ჩვენ ვთვლით, რომ რაღაც დავაშავეთ და ერთმანეთში ვეძებთ დამნაშავეს, მაგრამ დარწმუნებული ვარ, რომ არცერთი მხარე დამნაშავე არაა. თვითონ ევროკავშირის პოლიტიკურ წრეებს აქვთ თავიანთი ინტერესები და გეგმები, რაზედაც ჩვენ რატომღაც თითქმის არ ვლაპარაკობთ, - ამის შესახებ „ქრონიკის“ ეთერში პოლიტოლოგმა, რამაზ საყვარელიძემ განაცხადა.

„მაკრონმა გვითხრა, რამ მიგვიყვანა ამ მდგომარეობამდე - გეოგრაფიამ. ცოტა უფრო სერიოზულად რომ მოგახსენოთ, ჩვენ ვთვლით, რომ რაღაც დავაშავეთ და ერთმანეთში ვეძებთ დამნაშავეს, მაგრამ დარწმუნებული ვარ, რომ არცერთი მხარე დამნაშავე არაა. თვითონ ევროკავშირის პოლიტიკურ წრეებს აქვთ თავიანთი ინტერესები და გეგმები, რაზედაც ჩვენ რატომღაც თითქმის არ ვლაპარაკობთ. ეს გადაწყვეტილება მიიღეს იმ დღეებში, როცა საფრანგეთის, გერმანიისა და ევროკომისიის ლიდერები ეახლნენ ზელენსკის უკრაინაში და სურდათ ზეწოლის მოხდენა იმ მხრივ, რომ უკრაინა რუსეთთან დათმობაზე წასულიყო. ასეთია ევროპის წამყვანი ქვეყნების ინტერესი, მათ სურთ, რომ თუ რუსეთთან დაპირისპირება მოუწევთ, ეს დაპირისპირება იყოს რაც შეიძლება რბილი. აი, ამ შემარბილებელი ბალიშის ფუნქცია ერგო საქართველოს. არ ვიცი, ხვალ რა მოხდება, მაგრამ მაკრონის ფრაზამ მოშორებული რეგიონის შესახებ უნდა დაგვაფიქროს იმაზე, რომ რუსულმა ფაქტორმა იმოქმედა ამ გადაწყვეტილებაზე. ეს შეიძლება იყოს სიგნალი, მწვანე შუქი რუსეთისთვის, რომ უხეში მოძრაობები გაკეთდეს საქართველოს მიმართულებით. ევროპაც უშვებს შეცდომებს და მერე თვითონაც აღიარებს ამას. მაგალითად, მათი რეაქცია 2008 წელს მომხდარზე, მაგრამ ეს ხომ პრობლემას არ შველის? ასე რომ, აქაც შეცდომის დაშვების საფრთხე არსებობს, მით უმეტეს რომ გადაწყვეტილებების მიღება ძალიან სწრაფ ტემპში ხდება“, - განაცხადა რამაზ საყვარელიძემ.