იმ ფონზე, როცა ნიკა მელია რევოლუციას აანონსებს, საკონსტიტუციო ცვლილებებზე მსჯელობა ვერ შედგება. საგარეო ურთიერთობათა კომიტეტის თავმჯდომარის ნიკოლოზ სამხარაძის განცხადებით, თუ ოპოზიცია „კონსტრუქციულ რელსებზე“ გადავა, მაშინ მუშაობა შესაძლებელი გახდება. ქართული ოპოზიცია 8 წელია ცდილობს ქვეყანაში გამოიწვიონ დესტაბილიზაცია, რომ დაბრუნდნენ ხელისუფლებაში - ეს არის რადიკალური ოპოზიციის მთავარი ამოცანა.

მიუხედავად იმისა, რომ რადიკალების პოლიტიკური მიზანი ქვეყანაში პროცესების რადიკალიზაციაა, „ნაციონალური მოძრაობის“ წევრი ნონა მამულაშვილი აცხადებს, რომ რევოლუციების ეპოქა დასრულდა. ახლა, ბრძოლის ერთ-ერთი მეთოდი იქნება მუშაობა დასავლეთთან, რომ ივანიშვილი და მისი გარემოცვა დასანქცირდეს. დეპუტატი აცხადებს, რომ ხელისუფლების შესაცვლელად რევოლუციის გარდა ბევრი სხვა გზა არსებობს, რომელიც კონსტიტუციას არ არღვევს. ოპოზიციას, რომელსაც ქვეყნის შიგნით მოსახლეობის მხარდაჭერა არ აქვს, ახლა სამიზნედ დასავლეთს ირჩევს.

„ქართული ოცნების“ თავმჯდომარის ირაკლი კობახიძის განცხადებით, რადიკალური ოპოზიციის წარმომადგენლები ევროკავშირის დერეფნებში დადიან და საპირისპირო კამპანიას აწარმოებენ. მისი თქმით, გათვლა არის ის, რომ კანდიდატის სტატუსის არმიღებას მოჰყვეს არეულობა და ქვეყნის ომში ჩართვა.

„რადიკალური ოპოზიციის სურვილია, საქართველოს ომში ჩართვა, თუმცა ამ გათვლას აღსრულება არ უწერია. ყველაფერი გაკეთდება იმისათვის, ჩვენი მხრიდან, რომ ქვეყანამ მიიღოს ევროკავშირის კანდიდატის სტატუსი და იმისათვის, რომ ზოგადად, ქვეყანა იყოს წარმატებული“, - განაცხადა ირაკლი კობახიძემ.

ცნობილია, რომ ევროკომისიამ კითხვარის ქართული პასუხების შესახებ მოსაზრებები ევროკავშირის ლიდერებს, 24-25 ივნისის სამიტზე უნდა გაუზიაროს. მთავრობის მეთაურმა კარლ ჰარცელს კითხვარის მეორე და საბოლოო ნაწილი 10 მაისს გადასცა. საპარლამენტო უმრავლესობის წევრის, მიხეილ სარჯველაძის განცხადებით, ყველანაირ ძალისხმევას მიმართავს ოპოზიცია, რაც შეიძლება ნაკლები გაკეთდეს და რეალური საქმეებიდან ყოველგვარი ყურადღება გადაიტანონ.

„ხელისუფლების მთავარი, პრინციპული მიდგომააა - არავის მისცეს თავისი დესტრუქციული ზრახვების განხორციელების, სისრულეში მოყვანის შესაძლებლობა, გამოვიყენებთ ყველა ხერხს, რომელიც ამისთვის აუცილებელი იქნება და რაც ჩვენი მოსახლეობის უსაფრთხოებას უზრუნველყოფს.

ჩვენ კარგად გვესმის, რომ ეს საუკუნეობრივი არჩევანია - ჩვენი ქვეყანა ევროპის ნაწილი იყოს, შესაბამისად ამ პრინციპულ ხაზს ხელისუფლება მიჰყვება. მთავარი, რაზეც სიფხიზლეა საჭირო, ეს არის ზედმეტად არ გავერთოთ ჩვენს ოპონენტებთან ოპონირების პროცესით და მიუხედავი არ დარჩეს თვითონ საქმე, რომელიც პროფესიულად გადაწყვეტას მოითხოვს და ამაზე მეტი ყურადღებაა საჭირო“, - განაცხადა მიხეილ სარჯველაძემ.

ვინ ვის რას ელაპარაკება არ იცის „გირჩის“ წევრმა იაგო ხვიჩიამ, რადგან „ქართულ ოცნებას“ ევროსტრუქტურებში და მივლინებებში ის არ დაჰყავს.

„მოგეხსენებათ, „ქოცებს“ არ დავყავარ ევროსტრუქტურებში, მივლინებებში და ა.შ. დაჰყავთ თავიანთი ნაცნობები სხვა ოპოზიციონერები და ალბათ, იმათ უკეთ იციან, ვინ ვის რას ელაპარაკება, მე არ მაქვს ინფორმაცია. აი, რომ წამიყვანენ ერთხელ, მაშინ ყველაფერს მოგიყვებით, მაგრამ ამას არ აკეთებენ. თუ რამეს საზიანოს და სამტროს ამბობ, არც აქ უნდა თქვა და არც სხვაგან, მაგრამ ის ხალხი რომ დაგყავს მივლინებებში, ვინც აქ ამბობს ამას და მერე გიკვირს, ეგ უფრო გასაკვირია, ჩემი აზრით“, - ამბობს იაგო ხვიჩია.

რადიკალური ოპოზიციის ერთ-ერთი სახე, ნონა მამულაშვილი კი ამბობს, რომ საქართველოს სახელმწიფოებრიობას და ევროატლანტიკურ გზას ვინც ძირს უთხრის და პროცესს კითხვის ნიშნის ქვეშ აყენებს, ეს არის „ქართული ოცნება“. „ნაციონალური მოძრაობის“ წევრი ირწმუნება, რომ დასავლეთიდან საქართველოს ხელისუფლების მიმართ ძალიან მძიმე კრიტიკა ისმის და მძიმე ნაბიჯებიც იდგმება.

„ვინც ამ ქვეყანას ძირს უთხრის, ეს არის ბიძინა ივანიშვილი და მისი წარმომადგენლები მთავრობაში, პარლამენტსა და სასამართლოში. ირაკლი კობახიძე არის რუპორი კრემლის პროპაგანდის და ის იმეორებს იმას, რასაც დაავალებენ. დასავლეთიდან საქართველოს ხელისუფლების მიმართ ძალიან მძიმე კრიტიკა ისმის და მძიმე ნაბიჯებიც იდგმება. „ქართული ოცნებისთვის“ ევროკავშირის ოფიციალური სტრუქტურები დაკეტილია და ასე სახლებში შევარდნა მოუწევთ“, - აცხადებს ნონა მამულაშვილი.

პარტია „საქართველოსთვის“ წევრი, გიორგი ხოჯევანიშვილი თვლის, რომ როცა გეძლევა შანსი, რომ გადადგა ნაბიჯები, რომელიც ქვეყანას ევროკავშირში გასაწევრიანებლად დაეხმარება და ამ შანსს არ იყენებ, მოღალატეობრივი ნაბიჯია. მისი თქმით, საქართველოს ევროკავშირში გასაწევრიანებლად გარკვეული რეფორმები აქვს გასატარებელი.

„წლებია ველოდებით და კიდევ როდის იქნება ეს შესაძლებლობების ფანჯარა გაღებული საქართველოსთვის, როდის ექნება საქართველოს კიდევ შანსი, რომ ერთი ნაბიჯი კიდევ წინ გადაიდგას და კიდევ უფრო დაუახლოვდეს ევროკავშირს, კაციშვილმა არ იცის და როდესაც ამ შანსს შენ არ იყენებ, არამედ პირიქით, ებრძვი ამ შანსის გამოყენებას შენი ნაბიჯებით, შენი გადაწყვეტილებებით, ეს მოღალატეობრივი ნაბიჯებია და ამას აუცილებლად ასე შეაფასებს ისტორია და ჩვენი მომავალი თაობები.

შემდეგი იქნება ის, რომ ევროკავშირი შეიძლება აღარ იყოს ისე აქტიურად დაკავებული საქართველოს საკითხებით, მაგრამ მე იმედს ვიტოვებ, რომ ეს ასე არ იქნება და ეყოფათ გამბედაობა იმის შესაფასებლად, რომ ეს გამოწვევა, რომელიც ჩვენი ქვეყნის წინაშე დგას „ქართული ოცნების“ სახით, არ გახდეს მიზეზი იმისთვის, რომ ჩვენს ქვეყანას მოესპოს განვითარების შანსი“, - განაცხადა გიორგი ხოჯევანიშვილმა.