთვის, ან ზნეობრიობითვის გადადგამს ნაბიჯს. ჩვენი ოპოზიციის და დასავლეთის იმ ჯგუფებისთვის, ვისთვისაც ამოცანა არის, რომ საქართველოსთან ევროპის ურთიერთობა გაართულონ, იძახიან, რომ საქართველო რუსეთისკენ იხედება. თუ საქართველო რუსეთისკენ იხედება, მაშინ რუსეთი რატომ აკეთებს ბაზას აფხაზეთში?

წესით, მადლიერების ნიშნად საქართველოსთვის სასურველ ნაბიჯებს უნდა დგამდეს და მეორე, რუსეთს არ აწყობს საქართველოზე ტრანზიტი გავიდეს, თუ საქართველოს ხელისუფლება რუსეთის სურვილებს ითვალისწინებს, მაშინ ადგებოდა და გახსნიდა ამ მეორე ფრონტს, ეს იქნებოდა რუსული ინტერესების გათვლა. ამიტომ, თუ ფაქტები და ნათქვამები ერთმანეთს ეწინააღმდეგება, რომელიღაცა ტყუილია და ლოგიკამ უნდა გვიკარნახოს, სად მართალია და სად არა“, - ამბობს for.ge-სთან საუბრისას რამაზ საყვარელიძე.