„ქართული ოცნება“ საჯაროდ აწერს ხელს ევროკავშირისა და ევროპული საბჭოს პრეზიდენტის შარლ მიშელის ეგიდით შექმნილ დოკუმენტს, რომელიც მიშელის სპეციალურმა წარმომადგენელმა საქართველოში კრისტიან დენიელსონმა წარადგინა. ამ დოკუმენტში ევროკავშირმა არ შეიტანა ე.წ. პოლიტპატიმრების საკითხი, ასევე რიგგარეშე არჩევნების საკითხი, რაც საპარლამენტო არჩევნებისა და პარლამენტის ლეგიტიმურობის კიდევ ერთი მკაფიო დადასტურებაა. პოზიციას არ ცვლის რადიკალური ოპოზიცია და მიაჩნიათ, რომ მმართველმა გუნდმა გადაწყვეტილება საერთაშორისო ძალების ზეწოლის შედეგად მიიღო.

for.ge ანალიტიკოსს დავით ზარდიაშვილს ესაუბრა.

„ქართული ოცნება“ იღებს გადაწყვეტილებას და ხელს აწერს კრისტიან დენიელსონის მიერ წარმოდგენილი დოკუმენტს, როგორ ფიქრობთ, რატომ მიიღო მმართველმა გუნდმა ეს გადაწყვეტილება დღეს, როცა აშშ–ში შეხვედრებს მართავს პარტია „ქართული ოცნების“ თავმჯდომარე?

დავით ზარდიაშვილი: ქვეყანას სჭირდება ეს გადაწყვეტილება. ამ დოკუმენტთან დაკავშირებით „ქართულ ოცნებას“ ჰქონდა გარკვეული შენიშვნები, მაგრამ იქვე განაცხადა, რომ პრინციპულად თანახმაა, რომ ამ დოკუმენტს ხელი მოაწეროს. რადგან ოპოზიციამ უარი თქვა, მაშინ, იქვე, შეხვედრაზე იყო მიღებული გადაწყვეტილება, რომ „ოცნებაც“ არ მოაწერდა ხელს.

ახლა, ირკალი კობახიძის ვაშინგტონში ვიზიტის დროს ხაზგასმით აღინიშნა, რომ „ოცნება“ მოწოდებულია შედგეს შეთანხმება. სწორედ ამის დემონსტრირებაა ის, რომ მიუხედავად შენიშვნებისა, მზად არის კომპრომისზე წავიდეს და იმ სახით, რა სახითაც იყო შემოთავაზებული ეს დოკუმენტი, ხელი მოაწეროს. ეს არის კიდევ ერთი მზაობა, დემონსტრირება იმისა, რომ „ოცნებას“ აქვს კონსტრუქციული პოზიცია.

მმართველი გუნდის მიერ დოკუმენტზე ხელმოწერა არის პოლიტიკური პოლარიზაციისაკენ გადადგმული ნაბიჯი?

– ცხადია. ხელისუფლებამ ამოწურა კომპრომისის ყველანაირი რესურსი. რისი დათმობა შეეძლო, ბოლომდე დათმო. მთავარი რაც არის – იღებს ამნისტიციის კანონს და 2019 წლის ძალიან მძიმე დანაშაულში ბრალდებულები და მსჯავრდებულები, არა მარტო მელია, არამედ ყველა მონაწილე განთავისუფლდება პასუხისმგებლობისგან. ამაზეც კი წავიდა ხელისუფლება, ეს მაშინ, როდესაც პარლამენტზე შეტევა არის მძიმე დანაშაული.

როგორც თალაკვაძემ განაცხადა, ეს არაა, მთლად მართლზომიერი და სამართლათან თანმხვედრი გადაწყვეტილება, მაგრამ პოლიტიკური კომპრომისია. თუ „ქართული ოცნება“ ადგილობრივ არჩევნებში ჯამურად 40%–ზე ნაკლებს აიღებს, მაშინ მზად არის განიხილოს რიგგარეშე არჩევნების დანიშვნის საკითხი. ამაზე მეტი კომპრომისი ყოვლად წარმოუდგენელია. რჩება ერთადერთი – ეს ხელისუფლება წავიდეს და მოვიდნენ ეს ექსტრემისტული ძალები. რასაც „ოცნებას“ არ აპატიებს ქართველი ამომრჩეველი რადგან, რეალურად, ეს ნიშნავს სახელმწიფოებრიობაზე უარის თქმას.

ხელისუფლების გადაწყვეტილებას თანმხვედრი ნაბიჯი არ მოჰყვა ოპოზიციის მხრიდან და იგი ისევ დესტრუქციაზე საუბრობს. რეალურად მივდივართ იმ დასკვნამდე, რაზეც საუბრობენ საერთაშორისო ორგანიზაციები, რომ რასაც ოპოზიცია აკეთებს, ეს აწყობს რუსეთს...

– რუსული თამაში იქით იყოს, ეს არის ყველანაირი ცივილური პოლიტიკიდან ამოვარდინილი უგუნურობა. ეს საკუთარი ქვეყნის წინააღმდეგ მიმართული საბოტაჟია - შენ საბოტაჟს უწყობს ქვეყნას, რადგან  პარლამენტს არ აძლევ სრულფასოვნად შეკრების საშუალებას, რომ თავისი ფუნქცია განახორციელოს. ოპოზიციის ხელშია მნიშვნელოვანი ფუნქცია – სამთავრობო კონტროლი. ამის შესაძლებლობა როცა არ იქმნება, ეს ნიშნავს, რომ საკუთარი ქვეყნის წინააღმდეგ საბოტაჟს აწყობ და არ აძლევ უფლებას, რომ სრულფასოვანი დემოკრატია და გამართული პოლიტიკური სისტემა ჰქონდეს.

მიზანი რა არის? – ხელისუფლების შეცვლა არაკონსტიტუციური გზით. რიგგარეშე არჩევნების უკან რეალურად რა დგას, ეს ხომ ყველამ ვიცით, ეს არის ხელისუფლების გადადგომის მოთხოვნა. ხელისუფლება უნდა წავიდეს და თავად უნდა მოვიდნენ, ამას არც მალავენ. ეს არის ბრძოლა წესების გარეშე. მათ იმედი აქვთ და ამბობენ, რომ 15 მაისს ასი ათას ადამიანს გამოიყვანენ ქუჩაში.

ერთია რას ამბობს ოპოზიცია და მეორეა IRI–ის კვლევა, რომელიც 2–26 თებერვლის პერიოდში ჩატარდა, საკმაოდ დაბალია უშუალოდ „ნაციონალური მოძრაობის“ რეიტინგი...

– გზა არ აქვთ. ყველა გზა მოიჭრეს, როგორც კი უარი თქვეს პოლიტიკაში ლეგალური გზით მონაწილეობაზე. დაკავებული არიან საბოტაჟით, ცდილობენ, რომ არაკონსტიტუციური გზით მიაღწიონ ხელისუფლების მოპოვებას, მიუხედავად იმისა, რომ წარუმატებელია მათი ყველა ნაბიჯი, მაინც ჯიუტად ამ გზას ადგანან და იმედი აქვთ, რომ სიჯიუტით მიაღწევენ საწადელს.

ამიტომ პარლამენტმა საბოლოო ჯამში უნდა იმსჯელოს იმაზე, რომ დააკმაყოფილოს ამ ექსტრემისტების განცხადება, თავად თქვეს უარი მანდადეტებზე. მათ მაგივრად მოვლენ სხვა ძალები, პარლამენტის შევსება უნდა მოხდეს სხვა მექანიზმით და ამის თაობაზე ქართველ პოლიტვერანებს პარლამენტში შეტანილი გვაქვს ინიციატივა.

საქართველოში რომ ჩამოყალიბებული პოლიტიკური და მმართველობითი სისტემა იყოს, ამ ოპოზიციის ადგილი აღარ იქნებოდა ამ სივრცეში. ქართულ პოლიტიკურ სივრცეში ექსტრემიზმის ადგილი არ არის, ისევე როგორც არც ერთი ცივილურ ქვეყანის პოლიტიკურ სივრცეში. ექსტრემისტებს არ ელაპარაკებიან, ისევე როგორც ტერორისტებს.

სამწუხაროდ, ამომრჩეველთა რაღაცა ჯგუფმა ასეთ ექსტრემისტულ ძალებს მისცა ხმა და მიანიჭა მანდატი. ამომრჩევლის ნება უზენაესია, მაგრამ ეს მანდატმიღებულები საბოტაჟს უწყობენ სახელმწიფოს და პარლამენტს, მიღებული მანდატები უკან გადმოყარეს და ამიტომ მიღებული უნდა იქნას გადაწყვეტილება. მანდატები თავიდან უნდა გადავანიწილოთ, ამას ითხოვს ცივილური სახელმწიფოს ლოგიკა.