საქართველოს ფარმაცევტულ ბაზარზე GDP და GMP სტანდარტების დანერგვა სავალდებულო ხდება. აღნიშნული ცვლილება ძალაში 2022 წლის 1-ლი იანვრიდან შევა, შესაბამისად, წამლების მონიტორინგიც დაიწყება. ეს, პირველ რიგში, მედიკამენტებზე ფასის ცვლილებას გამოიწვევს, ხოლო რამდენად გააუმჯობესებს ხარისხს, კიდევ საკითხავია.
როგორც ფარმაცევტული კომპანიების ასოციაციის აღმასრულებელმა დირექტორმა ილონა კოკიაშვილმა აღნიშნა, ფარმაცევტულ დაწესებულებებს ახალი სტანდარტების დაკმაყოფილება საქართველოს ბაზარზე მედიკამენტების ხარისხის გაუმჯობესების მიზნით მოუწევთ.
„GDP და GMP სტანდარტით წამყვანი ქვეყნები მრავალი ათეული წლის განმავლობაში ოპერირებენ. ჩვენთან ამ თემაზე საუბარი დაიწყო ჯერ კიდევ 2016 წელს, როდესაც უკვე კონკრეტული გრაფიკები დაისახა, რომ როგორც მწარმოებლები, ისე დისტრიბუტორები ჩართულიყვნენ ამ პროცესის იმპლემენტაციაში და რაღაც პერიოდისთვის სავალდებულო ყოფილიყო.
მსხვილი კომპანიები ისედაც აკმაყოფილებდნენ ამ სტანდარტს. ჩვენ მოვილაპარაკეთ, რომ ოქტომბრისთვის ჩვენ უკვე უნდა ამოვწუროთ ამ ტექნიკური საკითხების განხილვა. ანუ რაც ხელს უშლის პრაქტიკულად, რაღაცაზე გადასვლას. რაც მთავარია, უკვე დასრულებულია ტრენინგების საკითხი, სახელმწიფო უკვე არჩევს კომპეტენტურ ტრენერებს, ვისთან ერთადაც ბიზნესი შეძლებს თავისი კადრების დატრენინგებას“, - განაცხადა კოკიაშვილმა.
მომხმარებლისთვის მნიშნვნელოვანია გამოიწვევს თუ არა ცვლილება მედიკამენტებზე ფასების მატებას. ფარმაცევტული კომპანიების ასოციაციის აღმასრულებელი დირექტორი ამბობს, რომ ამის ალბათობა მართლაც არსებობს.
„ალბათობა ამის არსებობს, მაგრამ ჩვენ ამის ანალიზის გაკეთებას შევძლებთ მხოლოდ რაღაც პერიოდის გასვლის შემდეგ. ანუ 1-ლი იანვრიდან სავალდებულო რომ გახდება, სადღაც 5-6 თვეში ჩვენ უკვე დავინახავთ სურათს. რა თქმა უნდა, ნებისმიერი რეგულაცია გავლენას იქონიებს ფასზე, მაგრამ არა ისეთს, რომ ეს იყოს ძალიან მაღალი ეფექტის“, - განაცხადა „პალტრანიუსის“ ეთერში კოკიაშვილმა.
ფარმაცევტული პროდუქციის ხარისხის მხრივ მათლაც ვერ არის საქმე კარგად. ცოტა ხნის წინ სამედიცინო და ფარმაცევტული საქმიანობის რეგულირების სააგენტომ თბილისში არსებული ფარმაცევტული საწარმოები შეამოწმა და 40 მოქმედი საწარმოდან 33-ში დარღვევები აღმოაჩინა. 33-ივე საწარმოში დარღვეული იყო სანებართვო პირობები, 22 შემთხვევაში კი ფარმაცევტული პროდუქტი წარმოების წესის დარღვევით იყო გამოშვებული.
„შემოწმების შედეგად აღმოვაჩინეთ სხვადასხვა ტიპის დარღვევები, როგორიცაა სანებართვო პირობების დარღვევა, წარმოების წესის დარღვევა. მაგალითად, ერთ-ერთი საწარმოს შემოწმებისას, სააგენტომ ვადაგასული ფარმაცევტული პროდუქტის რეალიზაციის ფაქტები გამოავლინა და კონკრეტულად აღნიშნულ დაწესებულებას 7 დასახელების, 99 239 ერთეული, წარმოების წესის დარღვევით არსებული ფარმაცევტული პროდუქტი ჩამოერთვა“, - განაცხადა რეგულირების სააგენტოს ხელმძღვანელმა ზაალ კაპანაძემ.
შემოწმების შედეგად გამოიკვეთა: სანებართვო პირობების დარღვევის 33 ფაქტი. როგორც კაპანაძემ აღნიშნა, რეგულირების სააგენტო მუდმივად ახდენს ფარმაცევტული საწარმოებისა და აფთიაქების მონიტორინგს, მაგრამ მდგომარეობა მაინც არადამაკმაყოფილებელია. რას შეცვლის იანვრიდან ასამოქმედებელი რეგულაცია, ამ ეტაპზე თქმა რთულია. ხშირია შემთხვევა, რომ ახალი სტანდარტის შემოღების შემდეგ, მდგომარეობა ამ თუ იმ სექტორში უცვლელი რჩება.
