„როგორც წყარო ამბობს, საუბარი მეტად დაძაბულ ვითარებაში შედგა და საქმე კონფლიქტამდეც მისულა. წყარო იმასაც დასძენს, რომ რეზიდენციიდან გამოსულ ივანიშვილს გადაწყვეტილება მიუღია – საქართველოში რაც ბიზნესები აქვს, დახუროს“, – ვწერდით სტატიაში.
ორიოდე კვირის შემდეგ, დაახლოებით იგივე შინაარსის ინფორმაცია, იმ დამატებით, რომ ივანიშვილმა ოჯახი საზღვარგარეთ გახიზნა, სააგენტო „პირველის“ მიერ გავრცელდა, რასაც მეორე დღესვე მოყვა „ქართუ ჯგუფის“ პრესსამსახურის განცხადება და ინფორმაციის უარყოფა. ჩვენ აღნიშნული განცხადებაც განვათავსეთ ვებ–გვერდზე, თუმცა, მისი ტონიდან და შინაარსიდან გამომდინარე, გადავწყვიტეთ პასუხი გაგვეცა პრესსამსახურის განცხადებაზე.
„ბოლო დროს რამდენიმე საინფორმაციო სააგენტოს ინფორმაცია საეჭვოდ დაემთხვა ერთმანეთს... ორივე სააგენტოს ინფორმაცია არის სრული აბსურდი, რადგან ივანიშვილი საქართველოში მხოლოდ საქველმოქმედო საქმიანობას ეწევა, აქ არანაირი ბიზნესი არ გააჩნია... თუკი ივანიშვილს საქართველოში ბიზნესი არ გააჩნია, ნებისმიერი საღად მოაზროვნე ადამიანისთვის აშკარაა, რომ შეუძლებელია ხელისუფლების მხრიდან მასზე რაიმე ზემოქმედების მოხდენა, როგორც ამის წარმოჩენა სურთ. შესაბამისად, ივანიშვილს ვერც ვერავინ დაიბარებს და არც არავის ეახლება.
ჟურნალიტებმა კი იციან სიმართლე, მაგრამ სხვაგვარად ხომ ვეღარ დაწერდნენ მთავარს - რომ დაიბარეს, ყური აუწიეს, დააშინეს... შევეცდებით განვმარტოთ, რატომ სურთ საქმის ასეთნაირად წარმოჩენა: პირველი - იმიტომ, რომ ჟურნალისტებს მსგავსი სტატიებით სურთ იმის ჩვენება, რომ ხელისუფლება ისეთ ბიზნესმენსაც კი არ ინდობს, როგორიც ბიძინა ივანიშვილია. თუკი ხელისუფლება ასე მოქცევას კადრულობს ივანიშვილთან, ძნელი წარმოსადგენი არ არის, რა წნეხს უნდა განიცდიდნენ ბიზნესსექტორის ის წარმომადგენლები, რომლებიც მხოლოდ საქართველოში საქმიანობენ. სწორედ მათი დაშინება სურთ.
და კიდევ: ეს არის ბატონი ბიძინას პიროვნების დამცირების, საზოგადოების თვალში მისი იმიჯის შელახვის მცდელობა და იმის ჩვენება, რომ შესაძლებელია მისი დაბარება, დაშინება და მასზე ზემოქმედება. მერე რა, რომ მდიდარია - როცა უნდათ დაიბარებენ და რასაც უნდა, იმას გააკეთებინებენ!“ – ნათქვამია განცხადებაში.
ხელისუფლებამ, რომელმაც მცირე მეწარმეებიც კი დაანგრია და ბიუჯეტის შევსებას საპროცესო გარიგებებით ცდილობს, გინდათ დაგვაჯეროთ, რომ მსხვილ ბიზნესმენებს გვერდი აუარა?
რაც შეეხება თქვენს აღშფოთებას, ხომ არ არის ეს აღშფოთება იმით გამოწვეული, რომ თავად შესაძლოა დაკარგოთ „ფულის მუდმივი წყარო“? აწ უკვე გარდაცვლილი ბადრი პატარკაციშვილი კლასიკური მაგალითია იმისა, როგორ შეიძლება მდიდარი ადამიანების გვერდით უამრავმა მუქთახორამ მოიყაროს თავი და საკმარისია მას რაიმე ტიპის საფრთხე ან უბედურება შეექმნას, რომ ეს მუქთახორები სწორედ ამ საფრთხეზე და უბედურებაზე ცდილობენ ხელის მოთბობას. გაიხსენეთ თუნდაც, ჯოზეფ ქეი, ან გიორგი თარგამაძე.
აქვე განვმარტავთ - ჩვენი მიზანი ნამდვილად არ ყოფილა ივანიშვილის პიროვნების დამცირება. ჩვენ დავწერეთ იმის შესახებ, რაზეც ინფორმაცია ორმა სხვადასხვა წყარომ, თითქმის, ერთდროულად მოგვაწოდა. სხვათა შორის, ის რაზეც ჩვენი წყარო საუბრობდა, მაგრამ ჩვენ არ დავწერეთ, თავად პრესსამსახური საუბრობს - როცა ყურის აწევაზე და დაშინებაზე მიანიშნებს - და ეს, მართლაც უცნაურია.
„ერთადერთი, შესაძლოა არსებობდეს ხელისუფლებისგან მისი ფიზიკური ხელყოფის საფრთხე...“ – როდესაც ამაზე წერთ, ბუნებრივად ჩნდება შეკითხვა, რატომ მოგივიდათ თავში, თუნდაც თეორიულად, მსგავსი საფრთხის დაშვებაზე გესაუბრათ? და თუ ამას უშვებთ, მაშინ რატომ გიკვირთ, რომ ივანიშვილისთვის სააკაშვილს ფული ეთხოვა?
და ბოლოს, არ ვაპირებთ ღრმად შევიდეთ პოლემიკაში, ვის, რატომ და რისთვის აფინანსებდა ბიძინა ივანიშვილი, რადგან კიდევ ერთხელ შეგახსენებთ, რომ ჩვენს ინტერესებში ნამდვილად არ შედის იმ ადამიანის რეპუტაციის შელახვა, რომელმაც ბევრი სიკეთე გააკეთა საკუთარი ქვეყნის და ხალხისთვის. სხვა საქმეა, ვინ როგორ იყენებს მის ამ სიკეთეს დაწყებული საჩხერიდან, დასრულებული თბილისის მაღალი ეშელონებით.
ჩვენ არც იმის გარანტია გვაქვს, რომ აღნიშნული განცხადება თავად ხელისუფლების კარნახით არ არის დაწერილი. ჩვენ არაერთი ასეთი ფაქტის მომსწრედა მნახველი ვყოფილვართ. ირაკლი ოქრუაშვილმა თუ ერთ დღეში შეცვალა საკუთარი ჩვენება, რატომ უნდა ვიყოთ დარწმუნებული, რომ ამ შემთხვევაშიც შსს–ხელი არ ურევია?
თუ ჩვენს მიერ დაწერილი ინფორმაცია სინამდვილეს არ შეეფერება და ბიძინა ივანიშვილი საქართველოში დარჩება, რაც მას ნამდვილად დადებითად ახასიათებს, გვერწმუნეთ, ჩვენ ამის საწინააღმდეგო არაფერი გვაქვს.
რაც შეგეხებათ თქვენ, პრესსამსახურს, როგორც ჩანს, ჟურნალისტებთან ურთიერთობის ეს სტილი კარგად გაქვთ აპრობირებული, რადგან ეს პირველი შემთხვევა არაა, როცა ჟურნალისტებთან პირდაპირ იერიშზე გადადიხართ. თუმცა, გპირდებით, პირადად პრესაგე.ტვ არ მოგცემთ საბაბს, რომ თქვენი სიცოცხლისუნარიანობის გასახანგრძლივებლად თქვენთან პოლემიკა გავმართოთ. ეს ივანიშვილის საქმეა და თუ სურს თავად მიხედავს ამ პრობლემასაც.
