უფლებადამცველ ნანა კაკაბაძეს ნაციონალები 90-იან წლებს ახსენებენ და აცხადებენ, რომ 8 თებერვლის დაპირისპირების სულისჩამდგემალი, სხვებთან ერთად, ისიც იყო. თავის მხრივ, „ყოფილი პოლიტპატიმრები ადამიანის უფლებებისთვის“ თავმჯდომარე ამ ცილისწამებისთვის სასამართლოში სარჩელის შეტანას აპირებს.

For.ge ნანა კაკაბაძეს ესაუბრა.

- იმ აღვირახსნილი კამპანიის გამო, რაც ატეხილია დღეს „ნაციონალური მოძრაობის“ აქტივისტების თუ სხვების მხრიდან, ვაპირებ სარჩელის შეტანას. ჩემი სარჩელის ადრესატები იქნებიან გიგი უგულავა, ვანო მერაბიშვილი, ირმა ნადირაშვილი, ჩიორა  თაქთაქიშვილი, გივი თარგამაძე. მათ კიდევ ახალ-ახალი სახეებიც დაემატებიან, ვინც სარჩელის შეტანის დროისთვის ცილს დაგვწამებს.

ყოფილი ხელისუფლების წარმომადგენლები თქვენ  „მხედრიონთან“ კავშირს გიხსენებენ, ასევე, თქვენი ბინის შეძენის, პოლიტპატიმრების თემით აპელირებენ.

- ამის მიზეზი პროცესის დისკრედიტაციაა, რაც არ ემყარება არანაირ ჭეშმარიტებას. ეს ზუსტად იციან, რადგან არსებობს საჯარო რეესტრი და გადამოწმების ათასი საშუალება აქვთ. მათ ზუსტად იციან, რასაც ლაპარაკობენ, უბრალოდ, ამას ლაპარაკობენ მიზანმიმართულად. ჩვეულებრივი რიგითი მოქალაქეები ხომ არ დაიწყებენ ამ ინფორმაციის გადამოწმებას?! ამიტომ მათი მხრიდან ეს ითქვა და დამთავრდა.

მხედრიონთან კავშირს რაც შეეხება, რას უპასუხებთ მათ ბრალდებებს?

- ამას ვუპასუხებ იმით, რომ არასდროს დამიმალავს, რომ ჩვენ ყველა ადამიანის  უფლებადაცვითი ორგანიზაცია ვართ და აბსოლუტურად ყველა საქმეში ვიყავით ჩართული. მას შემდეგ, რაც დაიშალა საბჭოთა კავშირი, ვიცავდით არა მარტო „მხედრიონს“, არამედ ყოფილ კომუნისტებსაც, რომლებიც საბჭოთა კავშირის დაშლის მერე ციხეებში ისხდნენ, შემდეგ ვიცავდით ზვიადისტებს, როდესაც უკვე  ზვიადისტები ისხდნენ ციხეში, „მხედრიონელებს“, როდესაც „მხედრიონელები“ იხდიდნენ სასჯელს. ბუნებრივია, გვიყალიბდებოდა ურთიერთობები მათთან, მაგრამ საოცარია, რომ ყოფილი ხელისუფლება როდესაც ვიღაცას ეუბნება, რომ შენ „მხედრიონელებთან“ ახლოს იყავი, თვითონ დღეს არიან მათთან ახლოს. მე არ ვიცნობ არცერთ „მხედრიონელს“, რომელიც არის ცოცხალი, არის საქართველოში და ნაციონალებს არ ჰყოლოდეთ ხელისუფლებაში.

ნიკა რურუას და სხვებს გულისხმობთ?

- დიახ, ნიკა რურუა, „ზარალა“, „ტილიკა“, „სილქნეტის“ მფლობელები. ვინც „მხედრიონში“ იყვნენ და გადიოდნენ ამ საქმეებში, აბსოლუტურად ყველანი ჰყავთ ხელისუფლებაში. თუ მიუღებელია ეს ხალხი, ხელისუფლებაში რატომ ჰყავთ? იქნებ, ამ ადამიანების ხელისუფლებაში ყოფნა მათთვის მისაღებია, სხვის წინააღმდეგ კი მათი გამოყენება მათივე პიარისთვის კარგია?! ახლა ჯაბა გარდაცვლილია, მაგრამ ვინც ცოცხალია, ნაციონალებს ყველანი ხელისუფლებაში ჰყავთ.

ისინი თქვენს მიერ ბინის შეძენის ფაქტსაც შეეხნენ და, ასევე, პოლიტპატიმართა ე.წ. „კასირობა“ დაგწამეს.

- თავისთავად ეს აბსურდია, მათ ხაზი გაუსვეს, ჭავჭავაძის პროსპექტზე იყიდა ბინაო, არადა, ჭავჭავაძის პროსპექტზე ვცხოვრობ 1962 წლიდან, რადგან დავიბადე, გავიზარდე და დავბერდი ამ პროსპექტზე. უბრალოდ, ისე მოხდა, რომ მას შემდეგ, რაც ჩვენი ოჯახი გაიზარდა, ჩემმა ძმამ ცოლი მოიყვანა, ბავშვები გაუჩნდა, გავიყავით და მე გადმოვედი ჭავჭავაძის №37-ში, ჩემი ძმა დარჩა №68-ში, დედაჩემი კი ბებიაჩემისა და ბაბუის სახლში გადავიდა. თანაც, ეს მოხდა ცხრა წლის წინ და არა ახლა, როგორც ესენი ლაპარაკობენ, თითქოს რამდენიმე დღის წინ ვიყიდეთ ბინა. არა მგონია, ცხრა წლის წინ ამათ წინასწარ ჩაედოთ ინვესტიცია იმისთვის, რომ ცხრა წლის შემდეგ პოლიტპატიმრობა დასჭირდებოდათ. ამიტომ ნაციონალებმა ზუსტად იციან, რომ სისულელეს ლაპარაკობენ, ამისთვის არსებობს საჯარო რეესტრი. ამის გაგებას რა უნდა? თვითონ მართლაც არ აქვთ გაგების პრობლემა, არამედ საზოგადოების შეცდომაში შეყვანა სურთ. რაც შეეხება იმას, თითქოს, პოლიტპატიმრები ფულადი დაინტერესების გამო გამოვიდნენ ციხიდან, ეს ბრალდება მარტო მე და ეკა ბესელიას არ გვეხება. ეს ყველაზე მეტად ეხება ამ ადამიანებს, პოლიტპატიმრებს, რომლებიც დღემდე იდევნებიან. მათ ეუბნებიან, თითქოს ისინი ყიდულობდნენ პოლიტპატიმრობას, ანუ თურმე ისინი არ ყოფილან პოლიტპატიმრები, უბრალოდ, ეს სტატუსი უყიდიათ ისე, როგორც სუპერმარკეტში რაღაც პროდუქტს იყიდი. ბუნებრივია, უდანაშაულოდ ციხეებში გაშვებული, ნაწამები, გაუბედურებული ხალხი ჯერ ისედაც გამწარებულია და პლუს, კიდევ ეუბნები, რომ პოლიტპატიმრობის სტატუსს ყიდულობდიო, ეს შეურაცმხყოფელია.

ირმა ნადირაშვილი თქვენს დაკავებას მოითხოვდა. 8 თებერვლის დაპირისპირებაში თქვენი როლი როგორი იყო?

- 8 თებერვალს მე ვიყავი ალყაში მიშა სააკაშვილის ზონდრების მიერ. სამი ადამიანი იყო მოწმე, მათ შორის, ერთი პოლიციელი, რომელმაც დაინახა, რაც ხდებოდა და პირდაპირ შემოიჭრა ამ ალყაში და მათ ეუბნებოდა, რას შვებით, ამას რამე რომ მოუვიდეს, გარეთ გახედეთ, რა ხდებაო. მართლაც, პოლიტპატიმრები უკვე კიოდნენ და იქიდან მეძახდნენ - ნანა, ნანა! ვერ გებულობდნენ, რატომ ვერ გამოვდიოდი იქიდან, ისეთი აჟიოტაჟი ატყდა.      

შეგნებულად მოგაქციეს ალყაში?
- რა თქმა უნდა, - შეგნებულად, რომ ჩემთვის საფრთხის შექმნის გამო კიდევ უფრო დაძაბულიყო და გამწვავებულიყო სიტუაცია. ამიტომ ყველაფერი გავაკეთე იმისთვის, რომ ალყიდან გამომეღწია. სამი პოლიტპატიმარი იყო კიდევ იქ დარჩენილი, რომლებიც ვერ გააგდეს, თორემ იმ სამსაც აგდებდნენ გარეთ, რომ რაღაცნაირად მარტო დავრჩენილიყავი. მაინც მოვახერხე გარეთ გამოღწევა. ალყიდან გამოსვლის შემდეგ პოლიტპატიმრებმა რომ დამინახეს, რაღაცნაირად შენელდა დაპირისპირება. ასე რომ, ყოფილი ხელისუფალნი ყველა მიმართულებით იწვევდნენ დაძაბულობას.

თუ დაინახეთ, გარეთ რა ხდებოდა?

- მე ვერაფერი დავინახე, გარეთ ეს პროცესები უკვე დაწყებული იყო. კარგა ხანს, 15-20 წუთი ვიყავი შესასვლელ კარებთან მიმწყვდეული. მოგვიანებით გზა ცოტათი გაიხსნა და იმ მომენტში ჩამოვედით კიბიდან. არ ვიცი, ეს ამ შეხლა-შემოხლამ  განაპირობა თუ უცხოელები შედიოდნენ, მაგრამ ამ გზით ვისარგებლე, იქვე იდგა მანქანა, იქამდე მიავაღწიე და უკვე პრობლემები აღარ იყო.

შენობაში თუ შეაღწევდით, პრეზიდენტისთვის რა კითხვის დასმას აპირებდით?

- მე არც ვიყავი სიაში. უბრალოდ, მე პოლიტპატიმრების შესვლას ვლობირებდი, რაც მანანა მანჯგალაძესაც ვთხოვე. თავისთავად ის ფაქტი, რომ ჩვენ ვითომ ჩასაშლელად ვიყავით მისული, ვერაფრით აიხსნება. პირიქით, მანჯგალაძეს და ბანძელაძეს სიებს ვატანდით, რომ დავეშვით შენობაში და ამ დროს შეხვედრის ჩაშლას ვაპირებდით?! ეს ხომ პარადოქსი და ურთიერთგამომრიცხავია. პოლიტპატიმრებს კითხვების დასმა უნდოდათ - რატომ გვაწამეთ? რატომ წაგვართვით ქონება? რა განაჩენები გამოგვიტანეთ? ამისთვის ვისხედით ციხეებში უდანაშაულო ადამიანები?!

ირმა ნადირაშვილი რას გერჩით? პირადი დაპირისპირება აქვს თქვენთან, როცა აცხადებს, 1991-1992 წლებშიც ასე დაიწყო შიდა დაპირისპირება და მაშინაც ყველაფერს ნანა კაკაბაძე, ჯაბა იოსელიანის მარჯვენა ხელი ორგანიზატორობდაო.

- „რუსთავი 2“-ში როდესაც მუშაობდა, მაშინ ვიცნობდი და საკმაოდ ნორმალური ურთიერთობა გვქონდა. მან ახლა იცის, რომ პოლიტპატიმრის სტატუსის დაფიქსირება ყველაზე სერიოზული განაჩენია „ნაციონალური მოძრაობისთვის“. ფაქტობრივად, მათთვის სასიკვდილო განაჩენია, რომ ეს ადამიანები არსებობენ და დემოკრატიის შუქურის მაგივრად, მიღებულია რეპრესიული რეჟიმი, რისი აღიარებაც მოხდა. მათ იციან ჩემი როლი და წვლილი ამ საქმეში და ბუნებრივია, ამან აქცია მტრად. თორემ ნადირაშვილს გამარჯობითაც ძლივს ვიცნობ, ჩემთან რა დაპირისპირება უნდა ჰქონდოდა?!