რვაწლიანი ემიგრაციის შემდეგ გერმანიიდან დაბრუნებული სატყეო დეპარტამენტის ყოფილი უფროსი ბიძინა გიორგობიანი მის წინააღმდეგ მოქმედ მთავარ პირებად დათა ახალაიას, ვანო მერაბიშვილს, ამირან მესხელსა და გივი თარგამაძეს ასახელებს და აცხადებს, რომ მას კონსტიტუციური უსაფრთხოების დეპარტამენტისა და კონტროლის პალატის წარმომადგენლები დევნიდნენ. მასზე ინტერპოლით წითელი ცირკულარით ძებნა კი გივი თარგამაძის უშუალო მითითებით გამოცხადდა, რამაც გერმანიაში ცხოვრება ძალიან გაურთულა, მიუხედავად იმისა, რომ მას გერმანიის მოქალაქეობაც ჰქონდა.

ამჯერად ბიძინა გიორგობიანს არ სურს, პოლიტიკურ პროცესებს შორიდან უყუროს და საზოგადოებრივ-პოლიტიკურ ცხოვრებაში აქტიურად ჩართვას აპირებს. პოლიტიკური შეხედულებებით იგი კონსერვატორია და აქტიურ თანამშრომლობას გეგმავს როგორც „კონსერვატიულ“, ისე კოალიცია „ქართულ ოცნებაში“ შემავალ სხვა პარტიებთან. ამ ეტაპზე კონკრეტულ თანამდებობასთან დაკავშირებით შეთავაზება არ მიუღია, თუმცა გამორიცხული არაფერია. 

ამ ეტაპზე, სატყეო დეპარტამენტის ყოფილ უფროსს მის წინააღმდეგ ჩვენების მიმცემთა სამართლებრივი დევნის დაწყება გადაწყვეტილი არ აქვს და არ სურს „ძვირფასი დრო“ ამაზე დაკარგოს, თუმცა საბოლოო გადაწყვეტილებას ამ თემაზე კონსულტაციების შედეგად მიიღებს.  

For.ge ბიძინა გიორგობიანს ესაუბრა.

თქვენ კურირებდით სატყეო სექტორს, თუმცა იძულებით მოგიხდათ საქართველოს დატოვება. ამასთან დაკავშირებით საინტერესოა თქვენი პოზიცია, ასევე, რას იტყვით სატყეო ბიზნესის ირგვლივ, რომლის სქემაშიც, როგორც ითქვა, თავიდან ვანო მერაბიშვილიც იყო ჩართული?

- ეს საწყის ეტაპზე ხდებოდა, თორემ შემდეგ უკვე ისინი კორუფციის სხვა სქემებით მუშაობდნენ და მათ სატყეო ინტერესები ამ მიმართულებით დაკარგეს. იმ პერიოდში, 2004 წელს, როდესაც მე იქ ვმუშაობდი, მათ, რასაკვირველია, ჰქონდათ ინტერესი და სურდათ მოეშორებინათ ის ადამიანი, რომელიც იქ მუშაობდა, ანუ - მე. სურდათ, იქ ყოფილიყო მათთვის სასურველი ვინმე და მათი გუნდის წევრი.

თავის დროზე, როცა ამ პოსტზე დაგნიშნეს, ნუთუ არ იცოდნენ, რომ თქვენ მათი ერთგული არ იქნებოდით?

- 1995 წლიდან გერმანიაში ვცხოვრობდი, იქ ვმუშობდი და შემდეგ, როცა დავბრუნდი საქართველოში, ზურაბ ჟვანიამ მთხოვა ამ ადგილას დამეწყო მუშაობა. მეც მქონდა ასეთი წარმოდგენა, რომ ახალ პოლიტიკურ ძალას, ახალგაზრდა პოლიტიკოსებს სურდათ გარკვეული ცვლილებები, ახალი პოლიტიკური კულტურის, ახალი ეკონომიკური ცხოვრების დამკვიდრება. იყო ასეთი ილუზია 2004 წლის გარიჟრაჟზე, რომ შეიძლებოდა ქართულ პოლიტიკურ ცხოვრებაში ახალი იმპულსი შემოსულიყო. მეც დავთანხმდი ამ წინადადებას და დავიწყე მუშაობა. თუმცა სულ რაღაც 11 თვე ვიმუშავე, რადგან შეუძლებელი იყო მუშაობის გაგრძელება. მერე უკვე, როდესაც „ნაციონალურმა მოძრაობამ“ ხელისუფლების მონოპოლიზია სრულიად მოახდინა, როდესაც ერთპარტიული მმართველობა დამყარდა საქართველოში, მათ, რასაკვირველია, აღარ უნდოდათ, ჰყოლოდათ იქ ადამიანი, რომელიც მათი გუნდის წევრი არ იყო.     

სატყეო დეპარტამენტში შემოგზავნილების შესახებ რას გვეტყვით, რომლებიც თქვენს გვერდით მუშაობდნენ? და ზოგადად, რას იტყვით იმ ე.წ. მრჩევლებზე, რომლებიც გარემოს დაცვის სამინისტროსაც ჰყავდა.

- იქ სხვადასხვანაირი ადამიანი მუშაობდა. პირადად მეც ძველი კადრების ნაწილი სამუშაოდ დავტოვე. თურმე ადამიანების ნაწილი ჩემს წინააღმდეგ მუშაობდა და შემდეგ უკვე სასამართლოში აკეთებდნენ იძულებით განცხადებებს, რადგან ისინი იძულებულნი იყვნენ, ასეთი ჩვენებები მიეცათ. თუმცა ადამიანების ისეთი ნაწილიც იყო, რომლებიც ამას დიდი სიამოვნებით აკეთებდნენ.

ანუ ე.წ. მიმაგრებულები და „დავერბოვკებულები“?

- ალბათ, ასეთი ადამიანები იყვნენ. „დავერბოვკებულს“ მათ მაინც ვერ ვუწოდებ, უბრალოდ, მათ თავიანთი სურვილები ჰქონდათ.

ემიგრაციაში წასვლიდან სამ დღეში, თქვენი სატელევიზიო მიმართვის გავრცელების შემდეგ ვანო მერაბიშვილმა დაგირეკათ და თქვენთან ურთიერთობის დალაგება სცადა.

- ტელეფონზე დამირეკა და მითხრა, მე არ ვიცოდი ეს ყველაფერი და აქ რომ ვრცელდება პრესით და ტელევიზიით ინფორმაცია, ჩვენ შეგვეძლო ამის შესახებ გვესაუბრაო.

ეს რისთვის გააკეთა?

- ალბათ, იმიტომ, რომ მე, სხვებისგან განსხვავებით, მათთვის მარტო ვერბალური ბრალდებები არ წამიყენებია, მე დოკუმენტურად ვადასტურებდი მათ მონაწილეობას სახელმწიფო ბიუჯეტის წინააღმდეგ მიმართულ ფინანსურ მაქინაციებში. ამიტომ, მათ აწუხებდათ ეს, თანაც, ეს პირველი შემთხვევა იყო, როცა ასეთი მძიმე დარტყმა მიიღეს და, ალბათ, უნდოდათ რამენაირად, ეს ყველაფერი დამთავრებულიყო. მხოლოდ ამიტომ დამირეკა მერაბიშვილმა, თორემ ის ჩემი ნაცნობი და მეგობარი არ ყოფილა.

მხოლოდ ის მითხრა მერაბიშვილმა, რომ მე არ ვიცოდი ეს ამბავი და იქნებ, შეწყდეს ასეთი განცხადებები ჩემს წინააღმდეგო, რაზეც მე ვუპასუხე, რომ მან მშვენივრად იცოდა და სწორედ ისინი ხელმძღვანელობდნენ ამ ყველაფერს.

 სატყეო სფეროს გარდა რაში გამოიხატებოდა მათი სახელისუფლო ინტერესები?

 - მე სატყეო სფეროსთან ახლა ძალიან შორს ვიქნები, ჩემი მთავარი თემა სატყეო თემა აღარ იქნება. მას შემდეგ გავიდა რვა წელი და ზუსტად არ ვიცი, სატყეო ბიზნესი ახლა რა მდგომარეობაშია. იმ პერიოდში მათ ჰქონდათ რაღაც ილუზია, რომ სატყეო ბიზნესით შეეძლოთ გარკვეული თანხების მობილიზება, მათ უნდოდათ ტყეების გაყიდვა. მე ამის წინააღმდეგი ვიყავი. მათ სურდათ ფინანსური მაქინაციების გაკეთება ცხინვალის ხელისუფლებასთან და მე ეს ერთპიროვნულად აღვკვეთე. მე არ ვიყავი მათი გუნდის წევრი, რაც მათ ერთპარტიული მმართველობა დაამყარეს 2004 წლის ნოემბრიდან. საერთოდ, მათი პარტიის წევრი არასდროს ვყოფილვარ. ამიტომ გადაწყვიტეს, ჩემთვის რაიმე დაებრალებინათ, ან დავეჭირე და ციხეში ჩავესვი, ან მოვეშორებინე. ეს იყო ძირითადი უთანხმოების მიზეზი.

რაც დღეს ხდება საქართველოში, ეს არის დასავლეთისგან შემოთავაზებული კოჰაბიტაციის, ანუ იძულებით მისჯილი თანაცხოვრების რეჟიმი, რომელშიც დღეს საქართველოს პოლიტიკური ელიტა იმყოფება. ეს მოხდა იმიტომ, რომ დასავლეთს, რომელმაც აიძულა სააკაშვილი, ეღიარებინა არჩევნების შედეგები, ამჯერად სურს, პოსტსაბჭოთა სივრცეში ხელისუფლების გადაბარების შემდეგ ნიმუშად ერთხელ მაინც იხილოს, რომ ძველი ხელისუფლება ციხეში არ წავიდეს და ასეთი პრეცენდენტი შეიქმნას. მათ სურთ, დაინახონ, რომ ხელისუფლება კი წავიდა მმართველობიდან, მაგრამ ის არ წავიდა ციხეში.

ეს იმიტომ, რომ სააკაშვილი დემოკრატიის ე.წ. შუქურა იყო?

- შუქურაზე არ არის საუბარი. როგორც ჩვენ გვაქვს დასავლეთის შესახებ ჩვენი წარმოდგენა, რომ იქ არის დემოკრატია და მასობრივად არ ირღვევა ადამიანის უფლებები, ისე დასავლეთიც ასეთნაირად ფიქრობს ყოფილი საბჭოთა ქვეყნების შესახებ, რომ, როცა ამ ქვეყნებში იცვლება ახალი ხელისუფლება, როგორც წესი, ძველი ხელისუფლება მიდის ციხეში. რაკიღა მათ საქართველოზე მაინც აქვთ ისეთი წარმოდგენა, რომ საქართველოში დემოკრატია უფრო განვითარებულია, ვიდრე სხვა პოსტსაბჭოთა სივრცეში, მათ უნდათ, იხილონ პრეცენდენტი, რომ ძველი ხელისუფლება, მართალია, წავიდა ხელისუფლებიდან, მაგრამ ის არ მიდის ციხეში და აგრძელებს პოლიტიკურ ცხოვრებას. მათ სურთ, ეს ციკლი, ხელისუფლებიდან წასვლა და ახალი ხელისუფლების მოსვლა არ იყოს სიკვდილ-სიცოცხლის საკითხი და ამის პრეცენდენტი შეიქმნას.

როგორც 2008 წელს ჩვენ ძალიან გვიჭირდა და გვსურდა, დაგვენახა დასავლეთისგან გამოწვდილი დახმარების ხელი, ისე მათი სურვილია, დაინახონ, რომ ამ ქვეყანაში ასეთი რამ ხდება. სხვათა შორის, მათი ეს სურვილი განხორციელებადია. შეიძლება, ამ მისჯილი იძულებითი თანაცხოვრებით გავძლოთ მანამდე, ვიდრე პოლიტიკურ ცხოვრებაში ცოტა ხნით კიდევ იარსებებს მიხეილ სააკაშვილი. როდესაც სააკაშვილისგან გათავისუფლდება „ნაციონალური მოძრაობა“, მათ შეუძლიათ, გააკეთონ რესტრუქტურიზაცია და ნაცმოძრაობა იყოს ერთ-ერთი ჩვეულებრივი ოპოზიციური პარტია. თუმცა ნაციონალები თავიანთი მოქმედებებით ძალიან სწრაფად მიდიან მარგინალიზაციისკენ და თუ ასე გააგრძელეს, დასავლეთი თავის სურვილს ვერ შეისრულებს, რომ იხილოს ერთი პარტია წასული, რომელიც მშვიდობიანად ოპოზიციურ რეჟიმში გადავა და გააგრძელებს თავის მოღვაწეობას.

როგორ შეაფასებთ საქართველოში დღეს არსებულ სიტუაციას?

- ეს არის პოსტსაბჭოთა სივრცეში უპრეცენდენტო აქტი, პოლიტიკური ნიშნით დაპატიმრებულებისა და პოლიტიკური დევნილების გათავისუფლება. აღნიშნული ნაბიჯი ხელს შეუწყობს საქართველოში სამოქალაქო საზოგადოების ფორმირებას, მომავალი პოლიტიკური თაობებისთვის ძალიან კარგი მაგალითი იქნება და ეს იქნება საზოგადოების გახსნილობისთვის დიდი იმპულსი. საქართველოში 2004 წელს გაფორმებული და დამყარებული ერთპარტიული მმართველობის შედეგები უკანასკნელი ცხრა წლის განმავლობაში ყველამ ვნახეთ. რაკი პოლიტიკურმა ოპოზიციამ სიტუაციის უსისხლოდ გადატეხვა არჩევნების საშუალებით შევძელით, ეს პოზიტიურია, ისევე, როგორც ახალი ხელისუფლების მიერ გადადგმული ნაბიჯები ეკონომიკის ადამიანისკენ შემობრუნების, სოციალურად ორიენტირებული საბაზრო ეკონომიკის, სოციალურად ორიენტირებული სახელმწიფო ბიუჯეტის შედგენის მხრივ, საიდანაც გამორიცხული იქნება ერთი პიროვნების ინტერესი, მისი გართობა, თვითმფრინავები და აუზები. ადამიანი უნდა იდგეს ხელისუფლებისა და სახელმწიფოს ინტერესების ცენტრში.

ალბათ, ემიგრაციიდან უფრო ობიექტურად ხედავდით რეალობას. ნაციონალების ლობისტების ჩარევის მიუხედავად, დასავლეთიდანაც ასე ჩანდა ეს ყველაფერი?

- „ნაციონალური მოძრაობის“ მმართველობის დროს ეს პარტია სახელმწიფო ხაზინიდან აღებული ფულით ქირაობდა ლობისტურ ჯგუფებს, რომლებიც ერთი პოლიტიკური ორგანიზაციის ლობირებას ახდენდნენ და არა საქართველოს ინტერესების გათვალისწინებას. წლების განმავლობაში მათ მოახდინეს საზღვარგარეთ არსებული საინფორმაციო ველის აბსოლუტური უზურპაცია, რისი გარდატეხაც „ქართულმა ოცნებამ“ მოახდინა. გასული წლის ზაფხულში საზღვარგარეთ ჩვენ შევძელით გარკვეული ბალანსის დაცვა, რათა მიგვეწოდებინა ობიექტური და სწორი ინფორმაცია. სწორედ იმ ფონდმა ჩაატარა კვლევები, რომელსაც მე ვხელმძღვანელობდი. სხვათა შორის, მაშინ „ნაცმოძრაობის“ ოფისში ჩაატარეს პრესკონფერენცია ნაციონალების სხვადასხვა ლიდერებმა - დარჩიაშვილმა, ჩიორა თაქთაქიშვილმა, გოკა გაბაშვილმა და მსგავსმა სახეებმა და აღნიშნეს, რომ ეს კვლევა, რომელიც ჩატარდა კომპანია „პენ შონ ბერლანდის“ მიერ, არ იყო მართალი. არადა, მაშინდელი კვლევის შედეგებსა და არჩევნების შედეგებს თუ გაიხსენებთ, იქ ცთომილება ძალიან ცოტაა. უფრო მეტიც, ეს კვლევა თითქმის ემთხვეოდა არჩევნების შედეგებს.

ბიძინა გიორგობიანისგან ტყუილი ჯერ არავის სმენია, მათი ტყულები კი მთელმა მსოფლიომ იცის. სწორედ მათი ტყუილების შედეგი იყო 2008 წლის ომი და ასევე, მათგან დანგრეული და ჩაოხრებული საქართველო, რაც დღეს სახეზეა. 2008 წლის აგვისტოს ომის შემდეგ  სერიოზულ პოლიტიკურ წრეებში სააკაშვილის სერიოზულ პოლიტიკოსად აღქმა უკვე შეწყვიტეს. თუმცა მას ჰყავს დაქირავებული რამდენიმე პიარ-ჯგუფი, რომლებიც მასზე მუშაობენ. ამით შეიძლება, ჯუჯა ადამიანი ვირტუალურად გოლიათად წარმოაჩინონ, მაგრამ როდესაც მას პირადად ნახავენ და მის მიერ გაკეთებულ საქმეს პირადად გაეცნობიან, დარწმუნდებიან, რომ ეს ტყუილია და მეორედ აღარ დაუჯერებენ ასეთ ტყუილებს.

თუმცა ისიც ფაქტია, რომ დასავლეთი გარკვეულ მიზეზთა გამო ამაზე თვალს ხუჭავდა.

- დასავლეთი ხუჭავდა თვალს, თუმცა უფრო ზუსტად, თვალს კი არ ხუჭავდა, უბრალოდ, დასავლურ დემოკრატიას არ ჰყავდა სანდო პოლიტიკური პარტნიორი საქართველოში. როგორც კი ასეთი პარტნიორი გამოჩნდა, მაშინვე მასთან მჭიდრო კონტაქტი დაამყარეს.

თქვენ ახსენეთ, რომ დათა ახალაია, მერაბიშვილი გდევნიდნენ.

- სააკაშვილის თანხმობით, ჩემს დევნას ახორციელებდა პირადად ვანო მერაბიშვილი, დათა ახალაია, ამირან მესხელი, მათი ხელქვეითებისა და ოფიცრების ხელშეწყობით.

კონკრეტულად რაში გამოიხატებოდა თქვენი დევნა?

- ჩემს წინააღმდეგ საქმის ფალსიფიცირებაში. იძულებისა და დაშინების წესით იუსტიციის სამინისტროს ექსპერტიზის ბიუროს თანამშრომელს აიძულებდნენ, ჩემს წინააღმდეგ ყალბი დასკვნა დაეწერა, მაგრამ მაინც ვერ მიაღწიეს სასურველ შედეგს. ასევე, ისინი აიძულებდნენ კონტროლის პალატის თანამშრომლებს, ჩემს წინააღმდეგ დაეწერათ ყალბი დასკვნა, რის საფუძველზეც მე დამაპატიმრებდნენ. მათ პირდაპირ ეუბნებოდნენ, დაგვიწერეთ ისეთი დასკვნა, რომ დავიჭიროთ გიორგობიანი. ახლა ეს ძალიან ვრცელი თემაა, თუ რა უნდა დაეწერათ მათ, თუმცა ეს ვერ მოახერხეს. ამიტომ ამ ადამიანების დევნა დაიწყეს, ისინი გაათავისუფლეს სამსახურიდან, ზოგიც პასუხისგებაში მისცეს, მათ ადგილას კი თავიანთი ხალხი დანიშნეს და შემდეგ მათ უკვე დაწერეს ის, რის საფუძველზეც ჩემს დაუსწრებლად ჩატარდა სასამართლო პროცესი და მე აბსოლუტურად ყალბი საქმის წარმოების საფუძველზე მომესაჯა ექვსი წელი პატიმრობა და შემდეგ უკვე ინტერპოლით გამოაცხადეს ჩემზე ძებნა.

თქვენ მაინც მოახერხეთ საქართველოს დატოვება. რამდენად პრობლემატური იყო ეს იმ პერიოდში?

- აეროპორტიდან არ დამიტოვებია საქართველო. მე ჩემმა მეგობრებმა გამაცილეს საქართველოდან.

ზურაბ ჟვანიას ფაქტორსაც შევეხოთ. თქვენ ჟვანიას გუნდის წევრი ბრძანდებოდით და აღნიშნეთ კიდეც, რომ ჟვანია გეუბნებოდათ, რომ მას ყოფილ პარტნიორებთან გაუცხოება დაეწყო.

- ამ თემაზე ბევრს არ ვილაპარაკებ. ეს სპეკულაცია გამოვა ჩემგან, რადგან რაიმე მნიშვნელოვან თემაზე ჟვანიასთან დაკავშირებით საუბარი არ მქონია. უბრალოდ, მან აღნიშნა, რომ არ ჰქონდა საამო ურთიერთობა ძველ პარტნიორებთან. თუმცა დარწმუნებული ვარ, რაც ადეიშვილმა და მერაბიშვილმა სპექტაკლი წარმოაჩინეს ზურას გარდაცვალების შემდეგ და ეს გაზის გაჟონვას დაუკავშირეს, ეს ცრუ ვერსიაა, რომელიც თავს მოახვიეს საზოგადოებას. ვფიქრობ, იქ არის ბევრი კითხვის ნიშანი და იმედი მაქვს, უახლოეს მომავალში გავიგებთ, სინამდვილეში რა მოხდა.

სამომამავლოდ ახალ ხელისუფლებასთან თანამშრომლობას თუ აპირებთ?

- დიდი ხანია, არ ვყოფილვარ საქართველოში. ჯერჯერობით ჩემი პირადი ნაცნობების, მეგობრების მონახულებით ვარ დაკავებული.     

პოლიტიკაში დაბრუნდებით?

- სიმართლე გითხრათ, წინასწარ განსაზღვრული რაიმე არ მაქვს.