მას შემდეგ, რაც რიგით ზესტაფონელებზე დაყრდნობით, შევიტყვეთ, რომ ზესტაფონში საკადრო საკითხებს გოგი ქავთარაძე აკონტროლებს, მასთან დაკავშირება გადავწყვიტეთ. გვაინტერესებდა, მართალი იყო თუ არა, თითქოს მისი მითითებით დანიშნეს კომისარიატში ავთანდილ კიკნაველიძე (რეზერვისტთა დახასიათებით, აგვისტოს ომიდან გაქცეული კაცი) და პოსტი დაატოვებინეს აფხაზეთის ომში ნაომარ, მრავალჯერ დაჭრილ კაცს, ზაზა დავლაძეს.
სხვათა შორის, ზაზამ დავლაძემ უკვე დაწერა განცხადება სამსახურიდან წასვლის თაობაზე და ამის მიზეზად ახალ კომისართან მორალური შეუთავსებლობა მიუთითა.
იმის გასარკვევად, ერევა თუ არა საკადრო საკითხებში, ჩვენ გოგი ქავთარაძეს დავუკავშირდით.
გოგი ქავთარაძის თქმით, რეალობა არ არის, თითქოს ზესტაფონში ნეპოტოზმით წყდება კადრების დანიშვნის საკითხი და თითქოს პირადად მან გადაწყვიტა ავთანდილ კიკნაველიძის კომისრად დანიშვნა, რადგან იგი დეპუტატ შალვა კიკნაველიძის ბიძა ყოფილა:
- მე სულ სხვანაირად ვფიქრობ ამის შესახებ. ავთანდილ კიკნაველიძე კომისრის პოსტზე მართლაც დანიშნულია, მაგრამ არაფერი ვიცი იმის შესახებ, აგვისტოს ომიდან იყო თუ არა გამოქცეული. შეიძლება, ზოგიერთი ინფორმაცია ნახევრად შეესაბამებიდეს სიმართლეს, მაგრამ ამის შესახებ მე არაფერი ვიცი. მერე, თუ აგვისტოს ომიდანაა გამოქცეული ავთანდილ კიკნაველიძე, თქვან ამის შესახებ, რომ გამოქცეულია, მე ხომ არ ვიცავ ამ ადამიანს?! მე რა ვქნა, მე ხომ არ გამოვქცეულვარ ომიდან?“ - კითხულობს გოგი ქავთარაძე.
ზესტაფონელები ამბობენ, რომ ეს პიროვნება კომისრად თქვენ დაანიშნინეთ გამგებელს. საერთოდ, როგორ წყდება საკადრო საკითხი ზესტაფონში?
- არა, მე არავის არ ვანიშნინებ. შეიძლება, საქმის კურსში ვიყო, მაგრამ არავის ვანიშნინებ, გამგებელი ამას თვითონ აკეთებს.
ახალი ხელისუფლების მოსვლის შემდეგაც ასეთი კადრები როცა ჩნდებიან რაიონში, გამოსავალს რაში ხედავთ? ფაქტია, რომ აფხაზეთის ომში ნაომარ, მრავალ ნაჭრილობევ პიროვნებას არ სცემენ პატივს და ინიშნებიან ისეთები, რომლებიც შესაძლოა, გამოქცეულნი იყვნენ აგვისტოს ომიდან?! როგორ უნდა მოხერხდეს ახალი კადრების აყვანა, რომ უშუალოდ რაიონის მოსახლეობა ამის გამო გულმოსული არ იყოს?
- არ ვიცი, თუ ვინმე ამას ლაპარაკობს, ეს გაარკვიონ ხალხში, რაიონში, მე ხომ არ ვიცოდი, როდესაც ეს კადრი ინიშნებოდა, რომ ის აგვისტოს ომიდან იყო გამოქცეული?! ამის შესახებ პირველად ახლა გავიგე. ამიტომ ამის შესახებ გამგეობას შეეკითხეთ.
როგორც ამბობენ, გამგებელი ზაზა დავლაძესთან პირად საუბარში ამბობს, მე ეს არ გადამიწყვეტია და გოგი ქავთარაძემ გადაწყვიტაო.
- შეუძლებელია, ეს ეთქვა ნუგზარს.
ზოგადად კადრები როგორ ინიშნება და როგორ უნდა ინიშნებოდეს თქვენს რაიონში?
- ყველა კადრი უნდა ინიშნებოდეს პატიოსნად, ვისაც ხალხი უჭერს მხარს, ვინც არის "ქართული ოცნების" წარმომადგენელი, ვინც ჩვენს მხარეს არის და ვისაც წინსვლა უნდა. ასეთი ხალხი უნდა ინიშნებოდეს ქალაქშიც და სოფლადაც რწმუნებულად. ეს არის ჩემი პასუხი.
პირადად თუ დაინტერესდებით ზაზა დავლაძის გათავისუფლებით, რადგან მან სამსახურიდან წასვლისას ახალ კომისართან მორალური შეუთავსებლობის შესახებ მიუთითა.
- ახლა არ ვიცი, როდესაც გავარკვევ სიტუაციას, რაღაც ზომებს მივიღებ.
პირადად თუ იცნობთ ახალ კომისარს ავთანდილ კიკნაველიძეს, რომლის გამოც ასეთი გაურკვევლობაა?
- როგორ არ ვიცნობ! და ზაზა დავლაძესაც ვიცნობ და მე ამ საქმეში არ ჩავრეულვარ. უბრალოდ, ყველას ველაპარაკე, მაგრამ ისეთი გარკვეული რომ ვყოფილიყავი საქმის ვითარებაში, ასეთი რამ არ მომხდარა. თორემ საქმის კურსში ვიყავი.
+++++
ამის შემდეგ For.ge ზესტაფონის გამგებელ ნუგზარ ქამუშაძეს დაუკავშირდა, თუმცა პირველად დარეკვისას, სავარაუდოდ, მდივანმა გვითხრა, თათბირობსო; მოგვიანებით განმეორებით რომ დავურეკეთ, თავად უკვე გამგებელმა აიღო ტელეფონი და გვითხრა, ხუთ წუთში გადმორეკეთ, საჭესთან ვზივარო. დათქმულ დროს მართლაც დავუკავშირდით და ვკითხეთ, თუ იცოდა, ვინ იყო ახალი კომისარი და რატომ ამბობენ მის შესახებ რეზერვისტები, რომ ის აგვისტოს ომის დროს გამოქცეული კადრია?! ამ შეკითხვის შემდეგ გამგებელმა გვითხრა, "გასაგებია. რა ვქნათ? ჩვენ თათბირი გვაქვს ახლა; დავლაძის განცხადება ვიცი და ჩემთან არ შემოსულა ჯერ მისი განცხადება".
პირადად თუ იცნობთ ახალ კომისარს და რამდენად მართალია, რომ გოგი ქავთარაძეს ურჩევია თქვენთვის ზაზა დავლაძის გათავისუფლება და მის პოსტზე ავთანდილ კიკნაველიძის დანიშვნა?
- ის ამას ამბობს, ეს ამას ამბობს, მაგას ვიცნობდი თუ იმას ვიცნობდი, მოდით ჩამოვყალიბდეთ, თქვენ ამის შესახებ პასუხი გინდათ ზეპირად, ტელეფონით? როგორ იქნება ეს ამბავი?
მე მაინტერებს, იცნობდით თუ არა ავთანდილ კიკნაველიძეს და გსმენოდათ თუ არა მისი წარსულის შესახებ, როცა ხალხი ამბობს, რომ ის აგვისტოს ომიდან გამოქცეულია? რა ნიშნით დაინიშნა პოსტზე?
- გასაგებია. ამიტომ მე უნდა მომცეთ დრო, რომ ამ შეკითხვებზე გიპასუხოთ, რადგან საქმე ეხება მაჟორიტარს, მას უნდა შევეკითხო. არის ასეთი გვარი, მე მისვამენ ასეთ შეკითხვას, ჩამოვყალიბდები. გასაგებია, ყველა თქვენი შეკითხვა მოვისმინე და ყველა შეკითხვა დავიმახსოვრე.
კიდევ მაინტერესებს, ზოგადად, რაიონში როგორ ინიშნებიან კადრები, ეს ხდება ახლობლობით, ნეპოტიზმით თუ ადამიანის ღირსებითა და დამსახურებით?
- ამ შეკითხვაზეც მოგვიანებით გაგცემთ პასუხს.
რამდენ ხანში გვიპასუხებთ?
- თათბირი მაქვს საგაზაფხულო სამუშაოებთან დაკავშირებით, ეს სერიოზული თათბირია, ჩავბრუნდები გამგეობაში და დაგირეკავთ.
კიდევ ერთხელ დაგიკონკრეტებთ ზაზა დავლაძის შესახებ, რომელიც არის აფხაზეთის ომის გმირი, მრავალგზის ნაომარი...
- ვიცით, ქალბატონო, დღეს ყველანი გმირები არიან, ყველანი ბარიკადებზე იდგნენ და ასე არ არის. ყველა საკითხთან დაკავშირებით გავერკვევი.
+++++
მოგვიანებით ნუგზარ ქამუშაძეს ისევ დავუკავშირდით. მან გვითხრა, ბატონი გიგი ქავთარაძე მობრძანდა, მას უნდა დავეთათბირო, გავერკვევი სიტუაციაში და პასუხს ამის შემდეგ მოგახსენებთო. ისიც დაამატა, დავლაძის განცხადება ჩემთან არ მოსულა, მე სიტყვიერად მითხრეს, რომ მან დაწერა განცხადება, იმასაც მეუბნებიან, რომ ინტერენეტშიც დებს რაღაც განცხადებებს.
რაც შეეხება, თუ ვინ დანიშნა პოსტზე ახალი კომისარი, ნუგზარ ქამუშაძემ გვითხრა, როგორც წესი, მაჟორიტარი არ ნიშნავს კადრებს, ავთანდილ კიკნაველიძე არ გახლავთ ჩემს მიერ დანიშნული კადრი, ის სულ სხვა პიროვნებამ დანიშნა, რომელიც იმ დროს გამგებლის მოვალეობას ასრულებდა. პირადად მე მას შემდეგ შევუდექი ჩემს მოვალეობასო.
როცა დავინტერესდით, თუ ვინ იყო ის პიროვნება, ვინც ავთანდილ კიკნაველიძე დანიშნა, ზესტაფონის გამგებელმა გვითხრა, ვნახავ, ბრძანებას ამოვაწევინებ, თუ ვისი დანიშნულია და რა პერიოდში, ვინაიდან რამდენიმე გამგებელი იყო ჩემამდე, ამიტომ სიტუაციაში უნდა გავერკვეო.
ამის შემდეგ დაგვიკავშირდა ზესტაფონის გამგეობის ადმინისტრაციის სამსახურის უფროსი ეკატერინე დუგლაძე და გვითხრა, ხვალისთვის უკვე იქნება საიტი და გაარკვევთ, თუ ვინ არის ზაზა დავლაძე, შეგიძლიათ ამ საიტით ისარგებლოთო.
თუმცა როცა ჩავეძიეთ, გვიპასუხა, რომ იმ პერიოდში გამგებლის მოვალეობის შემსრულებელი იყო ალექსანდრე მახათაძე.
- ბატონი ნუგზარი იმ დროს არ იყო გამგებელი და ვერც მოხსნიდა და ვერც დანიშნავდა ვინმეს. სწორედ ალექსანდრე მახათაძემ დანიშნა ახალი კომისარი ავთანდილ კიკნაველიძე. თუ რომელი პარტიის მხარდამჭერი იყო ალექსანდრე მახათაძე, ვერ გეტყვით, „ოცნების“ აქტიური მხარდამჭერი არ ყოფილა. იგი 1-ლი ოქტომბრის შემდეგ დაინიშნა, თუმცა წლების წინ, 2010 წლის 31 დეკემბერს ნაციონალების მიერ იყო გათავისუფლებული გამგებლის მოვალეობიდან და მოგვიანებით, 1-ლი ოქტომბრის შემდეგ ისევ დაინიშნა პოსტზე. მისი წინამორბედი, ვალერი თელია ჟურნალისტებზე ძალადობისთვის გათავისუფლდა. ამ დროს ავტომატურად კომისრის მოვალეობას ასრულებდა ზაზა დავლაძე, ის იყო ერთ-ერთი თანამშრომელი, რომელსაც ახალი კადრის დანიშვნამდე ევალებოდა მოვალეობის შესრულება. თუმცა რატომღაც ზაზა დავლაძეს გაუჩნდა ილუზია, რომ პოსტზე დარჩებოდა.
ძალიან შეურაცხმყოფელია, როცა ამდენი ხმაური მიმდინარეობს, რომ თურმე ბატონი გოგი ქავთარაძე ნიშნავს კადრებს, რადგან ყველამ კარგად იცის, რომ გოგი ქავთარაძე ვერც დანიშნავს და ვერც გაათავისუფლებს კადრებს. ამ თემაში ბატონი გოგი საერთოდ არ ერევა და არც იცის, ვინ ვინ არის. ავთანდილ კიკნაველიძე არავის კადრი არ არის და წლებია, ის კომისრად მუშაობს. ისიც ნაციონალების დროს გათავისუფლდა კომისრობიდან, მაგრამ 1-ლი ოქტომბრის შემდეგ ისევ დაინიშნა, მაგრამ ვერ გეტყვით, რომ მისი კანდიდატურა ვიღაცამ წამოსწია. ის წლების მანძილზე იყო კომისარი. როგორც ზესტაფონელი, გეტყვით, რომ ბატონი გოგი ქავთარაძე ბევრს ვერც ცნობს და არ ერევა საკადრო ცვლილებებში, უბრალოდ, ბატონი გოგის ერთადერთი პრობლემა ის არის, რომ სხვა დეპუტატებისგან განსხვავებით, ღიად უღებს ყველას კარს და ესაუბრება.
ამის შესახებ თავად რატომ არ ისურვა გამგებელმა ნუგზარ ქამუშაძემ საუბარი? გარკვეული შეკითხვები მქონდა მასთან.
- ამ შემთხვევაში, ამ კადრთან მიმართებით ბატონი ნუგზარი არაფერ შუაში არ არის და, როგორც ადმინისტრაციის სამსახურის უფროსს, მე დამავალა, საიტზე გამეთავსებინა ეს ინფორმაცია.
ძალიან ძნელია, თქვენ დაგისვათ კითხვები მაშინ, როცა გამგებელთან მაქვს შეკითხვა, მაგრამ მაინტერესებს, როცა ზაზა დავლაძე აცხადებს, რომ ახალ კომისართან მორალური შეუთავსებლობის გამო გადადგა პოსტიდან, ამაზე რას ფიქრობს ახალი გამგებელი და შეისწავლის თუ არა ამ სიტუაციას?
- როგორც ადმინისტრაციის სამსახურის უფროსმა, ზაზა დავლაძის განცხადება წავიკითხე, გთხოვთ გამათავისუფლოთ დაკავებული თანამდებობიდან შეუთავსებლობის გამოო და ეს გადავამოწმე. ბატონი ნუგზარი ამას რეზოლუციას ვერ დაადებდა, რადგან ამას განმარტება სჭირდება, თუ რას ნიშნავს შეუთავსებლობა?! აღმოჩნდა, რომ ზაზა დავლაძეს მასთან არც შეუტანია განცხადება.
მასთან არ შეუტანია, მაგრამ ასე რომ გახმიანდა ეს ამბავი, ხომ უნდა დაინტერესდეს, როგორც გამგებელი, რა შეუთავსებლობაზეა საუბარი?
- რომ გენახათ, დღეს გამგეობის მისაღებში რა ხდებოდა, 12 საათამდე ბატონი ნუგზარი ვერ წყვეტს მიღებას. მან ჩემგან მიიღო ინფორმაცია, რომ მსგავსი ტექსტი ეწერა ზაზა დავლაძეს. ზაზა ჩემი მეგობარი და ნაცნობია, ამიტომ ვფლობ ამ ინფორმაციას, თორემ ოფიციალურ დონეზე ეს განცხადება არ შემოსულა კანცელარიაში.
ისევ გეკითხებით, ამის შემდეგ ზესტაფონის გამგებელი თუ დაინტერესდება ამ განცხადებით? ეს პიროვნება და სხვა რეზერვისტებიც აცხადებენ, რომ ახლად დანიშნული კომისარი აგვისტოს ომიდან გაიქცა.
- დამიჯერეთ, ზაზა დავლაძე არაორდინარული ადამიანია; ჩვენ წავიკითხეთ მასალა და ძალიან კარგად იგრძნობა, რომ ის არის განაწყენებული ადამიანი, რომელმაც ვერ მიიღო თანამდებობა.
მაგრამ ომიდან გაქცევის ფაქტს რეზერვისტებიც ადასტურებენ.
- დიახ, მაგრამ ჩვენს მხარესაც ხომ აქვს უფლება, თავისი პოზიცია ჰქონდეს?
ამიტომ მინდოდა, გამგებელი უშუალოდ დამლაპარაკებოდა, თქვენი მეშვეობით კი ეს ძნელია.
- გამგებელი ვერ გეტყვით, საერთოდ არ ფლობს ინფორმაციას. მე ყოფილი ჟურნალისტი ვარ და კარგად ვიცი ეს ინფორმაცია; ისიც არ იცის ბატონმა ნუგზარმა, იყო თუ არა ავთო ომში და როგორ ექნებოდა ინფორმაცია, გამოიქცა თუ არა აგვისტოს ომიდან?! როგორ უნდა დავადასტურო ან უარვყო ეს ფაქტი?
მაგრამ გამგებელს ხომ ეკისრება მოვალეობა, შეამოწმოს, რამდენად სუფთა კადრი შეირჩევა? მას ბევრად მეტი საშუალება აქვს, გადაამოწმოს, ნამდვილად იმყოფებოდა თუ არა ომში კიკნაველიძე.
- როგორ მეუბნებით, როგორ შეიძლება ბატონმა ნუგზარმა შეამოწმოს, ომის დროს ვინ გამოიქცა?
როცა ასეთი ამბავია ამტყდარი, გამგებელს ევალება, კადრის სისუფთავე შეამოწმოს.
- ძალიან გთხოვთ, ეს არის სამოქალაქო სამსახური.
და არ უნდა ინტერესდებოდეს, ომში ნამდვილად იყო თუ არა?
- იმის გამო, რომ ვიღაც არ წავიდა ომში ან წამოვიდა ომიდან, სამსახურიდან ვერ გაათავისუფლებენ.
ეს მესმის, მაგრამ კაცი კომისრად არის დანიშნული და ხომ უნდა ინტერესდებოდეს გამგებელი?! ამიტომ თვითონ უნდა დამლაპარაკებოდა და არა - თქვენ.
- ზაზა დავლაძე და მისი ორი მეგობარი ამას ვერ მეტყვის.
ორ მეგობარზე არც არის საუბარი, სხვათა შორის, ბევრი რეზერვისტი საუბრობს ამის შესახებ და გამგებელსაც ეკისრება პასუხისმგებლობა დაადგინოს, მაგრამ თქვენ რატომ უნდა გესაუბროთ, როცა გამგებელმა უნდა გამცეს პასუხი?!
- გამგებელს არ ეკისრება ამის პასუხისმგებლობა, საჯარო სამსახურია, როგორ შეიძლება, გამგებელმა აგვისტოს ომის შესახებ კერძო გამოძიება დაიწყოს, თუ ვინ წამოვიდა?
ეს კერძო გამოძიება არ არის. კადრები შემოწმებული უნდა იყოს. იქნებ, ვინც აგყავთ თანამდებობაზე, დამნაშავეა?! იქნებ, სისხლის სამართლის საქმეა აღძრული მის მიმართ ზუსტად იმის გამო, რომ გამოიქცა ომიდან?
- ყველა საბუთი წესრიგშია. მე ვარ ადმინისტრაციის უფროსი და მე მაქვს ავთანდილ კიკნაველიძის პირადი საქმე.
მე მისგან მაინტერესდება, ამიერიდან დაინტერესდება თუ არა, რამდენად სუფთა წარსულის კადრები ინიშნებიან, რადგან ეს მოქმედებს ამომრჩეველზე, რიგით ზესტაფონელებზე.
- თქვენ რომ ზესტაფონელი იყოთ, გეცოდინებათ, ვინ არის ზაზა დავლაძე და ავთანდილ კიკნაველიძე.
ჩემთვის საკმარისია რამდენიმე ადამიანის პოზიცია.
- ზაზა არაორდინარული ადამიანია, მწვავე მასალას, ჟურნალისტს რომ სჭირდება, ისეთ მასალას აწვდის.
მე არანაირად არ მაინტერესებს მწვავე მასალა, უბრალოდ, როცა ხალხი ლაპარაკობს, უნდა გადავამოწმო.
- ზაზა ამით მანიპულირებს და ყურადღებას იქცევს. ჩემი ბავშვობის მეგობარია და ვიცი, როგორიც არის.
ისევ მაინტერესებს, თუ დაინტერესდება გამგებელი, როგორი კადრები ინიშნებიან? მოსახლეობის თვალში ეს შეიძლება გახდეს იმის საფუძველი, იფიქრონ, რომ „ქარულ ოცნებაშიც“ ნეპოტიზმი მძლავრობს.
- ოფიციალურ სამსახურში პირი არ ინიშნება პირადი საქმის სრულად შევსებამდე, მის პირად საქმეშია სრული ჩამონათვალი, რაც ადასტურებს, თუ ვინ არის პიროვნება, რამდენად სუფთა წარსული აქვს და რამდენად პროფესიონალია. ზესტაფონის მუნიციპალიტეტში სრულ წესრიგშია მისი პირადი საქმეები. პირად კონტროლზე მყავს აყვანილი.
ზაზა დავლაძე ხომ აფხაზეთის ომში ნაომარია და მრავალი ჭრილობა აქვს მიღებული?
- შინაგანი ჯარები არის სახელმწიფო სამსახური, სამოქალაქო სამსახური. ზაზა კი უცნაური ტიპია, მათ ჩათვალეს, რომ ზაზას წვევამდელებთან არ უნდა ჰქონოდა ურთიერთობა, გაცილებით დაღვინებული და მშვიდი ადამიანია ავთანდილ კიკნაველიძე. ის საქმის პროფესიონალია და ამ ფორმით შეარჩიეს.
მაგრამ მაინც იქამდე მივდივართ, უნდა გადამოწმდეს თუ არა ადამიანის ნამოქმედარი? რატომ უნდა გასწავლოთ, გამგებელს ევალება, მისთვის ადვილია გადასამოწმებლად, მართლა გამოიქცა თუ არა აგვისტოს ომიდან ეს პიროვნება. შესაძლებელია, ჩვენთვის ამის გაგება ძნელი იყოს, მაგრამ სახელმწიფო როცა გაკისრებს გამგებლის მოვალეობას, ეს უნდა გადამოწმდეს.
- დამიჯერეთ, ეს არის პირადი შუღლი ზაზა დავლაძესა და ავთანდილ კიკნაველიძეს შორის. იმ დრომდე ზაზა დავლაძეს უფროსად ჰყავდა ადამიანი, რომელიც ჯარშიც არ იყო ნამყოფი, კრიმინალი ვალერი თელია, რაზედაც მას პროტესტი არ ჰქონდა. მას პირადი ინტერესი აქვს ავთო კიკნაველიძეზე, ამიტომ ავთო არ უნდა. ის რომ უფროსად არ გინდა, ეს არ ნიშნავს, სამსახურშიც არ იარო.
თვითონ ის ფაქტი, რომ ავთანდილ კიკნაველიძე დეპუტატ შალვა (შაკო) კიკნაველიძის ბიძაა, რაიმეს არ ნიშნავს და არ არის ნეპოტიზმისკენ სწრაფვა?
- ეს აუცილებლად იქნებოდა, ის რომ პატარა ბიჭი იყოს, რომელიც ქუჩიდან აიყვანეს და უცებ კომისრად დანიშნეს. გეუბნებით, ის წლები იყო საკმაოდ წარმატებული კომისარი. ამიტომ აქ შაკოს ფაქტორი გამორიცხულია. შაკო დაბადებული არ იყო, ავთო კიკნაველიძე კომისარი რომ იყო. ის არ იყო ქუჩიდან აყვანილი ბიჭი.
მერე რა, შეიძლება, წლების მანძილზე კომისარი იყოს, მაგრამ ზესტაფონელები როცა ამბობენ, ქრთამს იღებდაო, ეს გასარკვევია.
- ქრთამის აღების დაბრალებას დამტკიცება სჭირდება. ვალერი თელია ქუჩიდან მოიყვანეს და კომისარი გახადეს, ავთო კიკნაველიძე კი წლები იყო კომისრად.
შეისწავლოს გამგებელმა, მართლა მოხდა თუ არა აგვისტოს ომიდან ამ პირის გამოქცევა, იქნებ, დამნაშავეა და არ შეიძლება ამ სისტემაში მისი ყოფნა?- რა შეიძლება, ჩავუთვალო ადამიანს დანაშაულად? ის, რომ ომიდან წამოვიდა?
ომიდან გამოქცევაა, წამოსვლა არ ხდება. მით უმეტეს, რომ იცოდეთ, მაშინ მას ხუთასი ადამიანი ებარა და მეთაური იყო.
- ამაზე პასუხი ვინ უნდა აგებინოს?
ყოველ შემთხვევაში, მისი საქმე გამგებელმა უნდა შეისწავლოს? რაიონის გამგებელს ევალება, თუ კადრის მიმართ შეკითხვები არსებობს, სასამართლომდეც, უფრო სწორად, სასამართლოს არარსებობამდეც, შეისწავლოს ეს საკითხი. მით უმეტეს, ამ სასამართლოს პირობებში აღარ გვინდა ამ თემაზე საუბარი გავაგრძელოთ.
- ეს სწორად მითხარით, შესაბამისმა ორგანოებმა უნდა შეისწავლოს, თუკი ეს დანაშაულია, მაგრამ ეს არ არის რაიონის გამგებლის პრეროგატივა. დამიჯერეთ, უამრავ პროექტზე მუშაობენ, შეხვედრები და თათბირებია, და გამგებელს ფიზიკურად ვერ ნახავთ. როგორ წარმოდგიდგენიათ, ბატონმა ნუგზარმა მიმართოს სამართალდამცავებს, გამოიკვლიონ, ავთო კიკნაველიძე იყო თუ არა აგვისტოს ომში? მე ვეცდები, ხვალ ავთოს კომენტარიც მქონდეს ამ თემაზე.
P.S. ჩვენ კვლავ დავუკავშირდით ზაზა დავლაძს, რომელმაც დაადასტურა, რომ განცხადება თანამდებობის დატოვების შესახებ დაწერილი აქვს (სარეგისტრაციო ნომრით - 697) და იგი ნანახი აქვთ, როგორც გამგებელს, ასევე მისი ადმინისტრაციის უფროსს, ეკატერინე დუგლაძეს. „რაც შეეხება ეკატერინე დუგლაძის განცხადებას, თიოთქოსდა ჩვენ მეგობრები ვიყოთ, მინდა გითხრათ, ასეთები ჩემს სამეგობროში არც ყოფილან და ვერც იქნებიან“ - გვითხრა ზაზა დავლაძემ.
