ანალიტიკოსი, დავით ზარდიაშვილი ვარაუდობს, რომ ადგილობრივ თვითმმართველობის არჩევნებზე კონკურენცია იქნება თვითონ ოპოზიციურ ფლანგზე, ერთმანეთს შორის. მისი თქმით, „ნაციონალური მოძრაობა“ მაინც ყველაზე მეტ ხმას მიიღებს, მაგრამ უკვე არ ექნება დიდი მხარდაჭერა. ანალიტიკოსი ფიქრობს, რომ ამომრჩეველთა 10%–ს მიიღებს გიორგი გახარია, დაახლოებით ამ ფარგლებში იქნება ლევან ვასაძის პარტიაც. ის, რომ მთავარი ოპოზიციური პარტია არის „ნაციონალური მოძრაობა“, ზარდიაშვილის შეფასებით სწორედ ეს იქნება თვითმმართველობის არჩევნებზე კონკურენციის საგანი.

for.ge დავით ზარდიაშვილს ესაუბრა.

პოლიტიკურ ველზე შემოვიდა ბიზნესმენი ლევან ვასაძე, შემოდის გიორგი გახარია, აბსოლუტურად განსხვავებული პოლიტიკური გემოვნება აქვთ, მაგრამ რამდენად კონკურენტული იქნებიან მმართველი ძალისთვის მათი გუნდები და, ამავე დროს, რამდენად წამგებიანია ოპოზიციისთვის მათი პოლიტიკაში შემოსვლა?

დავით ზარდიაშვილი: როგორი იქნება ძალთა გადანაწილება და რა შედეგი იქნება, ამას არჩევნები გვიჩვენებს. ამის შემდეგ ზუსტად შეგვიძლია ვთქვათ, რა და როგორ შეიცვალა ქართულ პოლიტიკურ ლანდშაფტში. ის, რომ პოლიტიკური ლანდშაფტი იცვლება, ეს თავისთავად ცხადია, რადგან ორი მნიშვნელოვანი ძალა შემოდის პოლიტიკურ ველზე. რიგითი პარტიები არ არიან და არც ისეთი წვრილი კლიენტელები, რომლებიც ვნახეთ ბოლო საპარლამენტო არჩევნებზე. 60–მდე პარტია მონაწილეობდა არჩევნებზე, 9 პარტია მოხვდა პარლამენტში, მაგრამ ძირითადი მხარდაჭერა „ქართულ ოცნებას“ და „ნაციონალურ მოძრაობას“ ჰქონდა. ლანდშაფტი, რომ იცვლება, ეს ცხადია. გახარიას მხარდამჭერთა რაოდენობა დიდია და ეს იგრძნობა. მას გარკვეული რესურსი გააჩნია, რომ წარმატებას მიაღწიოს.

გახარიას წარმატება რაზეა დამოკიდებული? არ ჩქარობს პოლიტიკური განცხადების გაკეთებას, თითქოს რაღაცის მოლოდინშია...

– ეს დამოკიდებულია იმაზე, როგორ მოახერხებს ორგანიზებას. მას გარკვეული ბეგრაუნდი აქვს პოლიტიკაში. იყო ერთ–ერთი ყველაზე წარმატებული პრემიერ–მინისტრი. ამიტომ ცხადია, რომ პოლიტიკური ქულები წინასწარ აქვს მოპოვებული. მაგრამ პარტიის შექმნა მარტო პოპულარულობაზე არ არის დამოკიდებული. გარდა ავტორიტეტისა, აუცილებელი არის მთელი რიგი სხვა რესურსი.

ვასაძის წარმატება რაზეა დამოკიდებული, როგორ ფიქრობთ, აქვს რესურსი?

– ვასაძეს აქვს გარკვეული რესურსი. „პატრიოტთა ალიანსზე“ უკეთესი რესურსი აქვს. ის უფრო ორგანიზებულია, გააჩნია გარკვეული მიდრეკილება ლიდერობისადმი, ეს არაერთგზის გამოამჟღავნა. თუმცა ვასაძის პოლიტიკური მიმართულება უფრო მეტად არის პრორუსული, ვიდრე „პატრიოტთა ალიანსის“ შემთხვევაში. ის თვალსაჩინოდ პრორუსულია.

მანამდეც კარგად იყო ცნობილი, რომ ვასაძე არის რუსი დუგინის პირდაპირი ქართული ვერსია, რომელიც ევრაზიული კავშირის კონცეფციას განასახიერებს პოლიტიკაში. ის მომხრე არის ევრაზიული იმპერიის. ვასაძეს უნდა, რომ ამ დისკურსში შეიტანოს თავისი ხაზი, რომ დიახ, ევრაზიულ კავშირში არის ჩვენი ხაზი, სადაც საქართველოს ექნება თავისი უპირატესობა და ლიდერის პოზიცია.

„ქართულ ოცნებას“ და ოპოზიციას ხმა არ მისცა 500 ათასმა ამომრჩეველმა, გახარიაც და ვასაძეც ემზადებიან თვითმმართველობის არჩევნებისთვის. როგორ ფიქრობთ, რომელი გუნდი მიიღებს 500 ათასი ამომრჩევლის მხარდაჭერას?

– ეს არის შედარებით პასიური ამომრჩეველი, ვერ ვიტყვით, რომ ისინი სხვანაირად ფიქრობენ, ვიდრე დანარჩენი საქართველო. უბრალოდ, შედარებით დაბალაქტიურები არიან. რასაკვირველია, ყველა პარტია შეეცდება, რომ ამომრჩევლის მაქსიმალურ მობილიზაციას მიაღწიოს, მაგრამ ის, რომ ეს 500 ათასი ამომრჩეველი თითქოს სხვა განწყობების არის და შეცვლის ძალთა ბალანსს, არ მგონია სერიოზული საფუძველი ჰქონდეს ამ მოსაზრებას.

განსაკუთრებულ ცვლილებებს არ ველოდები ადგილობრივ არჩევნებზე, იმიტომ, რომ ორივე ახალი პარტია არის. გარდა პოპულარულობისა და ავტორიტეტისა, აქ მნიშვნელოვანია იდეების ავტორიტეტი. ჯერჯერობით ჩანს, რომ „ქართულ ოცნებას“ სერიოზული კონკურენტი ამ არჩევნებზე არ ეყოლება. რასაკვირველია, გარკვეულ წარმატებას მიაღწევს გახარიას პარტიაც, შესაძლებელია - ვასაძეც. დარწმუნებული ვარ, რომ ვასაძეს მეტი მხარდამჭერი ეყოლება, ვიდრე „პარტიოტთა ალიანსს“, რომელიც თითქოს გაქრა პოლიტიკური სივრციდან. ამიტომ ვამბობ, რომ პოლიტიკური ლანდშაფტი სერიოზულად იცვლება. ცხადია, გახარიასაც ექნება სერიოზული წარმატება. საბოლოო ჯამში, გახარია–ვასაძეს პოლიტიკურ ველზე შემოსვლა არ აწყობს გაერთიანებულ ოპოზიციას.

გაერთიანებული ოპოზიციის კონკურენტად შეიძლება განვიხილოთ გახარიას და ვასაძის პარტია?

– რასაკვირველია. ვფიქრობ, რომ გახარია ნაწილობრივ წაიღებს „ქართული ოცნების“ ხმებს, მაგრამ დიდწილად წაიღებს წვრილ–წვრილი პარტიების ხმებს. ანუ, ალტერნატივის მაძიებელი ამომრჩევლის ხმებს წაიღებს, რომლებიც ელოდებიან „ქართული ოცნების“ ალტერნატივას. ეს, რა თქმა უნდა, არ უნდა აწყობდეს „ნაციონალურ მოძრაობას“, რადგან უარეს შედეგს აჩვენებენ, ვიდრე ეს იყო ბოლო არჩევნების დროს.

ვიცით ვინ არის „ქართული ოცნების“ ამომრჩეველი, მათ შორის „ნაციონალური მოძრაობის“, მაგრამ რა კეტეგორიის ამომრჩეველი ეყოლება გახარიას და იგივე ვასაძეს, რომელმაც რეგიონებში შეხვედრები დაიწყო? იმყოფებოდა ზუგდიდში, სადაც შეხვდა ბიზნესმენ კლიმენტი კეკუტიას და გაკეთდა შეფასება, რომ ვასაძე არის რუსული პროექტი და ამას ადასტურებს კეკუტიასთან შეხვედრა. შიძლება დავასკვნათ, რომ ვასაძის ამომრჩეველი არის პრორუსული განწყობის ამომრჩეველი?

– კარგად ვიცნობ კეკუტიას და შემიძლია გითხრათ, რომ არ არის პრორუსი განწყობის ადამიანი. პირიქით, ძალიან პატრიოტია და პროქართული აზროვნებით გამოირჩევა. თუმცა, რასაკვირველია, ეს არის კონსერვატულად განწყობილი ამომრჩეველი და ვინაიდან საქართველოში კონსერვატული მიმართულება ავტონომიური არ არის, აუცილებლად არის დაკავშირებული რუსული ყაიდის პოლიტიკურ იდეოლოგიასთან, სამწუხაროდ, ასეა. ვასაძის იდეოლოგიური საფუძველი რეალურად არის დუგინიზმი. დუგინი უპირისპირდება იმ პოლიტიკურ იდეოლოგიას, რასაც ლიბერალიზმი ჰქვია და ლიბერალიზმის ალტერნატივად მიიჩნევს ევრაზიულ იმპერიას, რომელიც რუსული მესიანიზმის იდეაზე დგას. ანუ, რუსეთმა უნდა იხსნას მსოფლიო ლიბერალიზმის ჭირისგან. დაახლოებით ასეთია ვასაძის იდეოლოგია.

ეს იმის გამო არ ხდება, რომ ვასაძე არის პრორუსი და კრემლის პროექტია, მას იდეოლოგიურად ასეთი მიმართება აქვს, ლიბერალიზმის წინააღმდეგი არის. შესაბამისად, ვასაძეს ამომრჩეველი იქნება კონსერვატულად განწყობილი ამომრჩეველი, დაახლოებით იმ კატეგორიის ამომრჩეველი, რომელიც ნამახვანის მშენებლობას აპროტესტებს - გოლეთიანი და მის გარშემო შეკრებილი პუბლიკა. ასევე, ამას ემატება „პატრიოტთა ალიანსის“ ამომრჩეველი. ვფიქრობ, რომ ვასაძეს ექნება დაახლოებოთ 10%–მდე მხარდამჭერა, დაახლოებით იგივე ექნება გახარიას.

ანუ, თქვენ ფიქრობთ, რომ „ქართული ოცნება“ არის უკონკურენტო?

– ჯერჯერობით ასეა. ყველაზე მეტი რესურსი აქვს და ყველაზე მეტად ორგანიზებული პოლიტიკური ძალა არის. განვითარდა, სახე შეიძინა, საქმის ინტერესებიდან გამომდინარე რაციონალურად მოქმედებს. პარტიული სტრუქტურები არ არის დამოკიდებული მხოლოდ პირად ურთიერთობებზე. პარტია მოქმედებს საერთო საქმის ინტერესებიდან გამომდინარე, რაციონალურად და მიზანმიმართულად.

პირადი ურთიერთობით ყალიბდება იგივე „ნაციონალური მოძრაობა“, რომელიც თავიდან ბოლომდე სააკაშვილის ხუშტურებზეა დამოკიდებული. ეს პარტია მუშაობს მისი ლიდერის გამარჯვებაზე, იმის იმედად, რომ მერე სააკაშვილისგან რაღაცა სარგებელს მიიღებს. აქ საქმის ინტერესი, რაციონალურობა და მიზანმიმართული პოლიტიკური გეზი არ ჩანს. ეს არის განსხვავება. ჯერჯერობით „ქართული ოცნებას“ არ ჰყავს ისეთი კონკურენტი, რომელიც ხელისუფლებას შეეცილება, თუმცა ეს კარგი არ არის. აუცილებელია, ღირსეული პოლიტიკური კონკურენტი, რომ განვვითარდეთ და წინ წავიდეთ.

როგორ ფიქრობთ, რამდენად კონკურენტული იქნება თვითმმართველობის არჩევნები?

– მმართველი პარტიას როლს ვერ შეეცილებიან და ამაში აბსოლუტურად დარწმუნებული ვარ, იმდენად დიდი უპირატესობა აქვთ ყველანაირი რესურსით თვალსაზრისით. კონკურენცია იქნება თვითონ ოპოზიციურ ფლანგზე ერთმანეთს შორის და აქ უკვე სააკაშვილს გამოუჩნდნენ კონკურენტები, მათალია, „ნაციონალური მოძრაობა“ მაინც ყველაზე მეტს აიღებს, მაგრამ უკვე არ ექნება დიდი მხარდაჭერა. გახარია სადღაც 10%–მდე მხარდაჭერას მიიღებს და დაახლოებით ამ ფარგლებში იქნება ვასაძის პარტია. სწორედ ის ფაქტორი, რომ მთავარი ოპოზიციური პარტია არის „ნაციონალური მოძრაობა“, თვითმმართველობის არჩევნებზე ეს იქნება კონკურენციის საგანი. ამ თვალსაზრისით თვითმმართველობის არჩევნები კონკურენტული იქნება, ამ ეტაპზე ასე ჩანს.