„გიორგი გახარიას გამო „ქართული ოცნება“ უცბად აღმოჩნდა მოწყვლად სიტუაციაში და ოპოზიციამ, რომელიც ყველანაირად ჩიხში იყო შესული საერთაშორისო თუ ადგილობრივი კუთხით, უცბად გამხნევდა, ვხედავთ უკვე, რა განცხადებებსაც აკეთებენ“, - აცხადებს for.ge-სთან საუბრისას ანალიტიკოსი ზაალ ანჯაფარიძე.

ღარიბაშვილი, თუ გახარია - რომელი უფრო ანგარიშგასაწევი ფიგურაა იქიდან გამომდინარე, რომ ბოლო პერიოდში „ნაცმოძრაობა“ კვლავაც მოუთოკავი აღმოჩნდა, ისინი მელიას დაცვის საბაბით გამაგრდნენ „ნაცმოძრაობის“ ოფისში და ახალგაზრდები ფარად აიფარეს. ღარიბაშვილის ხელმეორედ გამოჩენა პრემიერის პოსტზე „ნაცების“ ფსიქოლოგიური გარდატეხვისთვისაა გამიზნული ?

- გახსოვთ გახარიას ნათქვამი პარლამენტში გამოსვლისას „ნაცმოძრაობის“ მიმართ - „მე თქვენ დაგამთავრებთ“, - ფაქტია, მან ვერ დაამთავრა „ნაცმოძრაობა“. თავის დროზე ირაკლი ღარიბაშვილი იმიტომ გადააყენეს პრემიერმინისტრობის თანამდებობიდან, რომ ის ზედმეტად ხისტი იყო „ნაცმოძრაობის“ მიმართ და „ქართული ოცნების“ კოალიციაში მყოფ ზოგიერთ პოლიტიკურ ძალას ეს არ მოეწონა, დააბეზღეს დასავლეთთან და ბიძინა ივანიშვილი აიძულეს, ის გადაეყენებინა, წინააღმდეგ შემთხვევაში, იმუქრებოდნენ კოალიციის დატოვებით. ირაკლი ღარიბაშვილი არის ის ფიგურა, რომელიც ყველანაირად შემოწმებული, გადამოწმებულია „ქართული ოცნების“, ბიძინა ივანიშვილის ერთგულების კუთხით, მისგან ასეთი სიურპრიზები არ არის მოსალოდნელი, როგორც გახარიამ შესთავაზა „ოცნებას“. თუმცა იყო თუ არა მისი გადადგომა სიურპრიზი, ჩვენ არ ვიცით, რადგან მისი გადადგომის რეალურ მიზეზებს, ალბათ, მოგვიანებით გავიგებთ. თქვენს კითხვაზე, გახარია, თუ ღარიბაშვილი, ალბათ, უფრო ღარიბაშვილი.

თქვენ გაიხსენეთ გიორგი გახარიას ნათქვამი „ნაცმოძრაობის“ მიმართ,  მაგრამ, ამავდროულად, ჩვენ გვახსოვს გახარიას მეორე ნათქვამიც - „პარლამენტში ნაცმოძრაობის გარეშე მოსაწყენია“... რა გარანტიაა, რომ ის ძალები, რომლებმაც ერთხელ უკვე დააბეზღეს დასავლეთთან ირაკლი ღარიბაშვილი, ახლაც იმავეს არ გააკეთებენ და ისევ არ მოუწევს „ოცნებას“ მისი ჩამოშორება პრემიერობიდან?

- გამორიცხული არაფერია, ჩვენ ვართ არშემდგარი სახელმწიფო, მთლიანად დამოკიდებული ჩვენს საერთაშორისო პარტნიორებზე, მათ დახმარებებზე, კეთილ ნებაზე. თითქოს გვაქვს საელჩოები, საერთაშორისო ორგანიზაციებში წარმომადგენლობა, მაგრამ რეალურად დამოუკიდებელი ქვეყანა არ ვართ, ჩვენი სუვერენიტეტი ძალზე შეზღუდულია. აქედან გამომდინარე, ჩვენზე ზემოქმედება მარტივია. ის, რის უფლებასაც აძლევენ უცხოელი ელჩები საქართველოში საკუთარ თავს, ამას ვერ მისცემენ სხვა შემდგარ სუვერენულ სახელმწიფოში. ასეთ მოწყვლად კვაზი-სახელმწიფოსთვის მარტივია საკუთარი ნების თავზე მოხვევა. ღარიბაშვილის ახლა დანიშვნა, მე მგონი, „ქართული ოცნების“ ერთგვარი ძალის დემონსტრირების მაჩვენებელია, რომ საკუთარი ამომრჩეველი არ დაკარგონ, რადგან შექმნილ სიტუაციაში გახარიას გადაწყვეტილებამ ძალიან მძიმე დარტყმა მიაყენა „ქართულ ოცნებას“ პოლიტიკური, რეპუტაციული, და შესაძლოა ელექტორალური კუთხითაც. არ მინდა, კონსპირაციულ თეორიებში წავიდე, რადგან ინფორმაცია მჭირდება ამ ყველაფრის გასაანალიზებლად, ყოველ შემთხვევაში, ამის მყისიერი შედეგია, რომ „ქართული ოცნება“ უცბად აღმოჩნდა მოწყვლად სიტუაციაში და ოპოზიციას, რომელიც ყველანაირად ჩიხში იყო შესული საერთაშორისო, თუ ადგილობრივი კუთხით, უცბად მეორე სუნთქვა გაეხსნა. ვხედავთ ახლა, რა მკვეთრ განცხადებებსაც აკეთებენ. ეს არაფერზე მიგვანიშნებს? გახარიას ჟესტი მათთვის ერთგვარი სტიმული იყო, რომ გააქტიურებულიყვნენ.

რით ახსნით, რომ გიორგი გახარია არა მხოლოდ პრემიერობიდან გადადგა, არამედ დატოვა გუნდიც, პარტიაც.

- გასაგებია, თუ პრემიერობიდან მიდიხარ, უნდა დატოვო პარტიაც. ღარიბაშვილი რომ გადადგა პრემიერობიდან, მანაც დატოვა პარტია და მერე დაბრუნდა. გახარია არ ეთანხმებოდა პარტიის გადაწყვეტილებას ნიკა მელიასთან დაკავშირებით და დატოვა პარტია, ეს სავსებით ლოგიკურია.

ხომ არ აჯობებდა, გიორგი გახარიას ნიკა მელიას საბაბით პრემიერის პოსტის დატოვების ნაცვლად სხვა თემა გამოეყენებინა? თუნდაც ეთქვა სიმართლე, იყო თუ არა კობახიძესთან მიმართებით დაპირისპირება?

- რთულია ამის თქმა, არა მგონია, კობახიძესთან შესაძლო დაპირისპირების გაცხადება საჯაროდ მომგებიანი ყოფილიყო. უბრალოდ, გახარიამ გააკეთა ისეთი განცხადება, რომელიც უფრო გასაგები იქნებოდა საერთაშორისო პარტნიორებისთვის, მან არ მოიჭრა ბოლომდე გზები, რადგან შესაძლოა, პოლიტიკაში დაბრუნდეს. როგორც ვნახეთ, მისი განცხადება პოზიტიურად შეაფასეს ოპოზიციაში, საერთაშორისო პარტნიორებმაც აღნიშნეს, ხედავთ, პრემიერმა გადადგა ასეთი ნაბიჯი და ამით პოლიტიკური კრიზისის განმუხტვას შეეცადაო.

ხომ არ იყო ზარი საერთაშორისო პარტნიორების მხრიდან გახარიასთან მიმართებით, რომ ამ ეტაპზე ჩამოშორებოდა პოლიტიკას?

- იყო თუ არა ზარები, ნებისმიერ შემთხვევაში, ეს ნაბიჯი მას საერთაშორისო არენაზე პოზიტივში ჩაეთვლება, შესაძლოა, ამაზეც იყო გათვლა. დადის ინფორმაცია, რომ მან შეიძლება საკუთარი პოლიტიკური ძალა შექმნას. ვერ გეტყვით, ეს ვერსია რამდენად შეესაბამება სინამდვილეს. ყოველ შემთხვევაში, გახარიას არ უნდოდა, რომ, თუ პოლიცია ნიკა მელიას დასაკავებლად კანონით გამართლებულ ძალისმიერ ქმედებებს დაიწყებდა, რასაც შეიძლება ვიღაცის დაზარალდება მოჰყოლოდა, საბოლოოდ მასზე შეეწმინდათ ხელები და ეთქვათ, რაკი პრემიერ-მინისტრი ხარ, შენ ხარ ამ ყველაფერზე პასუხისმგებელიო, როგორც ეს 20 ივნისს მოხდა, როცა ის შს მინისტრი იყო, მიუხედავად იმისა, რომ მე არ ვიზიარებ მოსაზრებას, თითქოს 20 ივნისს არ უნდა გაკეთებულიყო, რაც გაკეთდა, მიუხედავად იმისა, რომ ძალის გადამეტების ცალკეული შემთხვევები იყო. მე ვფიქრობ, იმ დროს ძალის გამოყენება ლეგიტიმური იყო, ასე თუ ისე, საზოგადოების ერთ ნაწილში მიჩნეულია, რომ ეს იყო გახარიას მძიმე ტვირთი. გასაგებია, რომ მელიას დაკავების მცდელობისას ნაციონალები ამჯერადაც ყველანაირად შეეცდებოდნენ, მეტი ადამიანი დაზარალებულიყო. გიორგი გახარიამ არ მოისურვა კიდევ ერთი ტვირთის აკიდება და ამიტომაც გადადგა ასეთი პრევენციული ნაბიჯი.

ეს ადასტურებს, რომ 20 ივნისსაც მის მიერ ბრძანება არ გაცემულა?

- ვერ გეტყვით, თუმცა მაქვს ინფორმაციები იმის თაობაზე, რომ იქ ადგილზე გარკვეულმა მეთაურებმა გამოიჩინეს თვითშემოქმედება. ასეა თუ ისე, მას, როგორც შს მინისტრს დააკისრეს ძირითადი პასუხისმგებლობა და, როგორც ჩანს, მან ჩათვალა, კიდევ ასეთი მძიმე ტვირთის ხელმეორედ აღება მისთვის მიზანშეწონილი არ იქნებოდა. შესაძლოა, მისი გადაწყვეტილების უკან სხვა მიზეზებიც იყოს, მაგრამ, რაც არ უნდა ყოფილიყო მიზეზი, შედეგი არის ის, რომ დღეს „ქართული ოცნება“ გახარიას გადაწყვეტილების გამო პოლიტიკურად უხერხულ სიტუაციაში აღმოჩნდა. როგორ დააღწევს თავს ამ სიტუაციას, ეს არის მთავარი.

შეიძლება ვიფიქროთ, რომ „ნაცმოძრაობაც“ შედის გახარიას სამომავლო პოლიტიკურ თვალსაწიერში?

- მე ასე არ ვფიქრობ, თუმცა რაღაც წარმოუდგენელი ვერსიები მოვისმინე ამის თაობაზე. თუ ეს მოხდა, ალბათ, ის საკუთარ თავს პოლიტიკურ განაჩენს გამოუტანს.

ღარიბაშვილის დროს დაიწყება დაჭერები?

- დაჭერების რა მოგახსენოთ, მე ვფიქრობ, ერთადერთი, ვინც უნდა დაიჭირონ, ეს არის ნიკა მელია. ის არის კრიმინალი და არ შეიძლება, საქართველოში დამკვიდრდეს ისეთი პრაქტიკა, რომ, თუ შენ ხარ პოლიტიკური ლიდერი, კანონზე მაღლა დგახარ. თუ ეს პრეცედენტი შეიქმნა, სხვა პოლიტიკური ლიდერებიც მიმართავენ მსგავს ქმედებას.

მელიას მოქმედებების ფინალი რა არის - სააკაშვილის ჩამოსვლა საქართველოში, რომელიც რატომღაც გვარწმუნებს, რომ საქართველოში თანამდებობას არ დაიკავებს?

- მათი საბოლოო მიზანია, სააკაშვილი ჩამოიყვანონ საქართველოში, და როგორ ფიქრობთ, ის თანამდებობის გარეშე დაიტოვებს თავს? მაგრამ ამისთვის საჭიროა, ჯერ ხელისუფლებაში მოვიდნენ, ხელისუფლებაში მათი მოსვლა კი გამორიცხულია. ამისთვის საკმარისი ელექტორალური მხარდაჭერა არ აქვთ.