დღეს for.ge-ს პრეს-კლუბის სტუმარი იყო პოლიტიკური პარტია „თავისუფალი საქართველოს“ თავმჯდომარე, კახა კუკავა, რომელმაც ჟურნალისტების კითხვებს უპასუხა. თავდაპირველად მან წინა ხელისუფლების მიერ ადამიანებისთვის ქონების უკანონოდ ჩამორთმევის ფაქტებთან დაკავშირებით გააკეთა განცხადება. მისი თქმით, საუბარი იყო იმაზე, რომ ამ ქონებების დაბრუნება დაიწყებოდა, მაგრამ ჯერჯერობით, ამ მხრივ სიახლე მხოლოდ ის არის, რომ ახალმა ხელისუფლებამ ამ ქონების რეალიზაცია დაიწყო.

„საქართველოში უკანასკნელი 9 წლის მანძილზე ადგილი ჰქონდა რეკეტს, როგორიც 90-იან წლებში ხდებოდა. გახსოვთ ალბათ, მაშინ მხედრიონი ოჯახში შედიოდა და იქიდან გამოჰყავდა მანქანა, რომელიც მოეწონებოდა. სრული პასუხისმგებლობით შემიძლია ვთქვა და ამის ათასობით მადასტურებელი ფაქტიც შემიძია მოვიყვანო, როდესაც წინა ხელისუფლების დროს ხდებოდა ადამიანის დაკავება, პასუხისგებაში მიცემა და მით უფრო, გამამტყუნებელი განაჩენის გამოტანა, ასეთი ადამიანებისთვის ავტომანქანების ჩამორთმევა ხდებოდა. შემდეგ კი ასეთი ჩამორთმეული მანქანებით წინა ხელისუფლების მაღალჩინოსნები დასეირნობდნენ“, - ამბობს კახა კუკავა.

მისი თქმით, მანქანების ჩამორთმევა ორი წესით ხდებოდა. კერძოდ, ზოგ შემთხვევაში, თუ ადამიანს საპროცესო გარიგებას უფორმებდნენ, იქვე მიაყოლებდნენ ხოლმე, რომ საპროცესო შეთანხმების თანხასთან ერთად, დაკავებულს მისი კუთვნილი მანქანაც უნდა დაეტოვებინა.

კუკავა ამბობს, რომ ამავდროულად ავტომანქანების ჩამორთმევა ყოველგვარი სამართლებრივი საფუძვლის გარეშეც ხდებოდა, ანუ საპროცესო გარიგების გაფორმების გარეშეც და ასეთ გადაწყვეტილებებს მხოლოდ მაღალი თანამდებობის პირები ღებულობდნენ. კახა კუკავას თქმით, ერთ-ერთი ასეთი რეკეტიორი იყო ირაკლი კოდუა. ასეთი რეკეტის მაგალითად კუკავას მისი თანაპარტიელის, კონსტანტინე წიწილაშვილის დაკავება მოჰყავს. კერძოდ, მისი თქმით, წიწილაშვილს ჩამოართვეს მთელი ქონება, რაც მას სახლში ჰქონდა და მათ შორის ავტომანქანაც. ამასთანავე, კუკავას განმარტებით, არც ჩხრეკის ოქმში არის ეს ნივთები დაფიქსირებული და არც განაჩენში წერია, რომ ისინი სახელმწიფოს გადაეცა, თუმცა ვისაც რა მოეწონა, ის გაიტანა წიწილაშვილის სახლიდან - ერთ გამომძიებელს წიწილაშვილის საათი მოეწონა და წაიღო, მეორეს მუსიკალური ცენტრი და ასევე წაიღეს დაკავებულის ავტომანქანა „ჰონდა აკორდი“.

„სოდ-ი, რომელსაც ირაკლი კოდუა ხელმძღვანელობდა ჩვეულებრივი რეკეტიორული სტრუქტურა იყო და ისე იქცეოდა, როგორც კოზანოსტრა და მხედრიონი. ვერ ვიტყვი, რომ იმედი მაქვს, რადგან უკვე აღარ მაქვს იმედი, რომ პროკურატურა და იუსტიციის სამინისტრო ასეთი საქმეებით დაინტერესდება. კონსტანტინე გამსახურდიას აქვს ასეთი ფრაზა - მართლმსაჯულება არის წვრილმანი ღორჯოებისთვის, ხოლო დიდი ღლავები იქ არასოდეს გაებმებიან, რადგან ეს სუსტი ბადეა. დღეს პროკურატურას რომ ვუყურებ, მრჩება შთაბეჭდილება, რომ მართლმსაჯულება არის ისეთი ღორჯოებისთვის, როგორებიც მაიზერ ლიპარტელიანი და ვინმე ლობჟანიძეა, ხოლო ისეთი ღლავებისთვის, როგორებიც იყვნენ კოდუა, ბოკერია, თარგამაძე, ბარამიძე (რომელიც ადამიანების ადგილზე ლიკვიდაციის ბრძანებებს იძლეოდა) როგორც ჩანს, დღევანდელი პროკურატურისა და იუსტიციის სამინისტროს ხელმძღვანელებს ან სიმამაცე, ან კვალიფიკაცია არ ჰყოფნით“, - აცხადებს კუკავა.

იგი შინაგან საქმეთა და ფინანსთა მინისტრებს სთხოვს მოქალაქეებისთვის ჩამორთმეულ ავტომანქანებზე გამოცხადებული აუქციონი შეაჩერონ და ასევე მოითხოვს, პროკურატურამ ჩამორთმეული ქონების საქმეების შესწავლა დაიწყოს. კუკავას თქმით, აქ სხვადასხვა ექსპერტული გათვლებით დაახლოებით 15 მილიარდი დოლარის ღირებულების ქონებაზეა საუბარი - მანქანები, სახლები, წილები კომპანიებში, მიწის ნაკვეთები, ფულადი თანხები და ა.შ. ამასთანავე, კახა კუკავა აცხადებს, რომ თუ ამ ფაქტების გამო უახლოეს დღეებში ირაკლი კოდუა პასუხისგებაში არ იქნება მიცემული, მაშინ წმინდა სამართლებრივი თვალსაზრისით, პროკურატურა და იუსტიციის სამინისტრო კოდუას თანამზრახველებად ჩაითვლებიან.

კუკავას თქმით, „თავისუფალ საქართველოში“ შექმნილია საგამოძიებო ბიურო და იგი მოქალაქეებს მოუწოდებს, მივიდნენ მათთან და ჩამორთმეული საკუთრების შესახებ ინფორმაცია მიაწოდონ, იქ კი მათ სამართლებრივ დახმარებას გაუწევენ.

„სხვათაშორის, ირაკლი კოდუას ერთ-ერთმა ძმამ, გიორგი კოდუამ პრეს-კონფერენცია გამართა და თქვა, რომ საქართველოში ბიზნესი იზღუდებოდა და ამის გამო ძალიან შეწუხებული იყო. თუ ამ ყველაფერს დროულად ყურადღებას არ მივაქცევთ, შეიძლება ირაკლი კოდუამ ადამიანის უფლებების დარღვევაზე ჩაატაროს პრეს-კონფერენცია, ბაჩო ახალაიამ შეიძლება შექმნას (და მისმა ოჯახმა უკვე შექმნა) პატიმრების უფლებების დაცვის ორგანიზაცია, მიხეილ სააკაშვილმა და ვანო მერაბიშვილმა შეიძლება დემოკრატიის განვითარების ცენტრი შექმნან და ჩვენ ისევ წარსულში დაბრუნება მოგვიწიოს. ამიტომ ჩვენ ვაპირებთ ძალიან ენერგიული ქმედებები გავატაროთ იმ ფარისევლობის წინააღმდეგ, რასაც „ქართული ოცნება“ და „ნაციონალური მოძრაობა“ ერთად ეწევიან და რასაც კოჰაბიტაცია ეწოდება. საქართველოს არც ერთ მოქალაქეს 2012 წლის პირველი ოქტომბრის არჩევნებზე კოჰაბიტაციისთვის ხმა არ მიუცია“, - აღნიშნავს კახა კუკავა.

როდის და რა ვითარებაში წაართვეს წიწილაშვილს მანქანა?

- ეს მოხდა 2008 წელს, როდესაც იგი დააკავეს. ჩხრეკის დროს მისი ქონება აღინუსხა. საერთოდ, თუ ესა თუ ის ქონება დანაშაულთან არის დაკავშირებული, შესაძლებელია, რომ ჩხრეკის დროს იგი ამოღებული იყოს, მაგრამ შემდგომ, როდესაც ეს ქონება უკვე აღარ არის მტკიცებულების ძალის მქონე, ოჯახს უკან უბრუნდება. მაინტერესებს ავტომანქანა, ან ძვირფასი საათი რა მტკიცებულებას წარმოადგენდა სოდ-ისათვის (რომელიც ამ საქმეს იძიებდა), ხოლო თუ წარმოდგენდა, საქმის წარმოების დასრულების შემდეგ ის, როგორც უკანონო ქონება ან სახელმწიფოსათვის უნდა ყოფილიყო გადაცემული, ან ოჯახს უნდა დაბრუნებოდა. ამ შემთხვევაში, არც ერთი მოხდა და არც მეორე.

თქვენ მოუწოდებთ მოქალაქეებს, რომ წართმეულ ქონებასთან დაკავშირებით თქვენ მოგმართონ. ახლა იწყებთ ამ ინფორმაციის შეგროვებას, თუ რაიმე ბაზა უკვე გაქვთ?

- რა თქმა უნდა, ჩვენ გვაქვს ბაზა. ახლა ვცდილობთ სასამართლოებში მივმართოთ იმ ადამიანების საქმეები, ვის უფლებებსაც 9 წლის განმავლობაში ვიცავდით, მაგრამ ეს არის რეზონანსული საქმეები. მესმის, რომ იმ ადამიანების აბსოლუტური უმრავლესობა, რომელიც სააკაშვილის რეჟიმის რეკეტის მსხვერპლი გახდა, ჩვენ არ მოგვმართავდა. ჩვენ, ალბათ, დაახლოებით ორმა პროცენტმა მოგვმართა, დანარჩენი 98% კი დუმილს ინარჩუნებდა. მინდა ამ ადამიანებს მივმართო, რომ რა პოლიტიკური ვითარება იქნება ქვეყანაში, არაფრის შემაკავებელი გარემოება ეს არ არის. ყველას თავისი კერძო საკუთრება უნდა დაუბრუნდეს.

მინდა რეკეტში დღეს მოქმედი პროკურატურაც ვამხილო. მოგესხენებათ, არსებობს ასეთი ინსტიტუტი, როგორიც არის გირაო და რომელიც სააკაშვილის ხელისუფლების პირობებში ძალიან აქტიურად გამოიყენებოდა. კანონში წერია, რომ გირაო შეეფარდება ბრალდებულს და როცა საქმე დამთავრდება, ან როცა პატიმრობა იქნება შეფარდებული, გირაოს თანხა ამ ადამიანს უკან უნდა დაუბრუნდეს, რადგან გირაო თავის აზრს კარგავს. გესმით ხომ გირაოს არსი? დატოვე მილიონი დოლარი და თუ გაიქცევი, ეს ფული დაგეკარგება, მაგრამ როდესაც უკვე მოგისჯიან სასჯელს, ან გაგამართლებენ, ეს თანხა ოჯახს უკან უნდა დაუბრუნდეს. თქვენ შეგიძლიათ გადაამოწმოთ, უკანასკნელი ათი წლის განმავლობაში არც ერთ მსჯავრდებულს გირაო არ დაბრუნებია. ეს არის ასობით მილიონი, შეიძლება მილიარდებსაც აღწევს ეს თანხა, მე ეს ზუსტად არ ვიცი.

როგორ ხდებოდა საქმის დასრულების დროს? თუ თქვენ გირაოს სახით 50 000 ლარი გქონდათ გადახდილი, პროკურატურა გაგიფორმებდათ საპროცესო შეთანხმებას და სწორედ ამ ოდენობით ჯარიმას გაკისრებდათ, რაც შემდგომში გირაოს თანხაში იქვითებოდა. ვითომ, ამ თანხას უკან გიბრუნებდნენ და შემდეგ მისი ჯარიმის სახით გადახდა ხდებოდა. სინამდვილეში ამ გირაოს თანხების რეკეტი მიმდინარეობდა. ახლა მოგახსენებთ, რა ხდება დღევანდელი მდგომარეობით, როდესაც დამთავრდა ბნელი და უკუნი და გათენდა დემოკრატიის დილა. ბუნებრივია, ადეიშვილის პროკურორობის პირობებში დაწყებული ათასობით საქმეა წარმოებაში, რომლებზეც გირაო გადახდილია, მაგრამ ამ საქმეების წარმოება დასრულებული არ არის. დღევანდელი პროკურატურა უარს ამბობს, ამ გირაოს თანხების დაბრუნებასა და სისხლის სამართლის საქმეების შეწყვეტაზე. ამათი დემოკრატიულობა იმაში გამოიხატება, რომ ესენი ამბობენ - კი ბატონო, უკანონოდ გქონდათ ბრალი წაყენებული, მზად ვართ საქმე შეგიწყვიტოთ, არ გვინდა თქვენი დაჭერა, მაგრამ გირაოს ვერ დაგიბრუნებთ. ამიტომაც ბრალდებულებს საპროცესო შეთანხმებებს სთავაზობენ, რათა გირაო სახელმწიფოს დარჩეს, ამ ადამიანებს კი არასაპატიმრო სასჯელს დაუნიშნავენ.

როგორც ნახევრად ორსული არ არსებობს, ასევე ნახევრად მართლმსაჯულებაც ვერ იარსებებს. ის, რასაც დღევანდელი პროკურატურა გირაოებთან მიმართებაში სჩადის, ასევე დანაშაულია. შეიძლება ვიდაოთ, წინა პროკურატურა უფრო დამნაშავეა, თუ ახლანდელი, მაგრამ აქლემის ქურდი და ნემსის ქურდი, ორივე ქურდია. მე ხშირად მაკრიტიკებენ იმის გამო, რომ პროკურატურასა და იუსტიციის სამინისტროს ხშირად ვაკრიტიკებ, მაგრამ მე იუსტიციის სამინისტროსთან ურთიერთობის სხვა ფორმა უბრალოდ ვერ მოვნახე. დღესაც ნარკოტიკის და იარაღის ჩადება პროკურატურის მუშაობის ჩვეული სტილია. ასეთ საქმეებზე, ასევე ქონების ჩამორთმევის ფაქტებზე და კიდევ უამრავ ამგვარ ფაქტზე იუსტიციის სამინისტროს რამდენიმე წერილი მივწერე და ველოდები პასუხს. მე არ ვარ ამ ხელისუფლების ოპონენტი და არ მინდა ეს თემები პოლიტიკური სპეკულაციის თემებად ვაქციო, ამიტომ ველოდები, რომ ან დამიძახებენ, ან პასუხს გამცემენ, ან თუნდაც მე ნუ ჩამაყენებენ საქმის კურსში, მაგრამ ასეთ საქმეებზე რეაგირებას მოახდენენ. არც ერთ წერილზე რეაგირება არ მომხდარა. ამიტომ მინდა „ქართული ოცნების“ ლიდერებს და პირადად ბიძინა ივანიშვილს (რომელიც ამბობს, რომ ხელისუფლებას ჯანსაღი ოპონირება სჭირდება), როდესაც მაქვს კონკრეტული ფაქტები, რომ პროკურატურა ადამიანებს იარაღს ან ნარკოტიკს უდებს, მათ რეკეტს ეწევა და მათ უფლებებს ლახავს, რა გავაკეთო? ვთქვათ, პრესა არ მინდა საქმის კურსში ჩავაყენო და წერილობით მივმართავ ამა თუ იმ უწყებას, მაგრამ ამაზე რეაგირებას არ ახდენენ. როდესაც პრესაში ვაჟღერებ ამ ინფორმაციებს, ამას ძალიან მტკივნეულად აღიქვამენ. ამიტომ იქნებ მოიფიქრონ არასაპარლამენტო ოპოზიციასთან ურთიერთობის ისეთი ფორმა, როდესაც შესაძლებლობა გვექნება, სამუშაო რეჟიმში ხელისუფლების ცალკეულ უწყებებს იმ დარღვევების შესახებ მივუთითოთ, რომლებიც დღითიდღე სულ უფრო მრავალფეროვანი ხდება.

ვერაფრით ვერ დავეთანხმები არგუმენტს, რომ პროკურატურაში სააკაშვილის დროინდელი კადრები არიან ჩარჩენილები და შეგნებულად ხდება ასეთი რაღაცეები, რადგან „ქართუ ბანკის“ და „ელიტა ბურჯის“ ინტერესებს რაც შეეხება, ამ საქმეებს ძალიან სწრაფად და ეფექტურად იძიებენ. რატომღაც პრობლემები იქმნება მხოლოდ მაშინ, როდესაც საქმე ჩვეულებრივ, არა პოლიტიკურ ელიტას მიკუთვნებული ადამიანების ინტერესებს ეხება. ამიტომ, ჩვენ გვინდა მოვუწოდოთ ხელისუფლებას, გადახედოს თავის პოლიტიკას, რომლის გამო უკმაყოფილებასაც უკვე მოსახლეობაც გამოხატავს.

მოსახლეობის აღშფოთების კულმინაციას წარმოადგენდა ის განცხადება, რომელიც საპარლამენტო უმრავლესობის წევრებმა ამნისტიასთან დაკავშირებით გააკეთეს. თურმე ნაციონალების (რომლებიც ათი წლის განმავლობაში ოფიციალურად ყაჩაღობდნენ) სასჯელი მხოლოდ ის უნდა იყოს, რომ თუ ადრე უმრავლესობის დეპუტატები იყვნენ, ახლა უმცირესობის დეპუტატები იქნებიან. თუ ადრე მოპარულ ჯიპებში ისხდნენ, ახლა მოპარულ „ფოლკსვაგენებში“ ისხდებიან და ამით ამოიწურება მათი სანქციები. პოლიტიკური ამნისტია არა მხოლოდ „ნაციონალური მოძრაობის“ დანაშაულებებზე თვალების დახუჭვა იქნება, არამედ „ქართული ოცნების“ მიერ კორუფციის ღიად დეკლარირება იქნება. არ ვიცი, ეს ვინ მოიფიქრა, მაგრამ პირადად ბიძინა ივანიშვილის ყურადღება მინდა ამ ფაქტზე გავამახვილო და ვუთხრა მას - ეს იქნება სილის გაწვნა იმ ადამიანებისთვის, ვინც პირადად თქვენ მოგცათ ხმა. დარწმუნებული ვარ, ბატონი ბიძინა ამ საკითხში უფრო სიღრმისეულად ჩაერთვება და ეს ინიციატივა უკან იქნება გაწვეული. ჯერ სამართლიანობა უნდა აღდგეს, დამნაშავეები დაისაჯონ და მერე თუ ზედმეტი სიმკაცრე გამოგვივა, უკვე გულმოწყალეობაზეც შეგვიძლია ვიფიქროთ. ჩემთვის ცოტა გაუგებარია, დღეს რა გულმოწყალეობა აუტყდა ამ ხელისუფლებას.

ბიძინა ივანიშვილმა პრეზიდენტ სააკაშვილს ღია წერილით მიმართა და მოუწოდებს, უახლოეს ორ-სამ დღეში სააკაშვილმა საკონსტიტუციო ცვლილებებთან დაკავშირებით საკუთარი პოზიცია დააფიქსიროს. როგორია თქვენი შეფასება ამასთან დაკავშირებით?

- „ნაციონალურ მოძრაობასთან“ მიმართებაში საქართველოს პრემიერ-მინისტრს საკუთარი სტრატეგია აქვს, რომელიც მე არ მომწონს, მაგრამ მისი მხარდამჭერები და უახლოესი გარემოცვის წევრები აცხადებენ, რომ საბოლოო ჯამში, ივანიშვილი „ნაცმოძრაობას“ ერთიანად მოუღებს ბოლოს. ახლა კი უბრალოდ ასეთი უკანდახევის ტაქტიკას იყენებს. ახლა ამას ნამდვილად ვერ შევაფასებ, ეს შეიძლება მხოლოდ წლის ბოლოს შევაფასოთ. პირადად მე მგონია, რომ „ნაციონალურ მოძრაობასთან“ ლოიალური პოლიტიკა წამგებიანია. საქართველოს უახლოეს ისტორიაში ჩვენ გვაქვს ასეთი გამოცდილება, როდესაც ქვეყნის სათავეში ხალხის მიერ არჩეული ხელისუფლება მოვიდა (მხედველობაში მაქვს „მრგვალი მაგიდა“, რომელსაც ზვიად გამსახურდია ხელმძღვანელობდა), რომელიც ლოიალური იყო კომუნისტების, მხედრიონელების, კაგებეშნიკების და ყველა ჯურის დამნაშავეების და მოღალატეების მიმართ. როგორ დამთავრდა ეს ისტორია, ყველამ ვნახეთ.

მე რომ ვიყო ხელისუფლებაში, ან ისინი მე რომ მეკითხებოდნენ რჩევებს, ხელისუფლებას ვურჩევდი „ნაციონალური მოძრაობის“ წინააღმდეგ გატარდეს კანონით გათვალისწინებული რეპრესიები, ყველა დამნაშავე დაისაჯოს (რომელიც პარტიის წევრიც არ უნდა იყოს) და არც ერთი უდანაშაულო არ დაისაჯოს. არ მესმის დღევანდელი პოლიტიკა, რომ ან უნდა დაისაჯოს ყველა, დამნაშავეც და უდანაშაულოც, რასაც სააკაშვილის ხელისუფლება აკეთებდა, ან არ უნდა დაისაჯოს არავინ, მათ შორის არც დამნაშავე, რასაც ივანიშვილი აკეთებს. არც ერთი არ არის სწორი. სახელმწიფო ნიშნავს იმას, რომ დამნაშავეები უნდა ისჯებოდნენ, ხოლო უდანაშაულოები - არა. იმ ფორმებით ურთიერთობა, რომ პრემიერმა facebook-ით ღია წერილი გამოაქვეყნა, ხოლო ჩვენ დაველოდოთ, სააკაშვილი ამაღამ ამ პოსტს თუ დაალაიქებს, ცოტა არასერიოზულად მიმაჩნია და ქვეყნის სტაბილურობა ასეთ რაღაცეებს არ უნდა ეფუძნებოდეს.

რაც შეეხება თავად საკონსტიტუციო ცვლილებებს, ამ კანონპროექტთან დაკავშირებით როგორია თქვენი დამოკიდებულება?

- მიმაჩნია, რომ ეს პროექტი არაკვალიფიციურად მომზადებულია. არ ვიცი ეს ბატონი ხმალაძის კომპეტენციის ბრალია, თუ სხვა ფიზიკოსებიც მონაწილეობდნენ ამ პროცესში. საერთოდ, კარგი იქნებოდა, კონსტიტუციის შემუშავებაში კონსტიტუციონალისტებიც მონაწილეობდნენ. ნებისმიერ ქვეყანაში კონსტიტუცია მრავალი პოლიტიკური სუბიექტის კონსესუსის შედეგად იქმნება. ჩვენთან კონსტიტუცია ერთპარტიულ რეჟიმში მიიღება, რაც უკვე ძალიან ცუდია. გადაწყვეტილებას, რა თქმა უნდა, საპარლამენტო უმრავლესობა იღებს, მაგრამ კონსტიტუციის განხილვა ფართო საზოგადოებასთან ერთად ხდება. ჩვენ და კიდევ ხუთმა პარტიამ შევთავაზეთ ხელისუფლებას, ამ პროცესში მიგვეღო მონაწილეობა, მაგრამ ისინი ამას თავს არიდებენ. ერთი კვირის წინ ბატონი უსუფაშვილის განცხადება გამოქვეყნდა, სადაც მან თქვა, რომ არასაპარლამენტო ოპოზიციასთან, მაგრამ მხოლოდ კვალიფიციურ სუბიექტებთან. მოგეხსენებათ, ვინც არიან კვალიფიციური სუბიექტები და ძალიან უცნაური იქნება, თუ „ქართულ ოცნებას“ უცებ მათ მიმართ სიყვარულის ბუშტი გაუსკდება და უარს იტყვის ჩვენთან, ნინო ბურჯანაძესთან, ჯონდი ბაღათურიას პოლიტიკურ ძალასთან თანამშრომლობაზე. ქართული საზოგადოებისთვის ეს მართლაც აუხსნელი და გაუგებარი იქნება. საერთოდ ვხედავ, რომ თუნდაც „ქართული ოცნების“ რაიონული ორგანიზაციების დაფუძნებისა არ იყოს, ბევრი რამ პარტიული ბიუროკრატიის მიერ დაშვებული შეცდომების შედეგად ხდება, შემდეგ კი პასუხისგება ბატონ ბიძინა ივანიშვილს უწევს. პოლიტიკის არსი ასეთია, ლიდერი ივანიშვილია და ამიტომ კარგზეც მას ეტყვიან მადლობას და ცუდზეც მას გააკრიტიკებენ. თუ მას ჩემი აზრი აინტერესებს, მინდა ვუთხრა, რომ ვისაც საარჩევნო კანონმდებლობის და კონსტიტუციის რეფორმა ჩააბარა, ეს ხალხი სასწრაფოდ უნდა გამოიწვიოს ამ მიმართულებიდან და სადმე სხვა საკითხზე დაასაქმოს, რადგან კონსტიტუციის და საარჩევნო რეფორმა ისეთი დანაღმული მინდორია, სადაც ბატონი ხმალაძე უკვე ყველა ნაღმზე აფეთქდა, ანუ ყველამ გააკრიტიკა, ვისაც კი შეიძლებოდა გაეკრიტიკებინა, ევროსაბჭომაც, ევროპარლამენტმაც და ეს კრიტიკა არ შეწყდება, თუკი ეს პროცესი ასეთი არაკვალიფიციური ფორმით გაგრძელდება.

უნდა შეიქმნას საკონსტიტუციო კომისია, რომელშიც არასაპარლამენტო პარტიები, არასამთავრობო ორგანიზაციები შევლენ და რომელიც არ იქნება დროში შეზღუდული, ორ კვირაში უნდა მიიღოს ცვლილება, თუ სამ კვირაში.

ბატონო კახა, როგორც იურისტს რამდენად სარწმუნოდ მიგაჩნიათ გიგი უგულავას მიმართ წარდგენილი ბრალდება იმ ფონზე, როდესაც ბრალდების ერთ-ერთი მნიშვნელოვანი მოწმე არის ჯოზეფ ქეი, ანუ ადამიანი, რომლის მიმრთაც უამრავი კითხვა არსებობს?

- საქმე რომ სამართლებრივად შევაფასოდ, ამისთვის ძალიან მნიშვნელოვანია საქმის მასალების ცოდნა. შეიძლება დანაშაული რეალურად არსებობდეს, მაგრამ არაკომპეტენტურობის გამო, ის ვერ დამტკიცდეს. მაგალითად, თენგის გუნავა, რომელიც ახლა გმირად იქცა, რეალურად არის კრიმინალი, ოღონდ იმის გამო, რომ საქმე ჩაიბარა შესაბამისი გამოცდილების არმქონე წულუკიანმა, ამ ადამიანს ბრალი ბენზინის ტალონების უკანონო ხარჯვაზე წაუყენეს და იარაღი და ნარკოტიკები ჩაუდეს. საქმე რომ ცოტა უფრო კვალიფიციურ იურისტს ჩაბარებოდა, მას ეცოდინებოდა, რომ თენგიზ გუნავა 2007 წლის 28 ოქტომბერს ზუგდიდში აქციის დარბევას პირადად ხელმძღვანელობდა. ეს ხდებოდა სასტიკი მეთოდებით, ზონდერ-ბრიგადების მიერ, „არმატურების“ და სხვა ამგვარი საგნების გამოყენებით და ზუგდიდის ცენტრში პარლამენტის წევრი პირდაპირ წიხლქვეშ გაიგდეს.

იგივეს გეტყვით უგულავაზეც, საქმე რამდენად კვალიფიციურად არის გამოძიებული, ამას ვერ გეტყვით. შემიძლია ვთქვა, რომ რეალურად მას აქვს ის დანაშაული ჩადენილი, რასაც ედავებიან, მხედველობაში მაქვს რეკეტიორული წესით ტელეკომპანია „იმედის“ მისაკუთრება. კონკრეტულად უგულავას ბრალი იქ რა იყო და რამდენად ეს მტკიცებულებებით არის დადასტურებული, ეს უნდა შეაფასოს მან, ვისაც საქმის მასალებში ჩახედვის საშუალება ექნება. პირადად მე არაერთხელ მითქვამს და ხელისუფლებასაც მინდა მივმართო, რა თქმა უნდა, ამ საქმეზეც ევროპელი დამკვირვებლების მხრიდან იქნება დასაბუთებული ეჭვი, რომ უგულავას წინააღმდეგ ადგილი აქვს შერჩევით მართლმსაჯულებას. არანაირ ეჭვს არ იწვევს, რომ „იმედი“ რეკეტიორული წესით იქნა მისაკურებული, თითქმის, არანაირ ეჭვს არ იწვევს, რომ უგულავა ამ საქმის ერთ-ერი ორგანიზატორი იყო, მაგრამ ძალიან დასაბუთებული ეჭვები არსებობს, რომ ბატონი უგულავა ამ დანაშაულში მარტო არ იყო. ამიტომ, რადგან ბრალი მხოლოდ მას წარედგინა, რა თქმა უნდა, ევროპელების მხრიდან ეს ძალიან სერიოზული კრიტიკის საფუძველი გახდება. არა მხოლოდ ევროპელების, არამედ ჩემი მხრიდანაც ეს კრიტიკის საფუძველი იქნება, რადგან მე ვიყავი 7 ნოემბრის მოვლენების მონაწილე. მთელი იმ დღის განმავლობაში, რაც დარბევა დაიწყო, ვიყავი იქ, მათ შორის „იმედის“ დარბევის დროსაც და ზუსტად ვიცი, რა ხდებოდა და ვინ რა როლს ასრულებდა ამ ყველაფერში. ამ პროცესში უგულავა ნამდვილად არ იყო უკანასკნელი, მაგრამ არც პირველი, ან მეორე არ ყოფილა. ამიტომ არსებობს კითხვები შერჩევით მართლმსაჯულებასთან დაკავშირებით. რა გახდა ამის გამოძიება? რით ვერ დაადგინეს 7 ნოემბერს ვინ გასცა დარბევის ბრძანება?

გახსოვთ ალბათ, „თავისუფალი საქართველოს“ ვერ-გვერდზე გამოვაქვეყნეთ ვანო მერაბიშვილის და აზერბაიჯანის შინაგან საქმეთა მინისტრის სატელეფონო საუბარი, საიდანაც ირკვევა, რომ მიტინგის დასარბევი ეკიპირება უკანონოდ შემოჰქონდა. ამიტომ როდესაც ასეთი ფაქტების გამოძიება არ ხდება, რადგან მერაბიშვილი ინტერესის საგანს არ წარმოადგენს, ხოლო უგულავა - წარმოადგენს, რა თქმა უნდა, ნაციონალებს ევროპარლამენტში რომ ჰყავთ მარტენსი, გამოვა და იტყვის, რომ საქართველოში რაღაც საშინელება ხდება.

ამდენად, უგულავას საქმესთან დაკავშირებით მაქვს ორი შენიშვნა. პირველი არის ის, რომ იმედია მისი საქმე მხოლოდ ჯოზეფ ქეის ჩვენებას არ ემყარება და იქ სხვა მტკიცებულებებიც არსებობს. ხოლო მეორე, რატომ არ არიან მასთან ერთად სამართალში მიცემული მაგალითად, ვანო მერაბიშვილი და გივი თარგამაძე. შემიძლია აქვე ექსკლუზიურად მოგცეთ ინფორმაცია, რომ 7 ნოემბრის შემდეგ „იმედის“ ჟურნალისტებზე ზეწოლას და მათ გადაბირებას გივი თარგამაძე აწარმოებდა. არსებობდა თარგამაძის ლეგენდარული ჟურნალი, სადაც ეწერა - ამას კრედიტი, ამას პატიმრის განთავისუფლება და ა.შ. ამ ყველაფერში ის უშუალოდ მონაწილეობდა და დღემდე დაკითხულიც კი არ არის. გამოდის, რომ მარტო ჩიორა თაქთაქიშვილის ცხვირი არის კულტურული მემკვიდრეობა და ჩვენი არც ბეჭი ფასობს და არც ზურგი. 26 მაისის შემდეგ ორი თვე ვმკურნალობდი, მაგრამ ეს არავის ახსოვს. ერთი ის ვიცი, ჯენიფერ ლოპესმა დააზღვია მილიონ დოლარად მისი სხეულის ერთი ნაწილი, ხოლო მეორე ჩიორა თაქთაქიშვილის ცხვირია, ნახევარი ევროპა რომ მისტირის და ჩემი არც ბეჭი ფასობს და არც არაფერი. ბეჭს იმიტომ ვახსენებ, რომ სულ ბეჭებში მირტყეს ხელკეტი.

რაც შეეხება გიგი უგულავასთვის მილიონი ლარის ოდენობით გირაოს მოთხოვნას, ამას როგორ შეაფასებდით?

- ჩემი აზრით, ეს იყო შეცდომა. საერთოდ, მე ძალიან კარგად ვიცი სასამართლო სისტემა. იქ ზიან ჩვეულებრივი კრიმინალები, მაგალითად, მოსამართლე ესებუა, მოსამართლე ჩემია და ა.შ. მე თბილისის ერთ-ერთ კრიმინალურ უბანში, ნუცუბიძის პლატოზე გავიზარდე და მინდა გითხრათ, რომ ის დამნაშავეები და რეკეტიორები, ვინც იქ მინახავს, ფრთიანი ანგელოზები არიან იმათთან შედარებით, ვინც თბილისის საქალაქო და სააპელაციო სასამართლებში სხედან. ისინი რა თქმა უნდა, უყურებენ იმას, თუ როგორი კლიმატია ქვეყანაში. თუ დაინახავენ, რომ მათ საფრთხე ემუქრებათ, შესაბამისად იმოქედებენ. ხოლო თუ მოექცევიან ისე, როგორც ახლა მათ ენის მოჩლექვით ექცევიან, ისინი ახლა უცებ გახდნენ მიუკერძოებლები. მოსამართლეები ესებუა და ჩემია, რომელმაც ყველას გვახსოვს, გირგვლიანის საქმის განხილვისას პირდაპირ გადასცა ტელეფონი განსასჯელებს, ეს ადამიანები და კიდევ სხვები სისხლის სამართლებრივ პასუხისგებაში უნდა იქნენ მიცემულები. ის მოსამართლეები, რომლებმაც დანაშაული ჩაიდინეს, უნდა დააპატიმრონ, თუ მართლმსაჯულების განხორციელება გვინდა.