არჩევნებამდე რამდენიმე კვით ადრე, ექს-პრემიერის, გიორგი გახარიას პარტიის წევრები „სკანდალში“ გაეხვნენ - ალექსანდრე ხოჯევანიშვილისა და კახა ქემოკლიძის სახელი და გვარები ფარული ჩანაწერების გამოქვეყნებას დაუკავშირეს, რადგან ორივე მათგანი წლების განმავლობაში სუს-ში მაღალ თანამდებობას იკავებდა.

თუმცა, მმართველი გუნდის წევრებს გახარიასთან ნარკოტესტის ჩაბარებასთანაც აქვთ პრეტენზია. ეგ კი არა და ირაკლი კობახიძემ ტელევიზიის ეთერით ექს-პრემიერს „ვიღაც კოკაინშჩიკიც“ კი უწოდა.

აღნიშნულ საკთხებზე რა პასუხები აქვთ, პარტია „საქართველოსთვის“ წევრებს for.ge გიორგი გახარიას თანაგუნდელსა და პარლამენტის წევრს, ბექა ლილუაშვილს ესაუბრა.

ბექა ლილუაშვილი: რამდენადაც ჩემთვის ცნობილია, ნათია მეზვრიშვილი, ზეწოლებთან დაკავშირებით გამოკითხვაზე  იყო დაბარებული. მის გამოკითხვაზე დაბარებას ფარული ჩანაწერების საკითხთან არანაირი შემხებლობა არ აქვს.

რაც შეეხება ფარულ ჩანაწერებს, წარმოუდგენელია ვისაუბროთ ამ ჩანაწერების ავთენტურობაზე ან არაავთენტურობაზე, რადგან ამ კითხვაზე პასუხი გამოძიებამ უნდა გასცეს. შესაბამისად, უკვე რამდენიმე დღეა ვისმენთ იმ მითითებებს თუ არაპირდაპირ მინიშნებებს კონკრეტულ სახელებთან და გვარებთან დაკავშირებით, რომელიც ცალსახად უპასუხისმგებლო განცხადებებია. ეს ემსახურება მხოლოდ იმას, რომ მოახდინონ საზოგადოებაზე გარკვეული გავლენა. როგორ შეიძლება, როდესაც კონკრეტულ საკითხზე გამოძიება არის დაწყებული, მაღალი თანამდებობის პირები პოლიტიკური მიზნებისთვის იყენებდნენ ასეთ სენსიტიურ საკითხს! შესაბამისად, ჩვენი პოზიცია არის ასეთი, რა თქმა უნდა, ყველა კითხვას გამოძიებამ პასუხი უნდა გასცეს.

ფარული ჩანაწერების საკითხში თქვენი თანაგუნდელი და სუს-ის ყოფილი თანამშრომელი ალექსანდრე ხოჯევანიშვილი ფიგურირებს. ამაზე რა პასუხი გაქვთ?

- ძალიან სამწუხარო და მძიმე მოცემულობაა, რომ პოლიტიკურად მოტივირეული განცხადებებით გააკეთონ მინიშნებები, კონრეტულად ჩვენი გუნდის წარმომადგენლებზე, მაშინ, როდესაც ამ საკითხზე დაწყებულია გამოძიება. წარმოუდგენელია დაიკავო კონკრეტული პოზიცია, როდესაც გამოძიება არც დასრულებულა. გამოდიან კონკრეტული თანამდებობის პირები, მიზანმიმართულად სახელებისა და გვარების დასახელებას არ დავიწყებ, ასახელებენ სახელებსა და გვარებს. მაგალითად, ბატონი ხოჯევანიშვილის შემთხვევაში, კიდევ ერთი უტიფარი ტყუილით ცდილობენ ამ ადამიანის სახელს ჩირქი მოსცხონ და გუნდის დისკრედიტაცია მოახდინონ. ამბობენ, რომ ეს ადამიანი სუს-ში ზედამხედველი იყო ოპერატიული ტექნიკური სააგენტოსი, რაც ტყუილია - არასოდეს ხოჯევანიშვილი არ ყოფილა და არ კურირებდა ოპერატიულ ტექნიკურ სააგენტოს. ეს არის ის სააგენტო, რომელიც პირდაპირ პასუხისმგებელია მოსმენების, ჩაწერების, როგორც სამართლებრივი თვალსაზრისით, ასევე პასუხისმგებელია პირდაპირ ოპერატიულ ტექნიკური უზრუნველყოფით. შესაბამისად, ეს არის დიდი ტყუილი, იმ დიდი ტყუილების სერიიდან, რომელიც პირდაპირ ისახავს გახარიას გუნდის წინასაარჩევნოდ დაზიანებას. თუმცა, ეს მათ არ გამოსდით.

ხშირად ახსენებთ, რომ გამოძება დაწყებულია და გჯერათ, რომ გამოძება დაადგენს ვინ დგას ამის უკან?

- სამწუხაროდ, როდესაც პოლიტიკური პარტიების წარმომადგენლების მხრიდან, სახელმწიფო ინსტიტუციების მიმართ ხორციელდება პირდაპირი ზეწოლა, წარმოუდგენელია ამ პოლიტიკურ მოცემულობაში არ დავინახოთ, რომ სახელმწიფო ინსტიტუტები ზეწოლის ქვეშ არიან და, რა თქმა უნდა, რეალურ გამოძიებასაც არავინ ელოდება.

2012 წლიდან მოყოლებული, ყველა არჩევნების წინ ჩვენ ვნახულობთ ფარულ ჩანაწერებს. შეიქმნა კომისია, განადგურდა კადრები, მაგრამ დღეს ისევ ამ პრობლემის წინაშე ვართ. როგორ ფიქრობთ, რატომ?

- თქვენ მართალი ბრძანდებით, ოღონდ რა ნაწილში - ვერ მოახერხა ხელისუფლებამ და მათ შორის, როდესაც ჩვენ ხელისუფლების ნაწილი ვიყავით, ჩვენი პასუხისმგებლობაც არის ის, რომ დღეს პოლიტიკური ბრძოლის ინსტრუმენტად ისევ ხდება გამოყენება იმ მეთოდების, რომელიც ძალიან კარგად გვახსოვს და რომლის გამოც ქართველმა ხალხმა წინა ხელისუფლებას უარი უთხრა. ეს არის, რა თქმა უნდა, უდიდესი პრობლემა, რომელსაც ბრიფინგებზე გამოსვლა და „ლაქლაქი“ კი არ სჭირდება, არამედ სჭრდება მიზანდასახული, თანმიმდევრული ნაბიჯების გადადგმა იმისთვის, რომ ეს პრობლემა აღმოიფხვრას. როდესაც, ჩვენ იქ ამის საშუალება მოგვეცა, დავიწყეთ. სამწუხაროდ, დღეს, როგორც ჩანს, ძალაუფლების შენარჩუნების მიზნით, ყველაფრის რღვევა მოხდა, ამიტომ ისევ ვხედავთ პოლიტიკურ ველზე იმ მეთოდებით ბრძოლას, რასაც 2012 წელს „ქართული ოცნება“ ებრძოდა.

პასუხისმგებლობა ახსენეთ, და აქამდე როდესაც ქვეყნებოდა ფარული ჩანაწერები, თქვენი ლიდერი გიორგი გახარია მაღალ თანამდებობას იკავებდა. თუნდაც, როდესაც ირაკლი ღარიბაშვილისა და ბერას ჩანაწერები გამოქვეყნდა, მაშინ პრემიერი იყო. პასუხისმგებლობა მას არ ეკისრება?

- როდესაც ჩვენ ვსაუბრობთ პასუხისმგებლობის ნაწილზე, ვგულისხმობთ იმას, რომ ზუსტად ასეთი გამოწვევები, რომელიც ქვეყნის წინაშე იდგა, კონკრეტულ ეპიზოდებს არ ვგულისხმობ, ჩვენ ვცდილობდით კონკრეტული მიზანმიმართული რეფორების დღის წესრიგით შეგვეცვალა ეს მოცემულობა, ამას ვაკეთებდით, ვიდრე ეს შესაძლებელი იყო და ვიდრე ჩვენ პროგრესი გვქონდა. ამიტომ ჩვენ ხელისუფლების ნაწილად ვრჩებოდით. თუმცა, როდესაც ჩვენ დავინახეთ და მათ შორის გიორგი გახარიამ დაინახა, რომ ამის რესურსი ფაქტიურად ამოიწურა - პარტიის პოლიტიკური ინტერესები დადგა სახელმწიფო ინტერესებზე მაღლა და მოხდა კონკრეტული პარტიის მხრიდან ჩარევა სახელმწიფო ინტერესების საზიანოდ, ავდექით და ჩვენ მივიღეთ ის გადაწყვეტილება, რაც მივიღეთ.

ასევე მინდა გკითხოთ, ირაკლი კობახიძის სატელევიზიო განცხადებაზე, როდესაც მან გიორგი გახარიას „ვიღაც კოკაინშჩიკი“ უწოდა. რატომ არ იკეთებს ნარკოტესტს გიორგი გახარია?

- როგორც გიორგი გახარიამ გასცა პასუხი, ანალოგიურად გიპასუხებთ - არანაირი პასუხის გაცემას არ ვაპირებ კობახიძის კომენტარზე, ერთი მარტივი მიზეზის გამო - ადამიანი, ვისი სიტყვაც დღეს არაფერს ნიშნავს, ამ ადამიანის სიტყვებზე დროის დაკარგვა სწორად არ მიმაჩნია. რაც შეეხება ტესტის ნაწილს, გიორგი გახარიამ ტესტი ქვეყნის გარეთ ჩააბარა. დანარჩენ ინფორმაციას საზოგადოებას ეტაპობრივად მივაწვდით.

რატომ უცხეთში, სამხარაულის ექსპერტიზას გიორგი გახარია არ ენდობა?

- ჩვენ გვქონდა უტყუარი ინფორმაცია, რომ ამ მიმართულებით პროვოკაცია მზადდებოდა. შესაბამისად, სწორედ იმიტომ, რომ სამხარაულის ექსპერტიზის ინსტიტუტის ღირსება დაგვეცვა, რადგან, შესაძლოა, ამ პოლიტკური პარტიის ზეწოლის გამო ვერ მოეხდინათ თავიანთი პოზიციის დაფიქსირება, ამიტომ მიიღო გადაწყვეტილება გახარიამ, რომ ტესტი საზღვარგარეთ გაეკეთებინა.

არჩევნები მოახლოვდა და თქვენს პარტიას ძალიან ბევრი წევრი ტოვებს. რითი ახსნით ამას, რომ გუნდიდან ხალხი გეცლებათ?

- საუბრის დასაწყისში, როდესაც ნათია მეზვრიშვილი ვახსენე, სწორედ საგამოძიებო ორგანოში კომუნიკაცია ნათიასთან ამიტომ ხდებოდა, რომ არაერთი ბრიფინგი დავუთმეთ საკითხს, თუ როგორ ხდება სახელმწიფო ინსტიტუტების მხრიდან ჩვენი პარტიის არათუ წევრებზე, არამედ ადამიანებზე, რომლებიც სოციალურ ქსელში ალაიქებენ ჩვენს პოსტზე, პირდაპირი პოლიტიკური ტერორი. ზუსტად, ეს არის ის ძირითადი მიზეზები, რატომაც ადამიანები იძულებულები არიან, რომ ეს ნაბიჯები გადადგან. თუმცა, ეს მათ არ აშინებთ, ზუსტად იციან, როდესაც 2 ოქტომბერი დადგება და ცვლილებები დაიწყება, ზუსტად იციან რა პოზიცია უნდა დააფიქსირონ. დიდი მადლობა, სამწუხაროდ მეტს ვეღარ გესაუბრებით შეხვედრა მაქვს.