პოლარიზაცია ის საკითხია, რომელიც წინასაარჩევნოდ განსაკუთრებით გვაღელვებს, თუმცა რა თქმა უნდა არჩევნების დასრულების შემდეგ, ყველამ მათ შორის კანდიდატებმა ერთად ცხოვრება და მუშაობა უნდა განვაგრძოთ, - ამის შესახებ აშშ-ის საარჩევნო კომისიის წარმომადგენელმა, დონალდ პალმერმა განაცხადა.
„არ ველოდები რომ 2020 წლის პრეცედენტი განმეორდება, როდესაც ერთ-ერთი დამარცხებული კანდიდატი შედეგების აღიარებაზე უარს ამბობდა. პოლიტიკური სპექტრის სრული უმრავლესობა ენდობა საარჩევნო სისტემას. ჩვენ ვხედავთ განსხვავებებს, თუმცა ურთიერთპატივისცემა გვერდზე არ უნდა გადავდოთ“, - აღნიშნა პალმერმა.
შეერთებულ შტატებში შუალედური არჩევნების ჩასატარებლად ემზადებიან. 8 ნოემბერს ამერიკელი მოქალაქეები წარმომადგენელთა პალატის 435 დეპუტატს, 35 სენატორსა და 36 გუბერნატორს აირჩევენ. შუალედურ არჩევნებს ეუთოს ეგიდით დააკვირდებიან საქართველოს პარლამენტის წევრები.
