აფთიაქებს წამლების ორიგინალური შეფუთვის დაშლისა და გადაფუთვის უფლება მიეცათ. ჯანდაცვის სამინისტროს დეკემბერში მიღებულმა გადაწყვეტილებამ მოსახლეობაში დიდი უკმაყოფილება გამოიწვია. განსაკუთრებით - სოციალურად დაუცველ ფენაში, ვინაიდან საზოგადოების ამ ფენას მთლიანი შეფუთვის მედიკამენტის შეძენის შესაძლებლობა არ ჰქონდათ. ამიტომ მომხმარებელთა უმრავლესობას ზოგიერთი მაღალფასიანი დასახელების წამლის ყიდვისგან თავის შეკავება მოუწევდა. ეს კი, რიგ მკურნალობის პროცესს შეუძლებელს გახდიდა.
ამგვარ უხერხულობას აღიარებდა ჯანდაცვის სამინისტროც. ამიტომ გადაწყდა, რომ აფთიაქებში ფარმაცევტული პროდუქციის დაშლა-დაფასოებისა და გაცემის წესებს ჯანდაცვის მინისტრის ბრძანება დაარეგულირებდა. დაახლოებით თვენახევრის შემდეგ სპეციალურ ბრძანებას დავით სერგეენკომ ხელი უკვე მოაწერა. ახლა უკვე გარკვეულია რომელი წამლის დანაწილება შეიძლება და რა ფორმით.
ავტორიზებულმა აფთიაქებმა და სავაჭრო ობიექტებში გახსნილმა აფთიაქებმა, ჯანდაცვის მინისტრის ბრძანების აღსრულება ერთ თვეში უნდა უზრუნველყონ.
ბრძანების მიხედვით, აფთიაქებში წამლების მცირე რაოდენობად გადაფასოება და ხელახალი ეტიკეტირება ნებადართულია მხოლოდ წამლის რეალიზაციის მომენტში.
მეორეული შეფუთვის დაშლას და ორიგინალური პირველადი შეფუთვით გაცემას ექვემდებარება სამკურნალო საშუალებები შემდეგი პირველადი შეფუთვით: ამპულა, ფლაკონი, პაკეტი, წინასწარ შევსებული შპრიცი, კარტრიჯი, კალამი, ფირფიტა/ ბლისტერი, მათ შორის, დაშვებული ხდება ფირფიტის/ბლისტერის დაჭრა.
დაუშვებელია ნიტროგლიცერინის შემცველი ფარმაცევტული პროდუქტებისა და შუშხუნა ტაბლეტების რეალიზაცია ორიგინალური პირველადი შეფუთვის დაშლით.
მოთხოვნის შემთხვევაში, აფთიაქებმა უნდა უზრუნველყონ მომხმარებლისათვის ფარმაცევტული პროდუქტის გამოყენების ინსტრუქციის ქართულენოვანი ვერსიის მიწოდება, ასევე თვალსაჩინო ადგილას უნდა განათავსოს ინფორმაცია, ქართულენოვანი ინსტრუქციის პაციენტზე გაცემის შესაძლებლობის შესახებ.
ფარმაცევტული პროდუქტის ხელახალი შეფუთვა და ეტიკეტირება სპეციალისტმა უნდა გახორციელონ ნიღბისა და ხელთათმანის მეშვეობით. ქიმიური კონტამინაციის თავიდან ასაცილებლად, სათვლელი მოწყობილობა საჭიროებს გასუფთავებას მშრალი ფუნჯით, ხოლო შემდეგ, ყოველი ახალი დასახელების შემოუგარსავი ტაბლეტის შემთხვევაში – ხელსაწყოს ინსტრუქციაში მითითებული მეთოდით ან 70%-იან ეთილის სპირტში დასველებული დოლბანდით.
ხელახალი შეფუთვის ეტიკეტზე დატანილი უნდა იქნეს შემდეგი ინფორმაცია: ფარმაცევტული პროდუქტის სავაჭრო დასახელება, დოზა, სერიის ნომერი, მწარმოებლის მიერ მინიჭებული ვარგისობის ვადა, გაცემის თარიღი, ფარმაცევტული პროდუქტის გამოყენების რეკომენდებული ვადა, შენახვის განსაკუთრებული პირობები, პაციენტის მოთხოვნის შემთხვევაში, მწარმოებელი ქვეყანა ან/და მწარმოებელი.
ხელახალი შეფუთვით ფარმაცევტული პროდუქტის გამოყენების რეკომენდებულ ვადად განისაზღვრება რეალიზაციიდან 6 თვე. თუ ფარმაცევტული პროდუქტის ვარგისობის ვადა რეალიზაციის მომენტისთვის ნაკლებია 6 თვეზე, მაშინ ფარმაცევტული პროდუქტის გამოყენების რეკომენდებულ ვადად განისაზღვრება მწარმოებლის მიერ მინიჭებული ვარგისობის ვადა.
თუკი მინისტრის ბრძანება არ შესრულდა და რომელიმე აფთიაქში დარღვევები გამოვლინდა, ასეთ შემთხვევაში ჩაითვლება, რომ ფარმაცევტული ობიექტი არღვევს „წამლისა და ფარმაცევტული საქმიანობის შესახებ“ კანონს. ეს კი აუცილებლად გამოიწვევს აფთიაქების ფინანსურად დაჯარიმებას.
