ვიდრე ბოლომდე გვიან არ არის, ვთავაზობ ბატონ კობახიძეს გავაკეთოთ ერთობლივი საპარლამენტო დელეგაცია, სადაც როგორ ოპოზიცია, ასევე მმართველი გუნდი იქნება, წავიდეთ ბრიუსელში და დასავლელ პარტნიორებს ვუთხრათ, რომ საქართველოც იმსახურებს დაჩქარებული პროცედურებით გაწევრიანებას, - ამის შესახებ „სტრატეგია აღმაშენებლის“ ლიდერმა გიორგი ვაშაძემ „პალიტრანიუსის“ გადაცემაში „ნიუსრუმი“ განაცხადა.

მისივე შეფასებით, ხელისუფლების მხრიდან ევროკავშირში დაჩქარებულ გაწევრიანებასთან დაკავშირებით არცერთი ქმედითი ნაბიჯი არ გადადგმულა და მხოლოდ კომიტეტის თავმჯდომარის გაგზავნა, ან გაუგებარ შეხვედრებზე ყოფნა, რომელიც არაფრის მომტანი არ არის, შედეგს ვერ გამოიღებს.

"ძალიან გული მტკივა ხელისუფლების მერყევ პოზიციასთან დაკავშირებით, უკრაინამ თანადგომის ნაცვლად მიიღო ისეთი განცხადებები, რომელიც ხელს უშლის მოქმედებას საგარეო ასპარეზზე. არავის არ მოუთხოვია საქართველოს მთავრობისგან ომის რიტორიკა, რასაც კადრულობს „ქართული ოცნება“ არის სირცხვილი, ვითხოვდით ღირსეულ პოზიციას, გამხნევებას და ცივილიზებული სამყაროს გვერდით დგომას. იმედია, არავის უხარია რუსეთის მხრიდან საქართველოსთვის სანქციების მოხსნა. პირველი სანქცირებული ქვეყანა ჩვენ ვიყავით და სანქციები დღემდე მოქმედებდა, დამიჯერეთ, როგორც კი შესაძლებლობა ექნება რუსეთი ამ სანქციებს უკან დააბრუნებს.

გუშინდელ დოკუმენტში, რომელიც ევროპულმა მხარემ გამოაქვეყნა, საქართველო-მოლდოვა უკრაინისგან ცალკეა ნახსენები. პირადად მე ევროპარლამენტის ერთ-ერთ ყველაზე დიდ ფრაქცია „ალდესთან“ დავაყენე საკითხი, რომ ეს სამი ქვეყანა ერთად ყოფილიყო, რაზეც დაგვეთანხმნენ. საქართველოს მთავრობამ დააგვიანა განაცხადის გაკეთება, ათასობით ადამიანის ქუჩაში გამოსვლა და საერთაშორისო მექანიზმების ჩართვა გახდა საჭირო, ერთი კვირა გავიდა რაც შევთავაზე, რომ ერთად წავსულიყავით ბრიუსელში, გვეჩვენებინა ჩვენი ერთიანობა და გადაგვედგა კონკრეტული ნაბიჯები. მაინტერესებს რა კონკრეტული ნაბიჯები გადაიდგა იმისთვის, რომ დაჩქარებული გაწევრიანების პროცედურა ჩვენზეც გავრცელდეს, მხოლოდ კომიტეტის თავმჯდომარის გაგზავნა და გაუგებარ შეხვედრებზე ყოფნა, რომელიც არაფრის მომტანი არ არის, სამწუხაროდ, შედეგს ვერ გამოიღებს. არანაირი იმედი არ უნდა გვქონდეს იმის, რომ ევროპა ჩვენს ნაცვლად საქმეს გააკეთებს. სანამ ბოლომდე გვიან არ არის, ვთავაზობ ბატონ კობახიძეს, გავაკეთოთ ერთობლივი საპარლამენტო დელეგაცია, სადაც როგორ ოპოზიცია, ასევე მმართველი გუნდი იქნება, წავიდეთ ბრიუსელში და დასავლელ პარტნიორებს ვუთხრათ, რომ საქართველოც იმსახურებს იმავე პროცედურებით გაწევრიანებას. ეს ნაბიჯები გადასადგმელია, მაგრამ არცერთი ქმედითი ნაბიჯი არ გადადგმულა საქართველოს ხელისუფლების მხრიდან ევროკავშირში დაჩქარებულ გაწევრიანებასთან დაკავშირებით.

პირველ კლასში ბავშვს ხელზე რომ მოკიდებს ხელს და კალმით ასწავლის როგორ უნდა მოხაზოს, ღარიბაშვილის ხელმოწერაზე ეს გამახსენდა, თითქოს ვიღაცას ძალით ეჭირა მისი ხელი და აწერინებდა ხელს ამ დოკუმენტზე“, - აღნიშნა გიორგი ვაშაძემ.