ახლახან ჩამოყალიბებულ ,,სამოქალაქო სოლიდარობის” დამფუძნებლებს მიაჩნიათ, რომ მოძრაობა შეძლებს, ხელისუფლება მუდმივად პრესინგის ქვეშ ამყოფოს. ,,თუ შედეგს ვერ მივაღწევთ (ეს სკეპტიკოსების გასაგონად), ,,შემოლაწუნების” ფუნქციას მაინც შევასრულებთ”, - ამბობს “სოლიდარობის” ერთ-ერთი დამფუძნებელი, კავკასიის საკითხების ექსპერტი მამუკა არეშიძე. ისე, “სამოქალაქო სოლიდარობაში”, გია კორკოტაშვილსა და ირაკლი კაკაბაძის გვერდით, არეშიძის გამოჩენა ბევრს გაუკვირდა. ამასთან, გარკვეული შეკითხვები მოძრაობის ფინანსებთან დაკავშირებითაც გაჩნდა... “ქართული სიტყვა” მამუკა არეშიძეს ესაუბრა.
- ბატონო მამუკა, თქვენმა მოძრაობამ პრიორიტეტად საზოგადოებრივ მაუწყებელში მიმდინარე პროცესების კრიტიკა აირჩია...
- სიმართლე გითხრათ, ამ ეტაპზე აქტიურობას არ ვაპირებდით და ვფიქრობდით, რომ პროცესებში მონაწილეობას იანვარში, ბორდის არჩევნების დროს მივიღებდით, მაგრამ გარემოებებმა გვაიძულა, ამ კუთხით გავაქტიურებულიყავით. როცა საზოგადოებრივი მაუწყებლის ხელმძღვანელად გამოცდილი პროფესიონალი თამაზ ტყემალაძე დაინიშნა, თითქოს ყველაფერი თავის ადგილას დადგა, მაგრამ ბოკერიას გუნდი მიხვდა, რომ ტელევიზია მომავალ არჩევნებში მის სასარგებლოდ არ იმუშავებდა, ამიტომაც სიტუაცია არია, რასაც კვესიტაძე-პაიჭაძის საავტორო გადაცემის დახურვა დაერთო. მინდა, ხაზგასმით აღვნიშნო, რომ დავით პაიჭაძის პროფესიონალიზმში ეჭვი არასოდეს მეპარებოდა, მაგრამ მისი პოლიტიკური კრედო ჩემთვის მისაღები არაა. იგივეს ვერ ვიტყვი ეკა კვესიტაძეზე, რომლის პროფესიონალიზმი და საქციელი საეჭვოდ მიმაჩნდა - ყოველთვის მხარე, ,,ნაციონალების” მედროშე იყო. ახალმა ხელმძღვანელობამ ჩათვალა, რომ გადაცემებმა თავიანთი თავი ამოწურეს, ბორდი-ს გაუმართლებელმა ჩარევამ კი, დაპირისპირება გამოიწვია. ყველას კარგად ახსოვს, წინა ხელისუფლების დროს, ბევრი პროფესიონალი ტელევიზიიდან როგორ უცერემონიოდ დაითხოვეს. ტელევიზიის საშვი არ მისცეს ქალბატონ ლია მიქაძეს, ქართული ტელევიზიის სახეს და სიმბოლოს. შეიძლება, ასეთი ღვაწლმოსილი ადამიანი ეთერში არ გაუშვა, მაგრამ ელემენტალურ პატივისცემას მაინც ხომ იმსახურებს?! როცა პატივისცემით სხვას არ ეპყრობი, სხვისგან იგივეს ნუღარ ითხოვ. მახსოვს, დათო პაიჭაძე, ძველ თანამშრომლებთან შეხვედრის დროს, მაგიდაზე მუშტს ურტყამდა და გაიძახოდა, თქვენი დრო დამთავრდაო. ჰოდა, ნუღარ უკვირთ, რომ მათი დროც დამთავრდა.
- დავით პაიჭაძე და ეკა კვესიტაძე აშშ-ის ელჩთან, ნორლანდთან “წასულან” სიმართლის საპოვნელად...
- ბატონი რიჩარდ ნორლანდი სხვა ქვეყნის საზოგადოებრივი ტელევიზიის მუშაობაში არ ჩაერევა - დემოკრატიული ქვეყნისთვის ასეთი რამ მიუღებელია. საპარლამენტო არჩევნების წინ, აშშ-ის ერთ-ერთი შტატის სენატორმა, მაკკეინის ჯგუფიდან, არაერთგზის გამოხატა პროტესტი ქართული საზოგადოების მიერ ,,ნაცმოძრაობის” წინააღმდეგ აგორებული საპროტესტო ტალღის გამო. მე და ამავე შტატში მცხოვრებმა ქართველმა ბიზნესმენმა, დავით კარტოზიამ ამოვირჩიეთ შტატის ორმოცდაათი ცნობილი და გავლენიანი პიროვნება კულტურის, ბიზნესის, საინფორმაციო და სხვა სფეროებიდან, წერილები გავუგზავნეთ, რომელთაც თან ციხის კადრები დავურთეთ ახსნა-განმარტებით, აი, თქვენი სენატორი მხარს უჭერს მთავრობას, რომელმაც ასეთი რამ ჩაიდინა საკუთარი მოქალაქეების მიმართო. იმ დღის მერე, სენატორისგან აღარაფერი გაგვიგია.
მოკლედ, საზოგადოებრივი მაუწყებლის კარი ყველასთვის უნდა იყოს ღია, მაგრამ ეს კარი ჩემთვის დაკეტილია - ბორდ-მა უფლებამოსილებას გადააჭარბა და ჩემი გადაცემა ,,კავკასიური აქცენტები” ბადიდან ამოაგდო. ეს იმ დღეს მოხდა, როცა ტელევიზიის წინ ჩვენი მოძრაობის აქცია მიმდინარეობდა.
- ანუ, ბორდ-ს თქვენი აქცენტები არ მოსწონს?
- საზოგადოებრივ მაუწყებელში მნიშვნელობა არ უნდა ჰქონდეს პარტიულობას, შერჩევა პროფესიონალიზმისა და თემის აქტუალობით უნდა ხდებოდეს. დღეს “მაუწყებელში”, ისევე როგორც სამინისტროებში, ,,ნაციონალებთან” დაახლოებული ბევრი პიროვნება მუშაობს, ისინი კანონსა და შინაგანაწესს ემორჩილებიან, მაგრამ ქმნიან “მეხუთე კოლონას” და საბოტაჟსაც ეწევიან.
- რა აკავშირებს თამაზ ტყემალაძეს ,,ქართულ ოცნებასთან”?
- ბიძინა ივანიშვილი მას კარგად იცნობს - 2012 წლის მარტში, აზერბაიჯანელ მოსახლეობასთან შეხვედრისას გაიცნო. მახსოვს, ტყემალაძის მიერ ილია ჭავჭავაძეზე დაწერილ წიგნზე ვსაუბრობდით, რომლის გამოცემაც შემდეგ ,,ქართუ ფონდმა” დააფინანსა, თუმცა პრემიერი დღემდე პრინციპულად არ ერევა საზოგადოებრივი მაუწყებლის საქმიანობაში. M
- სამაგიეროდ, თქვენი ორგანიზაციის ერთ-ერთი დამფუძნებელი, ირაკლი კაკაბაძე ექსტრემისტული ფორმით გამოხატავს პროტესტს და ტელევიზიას ფუნას ესვრის. გია კორკოტაშვილიც საკმაოდ ექსცენტრიული პიროვნებაა. “ფუნების სკანდალი” თქვენს მოძრაობას ჩრდილს არ აყენებს?
- ირაკლი კაკაბაძემ აშშ-ში წლები გაატარა, სადაც პროტესტის გამოხატვის ყველანაირი ფორმაა მიღებული, თუმცა პირადად მე, ეს კონკრეტული ფორმა არ მომწონს. ჩვენ, დამფუძნებლები ვიღებთ ერთობლივ გადაწყვეტილებას იდეის გარშემო, მაგრამ გამოხატვის ფორმაზე გადაწყვეტილებას კონკრეტული ადამიანი კონკრეტულ სიტუაციაში იღებს. ირაკლი ზრდასრული ადამიანია და მის ქმედებებს ვერ დავბლოკავ... სხვათა შორის, ექსცენტრიულ კორკოტაშვილს, რომელსაც კრიზისული სიტუაციების მართვის ფუნქცია დავაკისრეთ, ჩემი აკადემიურობა არ მოსწონს.
- ჰოდა, გასაკვირია, რა საერთო აქვს აკადემიურ მამუკა არეშიძეს ამ ექსცენტრიულ ადამიანებთან?
- საზოგადოებრივ მოძრაობაში ერთიანდებიან თანამოაზრეები, მაგრამ მათი ქცევა შეიძლება, ერთმანეთს არ ემთხვეოდეს. ქართული ანდაზაა, ისეთმა ფურმა დამწიხლოს, რომელიც ჩემზე მეტს იწველისო... ერთ ამბავს გავიხსენებ: 1991 წლის 2 სექტემბერს თბილისში, პოლიციასა და მოქალაქეებს შორის სისხლიანი შეტაკება მოხდა. რუსთაველზე სისხლის გუბეს მოხუცი კაცი დაჰყურებდა და ამბობდა: ეს პატარა გუბე სისხლის ღვარს გააჩენსო. ის კაცი მართალი აღმოჩნდა.
- ირაკლი კაკაბაძის ფუნა რას გააჩენს?
- საქმე ირაკლის ფუნაში არაა. აზროვნების ნორმების შეცვლა ახალ მიდგომებს ქმნის - ესქტრემისტულს, ესქტრავაგანტურს, ანარქისტულს. ,,ნაციონალების” რომელიმე წარმომადგენელმა რომ მითხრას, კაკაბაძემ ეს რა გააკეთაო, ამ საყვედურს არ მივიღებ, რადგან “ნაციონალებს” ისეთი საქმეები აქვთ ჩადენილი, რომლებთან შედარებითაც, ირაკლის საქციელი სასაცილოა.
- კი ბატონო, მაგრამ ჩვენ ,,ნაციონალების” მიდგომებს ხომ უარვყოფთ?
- მეთოდები კი გადავაგდეთ, მაგრამ აზროვნება დარჩა. სამწუხაროდ, მორალის ხუნდები ახსნილია - ყველა იმას აკეთებს, რაც უნდა, ასეთია ჩვენი საზოგადოება, ამიტომ ვერ დავუწყებ კაკაბაძეს ჭკუის დარიგებას, მაგრამ თუ მისი საქციელი მოძრაობას ჩრდილს მიაყენებს, ამის შესახებ აუცილებლად ვეტყვი.
- ბატონო მამუკა, მოძრაობას ვინ აფინანსებს?
- დამფინანსებელი არ გვყავს, საქმეს ბიზნესმენთა შემოწირულობებით ვაკეთებთ.
- ქონებაწართმეულ ბიზნესმენებს იმის საშუალება აქვთ, რომ მოძრაობა დააფინანსონ?
- ვისაც ბიზნესის ჭკუა აქვს, რაღაც შემოსავალი ყოველთვის აქვს, მით უმეტეს, რომ დღემდე მხოლოდ 3 200 ლარი დავხარჯეთ. დავუკავშირდით სტუდენტობას, მოქალაქეებს მივაწვდინეთ ხმა ბათუმში, ჭიათურაში, ახალქალაქში, ახალციხეში, საგარეჯოში, ქუთაისსა და რუსთავში.
- ბატონო მამუკა, თქვენი მოძრაობა, რომლის ერთ-ერთი მთავარი ლოზუნგი სამართლიანობის აღდგენაა, სამოქალაქო დაპირისპირებას ხომ არ გამოიწვევს?
- სამოქალაქო დაპირისპირების ფორმატი ისედაც არსებობს და ჩვენ, პირიქით, შეგვიძლია, მეხამრიდის როლი შევასრულოთ, ადამიანებს იმედი შევუნარჩუნოთ.
- როცა სამართლიანობის აღდგენაზე საუბრობთ, მთავრობის ფუნქციას საკუთარ თავზე იღებთ?
- ამის არც პრეტენზია გვაქვს და არც - მექანიზმები, რომ ვინმეს წართმეულ ქონებას დავუბრუნებთ ან ღირსებას აღვუდგენთ. საზოგადოებაში აგრესიული განწყობაა. 27 ოქტომბერი კოჰაბიტაციის დეკლარირებული დასრულების უკანასკნელი ვადაა, მერე იწყება მარგველაშვილის მიერ დაპირებული სამართლიანობის აღდგენის პროცესი. ხალხი მეტს არ მოითმენს და პირდაპირ ქუჩაში გამოვა. კარგად თუ დააკვირდებით, ბევრ შენობაზე შენიშნავთ წარწერას - ,,წართმეულია!” ხვალ ამ შენობებში, მიუხედავად იმისა, დალუქული აქვს თუ არა პროკურატურას, კანონიერი მფლობელი შევა.
- იმის თქმა გინდათ, რომ განუკითხაობის პროცესი დაწყებულია?
- რამდენიმე მაგალითი ვიცი, როცა სადგომზე დაყენებული წართმეული მანქანა პატრონმა წაიყვანა.
- ეს ხომ სამართალდარღვევაა?
- რასაკვირველია. მოვლენები შეიძლება, სხვანაირადაც განვითარდეს. თუ სამართალდამცავებმა ამ უკანონობის აღკვეთა დაიწყეს, ადამიანები პროკურატურას მიადგებიან და შეტანილ სარჩელებზე პასუხს მოითხოვენ. ცხრა წლის განმავლობაში სასამართლოს დანამატად ქცეულმა პროკურატურამ დისკვალიფიკაცია განიცადა. დღეს სარჩელების განხილვა ძალიან იშვიათად ხდება, ისიც - ნაცნობ-მეგობრობით.
- რა ამის პასუხია და, ცრუ შეტყობინებების შესახებ რას ფიქრობთ? შესაძლებელია, რომ ყველაფერი ეს უცხო ქვეყნიდან იყოს მართული?
- ცრუ შეტყობინებების სერია საზოგადოების მუდმივად დეპრესიაში ყოფნასა და მოსახლეობის თვალში სამართალდამცავთა დისკრედიტაციას ითვალისწინებს. ცრუ შეტყობინებებმა შეიძლება, სამართალდამცავთა რეაქცია მოადუნოს, მაგრამ საზოგადოება ფხიზლადაა.Aჩემი აზრით, ყველაფერ ამის უკან ძალოვან სტრუქტურებში შექმნილი მეხუთე კოლონა, ან პარტია ,,ნაციონალური მოძრაობა” დგას. გარე ქვეყანა პროცესებს აგენტურის გარეშე ვერ წარმართავს, ეს ქსელი კი იმ “მეხუთე კოლონაში” უნდა ვეძებოთ, რომელიც ნებისმიერ უწყებაში მოქმედებს.
- საქართველოში დესტაბილიზაცია რომელ ქვეყანას აწყობს?
- ევროკავშირის გარდა, ყველას არასტაბილური საქართველო სჭირდება. ქვემო ქართლში ოთხ სუბიექტს შორის ბრძოლაა გაჩაღებული: თურქეთი, ირანი, აზერბაიჯანი და არაბული ქვეყნები იქაურ მუსულმანებზე გავლენის მოსაპოვებლად იბრძვიან. ვიდრე ბრძოლა მიმდინარეობს, ხიფათი ნაკლებია, მერეა საშიში, როცა რომელიმე მათგანი გაიმარჯვებს. რუსეთზე დიდი მტერი დღეს პოლიტიკური ისლამია, ძალა, რომელსაც ნებისმიერ ქვეყანაში დესტაბილიზაციის გამოწვევა შეუძლია.
- თქვენი მოძრაობის უკან სპეცსამსახური ხომ არ დგას?
- გასაგებია, რომ საზოგადოება ეჭვებითაა შეპყრობილი, მაგრამ მაინც არ მესმის, რატომ ისმება ეს შეკითხვა ჩვენს შემთხვევაში. მერწმუნეთ, იარაღად თავს არავის გამოვაყენებინებ, ეს ჩემთვის მიუღებელია.
