თუკი საქართველო ევროკავშირის წევრი ქვეყნის სტატუსს ვერ მიიღებს, არსებობს თუ არა იმის ალბათობა, რომ მოსახლეობაში საპროტესტო მუხტი გაჩნდეს, ოპოზიციამ მოახერხოს და ამ მიზეზით ხელისუფლების წინააღმდეგ ხალხი ქუჩაში გამოიყვანოს? მივიღოთ მეორე მაიდანი, რომლის შედეგადაც ქვეყანაში ხელისუფლების ცვლილება მოხდება? რა სცენარს ამუშავებს ოპოზიცია? ბოლო დღეებია ხელისუფლება ირწმუნება, რომ ოპოზიციის ლიდერები ევროკავშირის დერეფნებში დადიან და ამტკიცებენ, რომ ჩვენი ქვეყანა ამ სტატუსის მისაღებად ჯერ მზად არ არის. რა არის მათი რეალური მიზანი და რისთვის შეიძლება ემზადებოდნენ? ამ და სხვა კითხვებზე for.ge-სთან ანალიტიკოსი დავით ქართველიშვილი საუბრობს.

არსებოობს თუ არა იმის ალბათობა, რომ ქვეყანამ ევროკავშირის კანდიდატი ქვეყნის სტატუსი ვერ მიიღოს? რატომ სააუბრობს ამაზე ბოლო დღეებია ხელისუფლება, შესაძლოა რაიმე ინფორმაცის ფლობს, რაც ამ რისკს ზრდის?

- არ ვიცი, ძალიან რთულია იმაზე საუბარი, რა ინფორმაცია აქვს ხელისუფლებას, მაგრამ ფაქტია, რომ ევროკავშირში ჩვენი ოპოზიცია მავნებლობით არის დაკავებული. საქართველოს შემთხვევაში ორი ვარიანტი შეიძლება განვიხილოთ - თუკი ევროკავშირის წევრი კანდიდატის სტატუსის მსურველ ტრიო ქვეყანას, ანუ უკრაინას, მოლდოვას და საქართველოს, სამივეს სტატუსი არ მიანიჭეს და უარი გვითხრეს, კი ბატონო, ეს ქართველი ხალხისთვის გასაგები იქნება. ამ ამბის ახსნა იქნება ის, რომ ევროკავშრი ამ ეტაპზე, გაფართოების პოლიტიკისთვის მზად არ არის - ეს ყველაზე მისაღები პასუხი იქნება, ეს იქნებოდა გულწრფელი განცხადება.

არსებობს ასევე მეორე ცუდი ვარიანტი. ამ ასოცირებულ ტრიოში უკრაინამ და მოლდოვამ სტატუსი „ქვეყნის კანდიდატი“ მიიღოს და ჩვენ უარი გვითხრან. ეს იქნება ჩვენი ხალხისთვის ყველაზე დიდი იმედგაცრუება, რაც კი დასავლეთიდან ოდესმე მიგვიღია. არადა ამ ორივე ქვეყნისგან განსხვავებით, საქართველოს ასოცირების ხელშეკრულებით ნაკისრი ვალდებულებები, ევროკავშირის მიერ შემუშავებული სტანდარტები, რეფორმირების გზა და სხვა დემოკრატიული განვითარების გზა გვაქვს გავლილი. ყველა პარამეტრების მიხედვით, საქართველო ცალსახად თავის პარტნიორებს უსწრებს. ამას ყველა გამოკითხვა ადასტურებს.

იმ კომისიების ანგარიში, რომელიც ყოველწლიურად ნაკისრი ვალდებულებების ხელშეკრულებას ამოწმებს. ბოლო სხდომა შარშან ბრიუსელში ჩატარდა და საქართველომ უმაღლესი შეფასება მიიღო. მაშინ, როცა უკრაინა ომამდე გამოთქმული პრეტენზიების მიხედვით, საერთოდ რეფორმირების გზას არის აცდენილი. ასეთი სიტუაციის ფონზე, თუ სუფთა ფსევდო პოლიტიკური გადაწყვეტილება იქნება მიღებული, უკრაინას მიენიჭა სტატუსი და საქართველოს არა, ეს ძალიან ცუდი იქნება, რომლითაც დასავლეთი ფატალურ შეცდომას დაუშვებს.

თქვენ ფიქრობთ, რომ დასაველთში ამ რისკებს ვერ აფასებენ და ვერ ხვდებიან, რომ საქართველოსთვის სტატუსის არ მინიჭების შემთხვავში, მოსახლეობაში ანტიდასვალური განწყობები მოიმატებს? უკრაინის ომის ფონზე, ამას რუსეთი ხომ სათავისოდ გამოიყენებს. ფიქრობთ დასავლეთი ასე გარისკავს?

- არ ვიცი, წესით, ლოგიკას თუ გავყვებით ასეთი შეცდომა არ უნდა დაუშვას. რა თქმა უნდა, ხალხში ეს ევროპის მისამართით ნიჰილიზმს გააჩენს. მოდი, ლოგიკას გავყვეთ, რაში გამოიხატება ჩვენი ხელისუფლების პრორუსულობა და რა უნდა დაასახელოს დასავლეთმა მიზეზი იმისთვის, რომ ჩვენ ეს სტატუსი არ მოგვანიჭეს? თუ შეუძლია ოპოზიციას რაიმე კონკრეტული ფაქტის მოყვანა? ხომ ვხედავთ, რომ ხალხში ეს ფეიკები აღარ მუშაობს. ოპოზიციას ხელჩასაჭიდი არაფერი აქვს. რაღაცა სატელეფონო ჩანაწერებს აქვეყნებენ, სადაც პოლიტიკიდან წასულ ბიზნესმენს, ბიძინა ივანიშვილს სატელეფონო საუბარი ჰქონდა რუს ბიზნესმენ ევტუშენკოვთან. ეს კაცი არის, იყო და იქნება, ამერიკის პრეზიდენტის ბაიდენის შვილის ბიზნესპარტნიორი. ამ სამეულის ურთიერთობიდან გამომდინარე, შეიძლება ჩვენს ხელისუფლებას პრორუსულობა დააბრალო? ეს ხომ აბსურდია, რომელიც ნებისმიერი დასავლური ქვეყნის ელჩმა იცის.

უარის მიღების შემთხვევაში, ფიქრობთ, ჩვენი მოსახლეობის ბრაზი წავა არა ხელისუფლების, არამედ დასავლეთის მიმართ? ოპოზიციის მოლოდინი, რომ აქ რაღაცა დაპირისპირების კერა გაჩნდება და ხელისუფლების შეცვლის შანსი მიეცემათ მცდარია?

- არ ვიცი, ვის რისი იმედი და შიში აქვს, მაგრამ ფაქტი ერთია, რომ ჩვენმა მოსახლეობამ 33 წელია უკვე ბევრი რამ საკუთარ თავზე გადაიტანა. კარგად გაიზარდა და პოლიტიკაშიც მშვენივრად ერკვევა. ასე ადვილად უკვე არაფერს აღარ იჯერებს. რა თქმა უნდა, ხელისუფლებას არავინ დაადანაშაულებს იმაში, რომ კანდიდატის სტატუსი არ მივიღეთ. კითხვები ევროკავშირის მისამართით გაჩნდება. ჩვენს ხალხს ძალიან ბევრი აქვს ნაბრძოლი, ნაწვალები იმისთვის, რომ ეს სტატუსი მიიღოს. თუ საქართველოსთან მიმართებაში ევროკავშირი უსამრთლო გადაწყვეტილებას მიიღებს, ხალხი ამას ერთ შეფასებას მისცემს - საქართველო მხოლოდ იმიტომ დაისაჯა, რომ ომში ვერ ჩაითრიეს.

ამიტომ ამ შემთხვევაში, ხალხი ქუჩაში ხელისუფლების საწინააღმდეგო აქციაზე კი არ გავა, არამედ გავა ერთი ლოზუნგით, რომ ჩვენს ხელისუფლებას, რომელმაც ქვეყანა ომისგან იხსნა, გვერდით დავუდგეთ. ამ ხალხს დასავლეთიც დაინახავს და ე.წ. ოპოზიციაც, რომელიც საზოგადოებას ემუქრება და ქვეყანაში არეულობას აანონსებს. რევოლუციური მუხტს აგორებით და ხელისუფლების შეცვლით იმუქრებიან. არაფერი გამოუვათ, პირიქით, მე თქვენ გარწმუნებთ, რომ ეს იქნება ხელისუფლების მხარდასაჭერი გამოსვლა.

ფიქრობთ, რომ ოპოზიცია ქვეყანაში მაიდანის მოწყობას შეეცდება? ამ ამბავს გამოიყენებს იმისთვის, რომ ქუჩაში გამოსვლებით ქვეყნის ხელისუფლების ცვლილება მოხდეს? აქვს ოპოზიციას ამის რესურსი?

- გამორიცხულია, რომ ამ ქვეყანაში ოპოზიციამ რაიმე რევოლუციური სცენარით ხელისუფლება შეცვალოს, ან 2024 წლამდე ვადამდელი არჩევნების დანიშვნა მოხდეს. ხელისუფლებამ ამაზე ჩატარებული არჩევნებით პასუხი უკვე გასცა. ყველაზე ავტორიტარულმა საერთაშორისო არბიტრებმა დაადგინეს, რომ ამ ქვეყანაში არჩევნები არ გაყალბებულა და ხალხი ამ ხელისუფლებას საკუთარი ნებით ირჩევს. მესმის ოპოზიციას უნდა ამ თემის წამოწევა და ხელისუფლებაში დაბრუნებაზე ოცნებობენ. მათ არც ერთი კანონიერი გზა არ დარჩათ იმისთვის, რომ ისევ ძალაუფლება დაიბრუნონ. ამ ოპოზიციას მაიდანის მცდელობა კი არა, კაი ხანია რამდენიმე ათას საკუთარ მომხრესაც კი თავს ვერ უყრიან. პირიქით, ოპოზიცია იმდენს იზამს, რომ მართლა, ხალხს ქუჩაში მშვიდობისთვის გამოიყვანს - იმისთვის, რომ ერთხელ და სამუდამოდ სურვილი ამ ქვეყნის არევის აღარავის გაუჩნდეს. ამ მაიდანებმა უკრაინა დაღუპა. ამიტომ ქართველი ხალხი კარგად ხვდება, ვინ რას ცდილობს და არავინ აღარ აყვება. ამ მაიდნებით ნუ გვაშინებენ. გასაგებია, რომ იმ ბაკურიანში რაღაცა სცენარი შემუშავდა და ამისთვის ევროკავშირის დერეფნებშიც დაძრწიან. მიუხედავად ამისა, მათ ვარწმუნებ, რომ ხალხი დიდი ხანია გაიზარდა და ქვეყანას მათ არავინ აარევინებს.