„ბატონი რურუა არ არის ნახსენები ამ შეთანხმებაში. ეს არის ძალიან მკაფიო და ყველას შეუძლია ამის წაკითხვა“, - გერმანელი დიპლომატის ეს განცხადება, რადიკალური ოპოზიციის მხრიდან ანტიდასავლური კამპანიის დაწყების მიზეზი გახდა. პირველი „მშრომელი“ შალვა ნათელაშვილი აცხადებს, რომ „გერმანიის სამარცხვინო ელჩი საკუთარ ბიზნესზე მუშაობს, რომელიც ფინანსდება ივანიშვილის რეჟიმისგან“.

ნათელაშვილის განცხადებას იმეორებენ „ნაციონალური მოძრაობის“ და „ევროპული საქართველოს“ წევრები. ქართული ოპოზიციის შეურაცხმყოფელი განცხადებები, მიუღებელია საპარლამენტო ოპოზიციის იმ ნაწილისთვის, რომელიც „ქართულ ოცნებას“ გაემიჯნა და პარლამენტში ოპოზიციის სტატუსით გააგრძელა მუშაობა. for.ge-სთან საუბრისას დეპუტატი გედევან ფოფხაძე აცხადებს, რომ დიპლომატების დიფერენცირებას და დახარისხებას თავი უნდა დავანებოთ.

for.ge გედევან ფოფხაძეს ესაუბრა.

დიპლომატიურ კორპუსზე თავდასხმამ სისტემური ხასიათი მიიღო. განსაკუთრებით, ოპოზიციის თავდასხმის ობიექტი არის გერმანიის ელჩი. როდესაც ქვეყანას გაცხადებული აქვს, რომ მისი საგარეო კურსი არის ევროპული, ასეთი დაპირისპირება და შეურაცხყოფა, რასაც ეს დღეებია ვაკვირდებით, რამდენად რთულ მდგომარეობაში აყენებს სახელმწიფოს, მით უმეტეს, ამას აკათებს პოლიტიკური პარტია, რომელიც ამბობს, რომ არის პროევროპული, ხოლო სხვა დანარჩენი და მათ შორის ხელისუფლება - პრორუსული?

გედევან ფოფხაძე: რა საგარეო კურსიც უნდა გქონდეს გაცხადებული, მე მგონია, რომ დიპლომატიურ კორპუსთან უნდა გქონდეს ძალიან ფრთხილი დამოკიდებულება. ზოგადად, ქვეყნის საგარეო პოლიტიკა ორიენტირებული უნდა იყოს მეგობრობაზე და ეს არის ქართული სახელმწიფოს ინტერესი. ჩვენ რაც უფრო მეტი მოკავშირე გვყავს, უფრო მეტად ვართ დაცული არაღიარების პოლიტიკაში და უფრო მეტი მხარდაჭერა გვაქვს. ჩვენ დღეს ვახერხებთ იმას, რომ პოსტშედეგი მიღწეულია არაღაირების პოლიტიკაზე, ესეც ჩვენი დიპლომატების და სხვა ქვეყნებთან ჩვენი მეგობრული ურთიერთობების შედეგია.

ისედაც, არა მგონია, რომ სწორი სტანდარტი იყოს, მე თუ არ მომწონს რომელიმე დიპლომატი, ან მისი პოზიცია, თავს ვესხმოდე. თუ მომწონს ვიყენებ და ვამბობ, რომ დიპლომატიურ კორპუსს ასეთი პოზიცია აქვს და თქვენ რატომ არ უწევთ ანგარიშს? ამასთან დაკავშირებით უნდა იყოს ერთიანი სტანდარტი. სახელმწიფოებრივი ინტერესი უნდა ითვალისწინებდეს იმას, რომ ჩვენ დიპლომატიურ კორპუსთან უნდა გვქონდეს კონსტუქციული, დიპლომატიური და ქართული სახელმწიფოს სტრატეგიული ინტერესებიდან გამომდინარე დამოკიდებულება.

ძალიან რთულია შალვა ნათელაშვილის გამონათქვამებზე ადეკვატური კომენტარის გაკეთება, მაგრამ ნათელაშვილმა უმძიმესი ბრალი წაუყენა გერმანიის ელჩს, თქვა, რომ გერმანიის ელჩს აფინანსებს ბიძინა ივანიშვილი და, რომ მას ბიზნესი აქვს საქართველოში. იგივე პათოსი გააჟღერა „ევროპულმა საქართველომ“ და „ნაციონალურმა მოძრაობამ“. შეიძლება ეს შეფასდეს, როგორც გაერთიანებული ოპოზიციის საერთო პოზიცია?

- პოლიტიკოსი, რომელიც გადადის ასეთ ისტერიკაში, მასთან რა თემებზე შეიძლება საერთოდ ილაპარაკო?! შალვა ნათელაშვილს არ მოეწონა ჩემი აზრი კონკრეტულ საკითხთან დაკავშირებით და იმის ნაცვლად, ეთქვა, რომ გედევან ფოფხაძე არ არის მართალიო, ბრალი დამდო - კორუმპირებულია, მთელი ბორჯომი იყიდაო. ეს არის ადამიანი, რომლისთვისაც უფრო მარტივია, ამ ფორმით ვიღაცაზე თავდასხმით პოლიტიკური შედეგის მიღწევა. მას რომ მოსწონებოდა გერმანიის ელჩის გამოსვლა, იტყოდა, აი, ელჩი ჩვენს გვერდში დგასო. მაგრამ, რომ არ მოეწონა, უცებ აღმოჩნდა, რომ ვიღაცა ელჩს ფულს უხდის. ეს არ არის პოლიტიკური კულტურის მაჩვენებელი. მსგავსი რამ საერთოდ არ უნდა იყოს ყურადღების ღირსი. თუ არადა, უნდა დაასაბუთოს რაშია მტყუანი გერმანიის ელჩი. ეს ადამიანი ქართულ სახელმწიფოში წარმოადგენს გერმანულ სახელმწიფოს, თუ ჩვენ გვინდა გერმანიის სახელმწიფოსთან მეგობრობა და გვჭირდება...

დღეს, გაცილებით მნიშვნელოვანია გერმანიის სახელმწიფოსთან სწორი პოლიტიკური ურთიერთობა, მით უფრო ნატოსკენ მიმავალ გზაზე...

- ევროკავშირში გერმანია არ არის რიგითი სახელმწიფო. მას თავისი პოლიტიკური წონა აქვს ევროპაში და შენ თუ ასეთი დიფერენცირება გინდა, ეს მომწონს - ეს არ მომწონს, ეს ზიანს აყენებს სახელმწიფოს ინტერესებს. ამიტომ, მე მგონია, რომ ჩვენ დიპლომატების დიფერენცირებას და დახარისხებას თავი უნდა დავანებოთ. მით უმეტეს შეურაცხყოფაზე არ უნდა წავიდეთ. ამ ბოლო პერიოდში დიპლომატებმა ძალიან პოზიტიური როლი ითამაშეს იმისათვის, რომ შემდგარიყო პოლიტიკური შეთანხმება და კონსენსუსი. ამიტონ, არა მგონია სწორი იყოს მათი დიფერენცირება, მით უმეტეს, ის კარგია და ეს ცუდია, იმან ივანიშვილისგან ფული აიღო და ა.შ. დიპლომატების ასეთი დახარისხება არის აბსოლუტურად დაუშვებელი. ჩვენ ელჩებთან უნდა გვქონდეს მეგობრული ურთიერთობა, როგორც თავისი ქვეყნის წარმომადგენლებთან. როგორც იმ ქვეყნებს ვცემთ პატივს და გვაქვს მათთან მეგობრული პარტნიორული დამოკიდებულება, ასეთი დამოკიდებულება უნდა გვქონდეს იმ კონკრეტულ ელჩთან, რომელთანაც ურთიერთობა გვაქვს.

ამიტომ, მე მგონია, რომ ის პოლიტიკოსები, რომლებიც გადადიან შავ პიარზე და ამბობენ, რომ იმ კონკრეტული ელჩის პოზიცია არ უნდა გავიზიაროთ, იმიტომ, რომ მას ფული აქვს აღებული ბიძინა ივანიშვილისგან, ეს უკვე არის არასწორი პოლიტიკური კულტურა და არასწორი პოლიტიკური სტანდარტი, რომელიც არ უნდა მიიღოს საზოგადოებამ. ეს არის უპასუხისმგებლობა პოლიტიკაში და ამის გამო პოლიტიკოსები უნდა ისჯებოდნენ და ისჯებოდნენ სწორედ არჩევნებზე ხალხის მონაწილეობით. ჩვენ ხელი უნდა შევუწყოთ მათ ამაში.

ხელის შეწყობაში რას გულისხმობთ?

- ვგულისხმობ იმას, რასაც ახლა ვაკეთებ. იგივე ნათელაშვილისთვის გასაგები უნდა იყოს, როცა ასეთ რაღაცას იტყვის და მერე რაღაცაზე გაიხუმრებს, იმ ხუმრობამ ეს ბრალდება არ უნდა გადაფაროს. ეს არის უპასუხისმგებლობა და ამ უპასუხისმგებლობაზე თავისი პოლიტიკური ფასის გადახდა უნდა მოუწიოს. ყველა პოლიტიკოსმა უნდა გაიღოს პოლიტიკური ფასი იმ ცუდისთვის, რასაც ის აკეთებს - ქოცმაც, ნაცმაც, ლეიბორისტმა და მეც. არ აქვს მნიშვნელობა, ვინ ვართ. არასწორად ვიქცევი? არასწორ პოლიტიკურ სტანდარტს ვამკვიდრებ? ჩემს პარტიულ ინტერესს სახელმწიფოს და ხალხის ინტერესსზე ზემოთ ვაყენებ? ჩემს კერძო ინტერესს ხალხის ინტერესსზე წინ ვაყენებ? ავტომატურად, ამის გამო უნდა გადავიხადო მაღალი პოლიტიკური ფასი, რომ სხვებისთვისაც ჭკუის სასწავლებელი იყოს და მეც გამიჩნდეს პასუხისმგებლობის გრძნობა. სხვანაირად ჩვენ ვერ დავამკვიდრებთ იმ პოლიტიკურ სტანდარტს, რომელიც ქვეყანას ხელს შეუწყობს განვითარებაში.

სხვა შემთხვევაში ყოველთვის გვექნება პოლიტიკური ავანტურისტების სივრცე. ვიღაცა გამოხტება, რაღაცას სკანდალურს იტყვის, ყურადღებას მიიპყრობს, ყურადღების ცენტრში იქნება და ამით მოიგებს. კი არ წააგებს იმითი, რომ სისულელეებს აკეთებს და ავანტურაზე მიდის, არამედ თავისი ამ საჯაროობის ხარჯზე, პირიქით დაიწერს პოლიტიკურ ქულებს. ამას ცუდი პოლიტიკოსები იმიტომ აკეთებენ, რომ ყურადღების ცენტრში იყვნენ. მიმაჩნია, რომ ეს ყურადღების ცენტრი ძვირად უნდა დაუჯდეთ, ვინც არ უნდა იყოს ასეთი.

დილომატების ერთობლოვ განცხადებაში ხაზგასმული იყო, რომ ოპოზიცია ამ ლოგიკით არ უნდა საუბრობდეს. თქვენც წარმოადგენთ ოპოზიციურ ფრთას, მაგრამ არ იზიარებთ ნათელშვილის პოზიციას, რომელიც გაიმეორა „ევროპულმა საქართველომ“ და „ნაციონალურა მოძრაობამ“, ხომ არ გეგმავთ თქვენს კოლეგებთან ერთად დიპლომატებს მიაწოდოთ ინფორმცია, რომ ეს არაა საერთო ოპოზიციური პოზიცია?

- ჩვენ დიპლომატიურ კორპუსთან მიმართებაში გავაკეთეთ ძალიან მკვეთრი პოზიტიური განცხადება. ამაზე მეტ საჭიროებას ვერ ვხედავ. თუ არ ეთანხმები ვინმეს აზრს და მათ შორის დიპლომატის, პერსონალურად კი არ დაესხა თავს, არამედ შენ თვითონ უნდა დაასაბუთო, რა მიგაჩნია სწორად. არ არის აუცილებელი, რომ განსხვავებული აზრის მქონე ადამიანს, პიროვნული შეურაცხყოფა მიაყენო იმისათვის, რომ მისი აზრის ლოგიკა გააბათილო. აქედან გამომდინარე, ჩვენ ორმაგ სიმახინჯესთან გვაქვს საქმე. ჯერ ერთი, რომ თავს ესხმიან პერსონალს და მეორე - თავს ესხმიან დიპლომატს. ამ პოლიტიკური სტანდარტის წახალისება არასწორად მიმაჩნია.

სამწუხაროდ, ჩვენ მივეჩვიეთ ბრალდების წაყენებას მტკიცებულების გარეშე და უკვე აღარ ვსაზღვრავთ დიპლომატია, დეპუტატი, თუ რიგითი ადამიანი...

- ეს ძვირად უნდა დაუჯდეს ყველა იმ პოლიტიკოსს, რომელიც ამას აკეთებს. ჩვენ უნდა შევთანხმდეთ პრინციპზე - ან დამისაბუთე, ან პერსონალურად ნუ მეხები, შეეხე ჩემს შეხედულებას, ლოგიკას და გახადე ის სადავო, დაუმტკიცე საზოაგდოებას, რომ მე რაღაცაში არ ვარ მართალი. თუ შენ გადმოდიხარ პიროვნებაზე, ეს ნიშნავს, რომ არგუმენტები გამოგელია და შენ ხარ უბრალოდ ავანტურისტი. ამითი ზარალდება პოლიტიკური პროცესი, საღი აზრი ზარალდება. ხალხმა უნდა მიიღოს სწორი გადაწყვეტილება.

პოლიტიკოსები უნდა იყვნენ ერთგვარი ორიენტირები საზოგადოებისთვის. ეს არის მათი პოლიტიკური პროფესიონალური ვალდებულება.

თუ ვინმე დაამკვიდრებს ასეთ აზრს, რომ არ შეიძლება არსებობდეს განსხვავებული პოზიცია, უნდა იყოს ერთგვაროვანი, ან თუ დიპლომატი აფიქსირებს პოზიციას, აუცილებლად უნდა დააფიქსიროს ოპოზიციის სასარგებლო, თუ ასეთი სტანდარტი დავამკვიდრეთ, რა თქმა უნდა, ეს ხელს შეუწყობს ქვეყანაში პოლიტიკური განწყობების პოლარიზებას და ესკალაციას, ეს ცალსახაა.