ტელეკომპანია „მეცხრე არხის“ შეძენის მსურველთა ჯგუფმა საკუთარი აქტივობა იურიდიულ სივრცეში გადაიტანა და სააქციო საზოგადოება დააფუძნა. საჯარო რეესტრის დოკუმენტის თანახმად, სააქციო საზოგადოება „ტელევიზია“, ოფიციალურად, 9 სექტემბერს დარეგისტრირდა. სააქციო საზოგადოება სამმა აქციონერმა - მედიაექსპერტმა ია ანთაძემ, საქართველოს პირველი პრეზიდენტის შვილმა ცოტნე გამსახურდიამ და პუბლიცისტმა ვასილ მაღლაფერიძემ დააარსეს. დოკუმენტის თანახმად, „ტელევიზიის“ საწყისი კაპიტალი 3 ათასი ლარით განისაზღვრა და თითოეულმა აქციონერმა 1000-1000 ლარი გაიღო.

სააქციო საზოგადოება „ტელევიზიას“ აქციონერთა კრება 6 სექტემბერს გაიმართა. კრების დღის წესრიგში სამი საკითხი განიხილებოდა - სააქციო საზოგადოების დაფუძნება, ორგანიზაციის წესდების დამტკიცება და სამეთვალყურეო საბჭოს წევრობასთან დაკავშირებული დეტალები.

წესდების თანახმად, სააქციო საზოგადოება „ტელევიზიას“ საქმიანობას აქციონერთა კრება წარმართავს. ორგანიზაციას ერთი წლის ვადით არჩეული 8 წევრისაგან შემდგარი სამეთვალყურეო საბჭო უხელმძღვანელებს, რომლის შემადგენლობაშიც შედიან: თამაზ ავალიშვილი, რამილია ალიევა, დავით ზილფიმიანი, ნინო ზურიაშვილი, გიორგი ლოლაძე, ნატა მურვანიძე, მერაბ რატიშვილი, მამუკა ყუფარაძე; სამეთვალყურეო საბჭოს თავმჯდომარე მამუკა ყუფარაძე, თავმჯდომარის მოადგილე თამაზ ავალიშვილი.

„მეცხრე არხის“ შეძენის მსურველთა მიერ დაფუძნებულ სააქციო საზოგადოებას უკვე ჰყავს გენერალური დირექტორი - ვასილ მაღლაფერიძე. მაღლაფერიძე ორგანიზაციას პირველი სამი თვის განმავლობაში უხელმძღვანელებს.

სააქციო საზოგადოება „ტელევიზიას“ ძირითადი საქმიანობის საგანი სადამფუძნებლო დოკუმენტში ასეა განმარტებული: მაუწყებლობა; სატელევიზიო მაუწყებლობა; სატელევიზიო და აუდიოვიზუალური პროგრამების, მათ შორის, საინფორმაციო, სარეკლამო და სანახაობრივი პროგრამების შექმნა-რეალიზაცია; სატელევიზიო, დოკუმენტური და მხატვრული ფილმების შექმნა-რეალიზაცია; შემოქმედებითი სტუდიების შექმნა-ექსპლოატაცია; რადიო, სატელიტური და მასთან გაიგივებული მაუწყებლობა;

„ტელევიზიას“ დამფუძნებლები სააქციო საზოგადოების შექმნასთან დაკავშირებით ინფორმაციიის გახმაურებას ხვალისთვის გეგმავენ.