„ცუდია, რომ სააკაშვილმა არ იცის, რა განსაცდელი გამოატარა პატიმრებს, მაგრამ ცივილიზებული საქართველო, როგორი პატიმარიც არ უნდა იჯდეს, უნდა გამოიყურებოდეს ისე, როგორც ქართველ ხალხს ეკადრება. ამიტომ სააკაშვილი სასჯელს ცივილიზებულად, ადამიანური მოპყრობის ქვეშ მოიხდის“, - აცხადებს for.ge-სთან საუბრისას „ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე.

„ნაცმოძრაობამ“ ე.წ. პოლიტპატიმრების მთელ კოჰორტას (მელიას, რურუას) კიდევ ერთი „პოლიტპატიმარი“ მიუმატა - მიხეილ სააკაშვილის სახით, რომელსაც მეტი დრამატიზებისთვის „დევნილ პრეზიდენტად“ მოიხსენიებს. რა „აკლია“ სააკაშვილს იმისთვის, რომ დაიმსახუროს ეს ტიტული? რატომ გაუფასურდა სიტყვა „პოლიტპატიმარი“ „ნაცმოძრაობის“ ხელში?

- სააკაშვილს რა „აკლია“, არ ვიცი, მაგრამ ვინც ამისთანა ტიტულს იშველიებს სააკაშვილთან მიმართებით, მათ რომ ბევრი რამ აკლიათ, ეს ცხადია. იმ ადამიანებს, ვინც სააკაშვილს დევნილ პრეზიდენტად და პოლიტპატიმრად მოიხსენიებს, აკლიათ არა მარტო გონება, არამედ სინდისი, ზნეობა და ყველაფერი, თუკი რაიმე სიკეთე არსებობს ადამიანში. ადამიანი არაფერმა არ უნდა გააბოროტოს ისე, რომ რეალობის და ობიექტურობის განცდა დაკარგოს. გირგვლიანის, რობაქიძის, გამყრელიძის, ვაზაგაშვილის, ადამიანების მთელი პლეადის ტრაგედიის შემდეგ დღეს ამას არ უნდა ლაპარაკობდნენ.

სხვათა შორის, პრეზიდენტმაც აღნიშნა, რომ ის არასდროს შეიწყალებს სააკაშვილს, რადგან მუდამ ახსოვს ირინა ენუქიძის თვალები. თქვენ იბრძოდით სააკაშვილის რეჟიმის წინააღმდეგ, მაშინდელ არაერთ დანაშაულს შორის ყველაზე მეტად სააკაშვილის პერიოდის გამოხატულება რა იყო?

- მაშინდელი წლები იმიტომ იყო მძიმე, რომ ეს იყო დახურული ტიპის ფაშიზმი, ანუ ფაშიზმი დახურულ სივრცეში. გერმანული ფაშიზმი მთელ ევროპას, მთელ მსოფლიოს შეეხო და ყველა დააზარალა, ამიტომაც ყველა იყო ჩართული გერმანული ფაშიზმის წინააღმდეგ ბრძოლაში, გერმანული ფაშიზმი გაცილებით რეალურად მოსარევ პრობლემად გამოიყურებოდა, ვიდრე ის ფაშიზმი, რომელიც სააკაშვილმა საქართველოში დაამკვიდრა, რადგან ის გარდა ქართველი ხალხისა და საქართველოს მოქალაქეებისა, სხვას არავის აწუხებდა და არ ადარდებდა, მათ შორის, არც ის ადარდებდათ, რომ სააკაშვილის დროინდელმა ფაშიზმმა ჩვენი ტერიტორიების 22% გააჩუქა.

იმ პერიოდში ქართველები დასავლეთიდან მიტოვებულად გრძნობდნენ თავს, რადგან დასავლეთი მხოლოდ შეშფოთება-აღშფოთების ტერმინებს იშველიებდა საქართველოსთან მიმართებით პოზიციის გამოსახატად. რატომ ხდებოდა ასე?

- დასავლეთი პასიურობდა იმიტომ, რომ თვითონ მათ ჰქონდათ შეფასებები მიცემული ამ ფაშიზმისთვის - „დემოკრატიის შუქურა“. ეს სახელი სააკაშვილს უწოდეს, რადგან იქ რა მერკანტილური ინტერესები იყო, ამაზე ვერ ვისაუბრებ, საამისო მტკიცებულებები არ მაქვს. გარდა ამისა, 2003 წლამდე ვინც ყველაზე მეტი ნდობით გამოირჩეოდა დასავლეთის თვალში, ანუ არასამთავრობო სექტორი, „თავისუფლების ინსტიტუტის“ და „ახალგაზრდა იურისტთა ასოციაციის“ თამადობით, ესენი ყველანი უცბად, ერთ მშვენიერ დღეს გადაბარგდნენ პოლიტიკაში, მოვიდნენ ხელისუფლებაში და დასავლეთში არსებული ნდობა ბოროტად გამოყენეს. იქცნენ იმაზე უფრო ბოროტებად და ჯალათებად, ვიდრე ეს შევარდნაძის დროს იყო, არა მხოლოდ შევარდნაძის დროინდელი დამოუკიდებელი საქართველოს პერიოდში, არამედ შევარდნაძის საბჭოთა პერიოდშიც რომ იყვნენ ჯალათები, იმათზე ათჯერ უფრო საშინელ ჯალათებად იქცნენ სწორედ არასამთავრობო ორგანიზაციების წარმომადგენლები, რომლებიც რევოლუციის გზით პოლიტიკაში მოვიდნენ. ეს იყო დასავლეთის მხრიდან ერთი ფაქტორი, მეორე ფაქტორი, როგორც გითხარით, პირადი, ფულადი ინტერესები იყო, რომელზეც ვერ ვისაუბრებ. ნდობა ნდობაა, მაგრამ როდესაც დგახარ გვამებზე, როდესაც ჯორჯ ბუში ჩამოდის და იძახის, ეს არის „დემოკრატიის შუქურა“, ეს უკვე ნდობის და მხარდაჭერის მიღმაა, მით უმეტეს, როდესაც ცხვირწინ იყო გაზით გაგუდული პრემიერ-მინისტრი. რაც შეეხება დღევანდელობას და დასავლელი პოლიტიკოსების ნეიტრალურ დამოკიდებულებას პატიმარი სააკაშვილის მიმართ, „მავრმა გააკეთა თავისი საქმე და მავრს შეუძლია წავიდეს“, სააკაშვილმა ამოწურა თავისი პროექტი საქართველოში, მე ვფიქრობ, ის მალე უკრაინაში გადაინაცვლებს. დამთავრდა პროექტი „სააკაშვილი“, რომელიც საქართველოსთან მიმართებით იყო ჩაფიქრებული.

ეს ნიშნავს, რომ დასავლეთი არ მოითხოვს სააკაშვილის გათავისუფლებას?

- მოგვთხოვენ, როგორ არა, ვიღაცები, ალბათ, გვეტყვიან, გაათავისუფლეთო, მაგრამ ეს უკვე აღარ იქნება საქართველოსთვის პრობლემა. ვფიქრობ, სააკაშვილი გარკვეულ პერიოდს მაინც საქართველოს ციხეებში დაყოფს, არა იმ ციხეებში, რომელიც მან შესთავაზა საქართველოს 300 ათასზე მეტ მოქალაქეს, არა იმ პირობებში, წამებასა და ღირსების შემლახავ მოპყრობაში, ასეთ პირობებში ის არ იქნება და ცუდია, რომ სააკაშვილმა არ იცის, რა განსაცდელი გამოატარა იმ ადამიანებს, მაგრამ ცივილიზებული საქართველო, როგორი პატიმარიც არ უნდა იჯდეს, უნდა გამოიყურებოდეს ისე, როგორც ქართველ ხალხს ეკადრება. ამიტომ სააკაშვილი სასჯელს ცივილიზებულად, ადამიანური მოპყრობის ქვეშ მოიხდის. ვინაიდან სააკაშვილი არ არის დამოუკიდებელი ფიგურა და არ მოქმედებს დამოუკიდებლად, შემდგომ პროექტს, ალბათ, სხვა რომელიმე ქვეყანაში განახორციელებს. დასავლეთს და რუსეთს მასზე სერიოზული ბერკეტი აქვს, ორივე მართავს სააკაშვილს. საქართველოში ის არეულობის მოსაწყობად ჩამოვიდა.