ეკა ბესელია "ნაციონალურ მოძრაობას" საბოტაჟში ადანაშაულებს და მთავარ პროკურორსა და შს მინისტრს აღნიშნულ საქმეზე მასშტაბური რეაგირებისკენ მოუწოდებს.

მისი მტკიცებით, "ნაციონალურ მოძრაობაში" არსებობს რადიკალური ფრთა, რომელიც მიზანმიმართულად, კარგად გააზრებული გეგმით მოქმედებს და ახალი მთავრობის საქმიანობაში ხელის შეშლას ცდილობს. ამ რადიკალური ფრთის მიზანია, მათ ხელთ არსებული რესურსების გამოყენებით, ყოფილი ხელისუფლების ერთგული ანგაჟირებული საჯარო მოხელეების, სასამართლოს, თვითმმართველობის, კონტროლირებადი მედიის დახმარებით, მოახდინოს მთავრობის საქმიანობისთვის ხელის შეშლა, ხელოვნურად გამოიწვიოს ხალხის უკმაყოფილება და მოამზადოს ნიადაგი იმ ავტორიტარული საკონსტიტუციო მუხლის ამოქმედებისთვის, რომელიც გამოიწვევს დემოკრატიული არჩევნების შედეგების წართმევას და "ნაცმოძრაობის" მიერ უკანონოდ ხელისუფლების მიტაცებას.

ამასთან, ეკა ბესელია აცხადებს, რომ საბოტაჟი "ნაციონალური მოძრაობის" ერთიანი გეგმის ნაწილია და ამ საბოტაჟის მიზანია, აპრილში ამოქმედდეს კონსტიტუციის ის ნორმა, რაც გულისხმობს პრეზიდენტის უფლებას, დაითხოვოს ხალხის მიერ არჩეული მთავრობა.

"მიუხედავად იმისა, რომ ბოლო პერიოდში სამინისტროები ებრძვიან და ამარცხებენ კონკრეტული საბოტაჟის ფაქტებს მათ უწყებებში, მნიშვნელოვანია, რომ შსს-მ მოახდინოს მასშტაბური რეაგირება არა მხოლოდ განხორციელებულ საბოტაჟზე, არამედ წინასწარ აღკვეთოს ნებისმიერი იმ ტიპის მცდელობა, რომელიც ხელს უშლის სახელმწიფოს ნორმალურ ფუნქციონირებას და გამოიწვევს მოქალაქეთა მდგომარეობის დროებით გაუარესებას," - აცხადებს საპარლამენტო უმრავლესობის წევრი და ადამიანის უფლებათა კომიტეტის თავმჯდომარე ეკა ბესელია.

მის ამ განცხადებას გამოეხმაურა საპარლამენტო უმცირესობის წევრი აკაკი ბობოხიძე და აღნიშნა, რომ ქვეყანაში გარკვეული ძალა ნამდვილად ცდილობს საბოტაჟის მოწყობას, მაგრამ ამაზე პასუხისმგებლობა ხელისუფლებას ეკისრება:

"მე არ ვიცი, ქალბატონი ეკა ბესელია რა საბოტაჟზე საუბრობს, მაგრამ მე ვამბობ, დიახ, "ქართული ოცნების" მმართველობის სტილმა, დაუსჯელობის სინდრომმა, მოქმედების განუსაზღვრელად მიცემულმა თავისუფლებამ, ნებისმიერი მესამე ძალა წაახალისა, რომ მათ აკეთონ ის, რაც მათ უნდათ ქვეყნისთვის საზიანოდ."

უფრო მეტიც, ბობოხოძე მოითხოვს, საზღვარი დაედოს ე.წ. მესამე ძალის თავნებობას და თვითნებობას, ოღონდ თითი არ უნდა გაიშვირონ "ნაციონალური მოძრაობის" მხარეს.

რომელ მესამე ძალაზეა საუბარი და საითკენ იხრებიან "ნაციონალური მოძრაობის" რადიკალური და შედარებით ლმობიერი, ე.წ. ქორებისა და მტრედების ფრთის წარმომადგენლები? ამის შესახებ For.ge ექსპერტებსა და პოლიტიკოსებს ესაუბრა.

ექსპერტს პოლიტიკურ საკითხებში სოსო ცისკარიშვილს აფიქრებს კაკო ბობოხოძის ნათქვამი მესამე ძალის არსებობის შესახებ და შიშობს, მესამე ძალად თავად არ აღმოჩნდეს, ვინაიდან არცერთ ძალასთან არ აქვს პირდაპირი ორგანიზაციული დაქვემდებარება. ექსპერტის აზრით, სხვაგვარად, თუკი მინიშნებას არ გაგვიკეთებენ, თუ ვინ ეგულებათ მესამე ძალად, ისე ამ ძალის შესახებ საუბარი არასერიოზულია.

თუკი ნაციონალების მიერ ნახსენები მესამე ძალის მიღმა პრორუსული ძალები იგულისხმება, მაშინ სოსო ცისკარიშვილი ინტერესდება, რაში ვლინდება პრორუსული ძალების არსებობა?!

"ამ არსებული დაპირისპირების პირობებში, აბა, წარმოვიდგინოთ, სასამართლოზე ზემოქმედებს ეს პრორუსული ძალა, თუ ეს ძალა სააკაშვილის ფავორიტებს არ აკადრებს ციხეში ჩაჯდომას?! გამოდის, კარგად იციან ნაციონალებმა, რომ მათ მესამე ძალა უჭერს მხარს. ამდენად, ან ელანდებათ, ან ჩვენ არ ვიცით და მართლაც არსებობს ის ძალა, რომელიც გადაფარებულია "ნაციონალურ მოძრაობაზე" და უიმისოდ ვერ წარმოუდგენია, თუ როგორ უნდა შეინარჩუნოს გავლენა საქართველოზე", - აცხადებს სოსო ცისკარიშვილი.

რაც შეეხება ნაციონალებში ორი ძალის - რადიკალურისა და შედარებით ლმობიერის არსებობას, ექსპერტის თქმით, ეს გარკვეული კომპლიმენტი უნდა იყოს ქალბატონი ბესელიას მიერ ნაცმოძრაობის მიმართ, რადგან ყველა ის ადამიანი, რომელიც დღემდე ზომიერ ნაციონალად წარმოგვედგინა, რატომღაც ბოლო დღეებში "გავეშდა" და ჩაერთო სრულიად უსაგნო კამათში, რასაც ჰქვა უარგუმენტო დაპირისპირება პოლიტიკურ ოპონენტებთან.

"რაც მთავარია, ამით მათ საკუთარ თავს ავნეს, როცა ვეღარ გამოირჩნენ რადიკალი ნაციონალებისგან, ანუ მათ დაარწმუნეს საზოგადოება, რომ მათაც სერიოზული ვალდებულებები გააჩნიათ პოლიტიკური ძალის ელიტის მიმართ, რასაც საზოგადოება აღიქვამს, როგორც კრიმინალურ ქმედებათა ორგანიზატორებს. ამდენად, გულსატკენია, როდესაც წლების განმავლობაში მეტ-ნაკლებად სოლიდურ, კულტურულ, განათლებულ ხალხად ვიცნობდით ამ ადამიანებს, რომლებიც ახლა გულში მუშტის დარტყმით ეფიცებიან ერთგულებას ყველა იმ ადამიანს, რომლის მიმართაც პროკურატურას ბრალდება გამოაქვს ამა თუ იმ დანაშაულზე", - აღნიშნა სოსო ცისკარიშვილმა.

"თავისუფალი საქართველოს" ლიდერი კახა კუკავა მიიჩნევს, რომ ეკა ბესელია ერთადერთი დეპუტატია პარლამენტში, რომელსაც ახსოვს, რომ ის არჩეული და არა - დანიშნული დეპუტატია.

ამასთან, კახა კუკავა აცხადებს, რომ "ნაციონალური მოძრაობა" დანაშაულებრივი ორგანიზაციაა და ქართველმა ხალხმა ხმა მისცა ამ დანაშულებრივი ორგანიზაციისგან ქვეყნის გათავისუფლებას და არა იმას, რასაც დღეს აკეთებს "ქართული ოცნების" ხელმძღვანელობა, ანუ კოჰაბიტაციას, ამნისტიას, სისტემის შენარჩუნებას და, ხშირ შემთხვევაში, ნაცმოძრაობის მიერ შექმნილი კორუფციული მონოპოლიების გადაფორმებას საკუთარ თავზე.

რაც შეეხება კაკო ბობოხიძის მიერ მოხსენიებულ მესამე ძალას, კახა კუკავას თქმით, ყოველთვის, როცა საუბარია ანონიმურად და ვერ ასახელებენ ვერც სახელს და ვერც გვარს, რა თქმა უნდა, ეს ბლეფია.

"საუბარი იმაზე, რომ დღეს "ქართულ ოცნებასა" და "ნაციონალურ მოძრაობაში" ვიღაცა მესამე ძალა სიტუაციას ურევს, ეს აბსოლუტური ნონსენსია. დღეს არის ორი ფიგურა ქართული პოლიტიკის დაფაზე - სააკაშვილი და ივანიშვილი. არ ვიტყოდი, რომ რადიკალებსა და შედარებით ლმობიერებს შორის ნაცმოძრაობაში დაპირისპირებაა. უბრალოდ, "ნაციონალურ მოძრაობაში" არიან მაფიოზები, რომლებიც მთელი ცხრა წელი მართავდნენ ქვეყანას, ფულს ატრიალებდნენ  და კრიმინალს ეწეოდნენ. ეს არის გიგა ბოკერია, გივი თარგამაძე, მიხეილ მაჭავარიანი, თვითონ მიხეილ სააკაშვილი და დანარჩენები არიან მათი "რუპორები", რომლებსაც არავინ არ ეკითხებოდა კონკრეტული დანაშაულების არც დაგეგმვას, არც აღსრულებას. მაგალითად, პირობითად რომ ვთქვათ, „დარჩიაშვილების“ მსგავსი ტიპაჟები, თუნდაც მინაშვილი და წერეთელი, სახელმწიფოსთვის საშიშნი არ არიან. რამდენი სისულელეც არ უნდა ილაპარაკონ, სისულელის ლაპარაკი სახელმწიფოს არ დაანგრევს.

ამ დროს კი, კეზერაშვილი და მისთანები ძალიან დიდ შავ ფულს აკონტროლებდნენ და უკანონო შეიარაღებულ ფორმირებებთან თანამშრომლობის გამოცდილება ჰქონდათ, თუმცა არავინ იძლევა გარანტიას, რომ მომავალშიც ისინი ამ გზას არ მიმართავენ", - აცხადებს კახა კუკავა და დარწმუნებულია, რომ მათი მხრიდან არსებულ რისკებს განეიტრალება სჭირდება.

საბოტაჟის თვლსაზრისით, კონკრეტულად რას აპირებენ რადიკალურად განწყობილი ნაციონალები, კახა კუკავასთვის ამის თქმა წინასწარ ძნელია. თუმცა მიიჩნევს, რომ პრეზიდენტის მხრიდან მთავრობის სავარაუდო დათხოვნა ნაციონალების მიერ დაგეგმილი საბოტაჟის ერთ-ერთი ვარიანტია. გარდა ამისა, კახა კუკავა არ გამორიცხავს, რომ შეიძლება, 19 აპრილს შეტაკება მოხდეს.

"გაგახსენებთ, 2 სექტემბერს ზვიად გამსახურდიას არ გაუცია ბრძანება მიტინგის დაშლის შესახებ, მაგრამ ვიღაცამ გასცა ეს ბრძანება და ეს დაბრალდა ზვიად გამსახურდიას. ამიტომ ახალმა ხელისუფლებამ ამ ვარიანტზეც უნდა იფიქროს. კიდევ რამდენი ბოროტება შეიძლება მოიხარშოს ნაციონალების მახინჯი ტვინის ხვეულებში, ეს უცნობია", - აცხადებს კახა კუკავა და ნაციონალების ამ ფრთას რადიკალურს მაინც ვერ უწოდებს, რადგან მისთვის ისინი "ნაციონალური მოძრაობის" ჩვეულებრივი ხელმძღვანელები არიან.

შეძლებს თუ არა "ქართული ოცნება" მის მიმართ დაგეგმილი საბოტაჟი აღკვეთოს?! ამ საკითხთან დაკავშირებით კახა კუკავას მიაჩნია, რომ არც შს სამინისტრო, ან რომელიმე სხვა მინისტრი ამაზე გადაწყვეტილებას არ იღებს. გადაწყვეტილებებს იღებს მხოლოდ ბიძინა ივანიშვილი. თუმცა კახა კუკავა იმითაც ინტერესდება, თავად იღებს ივანიშვილი გადაწყვეტილებებს თუ ვინმესგან მოდის ეს დირექტივები?!

თუ ვინ იგულისხმა ე.წ. მესამე ძალაში, ამის გასარკვევად კაკო ბობოხიძესთან დაკავშირება ვცადეთ, თუმცა იგი სატელეფონო ზარებს არ პასუხობდა. თუმცა, საპარლამენტო უმცირესობის წევრ დავით დარჩიაშვილთან საუბარი შევძელით.

დარჩიაშვილი სრულ აბსურდად მიიჩნევს, რომ "ნაციონალურ მოძრაობაში" არსებულ სხვადასხვა მიმდინარეობებს პროკურატურა შეისწავლის.

მას აინტერესებს, საბოტაჟის რომელ მცდელობაზეა საუბარი, რადგან ტერმინი "საბოტაჟი" სტალინის დროს გამოიყენებოდა. ამიტომ მიიჩნევს, რომ სრულ სიგიჟესთან გვაქვს საქმე.

„საბოტაჟებით ლაპარაკობდნენ სტალინის დროს. სოფლის მეურნეობაში იყო ხოლმე მოწამლული სიმინდის საქმე, იყო მრეწველთა საქმე. დღესდღეობით რომელ საბოტაჟზეა საუბარი?! ქვეყანაში არის ორი ცივილიზაცია, ერთი მათგანი ცდილობს დემოკრატიული, მრავალპარტიული სისტემის, სამართლებრივი და ადამიანის უფლებების ენით ილაპარაკოს, მეორე კი საბოტაჟებზე ლაპარაკობს. შეიძლება, ეს ორი ცივილიზაცია გაბნეულია მთელ ქვეყნაში და შესაძლოა, პოლიტიკურ პარტიებსაც არ ემთხვევა“, - აცხადებს დავით დარჩიაშვილი.

მისივე შეფასებით, თუ ვინმეს სურს, მთავრობას პრობლემები შეუქმნას, რათა საზოგადოებამ დაკარგოს ამ მთავრობის ნდობა, ეს არ არის საბოტაჟი და ეს ჩვეულებრივი პოლიტიკური პროცესია.

„სულ სხვა რამეა სისხლის სამართლის დანაშაული. თუ ვინმე ამტკიცებს, რომ რომელიმე ჩვენგანმა დანაშაული ჩაიდინა, მაშინ ისიც უნდა დაამტკიცოს, რაში გამოიხატება ეს დანაშაული. ახლა თუ მე არ მომწონს ივანიშვილი, ან კიდევ, ბესელიას არ მოსწონს სააკაშვილი, ეს ჩვეულებრივი პოლიტიკური პროცესია“, - განმარტავს დეპუტატი.

თუ რომელ მესამე ძალაზეა საუბარი, ამის შესახებ დავით დარჩიაშვილმაც არაფერი იცის. თუმცა მიაჩნია, თუკი ცივილიზებულ ქვეყანაში ვცხოვრობთ, ნებისმიერ პოლიტიკურ ძალას უნდა მიეცეს უფლება თავისი არგუმენტები გამოხატოს. ხოლო, თუ ამით კონსტიტუციური წესრიგი დაირღვევა, მაშინ ეს უნდა აღიკვეთოს.