თბილისის მერიამ აღარ იცის სატრანსპორტო კოლაფსს თავი როგორ დააღწიოს. მთელი წლის განმავლობაში ყვითელი ავტობუსების რაოდენობას წარმატებით ამცირებდა, ახლა აღმოჩნდა, რომ ხაზებზე საკმარისი რაოდენობის მანქანები არ მოძრაობს და ამიტომ გაზრდა იგეგმება. მუნიციპალური ტრანსპორტი მერიის მოურჩენელ პრობლემად გადაექცა. 

თბილისის საკრებულოს საფინანსო-საბიუჯეტო კომისიის თავმჯდომარის თამაზ შოშიაშვილის თქმით, დედაქალაქში გარკვეულ სამარშრუტო ხაზებს ავტობუსები დაემატება. მისი თქმით, ავტობუსების სამარშრუტო ხაზების რაოდენობის შემცირებამ, პირველ ხანებში, მოსახლეობაში გარკვეული გაუგებრობა გამოიწვია. ამიტომაც, მერია აღნიშნულ თემაზე მუშაობს, მუდმივად ხდება პროცესის შესწავლა. “იგეგმება ავტობუსების დამატება იქ, სადაც საკმარისი არ არის. ეს პროცესი მომავალშიც გაგრძელდება”, - აღნიშნა შოშიაშვილმა.  

საკრებულოს საფინანსო-საბიუჯეტო კომისიის თავმჯდომარის თქმით, დღისთვის დედაქალაქში 92 ხაზია, სადაც 477 ავტობუსი მოძრაობს. გარდა ამისა, მოსახლეობისათვის გადაადგილება უფრო კომფორტული რომ გახდეს, მერიამ სამარშრუტო ტაქსებზე ტენდერი გამოაცხადა და 300 მიკროავტობუსის დამატება იგეგმება. შოშიაშვილის განცხადებით, დღეისთვის თბილისში სულ 2200-მდე მიკროავტობუსი მოძრაობს. 

საკრებულოს ოპოზიციური ფრაქცია ტენდერის შედეგების დალოდებას არ აპირებს და თბილისში თითოეულ ხაზზე, სულ მცირე, ერთი ავტობუსის დამატებას ითხოვს. როგორც დეპუტატმა ზაზა გაბუნიამ განაცხადა, ამ სფეროში განხორციელებულმა ცვლილებებმა დედაქალაქში სატრანსპორტო კოლაფსი გამოიწვია. შექმნიული მდგომარეობის გამოსასწორებლად ხელისუფლებამ თითოეულ ხაზზე ერთი ავტობუსი მაინც უნდა დაამატოს და გადაადგილების გრაფიკი შეიცვალოს. 

დედაქალაქში ყვითელი ავტობუსების რაოდენობა განახევრებულია. 2010 წლის აპრილის შემდეგ თბილისში 50%-ით ნაკლები ყვითელი ტრანსპორტი მოძრაობს. ეს გასაკვირი არც არის. ცხადია, რომ პროექტი წამგებიანია. სწორედ ამიტომ გაიზარდა მგზავრობის ღირებულება, თუმცა დღემდე გადაუჭრელია  "ურჩი გადამხდელების"  პრობლემა, რასაც სალარო აპარატებში დაგროვილი თანხის მწირი მოცულობაც მოწმობს. 

წლის მდასაწყისში თბილისის ავტოპარკში სულ 906 ერთეული ავტობუსი ირიცხებოდა და გადაადგილდებოდა. რომელთა შესაძენად დედაქალაქის მუნიციპალიტეტმა 64 136 352 მილიონი ლარი დახარჯა.  დღეს, როგორც ირკვევა, მათი რაოდენობა მხოლოდ 477 ერტეულს შეადგენს. 

თბილისის სატრანსპორტო სისტემაში ცვლილებები რომ უნდა მომხდარიყო და თანაც რადიკალური, საკამათო არ არის. მიუხედავად იმისა, რომ ამ სიახლიდან თითქმის 5 წელი გავიდა, ცხადი ხდება, რომ პროექტმა არ გაამართლა.

ის, რომ ყვითელი ავტობუსების მუშაობა წამგებიანია, მძღოლებიც ადასტურებენ და კონტროლიორებიც. მათი თქმით, მგზავრების გარკვეული ნაწილი, ჯარიმის მიუხედავად, ყოველდღიურად უბილეთოდ მგზავრობს. 

თითქოსდა მგზავრობის საფასურის გაზრდა იმით იყო გამოწვეული, რომ სატრანსპორტო ინფრასტრუქტურა უნდა მოწესრიგებულიყო, მგზავრთა გადაადგილება უფრო კომფორტული და უსაფრთხო გამხდარიყო. სინამდვილეში კი თბილისის ქუჩებში ისევ ის ამორტიზებული და გაუმართავი ავტობუსები მოძრაობს, რაც გაძვირებამდე იყო. მგზავრებს საფასურის გაზრდის შედეგად მხოლოდ პრობლემები შეექმნათ. ყვითელი ავტობუსებით მგზავრობა უფრო გაუსაძლისი გახდა. 

თუ რა თანხა ამოდის ყოველდღიურად სალარო აპარატებიდან და სად მიიმართება იგი არ ხმაურდება. “თბილისის ავტობუსში” განმარტავენ, რომ “თბილისის ავტობუსი” შეზღუდული პაუხისმგებლობის საზოგადოებას წარმოადგენს, აღნიშნული ინფორმაცია საჯარო არაა”. 

2009 წელს შპს “თბილისის ავტობუსის” მიერ მგზავრობის საფასურის ამოღება-ინკასაციის შესყიდვის შესახებ გამოცხადებულ ტენდერში “საქართველოს ბანკმა” გაიმარჯვა და ჩეხეთიდან 7 მლნ ლარის ღირებულების სალარო აპარატები ჩამოიტანა. მგზავრობის საფასურის ამოღება-ინკასაციის ახალი სისტემა კი 2009 1-ლი თებერვლიდან ამოქმედდა. ამ სისტემით მგზავრობის საფასურის გადახდა როგორც ნაღდი ანგარიშსწორებით - ხურდა ფულით, ასევე უკონტაქტო პლასტიკური ბარათითაა შესაძლებელი. უბილეთო მგზავრები 5 ლარით ჯარიმდებიან.