„ვინც გუნდურობის წესების დარღვევაში დამადანაშაულებს, მან წესიერად ახსნას რას გულისხმობს გუნდში. თუ გუნდში გულისხმობენ იმას, რომ რასაც გეტყვიან ის აკეთო, ეს გუნდი კი არა, ჯოგია. დღეს პარლამენტში გადაწყვეტილების მიღებაში მონაწილეობენ პარლამენტის თავმჯდომარე, ფრაქციის ხელმძღვანელები, მაგრამ არ მონაწილეობს უმრავლესობა. მხოლოდ მიღებული გადაწყვეტილების შემდეგ აცნობებენ უმრავლესობას უზენაეს ნებას“- აცხადებს geotimes.ge-სთან საუბრისას საპარლამენტო უმრავლესობიდან წამოსული და უკვე პრეზიდენტობის კანდიდატობის მსურველი კობა დავითაშვილი, რომელიც სხვათაშორის ძალიან გალაღებული და ომახიანი მეჩვენა.
-ბატონო, კობა აღარ გკითხავთ კოალიციის დატოვების ზოგად მიზეზებს, ამაზე ორი დღეა ყველა საინფორმაციო საშუალებებში საუბრობთ, მაგრამ არის დეტალები, რაც მნიშვნელოვანია...
- ჰოდა ჩამეკითხეთ. ( იცინის)
- ჩაკითხვით არა მაგრამ გკითხავთ, თქვენი ყოფილი თანამებრძოლები აცხადებენ, რომ კოალიციიდან თქვენი წასვლა მოულოდნელი არ ყოფილა, თუმცა ბევრი საინტერესო კომენტარი გაკეთდა...
-მე მგონი ჩემი კოლეგები ცოტა დაიბნენ, მიუხედავად იმისა, რომ ამბობენ რომ მოსალოდნელი იყო კობასგანო, როგორც ჩანს მოულოდნელი აღმოჩნდა და სხვა ვერაფერი მოიფიქრეს, გარდა იმისა, რომ ეთქვათ, ელექტრონული წერილი რატო მოგვწერა უტაქტობააო. დღეს მთელი მსოფლიო ელექტრონული ფოსტით ურთიერთობს და ამაში არაფერი იყო გასაკვირი.
- რას იტყვით შეფასებებზე? „პირველი მერცხალი“, „ივანიშვილის ბუდიდან ამოვარდნილი ბარტყი“, „მოხეტიალე ფორვარდი, ეს არასრული ჩამონათვალია იმ ეპითეტებისა, რაც თქვენი მისამართით პოლიტიკოსებმა გამოთქვეს, განსაკუთრებით აქტიურობდნენ “ ნაციონალები“, რომელთა რიგებიც ასევე პირველმა დატოვეთ...
-ძალიან სახალისოა როდესაც ვუყურებ როგორ შეტკივა გული „ნაციონალურ მოძრაობას“ და სოლიდარული აღმოჩნდა „ ქართული ოცნების“ მიმართ. მინდა ვუთხრა „ნაციონალურ მოძრაობას“ , მათ ადგილზე არ ვიხალისებდი, რადგან ამის საფუძველი არ აქვთ. ჩემი ამ გადაწყვეტილების მიზანი არის კოალიციაზე გავლენის მოხდენა, რათა მათ გაამკაცრონ მიდგომა „ნაციონალების“ მიმართ, მთავრი გზავნილი კოალიციის მიმართ სწორედ ეს იყო და მე ეჭვი მაქვს, რომ საზოგადოებაში იმდენად დიდი იქნება ამ იდეის მხარდაჭერა, რომ კოალიცია გადასინჯავს თავის დამოკიდებულებას კოჰაბიტაციის და იმ ლოიალურ კურსის მიმართ , რაც „ნაცმოძრაობის“ ლიდერების მიმართ ხორციელდება. როდესაც „ნაცმოძრაობის“ წევრობა არის ინდულგენცია, ყველაფრისგან თავის დახსნის საფუძველი, როდესაც პოლიციური რეჟიმი გრძელდება დანარჩენი საზოგადოების მიმართ და არ ეხება მხოლოდ „ ნაცმოძრაობას“. ეს შერჩევითი რბილი სამართალი მათ მიმართ ჩემთვის მიუღებელია, ამას ვაპროტესტებ. ჩემი პოლიტიკური ნაბიჯის მიზანიც ამის გამოსწორებაა, რასაც მჯერა აუცილებლად მივაღწევ. ამიტომ „ნაცმოძრაობის“ ის ლიდერები, რომლებიც ხალისობენ , შეიძლება ხალისის ხასიათზე აღარ დადგნენ იმის შემდეგ რაც ეს პროცესი დასრულდება...
-თქვენ თქვით, რომ ბაჩო ახალაიას სასამართლო პროცესის შეფასებები ხელისუფლების მხრიდან იყო ბოლო წვეთი კოალიციის დასატოვებლად, ბატონო კობა, თქვენ იურისტი ბრძანდებით, ამ პროცესზე რომ მოსამართლე ყოფილიყავით, რა გადაწყვეტილებას მიიღებდით, იქედან გამომდინარე, რომ რამდენიმე მოწმის ჩვენების გარდა პროკურატურამ დანაშაულის მტკიცებულებები ვერ დადო...
-იცით ძალიან უცნაურია, საზოგადოების მნიშვნელოვანი ნაწილი, „ოცნების“ ზოგიერთი წევრიც კი და ისეთი გამოცდილიც, როგორიც თინა ხიდაშელია, აღმოჩნდა მტრული პროპაგანდის მსხვერპლი და თქვა, რომ მტკიცებულებები არ იყო და პროკურატურამ ცუდად იმუშავა. ქართულ სასამართლოში და მთელ მსოფლიოშიც ეგრეა, მდიდარ ქვეყნებშია ცოტა განსხვავება, მთავარი მტკიცებულებათა ბაზა არის მოწმეთა და დაზარალებულთა ჩვენებები, ახალაიას საქმეში არსებობდა როგორც მოწმის, ასევე დაზარალებულთა ჩვენებები, ასევე არსებობდა ახალაიასა და სხვა ეჭვმიტანილების ჩვენებები, რომლებიც უარყოფდნენ დანაშაულს. ანუ აქ იყო წმინდად შეფასებითი საკითხი, მოსამართლეს ვისი ჩვენება უნდა გაეზიარებინა, ახალაიასი და მისი თანამებრძოლების თუ დაზარალებულის და მოწმეების, ამაზე იყო საუბარი. სხვა მტკიცებულებითი ბაზა, აიღეთ ნების მიერისისხლის სამართლის საქმე, არსად არ არსებობს. უიშვიათესი გამონაკლისის გარდა, როდესაც ცხელ კვალზე ხდება გამოძიების დაწყება, ამ შემთხვევაში ასეთი რამ ვერ მოხდებოდა. 19 დაზარალებული აძლევდა ჩვენებას და ის, რომ მოწმეები არ ჰყავდა პროკურატურას არის მითი და პროპაგანდისტული მანქანა. მოსამართლემ დაუჯერა ახალაიას, მე ამას ვამბობდი, როცა ამ მოსამართლეებს მიანდეს საქმის გადაწყვეტა. რადგან ეს მოსამართლეები იყვნენ ამ სისტემის ნაწილი და თავის თავის წინააღმდეგ არ წავიდოდნენ. მე არ ვიცი როგორ ახერხებს დღეს „ ნაციონალური მოძრაობა“ და რომელ კასრში, რომელ მოსამართლეზე უდევს მასალა, მაგრამ ფაქტია რომ კვლავ ახერხებენ მათ მართვას. არ ვიცი ამ მასალებში, რომელი მოსამართლე მსხვერპლია და რომელი ჯალათი, მაგრამ რაღაც ეგეთი რომ ხდება ეს ვიცი.
-თუმცა ბაჩო ახალაიას მიმართ, მერაბიშვილისგან განსხვავებით, „ ნაციონალებს“ თანადგომა დიდად არ გამოუჩენიათ და ახლა რატომ იზრუნებენ მის თავისუფლებაზე?
- ახალაიას განაჩენი არ ემსახურება მის საზოგადოებაში რეაბილიტაციას, მისი გამამართლებელი განაჩენი არის დემონსტრირება იმისა, რომ სასამართლოს კვლავ მართავს „ნაცმოძრაობა“ . ახალაიას ეს გარანტიები მისცა მიხეილ სააკაშვილმა, მასთან სასაუბროდ შესული მისი კოლეგების მეშვეობით. რადგან ახალაიამ რომ პირი მოაღოს, ძალიან ბევრ ჩვენებას მისცემს პირადად მიხეილ სააკაშვილზე, ამიტომ მან მიიღო პირობა. თუ არ იქნებოდა გამამართლებელი განაჩენი, როგორც გუნავა შეიწყალა ისე შეიწყალებდა. მე მაგალითად სამართლიან პროცესებს სააკაშვილის წასვლამდე არ ველი.
-მაშინ რატომ არ დაელოდეთ საპრეზიდენტო არჩევნებს და თუ სიტუაცია არ გამოსწორდებოდათ მერე დაგეტოვებინათ მმართველი კოალიცია...
- შეფასებები იყო კოალიციის მხრიდან გამაოგნებელი. რომ ეთქვათ, ჩვენ დავუშვით შეცდომა, როდესაც დავიჯერეთ გულუბრყვილოდ, რომ მოსამართლეთა ამ კორპუსს , რომელიც ამ სისტემის ნაწილი იყო ძალა შესწევდა მიეღო დამოუკიდებელი გადაწყვეტილებები. რომ ეთქვათ, ვიმუშავებთ სასამართლო რეფორმის გაუმჯობესებაზე და პროცესები გაგრძელდება, იქნებოდა ხელისუფლების უხერხემლობის და უნიათობის ნიშანი, ეს ბოლო წვეთი ნამდვილად არ იქნებოდა. მაგრამ ხელისუფლების რეაქცია, რომ ეს იყო დემოკრატიის ზეიმი და ეს გამარჯვება ადასტურებს, რომ სასამართლო დამოუკიდებელია, რომელსაც დავპირდით ხალხს და ასე გაგრძელდება. ნამდვილად ბოლო წვეთი იყო ამის თქმა, რომ არაფერი შეიცვლება და ასე გაგრძელდება, ჩემი პროტესტი ამ შემთხვევაში არის არა ემოციური, არამედ მიზანმიმართული.
-ის რომ სასამართლო რეფორმა ვერ განხორციელდა და იუსტიციის საბჭოში ისევ ის მოსამართლეები მოხვდნენ , ვის შეცდომად მიგაჩნიათ? იუსტიციის სამინისტრომ მოამზადა კანონპროექტი მაგრამ პარლამენტმა მიიღო სახეშეცვლილი...
-პირადად ბიძინა ივანიშვილის. დათო უსუფაშვილს და თინა ხიდაშელს უფრო ლიბერალური მიდგომები ქონდათ, მაგრამ გადაწყვეტილება მიიღო ბიძინა ივანიშვილმა. საერთოდ ძალიან ცუდი ტონია, კოალიციაში ამორჩევა ერთი პოლიტიკური ძალის და იმაზე „ბრაგაბრუგი“ და თან ისეთის ამორჩევა, რომელსაც საზოგადოების დიდი ნაწილის აზრით ნეგატიური რეიტინგი აქვს, ეს ძალიან არაეთიკური საქციელია. მაგრამ რესპუბლიკელები შეცდომას ვერ დაუშვებდნენ მარტო, თუ კოალიციის სხვადასხვა წევრი არ დათანხმდებოდა, ან კოალიციის ლიდერი არ დაითანხმებდა. პასუხისმგებლობა არის კოალიციის ლიდერზე და ყველა იმ წევრზე, ვინც ამ გადაწყვეტილებას მხარი დაუჭირა. ბატონი ბიძინას მთავარი შეცდომა იყო, (თუმცა ის ამას არ თვლის შეცდომად, ჩვენ ვისაუბრეთ ამ თემაზე ) კუბლაშვილთან შეხვედრა და ამ შეხვედრის გაფორმება, როგორც სასამართლოს დამოუკიდებლობის დადასტურება. კუბლაშვილი ცხოვრებაში არ ყოფილა დამოუკიდებელი და არც მომავალში იქნება. ის შეიძლება „ნაციონალურ“ მოძრაობაზე დამოკიდებულიდან, გახდეს, „ქართულ ოცნებაზე დამოკიდებული, მაგრამ დამოუკიდებელი ცხოვრებაში ვერ გახდება, გამორიცხულია. ივანიშვილის შეხვედრა კუბლაშვილთან დანარჩენი მოსამართლეებისთვის იყო სიგნალი და კუბლაშვილმა ძალიან კარგად გამოიყენა ეს ფაქტი საარჩევნო კამპანიის დროს, მან თქვა რომ მე ივანიშვილთან დალაგებული მაქვს ურთიერთობები, დამიჭირეთ მხარიო და შვიდივე წევრი გაიყვანა საბჭოში. ეს იყო სწორედ ბიძინა ივანიშვილის შეცდომა და ამ შედეგის პროგნოზირება ძნელი არ იყო. მე სამ ოქტომბერს ვუთხარი ბიძინას, რომ სასამართლოს კარდინალური რეფორმა იყო საჭირო. ის მოსამართლეები ვინც პოლიტიკური ნიშნით გაუშვეს, მათ შორის უზენაესი სასამართლოდან აღადგინა ვინმე? ამიტომ რომელ სამართალზეა საუბარი.
- კოალიციის ყოფნის პერიოდში არაერთხელ დასახელდით არაგუნდურ მოთამაშეთ, თქვენ ვერ აკმაყოფილებდით მათ კრიტერიუმებს, რის გამოც არაერთხელ მიიღეთ საჯარო კრიტიკა...
- გუნდში უნდა არსებობდეს თამაშის წესები. მე ძალიან გუნდური მოთამაშე ვარ, როცა წესიერებაა, როცა არის უწესობა, როცა უმრავლესობის შეკრებები არ ტარდება, როდესაც ხან ვინ და ხან ვინ, აბსოლუტურად სხვადასხვა ხალხი იღებს პოლიტიკურ გადაწყვეტილებებს, ჩემთვის გაუგებარი წესით და ამ გადაწყვეტილებებს მე უბრალოდ მაცნობებენ, არ მაქვს შანსი აზრიც კი გამოვთქვა წინასწარ, ასეთ დროს გუნდურობა არ არის მეორე მხრიდან. უმრავლესობაში მე გუნდურობას ვერ ვხედავდი. გუნდსა და ჯოგს შორის არის განსხვავება, ჯოგი მიყვება ერთ კაცს, მიერეკებიან. მარეკები ჰყავს აქეთ-იქედან, ჯოხით შემოარტყამენ ხოლმე. გუნდი არის როდესაც ადამიანთა ჯგუფი ჯდება და ერთად იხილავს საკითხებს, მერე ტარდება კენჭისყრა და ამ კენჭისყრაში ვინც აღმოჩნდება უმრავლესობაში უმცირესობა ემორჩილება იმას. მე მზად ვიყავი უმცირესობაში აღმოვჩენილიყავი და დავმორჩილებოდი უმრავლესობის ნებას, თუმცა ვერ მივაღწიე ვერცერთ საკითხზე პრეცედენტს, რომ უმრავლესობის შიგნით კენჭისყრა ჩატარებულიყო, ეს არ გაკეთდა და უმრავლესობაში როგორ უნდა გამოიკვეთოს პოლიტიკური ნება თუ კენჭისყრამ არ გამოავლინა?ამა თუ იმ საკითხზე?
- ანუ რიგით პარლამენტარებს მანდატი დაკნინებული აქვთ?
- ფაქტიურად ვერ ასრულებს პარლამენტის წევრი საკუთარ მოვალეობას, ზოგადად ნონსესია ის, რაც ბატონმა ბიძინამ ბრძანა იპოთეკარების კანონთან დაკავშირებით, რომ როგორ გაბედა პარლამენტმა და ჩემს გარეშე მიიღო გადაწყვეტილებაო. კონსტიტუციის თანახმად, პრემიერმინისტრი არის ანგარიშვალდებული პარლამენტის წინაშე და არა პირიქით. პარლამენტი არის საკანონმდებლო ორგანო და მთავრობა არის აღმასრულებელი. რასაც პარლამენტი მიიღებს ის უნდა აღასრულოს, მესმის რომ ერთი პოლიტიკური გუნდია, ივანიშვილი ლიდერია და მას თავისი პოზიცია აქვს. მაგრამ ეს შეიძლება გამოთქვას თავისი გუნდის დახურულ შეკრებაზე. როდესაც საჯაროდ პრემიერმინისტრი აცხადებს, რომ მასთან შეთანხმების გარეშე გადაწყვეტილება არ უნდა მიიღებოდეს ეს კონსტიტუციასთან შესაბამისობაში არ არის.
-ივანიშვილის ქმედებებში ხომ არ ამჩნევთ ავტორიტარიზმის ნიშნებს,თავის დროზე სწორედ სააკაშვილის არასწორმა ნაბიჯებმა და ერთპიროვნულმა გადაწყვეტილებებმა განაპირობა „ნაციონალთა“ პოლიტიკის კრახი...
-არა ასე არ არის, ბატონ ბიძინას ამისათვის აკლია ძალაუფლების და ფულის სიყვარული, ფული იმდენი აქვს სააკაშვილს არც დაესიზმრება, არც ძალაუფლების სიყვარულს ვატყობთ, ძირითადად საპირისპიროდ ჩანს, პირიქით წასვლა უნდა და არ უშვებენ. აქედან გამომდინარე, ეს საფრთხე არ გვემუქრება. უბრალოდ ეს დამოკიდებულება გუნდში არაჯანსაღია. როდესაც ცალკეული დეპუტატები არ გრძნობენ თავს ანგარიშგასაწევ ადამიანად, მას არ ეკითხებიან არაფერს, ძალიან ხშირად აკრიტიკებენ. იგივე, ბატონი ბიძინა გამოვიდა და მაჟორიტარებზე თქვა ფეოდალები არიანო, მანამდე თქვა არ მომწონს ჩემი გუნდის წევრები, ბევრი მსახიობიაო, „ ნაცმოძრაობაში“ პროფესიონალები არიანო. ეს მიდგომა არაპროფესინალურია. მესმის, ბატონი ბიძინა არ არის პოლიტიკოსი, ეჯავრება ეს პროფესია და დროზე უნდა დააღწიოს თავი აქედან, ადამიანურად მე მესმის მისი, მაგრამ თუ ხარ, არ შეიძლება ასეთი დამოკიდებულება საკუთარი გუნდის მიმართ, კონტრპროდუქტიულია, ეს ქმნის დაძაბულობის კერებს და არა კობა დავითაშვილის მოსაზრებები
-გამოდის, მისი დამოკიდებულების გამო პიროვნულად ხართ ნაწყენი?
-ეს მე არ მეხება, საკუთარ ადგილს ყოველთვის ვიმკვიდრებ. არავის ვაძლევ უფლებას სხვაგვარად მომეპყროს. ეს იმ ადამიანებმა იკითხონ, ვინც ამის უფლებას აძლევს. მე ამის გამო ნამდვილად არ გამჩენია პროტესტი, იმის გამო გამიჩნდა რომ გადაწყვეტილებები არ მიიღებოდა დემოკრატიული წესით და ზოგჯერ როგორ მიიღებოდა თავად გადაწყვეტილების მიმღებებმა არ იცოდნენ.
- რაც შეეხება თქვენ გადაწყვეტილებას საპრეზიდენტო არჩევნებში მონაწილეობასთან დაკავშირებით, დავით საგანელიძემ ეს სიყმაწვილის ოცნების ახდენად შეაფასა...
- ბატონმა დავითმა რა იცის ჩემი სიყმაწვილის შესახებ და რა იცის რა ოცნებები მქონდა?! არასდროს მიოცნებია გავმხდარიყავი პრეზიდენტი, მქონდა ოცნება ნორმალურ და ერთიან საქართველოში მეცხოვრა. თუ ბატონ საგანელიძეს უნდა ამ თემაზე დებატები, უკვე მერამდენედ ვიმეორებ, მობრძანდეს, ნებისმიერ ეთერში დაჯდეს და ვისაუბროთ, რა არის პოლიტიკაში მორალი, ზნეობა. ვინ რაზე ოცნებობს, ვინ აყენებს პირად ინტერესებს ქვეყნის ინტერესებზე მაღლა. ვისაუბროთ ფაქტებით და არა სპეკულაციით.
- რა ფაქტებზე საუბრობთ? დავით საგანელიძის მიმართ საზოგადოების გარკვეულ ნაწილში არის პროტესტი, რით არის ეს გამოწვეული?
- იმიტომ რომ ბატონ საგანელიძეს არ ახასიათებს სწორედ ის თვისება, რასაც გუნდურობა ჰქვია, გუნდურობა ითვალისწინებს გუნდის წევრების აზრის პატივისცემას, ის ნამდვილად არ არის უმრავლესობის პოპულარული ლიდერი. უმრავლესობაში რომ არჩევნები ჩატარდეს ბატონი საგანელიძე ვერ გახდება უმრავლესობის ლიდერი. ის დანიშნეს და ამიტომ არის უმრავლესობის ლიდერი. არც ხალხის სიყვარული აქვს, მის ფიტულებს წვავენ.
- დავუბრუნდეთ საპრეზიდენტო არჩევნების თემას, გულწრფელად მითხარით როგორ აფასებთ თქვენ შანსებს?
- არ ვიცი, მე ვხედავ არის პოლიტიკური მომენტი, რომ მეორე ტურში გავიდე. თუმცა ამის გარანტია არ არსებობს, საერთოდ პოლიტიკაში გარანტიები არავის აქვს, მე ცხოვრების ნახევარზე მეტი პოლიტიკაში ვარ და პიარიც მესმის, პოლიტიკური მომენტიც, დებატებიც და ვითარებაც მესმის. აქედან გამომდინარე, მე ვხედავ შანსებს. მაგრამ მაქვს პროგრამა მაქსიმუმი და პროგრამა მინიმუმი, ყველა კვერცხის ერთ კალათში ჩალაგებას არ ვაპირებ ნამდვილად და ტრაგედიის შექმნას იმის გამო, რომ რაღაცა არ გამოვიდა. სერიოზული შედეგის ჩვენება თუ ვერ მოხდა, მაშინ ეს იქნება მასტიმულირებელი პარლამენტში ნორმალური ოპოზიციური ფრაქციის შექმნისა და ეს სავსებით რეალური ამოცანაა, რომელსაც მე ვისახავ. ეს იქნება მემარცხენე- ცენტრისტული ფრაქცია, იმიტომ რომ ჩვენი პოლიტიკა ძალიან მემარჯვენეა. გვყავს მემარჯვენე ხელისუფლება და „ნაცმოძრაობა“ საერთოდ ლიბერტანიელ ულტრა-მემარჯვენეები არიან. მემერცხენე პარტია, ან პოლიტიკური ძალა ქვეყანაში არ არის. მე და ჩემი ერთი - ორი კოლეგა ვაპირებთ ამ მიმართულებებით ნაბიჯების გადადგმას. დისბალანსია და საზიანოა ქვეყნისთვის, ამხელა სოციალური გაჭირვების ფონზე არ არსებობდეს პარლამენტში მემარცხენე ძალა. ამიტომ ვაპირებ ხალხის პარტიის გაძლიერებას, წევრების მოზიდვას და მემარცხენე ცენტრისტული ძალად ჩამოყალიბებას.
- ბატონო კობა ალბათ კოჰაბიტაციის მოწინააღმდეგეთა მხარდაჭერის იმედი გაქვთ, თუმცა ამომრჩეველთა ეს სეგმენტი ნინო ბურჯანაძეს ჰყავს, თქვენ ალბათ სწორედ მას გაუწევთ ძირითად კონკურენციას...
-ჰყავს რა ყმები არიან? რა თქმა უნდა უსიამოვნოა ქალბატონი ნინოსთვის, მას წარმოედგინა რომ უღრუბლოდ აკრეფდა მთელ ამ ელექტორატს. მაგრამ ამომრჩეველი ყმა არ არის და არავის არ ეკუთვნის. მე მექნება ჩემი პროგრამა, მას თავისი, რაღაც ნაწილში გადაკვეთა მოხდება, მაგრამ სრული გადაკვეთა არა. ჩემგან განსხვავებით, ქალბატონი ნინო საერთოდ ვერ შედის სოციალურ ელექტორატში, სოციალური ორიენტაცია მას არასდროს არ ახასიათებდა, პირიქით საკმაოდ მკაცრი გადაწყვეტილებების მომხრე იყო და სწორედ მისი პარლამენტის თავმჯდომარეობის დროს გაუქმდა სოციალური და ჯანდაცვის პროგრამები.
რაც შეეხება საპროტესტო ელექტორატს, მათი ნაწილი საპარლამენტო არჩევნებზეც არ იყო „ოცნების“ მხარდამჭერი, უბრალოდ „ნაციონალების“ გაყრაში დაეხმარნენ ივანიშვილს. ამ ელექტორატში არ შევედავები ქალბატონ ნინოს, მაგრამ ამ 10 თვის მანძილზე საპროტესტო ელექტორატი კიდევ უფრო გაიზარდა „ქართული ოცნების“ ყოფილი მხარდამჭერებით, რომლებიც იმედგაცრუებულები არიან „ოცნების“ უნიათო და უხერხემლო ქმედებებით კოჰაბიტაციის გამო. და აქ, ვის მეტი შანსი აქვს, კოალიციასთან ერთად მებრძოლ კობა დავითაშვილს თუ ცალკე მდგომ ნინო ბურჯანაძეს, ეს ძალიან საკამათო საკითხია. ასე რომ, მე მის ადგილზე არ დავკმაყოფილდებოდი სასტარტო პოზიციით. მარტო არც აქამდე იყო ქალბატონი ნინო, მისი კონკურენტი იქნება ქალბატონი სალომე ზურაბიშვილი, რომელსაც აქვს საზოგადოების გარკვეული ნაწილის მხარდაჭერა. მე პატივს ვცემ ქალბატონ ნინოს, გამიკვირდა ასეთი მძაფრი უარყოფითი რეაქცია მისი შტაბის მხრიდან. ვის მეტი ამომრჩეველი ეყოლება ეს წინ გვაქვს, თუ მეორე ტურში გავა მივულოცავ მას.
