„დენიელსონის დოკუმენტში არავითარი მინიშნება ვადამდელ არჩევნებზე არ ყოფილა. რაც შეეხება ე.წ. პოლიტპატიმრების თემას, იქ იყო მინიშნება იმაზე, რომ უნდა ეპოვათ კომპრომისული გადაწყვეტილება“, - ასე აფასებს For.ge-სთან ანალიტიკოსი ზაალ ანჯაფარიძე „ქართული ოცნების“ გადაწყვეტილებას, რომ ხელისუფლება ევროპული საბჭოს პრეზიდენტის, შარლ მიშელის სპეციალური წარმომადგენლის, კრისტიან დენიელსონის დოკუმენტს ხელს მოაწერს.

For.ge გთავაზობთ ინტერვიუს ზაალ ანჯაფარიძესთან.

ზაალ ანჯაფარიძე: ვთვლი, რომ მას შემდეგ, რაც ირაკლი კობახიძე აშშ-ში ჩავიდა, „ქართულმა ოცნებამ“ იქ მიიღო გარკვეული მინიშნებები და გზავნილები, რაც თავადაც აღიარა - აშშ ელოდებოდა, რომ ხელისუფლება კომპრომისულ ნაბიჯებს გადადგამდა. ასევე ევროპელი პარლამენტარებისგან წამოვიდა მინიშნება, რომ მართალია, ორივე მხარეს ეკისრება პასუხისმგებლობა შექმნილ კრიზისზე, მაგრამ მეტი პასუხისმგებლობა ხელისუფლებაზეა.

ეს აქცენტები იქნა გათვალისწინებული და ამით „ქართულმა ოცნებამ“ წინმსწრები ნაბიჯი გადადგა, დაასწრო ოპოზიციას და ხელი მოაწერა ამ დოკუმენტს, მიუხედავად გარკვეული შენიშვნებისა. დოკუმენტზე ხელმოწერით სიგნალი გაუგზავნა დასავლელ პარტნიორებს, რომ „ქართული ოცნება“ მიდის იმ კომპრომისზე, რაც ევროპელმა მედიატორმა ჩამოიტანა.

კობახიძის განცხადებებში ჩანდა, რომ სენატორებთან შეხვედრის შემდეგ დასავლეთი „ქართული ოცნებისგან“ ითხოვდა პირველი შემხვედრი ნაბიჯის გადადგმას და ხელისუფლებამ ეს ნაბიჯი გადადგა. ახლა ვნახოთ, რითი უპასუხებს ამას ოპოზიცია.

როგორ ფიქრობთ, მოსალოდნელია, რომ ყველამ თუ არა, ოპოზიციის ნაწილმა ხელი მოაწეროს დოკუმენტს?

- არ მგონია, რომ „ნაცმოძრაობა“, „ევროპული საქართველო“ ან „სტრატეგია აღმაშენებელი“ ამ დოკუმენტს ხელს მოაწერს. სამწუხაროდ, „ქართული ოცნების“ ცალმხრივი ხელმოწერა შესაძლოა დარჩეს ასე.

თქვენი აზრით, „ოცნება“ შესაძლოა წამოვიდეს დათმობაზე და გიორგი რურუა და ნიკა მელია რაიმე სამართლებრივი ბერკეტით გათავისუფლდნენ?

- რთულია ამის წინასწარ პროგნოზირება. აქ მთავარი რურუას და მელიას საკითხი რომ არ არის, მგონი გვესმის. მელია და რურუა იქნებიან ციხეში თუ გარეთ, პრინციპული მნიშნელობა აღარ აქვს. მთავარი არის ის, რომ ვადამდელი არჩევნები არ ინიშნება, ეს არ დგას დღის წერსიგში და მივლენ იმ მოცემულობით, რაც დღეს გვაქვს.

თუ ოპოზოცია პარლამენტში არ შევა, მიუხედავად იმისა, რომ ხელისუფლება მელიას და რურუას გამოუშვებს იურიდიული მექანიზმების გამოყენებით, ამით ოპოზიცია უკანასკნელ მხარდაჭერასაც დაკარგავს, რომელიც გააჩნია ევროპასა და ამერიკაში.

ის განცხადებები, რაც ფართო აუდიტორიისთვის არ არის ცნობილი, უკვე ქმნის იმ განწყობებს, რაც დასავლეთშია ვადამდელ არჩევნებთან დაკავშირებით.

თუ ვადამდელი არჩევნები დაინიშნება, ეს ოპოზიციისთვის რას შეცვლის? ბევრი საუბრობს, რომ დღეს ოპოზიციური სპექტრის რეიტინგი უფრო მეტად დაეცა...

- დავუშვათ, ოპოზიციამ თქვა, რომ ჩვენ მივაღწიეთ გამარჯვებას და დავანიშნინეთ ხელისუფლებას ვადამდელ არჩევნები, ამ შემთხვევაში კი საზოგადოება გამოვიდა და უფრო მეტი მხარდაჭერა მისცა „ქართულ ოცნებას“, რომ არ დაუშვას ხელისუფლებაში „ნაციონალური მოძრაობის“ მობრუნება. რას იზამს ამ შემთხვევაში „ნაცმოძრაობა“, „ევროპული საქართელო“ და მათი სატელიტი პარტიები? კიდევ ერთხელ გამოაცხადებს, რომ არჩევნების შედეგებს არ ვენდობითო? - თუ თეორიულად დავუშვებთ, რომ ხელისუფლებამ კიდევ ერთხელ გადაწყვიტა კომპრომისზე წასვლა და დანიშნა ვადამდელი არჩევნები, არ მგონია, რომ ამ არჩევნებში ოპოზიციამ მოიპოვოს იმაზე მეტი შედეგი, ვიდრე მას 2020 წელის არჩევნების დროს ჰქონდა.

„გირჩის“ განცხადებაზე რას ფიქრობთ, რომელმაც თქვა, რომ პარლამენტში მივლენ, მაგრამ სხდომებს არ დაესწრებიან? მათი თქმით, პარლამენტი მათი მეორე ოფისი იქნება და მათ ორშაბათს უბრალოდ კაბინეტები უნდა ნახონ...

- „გირჩს,“ როგორც სერიოზულ პოლიტიკურ ორგანიზაციას არ აღვიქვამ. მან მისი ბიბლიური თავისუფლების ხარჯზე შეძლო გარკვეული ელექტორატის მობილიზება არჩევნებზე. ის, რასაც ისინი აკეთებენ, სერიოზულ ნაბიჯებად არ შეიძლება იქნას განხილული.

ხელისუფლებისთვის შეიძლება ეს ნიშნავს, რომ კიდევ ერთი პარტია შევიდა პარლამენტში, მაგრამ ის, რასაც „გირჩი“ აკეთებს, ეს არის თამაში ხელისუფლებასთან. ვნახოთ, ახლა ეს თამაში რით დამთავრდება. მგონია, რომ მაინც შევლენ პარლამენტში, რაღაც თავის დღის წესრიგს გააჟღერებენ და ამით დასრულდება მათი საპარლამენტო მოღვაწეობა.