„შეცდომაში შეყვანილი და ფეიკებით მოტყუებული ევროპარლამენტარები“ - ასე უწოდა საქარათველოს ხელისუფლებამ ევროპარლამენტარების რეზოლუციას, სადაც საქართველოში მედიის თავისუფლებისა და ჟურნალისტების უსაფრთხოების დარღვევების შესახებ საუბრობენ. ევროპარლამენტმა ხუთი პოლიტიკური ჯგუფის ინიცირებული ერთობლივი რეზოლუცია მიიღო. რეზოლუციას მხარი 308 ევროპარლამენტარმა დაუჭირა, წინააღმდეგი კი 218 წავიდა.

რეზოლუციაში ცვლილება შევიდა, რომელიც ბიძინა ივანიშვილს და მისთვის ინდივიდუალური სანქციების დაწესებას ეხება.

გარდა ამისა, ცალკე პუნქტი ეთმობა „მთავარი არხის“ გენერალური დირექტორის, ნიკა გვარამიას მიმართ გამოტანილ განაჩენს. დოკუმენტში ნათქვამია, რომ მოსამართლის გადაწყვეტილებამ ხაზი გაუსვა „სასამართლო სისტემისადმი მუდმივ უნდობლობას“.

ევროპარლამენტარები რეზოლუციაში შეშფოთებას გამოთქვამენ საქართველოში გაუარესებული მედიაგარემოს გამო და გმობენ ჟურნალისტების მიმართ ძალადობის ფაქტებს.

დოკუმენტში განხილულია 5 ივლისის, ნიკა გვარამიას, „ფორმულასა“ და „TV პირველის“ დამფუძნებლების საქმეები.

ასევე - მიხეილ სააკაშვილის პატიმრობა. დოკუმენტი მოუწოდებს, ჰუმანიტარული მიზნით, მესამე პრეზიდენტის გათავისუფლებას, რათა მან საზღვარგარეთ მკურნალობა მიიღოს.

 „ნაციოანლური მოძრაობის“ წევრებმა რა ინფორმაციაც არ უნდა მიაწოდონ ევროპარლამენტარებს, ქართველ ხალხს კარგად ახსოვს, რას წარმოადგენდა მიხეილ სააკაშვილი, რომელიც ახლა ამავე ევროპარლამენტარების მიერ შემოუშავებულ რეზოლუციაში წამებულის მანტიით გვევლინება. კარგად იციან, ვინ იყო ნიკა გვარამია და დავით კეზერაშვილი, რომლებიც იგივე ევროპარლამენტარების განცხადებით, დევნილი ტელეკომპანიების ხელმძღვანელები არიან. არადა გვარამია იყო ის პროკურორი, რომელმაც „იმედში“ სპეცრაზმის შევარდნა მისი სარედაქციო პოლიტიკის გამო გაამართლა და თქვა, რომ ის სუბიექტური იყო.

გამოდის, რომ ევროპარლამენტარების რეზოლუცია ფაქტებს კი არა, მხოლოდ შეფასებებს და აღქმებს ეფუძნება. ქვეყანაში ბოლომდე გაკოტრებული ოპოზიცია, რომელსაც ხალხის არც ქუჩაში გამოყვანის და არც მხარდაჭერის აღარანაირი რესურის არ გააჩნია, საკუთარი თავის რეაბილიტაციას ქვეყნის დამაზიანებელი პოლიტიკით ცდილობს. რეზოლუციაში მოხვდა ბევრი ფეიკი და ცოტა რეალობა. თანაც ისეთი, რომელზეც მხოლოდ ოპოზიცია საუბრობდა.

მაგალითად, რეზოლუციაში წერია, რომ სააკაშვილი კერძო კლინიკაში არ არის, არადა დიდი ხანია ის უკვე კლინიკა „ვივამედში“ იმყოფება. რეზოლუციაში წერია, რომ თითქოს „ტვ პირველის“ ოპერატორი თავდასხმის შედეგად მიყენებული დაზიანებების გამო გარდაიცვალა. არადა რეალობა ყველამ კარგად იცის და ეს თავად არხის მიერ დაქირავებულმა დამოუკიდებელმა ექსპერტმა ალექსანდრე გეჯაძემ განაცხადა. რეზოლუციაში წერია, რომ საქართველოში „ოცნების“ ხელისუფლების დროს მედიაგარემო გაუარესდა, არადა ქვეყანაში ბევრი ოპოზიციური ტელეარხი გაიხსნა.

 ჩნდება კითხვა, რატომ არ შეესაბამება ქვეყანაში არსებული რეალობა ევროპარლამენტარების აღქმას და რა შეიძლება ხელისუფლებამ ამას დაუპირისპიროს? როგორი განწყობა შეიძლება ქვეყნის შიგნით გაჩნდეს, თუკი ევროკავშირის კანდიდატის სტატუს არ მოგვანიჭებენ?

„ქართული ოცნების“ თავმჯდომარე ირაკლი კობახიძე ევროპარლამენტარებს „FAKE-ის მსხვერპლებს“ უწოდებს.

კობახიძის განცხადებით, „კამპანიამ, რომელიც 2012 წლიდან კრიმინალების ხელისუფლებაში დასაბრუნებლად წარმოებს, ევროკავშირის ერთ-ერთ უმაღლეს ინსტიტუტამდე, ევროპარლამენტამდე მიაღწია“.

მისივე თქმით, რეზოლუციას, რომელიც ქართული დემოკრატიისა და მედიის თავისუფლების მტრების – სააკაშვილისა და გვარამიას გათავისუფლებისკენ მოგვიწოდებს და ბიძინა ივანიშვილს, რომელიც პოლიტიკიდან დღეს სრულად არის დისტანცირებული და, რომელმაც ქართველ ხალხს 2012 წელს დემოკრატია, მედიის თავისუფლება და მედიაპლურალიზმი დაუბრუნა, ქართული დემოკრატიის, ლამის, მთავარ პრობლემად აცხადებს და მის სანქცირებას ითხოვს, არაფერი აქვს საერთო ევროპულ ღირებულებებთან და ასეთ რეზოლუციას, ჩალის ფასი აქვს.

„იმედი გვაქვს, როდესაც საქართველო, უკრაინა და მოლდოვა გავხდებით ევროკავშირის წევრი, იმ დროისთვის სხვაგვარი ევროპარლამენტი დაგვხვდება – „ფეიკის“ გავლენისგან დაცული და ჭეშმარიტი ევროპული ღირებულებების დამცველი ევროპარლამენტი, რომელსაც საკუთარი ობიექტური ინტერესების მიხედვით სუვერენულად მოქმედება შეეძლება. მტკიცებით ვერაფერს ვამტკიცებთ, მაგრამ დღევანდელი რეზოლუცია ამყარებს ცალკეული ექსპერტების მიერ გამოთქმულ ვარაუდს იმასთან დაკავშირებით, რომ ევროკავშირის წევრობის კანდიდატის სტატუსის გახმოვანებულ ვადაზე ადრე მოთხოვნის თემა საქართველოს არაკეთილმოსურნეებმა მოიგონეს, რათა ჩვენი ქვეყნისთვის და ხელისუფლებისთვის ხელოვნური სირთულეები შეექმნათ“, - განაცხადა ირაკლი კობახიძემ.

ანალიტიკოსი გია აბაშიძე აცხადებს, რომ ევროპარლამენტარების რეზოლუციამ საზოგადოების უდიდეს ნაწილში საკმაოდ უარყოფითი განწყობები გამოიწვია. აბაშიძე for.ge-სთან ამბობს, რომ ტყუილები არ შეიძლება იყოს იმ ორგანოს და სტრუქტურის რეზოლუციაში, რომელიც ჩვენ ჭეშმარიტების უმაღლეს მწვერვალად მიგვაჩნია.

„როგორ შეიძლება სააკაშვილი საზღვარგარეთ გაუშვან? ამას ქართველ ხალხს ეკითხებიან? რა განწყობაა ქვეყნის შიგნით მის მიმართ იციან? რეზოლუციაში ბევრი ფაქტობრივი შეცდომებია დაშვებული. იქ საუბრობენ, რომ თითქოს ის კერძო კლინიკაში არ იმყოფება, არადა დიდი ხანია ის უკვე კერძო კლინიკაშია, მკურნალობს და მედიკოსების დაკვირვების ქვეშ იმყოფება. თურმე გვარამია და სახელმწიფო ბიუჯეტის ქურდი კეზერშვილი კრიტიკული მედიის დამფუძნებლობის გამო იდევნებიან. ეს საქართველოს საზოგადოებას აკადრეს, რომელსაც ძალიან კარგი მეხსიერება აქვს და ზუსტად იცის, ვინ რას აკეთებდა და რას წარმოადგენს. თან, რა აბსურდზე მიდის საუბარი, თურმე ქართველი ხალხი პროევროპულია, მაგრამ ხელისუფლება პრორუსი ჰყავს. უკაცრავად, მაგრამ 10 წლის განმავლობაში, 9 სხვადასხვა არჩევნებში, რატომ ერთხელ მაინც ამ ხალხმა სხვა არ აირჩია? თან ამ არჩევნებს მათივე მისიები და ორგანიზაციები აკვირდებიან და აღიარებენ. მაშინ რა გამოდის, მათივე გამოგზავნილი ხალხი ტყუის? ეუთუ-ოდირის დასკვნები და ყველა სხვა ორგანიზაციების დასკვნა არასწორია? ასევე საუბარი იმაზე, რომ ბიძინა ივანიშვილს კრემლთან კავშირები აქვს, რით ამტკიცებენ? ერთი ფაქტი მაინც მოიყვანონ. მაშინ ჩვენც ვიტყვით, რომ ეს კუბილიუსი კაგებეს აგენტი იყო, როცა სახალხო ფრონტს უძღვებოდა ლიეტუვის დამოუკიდებლობის გარიჟრაჟზე. აბა, დაამტკიცოს რომ არ იყო“, - ამბობს გია აბაშიძე.

მისივე თქმით, დადოს ფაქტები ევროკომისიამ, თუნდაც ამერიკის შეერთებული შტატების სახაზინო დეპარტამენტმა, რომლებიც ამ კავშირებს იძიებენ. აბაშიძე ამბობს, რომ ამერიკელებისთვის ძალიან მარტივია ამის დადგენა, თუკი ივანიშვილმა რუსეთში ფული ატრიალა და რუსული არმია დააფინანსა. თუმცა ამის მტკიცებულებები არ არსებობს. ეს მხოლოდ ბრალდებების სროლაა, რომელიც რეალობას აცდენილია.

„ასეთ განცხადებებზე კრემლის მავნებლური პროპაგანდა ზის და ხელებს იფშვნეტენ. ძალიან კმაყოფილები არიან, რომ მათ საქმეს უპასუხისმგებლო ევროპული აქტორები აკეთებენ. ევროპარლამენტარი გლუქსმანი და მიხეილ სააკაშვილი ერთად სახელმწიფო ბიუჯეტის ხარჯზე გულაობდნენ. ლას-ვეგაში და ტაილანდში ქართველი ხალხის ფულით ერთობოდნენ. აი, ფაქტები, რომელიც მედიაში გავრცელდა. ევროპარლამენტი ყველაზე არაგამჭვირვალე ფინანსური სტრუქტურაა. ევროპარლამენტარები ხელფასის გარდა, სხვადასხვა ქვეყნებიდან, რომლებიც ევროკავშირის წევრები არ არიან, ფულს იღებენ, მათ შორის ახლო აღმოსავლეთის და არაბული ქვეყნებიდან. ამაზე უამრავი კვლევებია დადებული. იქაც იმდენად მყიფე და სუსტია კანონები, რომ მათი კონტროლის მექანიზმი არ არსებობს. ფოტიგა და კუბილიუსი ფულს რომელი ტრანშით იღებენ, კაცმა არ იცის. გამოდის, რომ ეს ხალხი საქართველოს მეგობრები კი არა კონკრეტული პარტიის მეგობრები არიან და მათი განცხადებებიდანაც ეს კარგად გამოჩნდა“, - აცხადებს აბაშიძე.

პოლიტოლოგ ვახტანგ ძაბირაძის განცხადებით ევროპარლამენტარების განცხადებების შემდეგ „ქართული ოცნების“ მხრიდან რაიმე მნიშვნელოვანი გადაწყვეტილება მოსალოდნელი არაა და ხელისუფლება გააგრძელებს იმ პოზიციაზე ყოფნას, რა პოზიციაზეც აქამდე იყო. ძაბირაძე for.ge-სთან ფიქრობს, რომ ის განცხადებები, რაც მათი მხრიდან გაკეთდა, ქართული საზოგადოებისთვის სიახლეს არ წარმოადგენდა.

„პრეტენზიები, რაც ევროპარლამენტარებს ჰქონდათ, არაერთხელ ითქვა ევროპარლამენტარების და ქართული ოპოზიციის მხრიდანაც. ამ მხრივ სიახლე არ ყოფილა, მაგრამ შეიძლება ითქვას, რომ მოლოდინები გამართლდა - მიუხედავად იმ პრობლემებისა, რაზეც მათ ისაუბრეს, თითქმის ყველამ საბოლოოდ განაცხადა, რომ მხარს უჭერენ საქართველოსთვის კანდიდატის სტატუსის მინიჭებას. ეს არის გარკვეული ავანსი იმ პოლიტიკური ვითარებიდან გამომდინარე, რაც შეიქმნა მსოფლიოში - ჩვენ ხომ რეფორმების გატარების ხაზით არ გვანიჭებენ ამ სტატუსს, სტატუსს გვანიჭებენ იქიდან გამომდინარე, რა სიტუაციაც არის.

ვფიქრობ, კრიტიკული განცხადებების მიუხედავად ევროპარლამენტარები კარგად ათვიცნობიერებენ იმ პრობლემასაც, სტატუსის არმინიჭების შემთხვევაში ქვეყნის შიგნით და მის გარეთ რა მოვლენები შეიძლება განვითარდეს. ამიტომ მნიშვნელობა არ აქვს, ამ სტატუსის არმინიჭებას მოჰყვება მნიშვნელოვანი ღელვა საქართველოში თუ არა. თუმცა ჩემი შეფასებით, ეს დიდ პროტესტს არ გამოიწვევს, მაგრამ მეორე მხრივ, თუ ზოგად პოლიტიკას გავითვალისწინებთ, ეს იქნება უბრალოდ უარის თქმა, დათმობა ჩვენი სივრცისა და რუსული გავლენის ქვეშ დატოვება. თუ ჩვენ ამ სტატუსს მოგვცემენ გარკვეული დათქმებით, მათ ექნებათ გარკვეული მექანიზმები. ამავე დროს, ქართული საზოგადოებისთვისაც, ეს პროცესი იქნება მნიშვნელოვანი იმ გაგებით, რომ გვეცოდინება, რა პრობლემები დგას. ასე რომ, მგონია, ამ სტატუსს მივიღებთ. არ მგონია, რომ რუსეთს ეს საბაბი ხელში ჩაუგდონ“, - ამბობს ძაბირაძე.

მისივე თქმით, ერთადერთი, რაც ამ ვითარებიდან გამომდინარე შეიძლება გაკეთდეს, ეს იქნება გვარამიას შეწყალება, სხვას, რაიმე მნიშვნელოვან გადაწყვეტილებას არ უნდა ველოდოთ. „ქართული ოცნება“ გააგრძელებს იმ პოზიციაში ყოფნას, რა პოზიციაშიც აქამდე იყო, ვიდრე არ გამოიკვეთება საბოლოოდ, როგორ განვითარდება პროცესი უკრაინა-რუსეთის დაპირისპირებაში. ამის შემდეგ შეიძლება ველოდოთ „ქართული ოცნების“ გააქტიურებას.