თურქეთის სასამართლომ ჟურნალისტ ჯამალ ჰაშაღის მკვლელობის საქმის განხილვა განაახლა. სასამართლო საქმეში საუდის არაბეთის მოქალაქეების მონაწილეობას განიხილავს, - ამის შესახებ BBC წერს.

ჟურნალისტის მკვლელობის საქმეში ბრალი 20 არაბს აქვს წარდგენილი. 2 მათგანს - საუდის არაბეთის პრინცის მრჩეველ საუდ ალ-ქაჰთანის და დაზვერვის ხელმძღვანელის მოადგილე აჰმად ასირის მკლელობისადმი წაქეზებაში ადანაშაულებენ, დანარჩენ 18-ს კი განსაკუთრებული სისასტიკით ჩადენილ განზრახ მკვლელობაში.

„დღეს სტამბოლში ჯამალის მკვლელობის სასამართლო პროცესი დაიწყო. პროცესზე მე მოწმედ წარვდექი, მაგრამ 20 არაბი ეჭვმიტანილი - არა. ვიმედოვნებ, რომ ეს სასამართლო პროცესი სიმართლეს გამოააშკარავებს იმის შესახებ, თუ სადაა ჯამალის ცხედარი და ვინ დგას ამ მკვლელობის უკან. არ გავჩერდები, ვიდრე სამართალს არ მივაღწევთ“ - წერს Twitter-ის გვერდზე ჟურნალისტის საცოლე, ჰატიჯე ჩენგიზი.

ჯამალ ჰაშაღი სტამბოლში, საუდის არაბეთის საკონსულოში 2018 წლის ოქტომბერში მოკლეს. ის საუდის არაბეთის მთავრობას მწვავედ აკრიტიკებდა. მოკლული ჟურნალისტის დანაწევრებული სხეული ამ დრომდე არ არის ნაპოვნი.

8 თებერვალს გაერომ თავისი ექსპერტების დასკვნა გამოაქვეყნა, რომლის თანახმად, საუდელი ჟურნალისტის ჯამალ ჰაშაღის მკვლელობა საუდის არაბეთის მაღალჩინოსნებმა დაგეგმეს და შეასრულეს. საუდის არაბეთის საგარეო საქმეთა სამინისტრო გაეროს გამოძიების დასკვნის შედეგებს უარყოფს.

​​