თვითმმართველობის არჩევნებამდე რამდენიმ დღით ადრე, ქვეყანა ერთ დიდ თეატრს დაემსგავსა. კვლევები, ფარული ჩანაწერები და ახლა საქართველოს მესამე პრეზიდენტის, მიხეილ სააკაშვილის განცხადება და ბილეთის დემონსტრირება, რომ 2 ოქტომბერს, საღამოს საქართველოში ბრუნდება.

For.ge-მ ფსიქოლოგ რამაზ საყვარელიძეს ექს-პრეზიდენტის ფსიქო-პორტრეტის აღწერა სთხოვა.

რამაზ საყვარელიძე: როგორც სამედიცინო საიდუმლოებები, ფსიქოლოგიაშიც ანალოგიურად, პორტრეტების გახმაურება მიღებული არაა. თუმცა, ჩამოდის თუ არა, ჯერ ეს კიდევ საკითხავია. თავად კი თქვა, რომ ჩამოვდივარო, მაგრამ ასეთი განცხადებები ხშირად უთქვია და შემდეგ, ხშირად შეუცვლია. ვნახოთ, აქამდე პროცესი მივა თუ არა. ვფიქრობ, პოლიტიკური მგრძნოელობა აქვს, პოლიტიკას კარგად გრძნობს და არა მგონია, რომ მისი ნაბიჯები განპირობებული რომანტიკული მოტივებით იყოს. ამიტომ, ყველა ეჭვობს, რომ ჩამოსასვლელი ნაბიჯი გადადგას.

მისი ასეთი პერფორმანსები მდგომარეობს იმაში, რომ მისი სახელი შესაძლოა დავიწყებას მიეცეს?

- არ მგონია, მისი სახელი დავიწყებას მიეცეს და არ იცოდეს ის, რომ ახალ ქართულ ისტორიაში სააკაშვილი ნამდვილად უნიკალური პიროვნებაა, რომლის სახელიც დავიწყებას არ მიეცემა. თუმცა, გააჩნია, არდავიწყება რა ნიშნით იქნება შემონახული ისტორიაში - პლუსით თუ მინუსით.

მიხეილ სააკაშვილმა კარგად იცის ისიც, რომ თუკი საქართველოს საზღვარს გადმოკვეთავს, ის ქართული მართლმსაჯულების წინაშე წარსდგება. ფსიქოლოგიურად ეს მომენტი როგორ აიხსნება, შეიძლება ითქვას, რომ ის ციხისთვის მზად არის?

- სწორედ ამიტომ, ბევრს ეპარება ეჭვი მისი ამ ნაბიჯის გადადგმაში. თანაც, ეს ის ადამიანია, რომელმაც თვითმფრინავის ხმის გაგონებაზე საფრანგეთის საგარეო საქმეთა მინისტრი მიატოვა და მანქანის ქვეშ გაიქცა. (საუბარია 2008 წლის აგვისტოს ომზე, როდესაც მიხეილ სააკაშვილი ფრანგ დიპლომატთან ერთად გორში იმყოფებოდა -რედ.). ასე რომ, ასეთი ხასიათის მქონე ადამიანი საეჭვოა, გმირობაზე წავიდეს.

ფაქტია, რომ ექს-პრეზიდენტს ლიდერობის ამბიცია აქვს და ეს მისი ქცევებიდან კარგად ჩანს. ლიდერობის დაკარგვის შიში ხომ არ აქვს?

- ნუ იფიქრებ, რომ ამიტომ მოდის. ისევე, როგორც ბევრს, მასაც ლიდერობა უყვარს, თუმცა საქართველოში ჩამოსვლის შემთხვევაში ხელისუფლებამ თითი რომც არ გაანძრიოს, მოსახლეობაში ვნებათაღელვა იქნება და ეს ვნებათაღელვა მის მოწინააღმდეგეებს უფრო მეტს გამოიყვანს ქუჩაში, ვიდრე მის მომხრეებს. ასეთ ფონზე, ეს მოვლენები არ მგონია, რომ მის ლიდერობის სურვილს შეესაბამებოდეს. უკმაყოფილო ადამიანები ლიდერად იმას არ იხდიან, ვისითაც უკმაყოფილოები არიან. შეიძლება იტყუება კიდეც, რადგან ტყუილს ხშირად ამბობს. არაერთხელ უთქვია, ჩამოვალო და არ ჩამოსულა?! - ახლა რა გარანტია გვაქვს, რომ ჩამოვა?!

მისი ტყულები ფსიქოლოგიურად როგორ აიხსნება?

- ფსიქოლოგია აუცილებელი არ არის, რადგან თუ გავთვალისწინებთ, რომ ასეთი დაპირებებით, მათ შორის ბილეთების ჩვენებით დაწყებული, მისი ამომრჩევლების მობილიზაცია ხდება. მან ბოლო ხანებში არაერთხელ მოუწოდა საკუთარ ამომრჩეველს, რომ ქუჩაში გამოვიდნენ. როგორ შეიძლება ამას ხელი შუწყოს, თუ არა იმით, რომ ამ ამომრჩეველს გრძნობა გაუჩინოს, თითქოს ჩამოდის და თავიანთი ლიდერი აქ ეყოლებათ.

მისი ბილეთიდან ჩანს, რომ დედასთან, გიული ალასანიასთან ერთად მოფრინავს. შეიძლება ითქვას, რომ დედას ფარად იყენებს?

- თუკი წამოვა, რა თქმა უნდა, დედამისის ფუნქცია ფარი იქნება. დედა-შვილი არიან და მოდით, ჩემი შვილი დაიჭირეთო - არ იტყის. თუმცა, რამდენდად გამოდგება ფარად ქალი, რომელიც შეიძლება ძალიან ადვილად შეაკავონ, ეს კიდევ საკითხავია. ეს არ არის ისეთი ძალის ფიგურა, რომელიც დაიცავს. მიშას როდესაც უნდოდა ჩამოეყვანა დასავლელი პოლიტიკოსები და მათთან ერთად ჩამოსულიყო, ამ შემთხვევაში ისინი ფარად გამოდგებოდნენ, მაგრამ დედამისი ფარად რამდენად გამოდგება, საეჭვოა - უფრო პროვოკაციული ელემენტი იქნება. დავუშვათ, მიშა დაიჭირეს და დედამისიც დაიჭირეს, შემდეგ ამაზე ატყდება ამბავი - აი, ქალი დააკავეს და ა.შ.

შეიძლება ითქვას პროვოკაციების წინასწარი გათვლები აქვს და დედასაც წირავს?

- დიახ, და თან დედამისის ჩამოყვანა შეიძლება პროვოკაციული დატვირთვა იმ მხრივაც ჰქონდეს, რომ მის მომხრეებს უფრო მიიზიდავს ასეთი სენტიმენტალური პასაჟით. ეს საბრძოლო ჩამოსვლა კი არ არის, არამედ სამშობლოს მონატრებული ორი ადამიანის ჩამოსვლაა. შეიძლება ასეთი შინაარსი უნდა, რომ შესთავაზოს საზოგადოებას.