ოპოზიცია, კერძოდ, „ერთიანი ნაციონალური მოძრაობა“ და მიხეილ სააკაშვილი ახალ სამოქმედო გეგმას სახავენ; შესრულებული მოთხოვნა - პრეზიდენტი სამოქალაქო სამედიცინო კლინიკაში ყოფილიყო გადაყვანილი, არ აღმოჩნდა საკმარისი. შიმშილობის შემდგომი რეაბილიტაციის პროცესის შემდეგ, დღეს უკვე მის გათავისუფლებაზე მიდის საუბარი, იმის მიუხედავად, რომ ყოფილ მაღალჩინოსანს უამრავ სასტიკ დანაშაულში სდებენ ბრალს.

ერთგვარი სამოქმედო გეგმის გაგრძელება მიხეილ სააკაშვილის პირადმა ექიმმა, ნიკოლოზ ყიფშიძემ გაახმიანა: „იქნებ, გავათავისუფლოთ ეს ადამიანი, იმკურნალოს ნორმალურად“, რასაც სახალხო დამცველის მიერ შექმნილი ექსპერტთა ჯგუფის წევრის, ექიმ  გიორგი პაპიაშვილის პასუხი მოჰყვა: „მიკავშირდებიან ჟურნალისტები და მთხოვენ ჩემი მოსაზრების გამოხატვას გუშინ ნიკოლოზ ყიფშიძის მიერ გამოთქმული წინადადების შესახებ პაციენტის თავისუფალ მკურნალობასთან დაკავშირებით. მიმაჩნია, რომ ამისთვის სამედიცინო საფუძველი არ არსებობს. ჩვენი ჯგუფი შეიქმნა ერთადერთი მიზნით, რომ შეგვეფასებინა გლდანის მე-18 დაწესებულებაში მყოფი პაციენტის მდგომარეობა და რისკები იქ დარჩენის და შიმშილობის გაგრძელების შემთხვევაში.

ჩვენმა გუნდმა ეს გააკეთა პაციენტის სიცოცხლისა და ჯანმრთელობის საუკეთესო ინტერესების გათვალისწინებით, რის შედეგადაც მოხერხდა ის, რომ დღეს პაციენტი არის გორის ჰოსპიტალში კვალიფიციური სამედიცინო გუნდის ხელში, მას შეწყვეტილი აქვს შიმშილობა და მისი მდგომარეობა გაუმჯობესებულია. მიუხედავად იმისა, რომ გარკვეული საფრთხეები ჯერ კიდევ არსებობს კვების აღდგენის პროცესში, სრულიად დარწმუნებული ვარ, რომ იმ ექიმებს, ვინც მას ამჟამად მკურნალობენ, შესწევთ უნარი პაციენტის სრულყოფილი რეაბილიტაციის“, - წერს „ფეისბუქზე“ ექიმი.

მიხეილ სააკაშვილთან დაკავშირებით, თუ როგორ განვითარდება მოვლენები, მოსალოდნელ სცენარად ანალიტიკოსი ნიკა ჩიტაძე ყოფილი პრეზიდენტის უკრაინული მხარისთვის გადაცემას განიხილავს. მისი თქმით, არ არის გამორიცხული, საქართველოს ხელისუფლებასა და უკრაინას შორის მსგავსი ტიპის შეთანხმება შედგეს:

„ამ ეტაპზე არ მგონია, „ქართული ოცნება“ დათანხმდეს, სააკაშვილმა იმკურნალოს თავისუფლებაზე. რაც შეეხება საზღვარგარეთ მკურნალობას, რაღაც დროის შემდეგ შესაძლებელია, უკრაინულმა და ქართულმა მხარემ მიაღწიონ შეთანხმებას, რომ მან იმკურნალოს საზღვარგარეთ. „ქართულ ოცნებას“ არ სურს, რომ სააკაშვილი საქართველოში იმყოფებოდეს, მით უმეტეს თავისუფლებაზე.

ხელისუფლება საკუთარ იმიჯს უფრთხილდება, შეიძლება პირდაპირ გაშვებას არ დათანხმდეს, ალბათ, პოლიტიკურად სავაჭროდ დასჭირდება სააკაშვილი, მოგვიანებით კი გაუშვან საზღვარგარეთ, ან უკრაინაში დააბრუნონ“, - განაცხადა ნიკა ჩიტაძემ For.ge-სთან.

ანალიტიკოსი რამაზ საყვარელი არ ფიქრობს, რომ სააკაშვილის ირგვლივ მიმდინარე პროცესი სწორედ ასე წარიმართოს. მისი თქმით, არ ელოდებოდა, რომ სიტუაცია ყოფილი პრეზიდენტის გორის სამხედრო ჰოსპიტალში გადაყვანით დაწყნარდებოდა. როგორც საყვარელიძემ აღნიშნა, მიხეილ სააკაშვილმა ბრძოლის ახალი ფრონტი გახსნა.

„გორის ჰოსპიტალი რომ არ დააკმაყოფილებდა, ეს სავარაუდო იყო. კიდევ ბევრ რამეს უნდა მოველოდოთ. აქციები და დესტაბილიზაცის პროცესი დამთავრებული არ არის, უბრალოდ ფორმები შეიცვლება. ამ ფორმების შეცვლის ერთ-ერთი ანარეკლი არის ნიკოლოზ ყიფშიძის ეს განცხადება. „თავისუფლება მიშას“ იდეას, სავარაუდოა, რომ აყვება მიშას მომხრეების დიდი ნაწილი.

დღეს ჟურნალ „პოლიტიკოსთან“ მიშას პროპაგანდისტული შაბლონების მიხედვით შედგენილი წერილი გამოქვეყნდა. სააკაშვილმა ეს წერილი რომ გაუშვა დასავლეთისკენ, უკვე ნიშნავს, რომ ბრძოლის ახალი ფრონტი გახსნა და ბრძოლის ახალი რაუნდი დაიწყო. სავარაუდოა, რომ ეს ფრონტი გაიშლება დასავლეთთან ურთიერთობაში და მეორე მხრივ, შიდა პროცესებში, ყიფშიძის მიერ გაკეთებული მოთხოვნის შესაბამისად. სხვა ექიმებმაც დაადასტურეს, რომ ბადრაგთან იყო გაუგებრობა, ფანჯრის გაღებაზე შეედავნენ და ა.შ. გააპროტესტებენ ყველა იმ ელემენტს, რაც სააკაშვილს, როგორც პატიმარს, შეიძლება გაუჩნდეს ამ პერიოდში.

უკრაინისკენ გადაყვანას არ ველოდები, რადგან უკრაინა აშკარად ჩუმად არის, მისი ომბუდსმენი აქტიურობს, თორემ ზელენსკის პრემიერთან ჰქონდა დიალოგი და მსგავსი იდეა არ შეუთავაზებია. რაც შეეხება დასავლეთში გადაყვანას, მისჯილი პაციენტის როლში, არ ვიცი რამდენად არსებობს ამის პრაქტიკა და რამდენად იზიარებენ დასავლეთის ქვეყნები ამას.

თუკი დადგება მსგავსი საკითხი, ისინი, ალბათ, თავიანთ ექსპერტიზას ჩაატარებენ და ამის შემდეგ მისცემენ პასუხს. იმ ჩივილების დონეზე, რაც დღეს აქვთ, არ მგონია, რომ დასავლეთმა თავი აიტკიოს და მიიღოს პატიმარი პაციენტი“, - განაცხადა რამაზ საყვარელიძემ For.ge-სთან.