პრეზიდენტობის მიწურულს პრეზიდენტ სალომე ზურაბიშვილის მიმართ შიდა და გარე ძალების მხრიდან ზეწოლა ძლიერდება, რათა მან სააკაშვილი შეიწყალოს. იმ დროს, როცა „ქართული ოცნება“ საკუთარი ნებით არჩეული, მაგრამ დაუმორჩილებელი პრეზიდენტის იმპიჩმენტისთვის ემზადება, ზურაბიშვილს ისევ „ნაცები“ გამოუჩნდნენ მხსნელებად და აღუთქვეს, რომ მის იმპიჩმენტს მხარს არ დაუჭერენ, ოღონდ ერთი დათქმით - ზურაბიშვილმა მიხეილ სააკაშვილი უნდა შეიწყალოს.

ნაციონალები ამ იდეის გარშემო დაირაზმნენ და ერთ ხმაში დამოძღვრეს პრეზიდენტი: „თუ ზურაბიშვილს სურს, საქართველო დაუახლოვდეს ევროკავშირს, გაათავისუფლოს უკანონო პატიმარი სააკაშვილი, ჯერ თავისი საქმე გააკეთოს და შემდეგ იაროს საზღვარგარეთ“, - ეს გიორგი ბარამიძის რეკომენდაციაა.

„პრეზიდენტს ვაკისრებთ პასუხისმგებლობას, შეასრულოს ჩვენი დასავლელი პარტნიორების მოთხოვნა კანდიდატის სტატუსის მიღებასთან დაკავშირებით და უზრუნველყოს მისი წილი პასუხისმგებლობა, რომ გაათავისუფლოს სააკაშვილი“, -ასეთია ნაცმოს პოლიტსაბჭოს თავმჯდომარის ლევან ბეჟაშვილის მოთხოვნა.

სააკაშვილის მეგობარი გარე ძალებიც გააქტიურებულნი არიან. ჯორჯ ბუშს გული სტკივა, როცა ხედავს, როგორ ეპყრობიან ციხეში მიხეილ სააკაშვილს, რომელსაც თავად იცნობდა.

აშშ-ის სახელმწიფო დეპარტამენტის ყოფილი მაღალჩინოსანი დევიდ კრამერიც მოლოდინშია, რომ სააკაშვილს შეიწყალებენ და უკრაინაში დაბრუნების შესაძლებლობას მისცემენ.

სავარაუდოდ, ნაციონალები კარგად აცნობიერებენ, რომ სააკაშვილის შეწყალება უფრო პოლიტიკური აქტი იქნება, ვიდრე რეალური გათავისუფლება, რადგან ექსპრეზიდენტის მიმართ კვლავაც მიმდინარეობს სასამართლო პროცესები, მაგრამ ნაცები ამაზეც თანახმა არიან, ოღონდ ეს პოლიტიკური აქტი გამოსტყუონ მოქმედ პრეზიდენტს და შემდეგ ეს დოკუმენტები დასავლეთში აფრიალონ, რომ თურმე შეუვალი პრეზიდენტი ზურაბიშვილიც კი აღშფოთდა „პუტინის პირადი პატიმრის“ მდგომარეობით.

რატომ გადაწყვიტა „ქართულმა ოცნებამ“ ზურაბიშვილისგან გათავისუფლება იმპიჩმენტის გზით? ხომ არ მიუვიდათ კულუარული ხმები, რომ მოქმედი პრეზიდენტი ყოფილი პრეზიდენტის შეწყალებას აპირებს?

ანალიტიკოსი გია აბაშიძე ჩვენთან საუბარში აცხადებს, რომ პრეზიდენტ ზურაბიშვილის არაადეკვატური ქცევები და განცხადებები იმპიჩმენტის ძირითადი მიზეზია, რაც მან საკუთარ თავს მოუწყო. ზურაბიშვილმა აშკარად დაარღვია კონსტიტუცია, ჯერ იკითხა საგარეო ვიზიტების თაობაზე, ანუ შეთანხმება უნდოდა, მაგრამ თანხმობა რომ არ მიიღო აღმასრულებელი ხელისუფლებისგან, მაინც მიზანმიმართულად, შეგნებულად დაარღვია კონსტიტუცია და უცხოეთში ვიზიტები განახორციელა.

„აქ მთავარი კითხვაა, რა ხარჯით წავიდა უცხოეთში პრეზიდენტი? იმედია, ეს მალე გახდება ცნობილი საზოგადოებისთვის. თუ მთავრობიდან არ იყო დასტური მის ვიზიტებზე, მაშინ რა ხარჯით წავიდა - პირადი ხარჯით, სამივლინებო ხარჯებით, თუ როგორ? პრეზიდენტმა ზურაბიშვილმა ორი თვის წინ ქართველ ჟურნალისტებთან შეხვედრისას უტიფრად განაცხადა, რომ საქართველო არ იმსახურებდა ევროკავშირის კანდიდატის სტატუსს ჯერ კიდევ შარშან, რაზეც რატომღაც ხმა არ ამოიღო „ნაცმოძრაობამ“, რომელიც დეკლარირებულად პოზიციონირებს, როგორც პროევროპული ძალა, მაგრამ რეალურად არის პრორუსული ძალა. არადა, ეს იყო ზურაბიშვილის თავხედური, ანტისახელმწიფოებრივი განცხადება. რაც შეეხება სააკაშვილის შეწყალებას, ზურაბიშვილმა ერთ-ერთ ფრანგულ გამოცემასთან საუბრისას რამდენიმე თვის წინ აღნიშნა, რომ აზრი არ აქვს შეწყალებას, რადგან არსებული სასჯელების გარდა სააკაშვილს ელოდება სხვა მიმდინარე საქმეებზე სასამართლო გარჩევები“, - აცხადებს გია აბაშიძე.

ამიტომ ანალიტიკოსი პოლიტიკურ დემარშად მიიჩნევს პრეზიდენტ ზურაბიშვილის მხრიდან სააკაშვილის ფორმალურ შეწყალებას წარსულ დანაშაულებებზე, მით უმეტეს, როცა მიმდინარე სასამართლო პროცესებზე მისი გათავისუფლება ვერანაირად ვერ იმოქმედებს. ანალიტიკოსის აზრით, ალბათ, ამ საქმეში უკვე ჩაერევა პროკურატურა, სასამართლო.

„მაინც ვემხრობი იმ აზრს, რომ, პირველი, ზურაბიშვილი არის არაადეკვატური, ხისტი და ჯიუტი პიროვნება და, მეორე, საპრეზიდენტო ვადის გასვლის შემდეგ კარიერის გაგრძელება მას დასავლურ საერთაშორისო სტრუქტურებში სურს. ვნახოთ, როგორ ახდება ეს პროგნოზი. თუ დავუშვებთ, რომ საკონსტიტუციო სასამართლომ გამოიტანა გამამტყუნებელი განაჩენი კონსტიტუციის დამრღვევი ზურაბიშვილის მიმართ, მაგრამ „ოცნებამ“ ვერ შეძლო 100 ხმის მობილიზება, ისევ და ისევ არაადეკვატურობიდან გამომდინარე, შესაძლოა, ე.წ. რევანშის მოტივით ზურაბიშვილმა შეიწყალოს სააკაშვილი, რაც ფუჭი იქნება, იქიდან გამომდინარე, რომ სააკაშვილის წინააღმდეგ არაერთი სხვა საქმეა აღძრული“, - აღნიშნა გია აბაშიძემ.

ანალიტიკოსი ვახტანგ მაისაია ეჭვობს, პრეზიდენტმა ზურაბიშვილმა შეიწყალოს სააკაშვილი. მისი აზრით, ეს გამორიცხულია, პროფანაციაა, ყველაფერი ეს პიარია და „ქართული ოცნება“ ამას პოლიტტექნოლოგიურად ავითარებს. სინამდვილეში, „ქართულ ოცნებას“ სხვა რამე აწუხებს, მათ არ სურთ ზურაბიშვილის ხილვა აქტიურ მდგომარეობაში საგარეო პოლიტიკური კურსის მიმართულებით.

ვახტანგ მაისაიას განმარტებით, „ქართულმა ოცნებამ“ აღმართა ჩარჩოები და კედელი, როცა საგარეო პოლიტიკური კურსი გადააქცია მულტივექტორულ საგარეო პოლიტიკურ მიმართულებად და აიღო დაბალანსებული კურსი ერთდროულად დასავლეთისა და აღმოსავლეთის მიმართულებით, ანუ ჩინეთსა და ევროკავშირს შორის. ეს არის ორმაგი არჩევანის გაკეთების კურსი, ამ კონტექსტში „ქართულ ოცნებას“ ეშინია, რომ არ მოხდეს სერიოზული დაპირისპირება პრეზიდენტსა და „ქართულ ოცნებას“ შორის საგარეო პოლიტიკური პლატფორმის ჩამოყალიბებაში.

„თუკი მოხდა სასწაული და ევროკავშირმა მოგვცა კანდიდატის სტატუსი, მაშინ ეს ჩაეთვლება პრეზიდენტს, რომელიც ახლა უცხოეთში იმყოფება, და არა „ქართულ ოცნებას“. წინასაარჩევნო ბრძოლის წინ „ოცნებას“ ეს არ აწყობს, მას დაეკარგება კოზირი, რომლითაც პროდასავლური ორიენტაციის მქონე საკუთარ მომხრეებს აკავებს. გასაგებია, „ნაცები“ რატომაც არ უცხადებენ მხარდაჭერას პრეზიდენტის იმპიჩმენტს, მათ აწყობთ „ქართული ოცნების“ საწინააღმდეგო სვლები, მაგრამ ვეჭვობ, რომ პრეზიდენტის იმპიჩმენტს შესაძლოა, მხარი დაუჭირონ იმ ადამიანებმა, ვინც თავის დროზე დატოვეს „ნაცმოძრაობა“. არ გამოვრიცხავ, იმპიჩმენტს მხარი დაუჭიროს, ასევე, „ნაცმოძრაობის“ იმ ფრთამ, რომელიც პრომოსკოვურ და პრორუსულ ხაზზე ზის, ეს ვანო მერაბიშვილის დაჯგუფებაა. „ქართული ოცნება“ ე.წ. მასკიროვკას ახდენს, გულუბრყვილობას თამაშობს, თითქოს იმპიჩმენტი არ შედგება, როგორ წარმოგიდგენიათ, ფრაქციაში „ოცნებას“ 84 ადამიანი ჰყავს, 7 კაცი ჰყავს „ხალხის ძალას“, ამას მივათვალოთ „ევროპელი სოციალისტების“, ანუ პრორუსული პოლიტიკური პარტიის 3 კაცი, მთლიანობაში, ეს არის 94 კაცი, იმპიჩმენტს კი სჭირდება ასი ხმა, ანუ 6 ექვსი ხმა აკლიათ. როგორ ფიქრობთ, 6 ხმას „ქართული ოცნება“ ვერ შეაგროვებს და ვერ მოისყიდის ბაჩუკი ქარდავას მსგავს „პოლიტიკოსებს“? - აცხადებს ვახტანგ მაისაია for.ge-სთან საუბრისას.